Iglesia Filipina Independiente

Diyosesis ng Zambales
Lupon ng Liturhiya at Musika

Ang Liturhiya Para Sa

Linggo Ng Mga Palaspas
 2
Trial Use Of Holy Week Liturgies
Dala ang kanilang mga palaspas, ang mga tao ay magtitipon-tipon sa isang
lugar na may katamtamang layo mula sa bahay-sambahan, upang doon gawin
ang panimula ng liturhiya; ang pagbabasbas ng mga palaspas at ang prusisyon
patungo sa bahay-sambahan bilang paggunita sa matagumpay na pagpasok ng
Panginoong Hesukristo sa Herusalem.
Ihahanda ang isang mesa upang doon ilalapag ang mga palaspas. Ihahanda rin
ang mga bendita at insenso. Pagsapit sa takdang oras, nakatayo ang lahat sa
paligid ng mesa, at ang pari, na nakasuot ng pula, ay tatayo sa gitna. Bilang
pasimula, maaring umawit ang koro ng isang angkop na imno. Pagkatapos,
sasabihin ng pari ang sumusunod:

Pari: MGA GINIGILIW NA MGA MAGULANG AT KAPATID SA

PANGINOONG DIYOS: Sa loob ng limang linggo ng kuwaresma,
tayo ay naghahanda sa pamamagitan ng ating pagsisisi,
pananalangin at pagkakawang-gawa upang ipagdiwang ang
hiwaga ng Paskuwa ng ating Panginoon. Tayo ngayon ay
nagkakatipon-tipon upang ito’y taimtim nating pasimulan
bilang pakikiisa natin sa buong Simbahan.
Sa araw na ito, ang ating mapagpalang Panginoon ay buong
tagumpay na pumasok sa lunsod ng Herusalem bilang Mesiyas:
para magdusa, mamatay at muling mabuhay mula sa mga
patay.
Halina’t ating ipagdiwang ng may kagalakan at pamamanata
ang isang linggo ng Paskuwa, at ang pagpasok ng Panginoon sa
Herusalem, tayo na at sumunod sa Panginoon ng may matibay
na pananampalataya. Atin Siyang ipahayag bilang ating
Tagapagligtas at Hari, upang tayo ma’y mapasama sa Kaniyang
buhay at kamatayan sa krus. Nang sa gayo’y makibahagi rin
tayo sa Kaniyang maluwalhating pagkabuhay.
Lahat: Osana sa Anak ni David, mapalad siya na dumarating sa
pangalan ng Panginoon, O Hari ng Israel: Osana sa kaitaasan.
Pari: Ang Panginoon ay sumainyo.
Lahat: At sumainyo rin.
Pari: Tayo’y manalangin: O Panginoong Diyos ng aming kaligtasan,
ipagkaloob Mo sa amin ang Iyong biyaya upang buong puso
naming gunitain ang Iyong mga mapagpalang gawain na
3
Trial Use Of Holy Week Liturgies
 nagdulot sa amin ng buhay na walang hanggan; alang-alang
kay Hesukristong aming Panginoon.
Bayan: Amen.
Ang Pagbasa Ng Ebanghelyo
Sa bahaging ito, babasahin ng pari o diyakono o di kaya ng isang ‘lay reader’
ang ebanghelyo sa pagpasok ni Hesukristo sa templo ng Herusalem. Taon A:
Mateo 21:1-11; Taon B: Marcos: 11:1-11a; Taon K: Lukas 19: 29-40. Pagkatapos,
sasabihin ng pari ang pagbabasbas ng mga palaspas.

Ang Pagbabasbas Ng Palaspas

Pari: Ang Panginoon ay sumainyo.
Lahat: At sumainyo rin.
Pari: Magpasalamat tayo sa Panginoon nating Diyos.
Lahat: Nararapat na siya’y purihin at pasalamatan.
Pari: Nararapat na purihin Ka, O Makapangyarihang Diyos, sapagkat
sa Iyong pag-ibig kami ay tinubos sa pamamagitan ng Iyong
Anak na si Hesukristo na aming Panginoon, na sa araw na ito
ay matagumpay Siyang pumasok sa banal na lungsod ng
Herusalem, at ipinagbunying Hari ng mga hari ng mga taong
naglatag ng kanilang mga damit at mga sanga ng palaspas sa
kanyang dinaraanan. Tulutan Mo, Panginoon, na ang mga
palaspas na ito, sa amin ay maging tanda ng Kaniyang
tagumpay, at ipagkaloob Mo na kaming mga tumatangan ng
mga palaspas sa Kaniyang Pangalan, ay ipagbunyi rin Siyang
aming Hari, at sundin ang Kaniyang landas tungo sa buhay na
walang hanggan. Siya na nabubuhay at naghaharing kasama
Mo at ng Espiritu Santo, iisang Diyos, ngayon at
magpasawalang hanggan. Amen.
Ang mga palaspas ay wiwisikan at iinsensuhan at ipamamahagi sa lahat.
Pagkatapos, bibigkasin ng koro at ng bayan ang sumusunod:

Koro: Ang mga batang Hebreo ay naglatag sa daan ng kanilang mga

kasuotan, at sumisigaw at nagsasabing: Osana sa Anak ni
David; purihin ang dumarating sa Ngalan ng Panginoon!

