PAGSULAT NG POSISYONG PAPEL
paksa.
Isa sa mga kasanayang dapat mahubog sa
kabataang Pilipino ay ang kakayahang manindigan sa
isang desisyong ginawa o pinanghahawakang
katotohanan o prinsipyo. Maisasagawa ito kung may
kakayahang mangatwiran sa desisyon o panig na napili
sa pamamagitan ng paglalatag ng matitibay na
ebidensiya o katibayan.
Ang Pangangatwiran ay isang uri ng diskursong
naglalayong mapatunayan ang katotohanan ng
ipinahahayag at pinaniniwalaan at ipatanggap sa
nakikinig o bumabasa ang katotohanang iyon.
Mahalagang ang taong nangangatwiran ay may
sapat na kaalaman tungkol sa paksang
pinangangatwiranan. Kailangang mabatay ang katwiran
sa katotohanan upang ito ay makahikayat at makaakit
nang hindi naman namimilit.
Ayon kay Jocson et al. (2005), sa kanilang aklat
na Pagbasa at Pagsulat Tungo sa Pananaliksik, ang
pangangatwiran ay tinatawag ding pakikipagtalo
argumentasyon na maaaring maiugnay sa sumusunod na
mga paliwanag.
 Ito ay isang sining ng paglalahad ng mga dahilan
upang makabuo ng isang patunay na tinatanggap
ng nakararami.
 Ito ay isang uri ng paglalahad na nagtatakwil sa
kamalian upang maipahayag ang katotohanan .
 Ito ay isang paraang ginagamit upang
mabigyang-katarungan ang mga opinyon at
maipahayag ang mga opinyong ito sa iba.
Ayon naman kay Grace Fleming, sumulat ng
artikulong “How to Write an Argumentative Essay”,
ang posisyong papel ay ang pagsalig o pagsuporta sa
katotohanan ng isang kontrobersiyal na isyu sa
pamamagitan ng pagbuo ng isang usapin para sa
iyong pananaw o posisyon.
Mga Hakbang sa Pagsulat ng Posisyong Papel
1. Pumili ng paksang malapit sa iyong puso
Makatutulong nang malaki kung ang paksang
tatalakayin ay malapit sa iyong puso at lubos na
nakaaantig ng iyong interes at maging ng
maraming makababasa nito.
2. Magsagawa ng panimulang pananaliksik
hinggil sa napiling paksa
Ang pagsasagawa ng panimulang pananaliksik
ay naglalayong malaman kung may sapat na
ebidensiyang makakalap hinggil sa nasabing
3. Bumuo ng thesis statement o pahayag ng tesis
Ayon kina Pamela C. Constantino at Galileo S.
Zafra (1997) sa kanilang aklat na Kasanayan sa
Komunikasyon II, ang pahayag ng tesis ay
naglalahad ng pangunahin o sentrong ideya na
iyong gagawin. Isa itong matibay na pahayag na
naglalahad ng pinapanigang posisyon o pananaw
ng mananaliksik tungkol sa paksa na handa
niyang patunayan sa pamamagitan ng
pangangalap ng mga datos o ebidensiya.
Kadalasan ito ay maikli lamang na binubuo ng
isa o dalawang pangungusap. Sa pamamagitan
ng pahayag ng tesis ay malalaman ng mga
mambabasa kung tungkol saan ang posisyong
papel.
4. Subukin ang katibayan o kalakasan ng iyong
pahayag ng tesis o posisyon.
Ito ay napakahalagang bahagi sa pagsulat ng
posisyong papel. Kailangang mabatid ang mga
posibleng hamong maaaring harapin sa
gagawing pagdepensa sa iyong napiling tesis o
posisyong hinggil sa isyu. Ilatag din ang mga
kahinaan ng pinasusubaliang posisyon sa
pamamagitan ng pag-iisa-isa sa mga
argumentong maaaaring iharap dito upang
mapagtibay ang kahinaan at kakulangan nito.
5. Magpatuloy sa pangangalap ng mga
kakailanganing ebidensiya
Kapag ganap nang napatunayan ang napiling
posisyon ay may matibay at malakas na laban sa
pinasusubaliang posisyon ay maaari nang
magsagawa nang mas malalim na pananaliksik.
