Свиреше на кавалот а од очите се лееја солзи и како по јолук се цедеа по
кавалот паѓајќи и отварајќи дупчиња на песокот под нозе. Каква тема обработуваше со звукот ? Го слушав, и јас солзи ронев, а зошто и сам не знаев. Кога престана се доближа до мене, изваде марамче од џебот, ми ги избриша моите солзи а потоа и неговите. - Ајде сега внучко, кажи ми што разбра од мојата свирка ?! Зошто и ти изрони солзи ?! - Не знам дедо, ете.. овие звуци ме однесоа во моето ПОЖАРСКО, кога одам таму селските козарчиња свират со кавалчињата такви песни со истите овие тонови. - Така е внучко, овие звуци ја кажуваат нашата мака Македонска, која уште царува таму а и овде кај што сме. Таа е впиена и во нашите души и во нашите инструменти. Ако ти засвирев со ГАЈДА се плашам дека ќе ми се закочеа прстите а не знам дали ти ќе можеше да станеш од твоето камено столче. Нејзините звуци поболно ги гребат нашите души. Со звуците на ГАЈДАТА можеш да истераш и свадба, ама, ако чепнеш со мислите за нашите ЕГЕЈСКИ патешествија, од неа ќе излезат звуци што ќе го замрзнат твоето срце па и сечие, а поготово твоето кое ги преживеа истите маки. Сега внуче, земи ја тамбурата од татко ти и засвири нешто весело, оти таа не знае да раскажува тажна историја. Го прибра кавалот во обвивката и ми ја подаде тамбурата со едната рака а со другата ги добриша солзите. - Дедо !! Во мојава душа се уште се звуците што ги слушнав од твојот кавал, а види, и прстите не ми мрдаат, ајде да ја оставиме мојата свирка за друг пат ! Пак пророни солзи, ги процени моите емоции и ме погали по косата и пак ја остави тамбурата на своето место. Тој друг пат не дојде, неговиот кавал остана траен успомен, а јас никогаш не успеав да произведам такви звуци. Дедо ми, сигурно си ги зеде со себе во покој за ние внуците да останиме со мирни души кога ќе свириме.