4
Trial Use Of Holy Week Liturgies
Lahat: Ipalakpak ninyo ang mga kamay, kayong lahat na bayan ng
Diyos. Sa Diyos ay magsihiyaw kayo ng tinig ng kagalakan. Ang
Panginoon ay nasa kaitaasan, at siya’y karapatdapat na
katakutan sapagkat siya’y dakilang Hari ng sandaigdigan.
Koro: Ang mga batang Hebreo na may tangan na mga sanga ng olibo
ay lumabas upang kanilang salubungin ang Panginoon; sila’y
sumisigaw at nagsasabing: Osana sa kaitaasan!
Lahat: Kanyang ipinasuko sa atin ang mga bayan, at ang mga bansa
ay kanyang ipinagapi sa ilalim ng ating mga paa, ipinili niya
tayo ng ating pamana; mana na ikinarangal ni Jacob na
kanyang minamahal.
Koro: Ang mga batang Hebreo na may tangan na mga sanga ng olibo
ay lumabas upang kanilang salubungin ang Panginoon; sila’y
sumisigaw at nagsasabi; Osana sa kaitaasan!
Lahat: Pumailanlang ang Diyos na may hiyawan; ang Panginoon ay
sumahimpapawid na kasabay ng tunog ng palakpak. Magsi-
awit kayo ng mga papuri sa Diyos, idalit ninyo ang kanyang
karangalan. Sa ating Hari, kayo ay magsi-awit ng papuri.
Koro: Ang mga batang Hebreo namay tangan na mga sanga ng olibo
ay lumabas upang kanilang salubungin ang Panginoon; sila’y
sumisigaw at nagsasabi: Osana sa kaitaasan!
Lahat: Ang Panginoong Diyos ay Hari ng buong sansinukob; kayo’y
umawit umawit sa pamamagitan ng mga salmo. Naghahari ang
Diyos sa mga bansa; naupo ang Diyos sa kanyang banal na
luklukan.
Koro: Ang mga batang Hebreo na may tangan na mga sanga ng olibo
ay lumabas upang kanilang salubungin ang Panginoon; sila’y
sumisigaw at nagsasabi: Osana sa kaitaasan!
Lahat: Ang mga prinsipe ng mga bayan ay nangagkatipon bilang bayan
ng Diyos ni Abraham. Siya ay Diyos na lubhang dakila;
kanyang alipin ang lahat ng mga prinsipe sa buong kalupaan.
Koro: Ang mga batang Hebreo na may tangan na mga sanga ng olibo
ay lumabas upang kanilang salubungin ang Panginoon; sila’y
sumisigaw at nagsasabi: Osana sa kaitaasan!
5
Trial Use Of Holy Week Liturgies
Lahat: Luwalhati sa Ama, at sa Anak at sa Espiritu Santo. Katulad
noong una, ngayon at magpakailanman, at magpasawalang
hanggan.
Koro: Ang mga batang Hebreo na may tangan na mga sanga ng olibo
ay lumabas upang kanilang salubungin ang Panginoon; sila’y
sumisigaw at nagsasabi: Osana sa kaitaasan!
Sa ibang mga Parokya at Diyosesis ay mayroong mga bata na gumaganap
bilang mga batang Hebreo o di naman kaya ay mga anghel at may mga parte na
kakanta ang mga bata. Dito maaaring gawin ang mga nabanggit.

Ang Prusisyon
Bilang paghahanda sa prusisyon, ilalagay ng pari ang kanyang kamanyang sa
lalagyan.

Pari: Humayo tayo sa Kapayapaan

Bayan: Sa Ngalan ni Kristo. Amen.
Itataas ng lahat ang kani-kanilang palaspas, at sabay na sasabihin:

Lahat: OSANA SA KAITAASAN! MAPALAD ANG DUMARATING SA

NGALAN NG PANGINOON! OSANA SA KAITAASAN!
Aayusin kaagad ang hanay para sa prusisyon. Mauuna ang mga seryales at
mga bata. Habang naglalakad patungo sa bahay-sambahan, maaring may mga
bata na magsasabog ng mga bulaklak at, patutunugin ang kampana kapag
papalapit na ang prusisyon sa bahay-sambahan. Hawak-hawak ng mga tao ang
kanilang mga palaspas, at awit ng mga imno.
Pagdating ng prusisyon sa bahay-sambahan, haharap ang pari sa madla
habang nakasara ang pinto nito, sasabihin niya ang sumusunod:

Pari: Mabuhay ang kaharian ng Anak ni David ang manunubos ng

daigdig. Ipinangako ng mga banal na propeta noong unang
panahon upang maging tagapagligtas sa sambahayang Israel.
Osana sa Anak ni David. Mapalad ang dumarating sa pangalan
ng Panginoon. Osana sa kaitaasan!
Lahat: Magdiwang ang lahat ng mga nilikha, pumapalakpak kayong
may awit at tuwa; bilang pagpupuri sa Diyos na Dakila. Ang
Diyos na si Yahweh, kataas-taasan; ay dakilang Haring dapat
katakutan; siya’y maghahari sa sangkatauhan.
6
Trial Use Of Holy Week Liturgies
 Tayo’y pinagwagi sa lahat ng tao, sa lahat ng bansa’y mamahala
tayo; siya ang pumili ng ating tahanan. Ang lupang minana ng
mga hinirang. Umakyat sa trono ng Panginoong Diyos, hatid ng
trumpetang malakas ang tunog. Masayang sigawan ang
ipinansuob.
Purihin ang Diyos, siya ay awitan; awitan ang hari, siya’y
papurihan. Ang Diyos siyang Hari ng lahat ng bansa, magmula
sa tronong banal at dakila.
Sa mga hinirang ng Diyos ni Abraham, sasama ang madlang
mga pamunuan; ng lahat ng bansa sa sandaigdigan, ang mga
sandata ng lahat ng kawal, lahat ay sa Diyos, na hari ng
tahanan.
Maaring awitin ang “All Glory”. Aawitin ang tugunan ng koro na nasa loob at
mga bata o bayan na nasa labas.
Sa ibang mga Parokya at Diyosesis ay mayroong mga mga ibang awit na
ginagamit dito, maaaring ito ay Ilocano o Tagalog. Sa bahaging ito maaaring
gawin ang mga nabanggit.

Ang Pagpasok
Kukunin ng pari ang krus na seryales at itutuktok niya ito ng makatlo sa pinto.
Bubuksan ang pinto ng mga nasa loob. Bago pumasok ang lahat, gagawin muna
ang panalangin:

Pari: Ang Panginoon ay sumainyo.

Lahat: At sumainyo rin.
Pari: Tayo ay manalangin: makapangyarihang Diyos, ang iyong
pinakamamahal na Anak ay nagpakasakit at namatay para sa
amin: Ipagkaloob mo sa aming paggunita ngayon ng kanyang
kaligtasan, amin nawang matagpuan ang tanging daan ng
buhay at kapayapaan; sa pamamagitan ni Hesukristo na aming
Panginoon.
Lahat: Amen.
Papasok ang mga tao, at sabay-sabay na babasahin ang Awit 118.

Lahat: Ang mga pintuan ng Banal na templo ay inyo ngayong buksan,

ako ay papasok, at itong si Yahweh ay papupurihan. Ito yaong
7
Trial Use Of Holy Week Liturgies
 pintong pasukan ni Yahweh, ang Panginoong Diyos; tanging
ang matuwid ang pababayaang doon ay makapasok. Aking
pinupuri ikaw, O Yahweh, yamang pinakinggan, dininig mo
ako’t pinapagtagumpayan. Ang batong natakwil ng
nangagtatayo ng tirahang-bahay, sa lahat ng bato ay higit
mahusay. Ang lahat ng ito ang nagpamalas ay ang Diyos na si
Yahweh, kung iyong mamasdan ay kawili-wili.O kahanga-hanga
ang araw na itong ang Diyos ang nagbigay, tayo ay magalak,
ating ipinagdiwang. Kami ay iligtas, tubusin mo, Yahweh, kami
ay iligtas, at pagtagumpayin sa layuni’t hangad. Ang pumarito
sa ngalan ni Yahweh ay pagpapalain; magmula sa templo, mga
pagpapala’y kanyang tatanggapin. Si Yahweh ang Diyos,
pagkabuti niya sa mga hinirang. Tayo ay magtaglay ng sanga
ng kahoy, simulang magdiwang at tayo’y lumapit sa
dambanang banal. Ikaw ay aking Diyos, kaya naman ako’y
nagpapasalamat; ang pagkadakila mo ay ihahayag. O
pasalamatan ang Diyos na si Yahweh, pagkat siya’y mabuti ang
kanyang pag-ibig ay napakatatag at mananatili
magpakailanman.
Ang mga tao ay tutungo sa kani-kaniyang mga upuan. Ang pari ay tutungo sa
kanyang upuan sa may dako ng altar simulan ang pagdiriwang ng Banal na
Misa, sa may bahagi ng panalangin para sa araw na ipinagdiriwang.