Ayon kay Constantino at Zafra (1997), nauuri sa
dalawa ang mga ebidensiyang magagamit sa
pangangatwiran:
a. Mga Katunayan (facts)—ito ay tumutukoy sa
mga ideyang tinatanggap na totoo dahil ang mga
katibayan nito ay nakabatay sa nakita, narinig,
naamoy, nalasahan, at nadama. Hindi
kinakailangang ang mananaliksik mismo ang
nakaranas o nakakita ng pangyayari para
magamit itong katibayan, maaari ring ito ay
nasaksihan o naranasan ng ibang tao.
b. Mga Opinyon—ito naman ay tumutukoy sa
pananaw ng mga tao, mga ideyang nakasalig
hindi sa katunayan kundi sa ipinapalagay
 lamang na totoo. Hindi ito katunayan kundi
pagsusuri o judgment ng katunayan. Kung
gagamiting ebidensya ang opinyon sa iyong
sulating papel, kailangang manggaling ito sa
taong may awtoridad na magsalita hinggil sa
isang isyu o paksa.
6. Buoin ang balangkas ng posisyong papel
Bumuo ng balangkas ng posisyong papel:
I. Panimula
a. Ilahad ang paksa.
b. Magbigay ng maikling paunang paliwanag
tungkol sa paksa at kung bakit mahalaga
itong pag-usapan.
c. Ipakilala ang tesis ng posisyong papel o ang
iyong stand o posisyon tungkol sa isyu.
Sa pagsulat ng panimula, mahalagang
maunawaan na ito ay may dalawang layunin. Una, upang
ipakilala ang paksa at ang tesis at pangalawa, upang
maantig ang interes ng mga babasa nito.
Halimbawa:
a. Isa sa napapanahong isyung pinag-uusapan
sa lipunan ngayon ay ang Enhanced Basic
Education Act of 2013 o Republic Act No.
10533.
b. Bawat pamilya at mag-aaral na Pilipino sa
kasalukuyan ay labis na naaapektuhan ng
programang ito. Puspusan ang
isinasagawang paghahanda at pagsasanay ng
pamahalaan upang maihanda ang mga
paaralan at mga guro sa maayos na
pagpapatupad nito.
c. Mahalagang maihanda ang mga mag-aaral
sa totoong buhay lalo na sa paglinang sa
kanilang mga kasanayang kakailanganin sa
papasuking larangan o trabaho kaya
mahalagang maipatupad ang programang
ito.
II. Paglalahad ng Counterargument o mga
Argumentong Tumututol o kumokontra
sa iyong tesis
a. Ilahad ang mga argumentong tutol sa iyong
tesis
b. Ilahad ang mga kinakailangang
impormasyon para mapasubalian ang
binanggit na counterargument
c. Patunayang mali o walang katotohanan ang
mga counterargument na iyong inilahad
d. Magbigay ng mga patunay para mapagtibay
ang iyong ginawang panunuligsa
III. Paglalahad ng iyong posisyon o
pangangatwiran tungkol sa isyu
a. Ipahayag o ilahad ang unang punto ng iyong
posisyon o paliwanag.
b. Ipahayag o ilahad ang ikalawang punto ng
iyong posisyon o paliwanag.
c. Ipahayag o ilahad ang ikatlong punto ng
iyong posisyon o paliwanag.
IV. Kongklusyon
a. Ilahad muli ang iyong argumento o tesis
b. Magbigay ng mga plano ng gawain o plan of
action na makatutulong sa pagpapabuti ng
kaso o isyu.
SINING NG PAGLALAHAD
Ayon sa UP Diksiyonaryong Pilipino (Binagong
Edisyon, 2010), ang paglalahad ay isang detalyado at
komprehensibong pagpapaliwanag ng isang bagay, pook,
o ideya
Ayon naman kay Jose Arrogante (2000) sa
kanyang aklat na Filipino Pangkolehiyo: Kasiningan, at
Kasanayan sa Komunikasyon, “Sa Ingles, ang
Paglalahad ay tinatawag na expository writing. Madalas
makita ang anyong ito sa pagtalakay sa karaniwan nating
binabasa sa araw-araw gaya ng mga aklat, mga editoryal
sa diyaryo, ng mga artikulo sa mga magasin, at iba pa.