Ang Panalangin Ng Araw

Pari: Ang Panginoon ay sumainyo.
Lahat: At sumainyo rin.
Pari: Tayo ay manalangin: makapangyarihan at walang hanggang
Diyos, sa Iyong dakilang pag-ibig sa sangkatauhan ay ipinadala
Mo ang Iyong Anak na si Hesukristo upang taglayin ang aming
katauhan, at danasin ang kamatayan sa krus, upang para sa
amin ay maging huwaran ng Kaniyang pagpakumbaba.
Ipagkaloob Mo na kami nawa ay sumunod din sa Kaniyang
pagpapakahirap at makibahagi sa Kaniyang muling
pagkabuhay; sa pamamagitan ni Hesukristo na aming
Panginoon, Siya na nabubuhay at naghaharing kasama Mo at
ng Banal na Espiritu bilang iisang Diyos, magpasawalang
hanggan.
8
Trial Use Of Holy Week Liturgies
Lahat: Amen.
Uupo ang lahat at taimtim na pakikinggan ang mga banal na pagbasa

Pagbasa Mula Sa Lumang Tipan

(Isaias 45:21-25 O 52:13-53:12)
Matapos ang unang pagbasa ay sasambitin ng tagabasa ang mga sumusunod:

Tagabasa: O Diyos ko: O Diyos ko: Bakit ako pinabayaan? Masidhi ang
pagtaghoy ko upang ako ay tulungan, ngunit hindi dumarating
ang saklolong hinihintay. Araw-gabi’y dumaraing, tumatawag
ako, O Diyos, hindi ako mapanatag, di ka pa rin sumasagot.
Ikaw yaong pinatungan tanging banal, walang iba, dinakila ng
Israel, pinupuri sa tuwina.
Sa iyo ang lahi nami’y nagtitiwala at umasa, nagtiwala silang
lubos; iniligtas mo nga sila. Noong sila ay tumawag, ang
panganib ay nawala, lubos silang nagtiwala at di naman
napahiya.
Tila ako’y isang uod at hindi na isang tao, kung makita’y
inuuyam, nagtatwa kahit sino. Bawa’t taong makakita’y
umiiling nanunukso, pabalik na nagtataka’t sinasabi ang
ganito: “Nagtitiwala siya sa Diyos, ang patnubay”. Magmula sa
pagkabata, ako’y iyong iningatan. Kaya naman mula noon, sa
Iyo na umaasa, sapul noon ikaw na lang ang Diyos na
kinikilala.Huwag mo akong lilisanin, huwag mo akong
tatalikdan, pagka’t walang sasaklolo sa panganib na daratal.
Pagbasa Mula Sa Bagong Tipan
(Filipos 2:5-11)
Pagkatapos ng pagbasa ay isang angkop na imno ang aawitin. Tatayo ang lahat
upang magbigay galang sa Pasyon ng Panginoong Hesukristo.

Ang Pagbasa Ng Pasyon

Ang Pasyon ay maaring basahin o awitin ng mga layko. Maaring ipapaganap sa
kanila ang iba’t ibang tauhan ng nasasabing Pasyon. Mananatiling nakaupo ang
mga tao hanggang sa bahagi ng Pasyon na kung saan binabanggit ang
pagdating ni Hesus sa may kalbaryo. Sa bahaging ito, tatayo ang mga tao
habang patuloy na binabasa ang Pasyon.

9
Trial Use Of Holy Week Liturgies
Ang Pagbasa ng pasyon ay sisimulan sa pagbigkas ng ganitong pambungad:”
Ang Pasyon Ng Ating Panginoong Hesukristo Ayon Kay.” Taon A: Mateo
26:36-27:54 (55-66); Taon B: Marcos 14:32-15:39 (40-47) o 15:1-39 (40-47); Taon
K: Lukas 22:39-23:49 (50-56) o 23:1-49 (50-56).
Sa araw na ito ay walang Sermon at hindi rin bibigkasin ang Kredo.
Magpatuloy ang Misa sa bahagi ng Kapayapaan. Ang Punong Tagapagdiwang
ay haharap sa bayan at sasabihin niya:

Pari: Mga kapatid, tayo ang Katawan ni Kristo: sa pamamagitan ng

isang Espiritu tayong lahat ay pinag-isang katawan ng tayo’y
binyagan.
Lahat: Panatilihin natin ang pagkakaisa na dulot ng Espiritu sa bigkis
ng kapayapaan.
Pari: Lagi nawang sumainyo ang kapayapaan ng Panginoon.
Lahat: At sumainyo rin.
Ang lahat ay magbibigayan sa isa’t isa ng bati ng kapayapaan.

Ang Pag-aalay
Pari: Mag-aalay tayo ng hain ng pasasalamat at tatawag sa Pangalan
ng Panginoon. Aawit tayo at magsasalita ng papuri sa
Panginoon.
Ang mga handog ng bayan ay lilikumin. Ang Banal na Hapag, ang Tinapay at
ang Alak ay ihahanda. Samantala, ang bayan ay nakaupo. Kung handa na ang
lahat ay tatayo ang lahat. Dadalhin sa Altar ng mga kinatawan ng bayan ang
mga handog na salapi at iba pang mga alay, pati na ang Tinapay at ang Alak,
na tatanggapin ng Punong Tagapagdiwang at iaabot ang mga ito sa Diyakono,
katuwang na ministro o ibang tagapaglingkod na siya namang maglalagay ng
mga ito sa ibabaw ng Banal na Hapag.
Matapos na maibigay ng mga nagsipaghandog ang mga alay, tinapay at alak ay
babasbasan ng Punong Tagapagdiwang ang mga naghandog gamit ang isa sa
sumusunod na panalangin:

Pari: Nawa ay patuloy kayong pagpalain at biyayaan ng Panginoong

Diyos sa inyong Paghahandog sa kanya at sa kanyang
Dambana; sa Pangalan ng Ama, ng Anak at ng Espiritu Santo
Amen.
(o)
10
Trial Use Of Holy Week Liturgies
Pari: Pagpalain, pangalagaan at patuloy kayong biyayaan ng Diyos
Ama, Diyos Anak at Diyos Espiritu Santo.
Siya nawa.
Pagkatapos na babasbasan ang mga nag-alay sila ay babalik ng muli sa
kanilang mga upuan.
Ang Panalangin sa mga Handog na alay, Tinapay at Alak.
Dapat tandaan na naka “Orans Posture” ang Punong Tagapagdiwang habang
binabanggit ang kaniyang bahagi sa panalangin

Pari: Walang hanggang Diyos, idinudulog namin sa Iyo ang mga

handog na alay, tinapay at alak. Marapatin Mong tanggapin ang
mga ito bilang tanda ng pag-aalay ng aming sarili sa Iyo.
Lahat: Nawa’y sa pamamagitan nito, matanggap namin ang lahat ng
Iyong kaawaan, mabuklod kami sa bigkis ng pag-iibigan at
mapaging-bago kami sa Paglilingkod sa Iyo, sa bisa ng
Sakramento ng katawan at dugo ng Iyong Anak na si
Hesukristo. Amen.
Sa bahaging ito ay magsusuob ng insenso (kung mayroon). Aawit ang koro para
sa pagsusuob ng insenso. Manatiling nakatayo ang mga tao.
Sasambitin ng Punong Tagapaghandog ang panalangin sa paglalagay ng
insenso sa insensaryo:

Pari: Ang aking dalangin sana’y tanggapin Mo, mahalimuyak na

samyong handog na insenso; ariing pang-gabing handog ko sa
Iyo. (Awit 141: 2)
Matapos makapag-insenso, ang Punong Tagapagdiwang ay maghuhugas ng
kamay habang binabanggit ang mga sumusunod na panalangin.

Pari: Linisin mo ako ng esopo at ako’y magiging busilak, hugasan mo

ako at ako ay magiging dalisay tulad ng niyebe. (Awit 51: 7)
Matapos na makapag-suob ng insenso ang Punong Tagapagdiwang,
makapaghugas ng mga kamay at masuoban ng insenso ang lahat, uupo ang
lahat upang ipanalangin ng Punong Tagapagdiwang ang mga pamisa ng mga
nanambahan.
Matapos ang panalangin sa mga pamisa ay tatayo ang lahat.

Ang Dakilang Pasasalamat

11
Trial Use Of Holy Week Liturgies
Mananatiling nakatayo ang lahat sa kabuuan ng Pasasalamat. Kung ang Banal
na Misa ay hindi Misa Kantada, maaring kaligtaan ang Dakilang Pasasalamat.

Dapat tandaan na naka “Orans Posture” ang Punong Tagapagdiwang habang

inaawit ang kaniyang parte sa Dakilang Pasasalamat.

Pari: Ang kagandahang loob ng Panginoon ay mananatiling walang

hanggan sa mga may takot sa Kanya, at ang Kanyang
pagkamatuwid sa sali't-saling lahi;
Bayan: Maging sa mga sumusunod sa Kanyang tipan, at nakaala-alang
sumunod sa Kanyang kautusan.
Pari: Itinatag ng Panginoon ang Kanyang luklukan sa langit; at ang
Kanyang paghahari ay sumasaklaw sa lahat.
Bayan: Purihin ninyo ang Panginoon, kayong lahat Niyang mga anghel;
kayong may lakas at kapangyarihan na tumatalima sa Kanyang
Salita.
Pari: Purihin ninyo ang Panginoon, kayong lahat Niyang mga hukbo.
Kayong mga lingkod Niya na sumusunod sa Kanyang kalooban.
Bayan: Purihin ninyo ang Panginoon, kayong lahat Niyang mga gawa
sa lahat ng dako na Kanyang nasasaklawan, purihin ang
Panginoon!
Sursum Corda
Pari: Ang Panginoon ay sumainyo.
Bayan: At sumainyo rin.
Pari: Itaas ang inyong mga puso.
Bayan: Itinataas namin sa Panginoon.
Pari: Magpasalamat tayo sa ating Panginoong Diyos.
Bayan: Nararapat na Siya’y ating pasalamatan at purihin.
Dapat tandaan na naka “Orans Posture” ang Punong Tagapagdiwang sa
kabuuan ng Prepasyo