Dalawang Uri ng Sanaysay
1. Pormal – ito ay maayos at mariin na paraan ng
pagsulat bunga ng isang maingat na
pagtitimbang-timbang ng mga pangyayari at
mga kaisipan. Kung minsa’y tinatawag din itong
impersonal o siyentipiko sapagkat ito’y binabasa
upang makakuha ng impormasyon.
2. Impormal – Tinatawag din itong pamilyar o
personal, at nagbibigay-diin sa isang estilong
nagpapamalas ng katauhan ng may-akda. Ito’y
naglalarawan ng pakahulugan ng may-akda sa
isang pangyayari sa buhay, nagtatala ng kanyang
 pagbubulay-bulay, at naglalahad ng kanyang
kuro-kuro o pala-palagay.
REPLEKTIBONG SANAYSAY (Sining ng
Paglalahad)
Ang replektibong sanaysay, ayon kay Michael
Stratford, isang guro at manunulat, ay isa sa mga tiyak
na uri ng sanaysay na may kinalaman sa introspeksiyon
na pagsasanay. Kinapapalooban ito ng pagbabahagi ng
mga bagay na naiisip, nararamdaman, pananaw, at
damdamin hinggil sa isang paksa at kung paano ito
nakalikha ng epekto sa taong sumusulat nito.
Maihahalintulad ito sa pagsulat ng isang journal kung
saan nangangailangan ito ng pagtatala ng mga kaisipan
at nararamdaman tungkol sa isang tiyak na paksa o
pangyayari.
Mga Dapat Isaalang-alang sa Pagsulat ng
Replektibong Sanaysay
1. Magkaroon ng isang tiyak na paksa o tesis
na iikutan ng nilalaman ng sanaysay.
2. Isulat ito gamit ang unang panauhan ng
panghalip.
3. Tandaan na bagama’t nakabatay sa personal
na karanasan, mahalagang magtaglay ito ng
patunay o patotoo batay sa iyong mga
naobserbahan o katotohanang nabasa hinggil
sa paksa upang higit na maging mabisa at
epektibo ang pagkakasulat nito.
4. Gumamit ng mga pormal na salita sa
pagsulat nito.
5. Gawing malinaw at madaling maunawaan
ang gagawing pagpapaliwanag ng mga ideya
o kaisipan upang maipabatid ang mensahe sa
mga babasa.
6. Sundin ang tamang estruktura o mga bahagi
sa pagsulat ng sanaysay: introduksiyon,
katawan, at kongklusyon.
7. Gawing lohikal at organisado ang
pagkakasulat ng mga talata.
LAKBAY SANAYSAY
Ang Lakbay-Sanaysay ay tinatawag ding travel
essay o travelogue. Ito ay isang uri ng lathalaing ang
pangunahing layunin ay maitala ang mga naging
karanasan sa paglalakbay. Ayon kay Nonon Carandang,
ito ay tinawag niyang sanaylakbay kung saan ang
terminolohiyang ito, ayon sa kanya, ay binubuo ng
tatlong konsepto: sanaysay, sanay, at lakbay. Naniniwala
siyang ang sanaysay ang pinakaepektibong pormat ng
sulatin upang maitala ang mga naranasan sa paglalakbay.
Mga Dapat Tandaan sa Pagsulat ng Lakbay-
Sanaysay
1. Magkaroon ng kaisipang manlalakbay sa
halip na isang turista.
Mahalagang malinaw sa isang manlalakbay ang
kanyang layunin. Layunin na makakalap ng mga
impormasyon at hindi mamasyal lamang.
2. Sumulat sa unang panauhang punto de-bista.
Ang karamihan sa nilalaman ng lakbay sanaysay
ay mula sa mga nakita, narinig, naunawaan, at
naranasan ng manunulat. Kadalasang
napakapersonal ng tinig ng lakbay-sanaysay
kung kaya’t mainam na unang panauhang punto
ang gamitin sa pagsulat.
3. Tukuyin ang pokus ng susulating lakbay-
sanaysay.