12
Trial Use Of Holy Week Liturgies
Pari: Tunay na marapat, aming tungkulin at kaligayahan, lagi at
saan man na magpasalamat sa Iyo, O Panginoon, Banal na
Ama, makapangyarihan at walang hanggang Diyos.
Itinakda Mo na ang kaligtasan ng sangkatauhan ay maganap sa
pamamagitan ng krus na kahoy: Ang punong kahoy ng
pagkalupig ng tao ay naging punong kahoy ng Kaniyang
tagumpay. Kung saan natapos ang Kaniyang buhay, doon din
ito masasauli, sa pamamagitan ni Hesukristo na aming
Panginoon.
Kaya nga, kasama ang mga anghel at mga arkanghel, at lahat
ng kalipunan ng langit, buong kagalakan naming ipinapahayag
ang inyong kaluwalhatian, laging nagpupuri sa iyo at
nagsasabi:
Sanctus
Dapat tandaan na dadagok sa dibdib ang Punong Tagapagdiwang sa pagsambit
ng mga salitang Banal, Banal, Banal at mag-aantanda ng Krus sa bahagi ng +
Pinagpala...

Lahat: Banal, banal, banal na Panginoon, Diyos ng kapangyarihan at

lakas, ang langit at lupa’y puspos ng Iyong kaluwalhatian,
Osana sa kaitaasan. + Pinagpala ang dumarating sa Pangalan
ng Panginoon. Osana sa kaitaasan.
Magpapatuloy ang Punong Tagapagdiwang, habang nananatiling nakatayo ang
lahat.

Dapat tandaan na naka “Orans Posture” ang Punong Tagapagdiwang sa

kabuuan ng panalangin.

Pari: Banal at butihing Ama, sa Iyong walang hanggang pag-ibig ay

nilalang Mo kami para sa Iyong sarili; nang kami’y nagkasala at
napaalipin sa kasamaan at kamatayan, sa awa Mo’y isinugo Mo
si Hesukristo, na Iyong bugtong at walang hanggang Anak,
upang maging tao na tulad namin, upang mamuhay at
mamatay bilang isa sa amin, at muling ipagkasundo kami sa
Iyo, ang Diyos at Ama ng lahat. Siya’y ipinako sa krus, at nag-
alay ng Kaniyang sarili, na isang ganap na hain para sa
sangkatauhan bilang pagsunod sa Iyong kalooban.

13
Trial Use Of Holy Week Liturgies
Luluhod ang lahat. Sa mga sumusunod na salita hinggil sa Tinapay at Alak,
ipapatong ng Punong Tagapagdiwang ang kaniyang mga kamay sa ibabaw ng
Tinapay at Kalis o kaya’y hahawakan at bahagyang itataas niya ito.

Dapat tandaan na ibababa na ang “Orans Posture” ng Punong

Tagapagdiwang sa bahaging ito ng Anamnesis.

Anamnesis
Nang gabing siya’y ipagkanulo upang magdusa at mamatay, ang aming
Panginoon ay kumuha ng tinapay, at nang siya’y makapagpasalamat sa
iyo, kanyang piniraso ito, at ibinigay sa kanyang mga alagad at sinabi:
“KUNIN AT KANIN ITO: ITO ANG AKING KATAWAN NA
IPINAGKAKALOOB KO SA INYO. GAWIN NINYO ITO SA PAGALAALA SA
AKIN.”
Matapos ang hapunan ay kinuha niya ang kalis, at nang siya’y
makapagpasalamat ay ibinigay ito sa kanila, at sinabi:
“INUMIN NINYO ITO, KAYONG LAHAT: ITO ANG AKING DUGO NG
BAGONG TIPAN, NA IBINUBUHOS PARA SA INYO AT PARA SA MARAMI
SA IKAPAGPAPATAWAD NG MGA KASALANAN. SA TUWING IINUMIN
NINYO ITO AY GAWIN SA PAGALAALA SA AKIN.”
Pagkatapos magbigay galang ng Punong Tagapagdiwang sa tinapay at alak ay
magsisitayo ang lahat at sasabihin ng Punong Tagapagdiwang ang mga
sumusunod:

Pari: Buong galak nating, ipahayag ang buod ng ating

pananampalataya.
Lahat: SI KRISTO AY NAMATAY!
SI KRISTO AY MULING NABUHAY!
SI KRISTO AY MULING DARATING!
Magpapatuloy ang Punong Tagapagdiwang. Dapat tandaan na naka “Orans
Posture” ang Punong Tagapagdiwang sa kabuuan ng panalangin