Dahil iba-iba ang kinahihiligan at
kinawiwilihang paksang maaaring itampok sa
paglalakbay, mahalagang matukoy kung ano ang
magiging pokus ng susulating lakbay sanaysay
nang sa gayon ay matukoy kung ano-anong
impormasyon lamang ang pagtutuunan ng
pansin sa pagsulat.
4. Magtala ng mahahalagang detalye at kumuha
ng mga larawan para sa dokumentasyon
habang naglalakbay.
Mahalagang maitala ang mga wastong
impormasyon o detalye sa isinagawang
paglalakbay na makatutulong sa pagsulat ng
sanaysay.
5. Ilahad ang mga realisasyon o mga natutuhan
sa ginawang paglalakbay.
Bukod sa paglalahad ng mga karanasan at mga
nakita sa paglalakbay, mahalaga ring maisama
sa nilalaman ng sanaysay ang mga bagay na
natutunan habang isinasagawa ang paglalakbay.
6. Gamitin ang kasanayan sa pagsulat ng
sanaysay.
Mahalagang taglayin ng may-akda ang sapat na
kasanayan sa paggamit ng wika. Sikaping ang
susulating sanaysay ay maging malinaw,
organisado, lohikal at malaman.
PICTORIAL ESSAY
Ang pictorial essay ay isang sulatin kung saan
higit na nakararami ang larawan kaysa sa salita o
panulat. Sa pagsulat ng pictorial essay dapat lamang
tandaan ang mga sumusunod:
 Ang paglalagay ng larawan ay dapat na
isinaayos o pinag-isipang mabuti sapagkat ito
ang magpapakita ng kabuoan ng kuwento o
kaisipang nais ipahayag.
 Ang mga nakatalang sulat o katitikan sa bawat
larawan ay suporta lamang sa mga larawan
kaya’t hindi ito kinakailangang napakahaba o
napakaikli. Kailangang makatulong sa pag-
 unawa at makapukaw sa interes ng magbabasa o
titingin ang mga katitikang isusulat dito.
 May isang paksang nais bigyang-diin sa mga
larawan kaya’t hindi maaaring maglagay ng mga
larawang may ibang kaisipan o lihis sa paksang
nais bigyang-diin.
 Isipin ang mga titingin ng iyong photo essay
kung ito ba ay mga bata, kabataan, propesyonal,
o masa upang maibatay sa kanilang kaisipan at
interes ang mga larawang ilalagay gayundin ang
mga salitang gagamitin sa pagsulat ng ma
caption.
TALUMPATI
Ang Pagtatalumpati ay isang uri ng sining.
Maipakikita rito ang katatasan at kahusayan ng
tagapagsalita sa panghihikayat upang paniwalaan ang
kanyang paniniwala, pananaw, at pangangatwiran sa
isang partikular na paksang pinag-uusapan.
Ang pagtatalumpati ay isang proseso o paraan
ng pagpapahayag ng ideya o kaisipan sa paraang
pasalitang tumatalakay sa isang partikular na paksa. Ito
ay karaniwang isinusulat upang bigkasin sa harap ng
mga tagapakinig. Ang isang talumpating isinulat ay
hindi magiging ganap na talumpati kung ito ay hindi
mabibigkas sa harap ng madla.
Mga Uri ng Talumpati
1. Biglaang Talumpati (Impromptu)— Ang
talumpating ito ay ibinibigay ng biglaan o
walang paghahanda. Kaagad na ibinibigay ang
paksa sa oras ng pagsasalita.
2. Maluwag (Extemporaneous)— Kung ang
biglaang talumpati ay isinasagawa nang biglaan
o walang paghahanda, sa talumpating ito,
nagbibigay ng ilang minuto para sa pagbuo ng
ipapahayag na kaisipan batay sa paksang
ibinigay bago ito ipahayag.
3. Manuskrito— Ang talumpating ito ay
ginagamit sa mga kumbensiyon, seminar, o
programa sa pagsasaliksik kaya pinag-aaralan
itong mabuti at dapat na nakasulat.
4. Isinaulong Talumpati— Ito ay kagaya rin ng
manuskrito sapagkat ito ay mahusay ring pinag-
aralan at hinabi nang maayos bago bigkasin sa
harap ng mga tagapakinig. May oportunidad na
magkaroon ng pakikipag-ugnayan sa tagapakinig
sapagkat hindi binabasa ang ginawang
manuskrito kundi sinaulo ang binibigkas ng
tagapagsalita.