Pari: Aming ginaganap ang pag-alaala sa pagkaligtas sa amin, O

Ama, sa haing ito ng papuri at pasasalamat, at iniaalay namin
sa Iyo ang mga handog na ito.
14
Trial Use Of Holy Week Liturgies
Ipapatong ang kamay ng Punong Tagapagdiwang sa mga Alak at Tinapay upang
pabanalin ang mga ito at kukrusan ang mga ito sa bahaging may nakalagay
na

Pari: Pakabanalin Mo ang mga ito sa pamamagitan ng Iyong Espiritu

Santo upang para sa Iyong bayan ay maging Katawan at
Dugo ng Iyong Anak, na siyang banal na pagkain at
inumin ng bago at walang katapusang buhay sa kanya.
Mag-aantanda ng Krus ang Punong Tagapagdiwang sa bahagi na may +

Pari: Pakabanalin Mo rin kami + upang tanggapin nawa namin nang

may pananampalataya ang banal na Sakramento ito, at
mapaglingkuran Ka nang may pagkakaisa, katatagan at
kapayapaan: at sa huling araw ay dalhin Mo kami kasama ng
lahat ng Iyong banal sa kaligayahan ng walang hanggang
kaharian.
Luluhod ang lahat

Pari: Ang lahat ng karangalan at kaluwalhatian ay sa Iyo, O Amang

makapangyarihan, ngayon at magpakailanman.
Itataas ng Punong Tagapagdiwang ang Tinapay at Kalis at sasagot o aawitin ng
Bayan nang malakas:

Lahat: AMEN!
Kung naibaba na ng Punong Tagapagdiwang ang Katawan at Dugo ng ating
Panginoong Hesukristo at matapos magbigay galang ay aawitin o sasambitin ng
lahat ang Ama Namin. Mananatiling nakaluhod ang lahat.

Pater Noster
Pari: Tulad ng itinuro sa atin ng ating Tagapagligtas na si
Hesukristo, tayo’y manalangin:
Lahat: Ama namin sa langit, sambahin ang Ngalan mo, sumapit nawa
ang kaharian mo, sundin ang loob mo, dito sa lupa gaya ng sa
langit, Bigyan mo kami ngayon ng aming kakanin sa araw-
araw. Patawarin mo kami sa aming mga kasalanan gaya rin ng
pagpapatawad namin sa mga nagkakasala sa amin. Huwag mo
kaming itulot sa mga pagsubok kundi iadya mo kami sa

15
Trial Use Of Holy Week Liturgies
 masama. Sapagkat sa iyo ang kaharian, ang kapangyarihan at
ang kaluwalhatian, ngayon at magpakailanman. Amen.
Mananatiling nakaluhod ang lahat.

Ang Pagpiraso ng Tinapay

Sasabihin ng Punong Tagapagdiwang ang sumusunod habang pinagpipira-
piraso ang Banal na Tinapay.

Pari: Panginoon, isinasamo namin sa Iyo na iligtas kami sa lahat ng

masama, at ipagkaloob sa amin ang Iyong kapayapaan sa
panahon namin. Sa tulong ng Iyong awa, ilayo kami sa
pagkakasala at iligtas sa ligalig. Sa pamamagitan ng Iyong Anak
na si Hesukristong aming Panginoon, na nabubuhay at
naghaharing kasama Mo at ng Espiritu Santo, iisang Diyos,
ngayon at magpakailanman.
Lahat: AMEN.
Agnus Dei
Aaawitin o sasabihin ng Bayan:

Pari: Kordero ng Diyos, ikaw ang nag-aalis ng kasalanan ng

sanlibutan;
Lahat: Maawa Ka sa amin.
Pari: Kordero ng Diyos, ikaw ang nag-aalis ng kasalanan ng
sanlibutan;
Lahat: Maawa Ka sa amin.
Pari: Kordero ng Diyos, ikaw ang nag-aalis ng kasalanan ng
sanlibutan;
Lahat: Ipagkaloob mo sa amin ang iyong kapayapaan.
Saglit na tumahimik.

Ang Panalangin Ng Pagpapakumbaba

Pari: Dumudulog kami sa Iyong hapag, maawaing Panginoon, na
hindi nagtitiwala sa sarili naming pagkamatuwid, kundi sa Iyong
marami’t dakilang awa.
16
Trial Use Of Holy Week Liturgies
Lahat: Hindi kami karapat-dapat na mamulot ng mga mumo sa ilalim
ng Iyong hapag. Subalit likas sa Iyo ang pagkamaawain.
Ipagkaloob Mo sa amin, kung gayon, butihing Panginoon, na
aming tanggapin ang Katawan ng Iyong mahal na Anak na si
Hesukristo, at inumin ang Kanyang dugo, upang kami na
pinalalakas at pinagiging bago ng Kanyang buhay, ay manahan
sa Kanya, at Siya’y sa amin, magpakailanman. AMEN.

Ang Komunyon
Habang itinataas ng Punong Tagapagdiwang ang Tinapay at Kalis ay sasabihin
sa lahat:

Pari: ANG MGA KALOOB NG DIYOS PARA SA BAYAN NG DIYOS.

Lahat: Panginoon, ako’y hindi karapat – dapat na tumanggap sa Iyo,
ngunit sa isang Salita Mo lamang ay gagaling na ako. (Mateo
8:8/Lukas 7:6C-7)
Magkukumunyon ang Punong Tagapagdiwang, susunod ang mga Ministro, at
ang Bayan, ibibigay ang Tinapay at Alak sa mga magkukumunyon. Habang
nagkukumunyon maaaring awitin ang isa o higit pang imno. Matapos
makapagkumunyon ang lahat, ang lahat ng nalalabing Tinapay at Alak (maliban
sa inilaan para sa pagpapakumunyon sa isang maysakit o malapit nang
mamatay) ay uubusin. Ang mga sisidlan ay huhugasan at lilinisin at ang Hapag
ay isasaayos.
Sa bahaging ito ay maaaring gawin ang mga paalala (announcements).

Ang Panalangin Pagkatapos Ng Komunyon

Tatayo ang mga tao, ang pari nama’y pupunta sa gitna, tatayo na nakaharap sa
mga tao.

Pari: Ang Panginoon ay sumainyo.

Bayan: At sumainyo rin.
Pari: Tayo’y manalangin. Makapangyarihan at walang hanggang
Diyos, pinasasalamatan Ka namin, sapagkat kami’y Iyong
pinakain ng pagkaing espirituwal: ang kamahal-mahalang
Katawan at Dugo ng aming Tagapagligtas na si Hesukristo.

17
Trial Use Of Holy Week Liturgies
Lahat: At sa mga Banal na misteryong ito ay tiniyak Mo na kami’y nga
buhay na bahagi ng katawan ng Iyong Anak, at mga
tagapagmana ng Kanyang walang hanggang kaharian. Ngayon
Ama, isugo Mo kami upang gawin namin ang tungkuling ini-
atas Mo sa amin, upang Ikaw ay ibigin at paglingkuran at ang
aming kapwa, bilang mga tapat na saksi ni Kristong aming
Panginoon: sa Kanya, sa Iyo, at sa Espiritu Santo, ang lahat ng
karangalan at kaluwalhatian, ngayon at magpakailanman.
AMEN.

Ang Pagpapala
Lahat ay luluhod. Ang mga sumusunod na Pagbabasbas ay sasabihin ng
Obispo. Maaaring sabihin ng Pari maliban sa mga bersikulong nauukol sa
Obispo.

Obispo: Pagpalain ang Pangalan ng Panginoon.

Lahat: Ngayon at magpakailanman.
Obispo: Ang ating tulong ay nasa Pangalan ng Panginoon
Lahat: Na lumikha ng langit at lupa.
Obispo/Pari:
Ang kapayapaan ng Diyos na di-malirip ng buong pang-unawa, matatag
na ingatan kayo sa kaalaman at pag-ibig sa Diyos, at sa Kanyang Anak
na si Hesukristo na ating Panginoon. At ang pagpapala ng
Makapangyarihang Diyos, ang Ama, ang Anak, at ang Espiritu Santo,
nawa’y sumainyo at laging manatili sa inyo ngayon at magpakailan man.
Lahat: AMEN
Mananatiling nakaluhod ang lahat para sa pagbabasbas. Makatapos ang
pagbabasbas ay tatayo ang lahat.

Pari: Ang Panginoon ay sumainyo.

Lahat: At sumainyo rin.
Pari: Ngayon di’y humayo kayo upang ibigin at paglingkuran ang
Panginoon.
Lahat: Salamat sa Diyos.
18
Trial Use Of Holy Week Liturgies
Ang Pambansang Awit ng Pilipinas ay aawitin. Matapos ang pag-awit ng
Pambansang Awit ng Pilipinas ay mananatili ang lahat sa simbahan para sa
paglabas ng mga ministro at habang inaawit ang pangwakas na awitin.

Iglesia Filipina Independiente

Diocese of Zambales
Committee on Liturgy & Music
Trial Use of the Holy Week Liturgies
Liturgy for Palm Sunday
The Rev. Fr. Rino Tristan R. Soliman, M.Div.
The Rev. Fr. Invensor C. Lastimado
The Rev. Deacon Reymel John F. Renaliza
Year 2018

The Right Rev. Emmanuel F. Sampayan, II

Diocesan Bishop of Zambales
19
Trial Use Of Holy Week Liturgies