Mga uri ng Talumpati ayon sa Layunin
Sa Pagsulat ng Talumpati mahalagang makilala
ang iba’t ibang uri ng talumpati ayon sa layunin nito:
1. Talumpating Nagbibigay ng Impormasyon o
Kabatiran
Ang layunin ng talumpating ito ay
ipabatid sa mga nakikinig ang tungkol sa
isang paksa, isyu, o pangyayari. Dapat
na maging malinaw at makatotohanan
ang paglalahad ng datos kaya
mahalagang sa pagsulat nito ay gumamit
ng mga dokumentong
mapagkakatiwalaan.
2. Talumpating Panlibang
Layunin ng talumpating ito na magbigay
ng kasiyahan sa mga nakikinig. Kaya
naman sa pagsulat nito, kailangang
lahukan ito ng mga birong nakatatawa
na may kaugnayan sa paksang
tinatalakay.
3. Talumpating Pampasigla
Layunin ng Talumpating ito na
magbigay ng inspirasyon sa mga
nakikinig. Sa Pagsulat nito, tiyaking ang
nilalaman nito ay makapupukaw at
makapagpapasigla sa damdamin at
isipan ng mga tao.
4. Talumpating Panghikayat
Layunin ng talumpating ito na hikayatin
ang mga tagapakinig na tanggapin ang
paniniwala ng mananalumpati sa
pamamagitan ng pagbibigay-katwiran at
mga patunay.
5. Talumpati ng Pagbibigay-galang
Layunin ng talumpating ito na tanggapin
ang bagong kasapi ng samahan o
organisasyon. Ginagawa rin ito bilang
pagtanggap sa isang bagong opisyal na
natalaga sa isang tungkulin.
6. Talumpati ng Papuri
Layunin ng talumpating ito na magbigay
ng pagkilala o pagpupugay sa isang tao
o samahan. Kabilang sa mga ito ang
talumpati ng pagtatalaga sa bagong
hirang na opisyal, talumpati ng pagkilala
sa isang taong namatay na tinatawag na
eulogy, talumpati sa paggagawad ng
medalya o sertipiko ng pagkilala sa
isang tao o samahang nakapag-ambag
nang malaki sa isang samahan o sa
lipunan, at iba pang kagaya ng mga ito.
Mga Dapat Isaalang-alang sa Pagsulat ng Talumpati
A. Uri ng Tagapakinig
Sa pagsulat ng isang mahusay na talumpati,
mahalagang magkaroon ng kabatiran ang
mananalumpati tungkol sa kaalaman,
pangangailangan, at interes ng kanyang
 magiging tagapakinig. Ayon kay Lorenzo et al.
(2002) sa kanilang aklat na Sining ng
Pakikipagtalastasang Panlipunan, ang ilan sa
dapat mabatid ng mananalumpati sa kanyang
mga tagapakinig ay ang sumusunod:
1. Ang edad o gulang ng mga makikinig –
Mahalagang alamin ang edad o gulang ng
nakararami sa mga tagapakinig. Iakma ang
nilalaman ng paksa at maging ang wikang
gagamitin sa edad ng mga makikinig.
2. Ang bilang ng mga makikinig
Importante ring malaman kung ilan ang mga
taong makikinig sa talumpati. Kung
maraming makikinig, marami ring
paniniwala at saloobin ang dapat na
isaalang-alang ng mananalumpati.
3. Kasarian
Madalas magkaiba ang interes, kawilihan,
karanasan, at kaalaman ng kalalakihan sa
kababaihan. Nagkakaroon din ng
magkaibang pananaw ang dalawa hinggil sa
isang partikular na paksa. Mahalagang
malaman kung ang pagtitipong pupuntahan
ay binubuo ng kalalakihan, kababaihan o ng
magkahalong kasarian.
4. Edukasyon o antas sa lipunan
Mahalaga ring malaman ang antas ng
edukasyon ng nakararaming dadalo sa
pagtitipon at maging ang antas ng kanilang
buhay sa lipunan. Malaki ang kinalaman ng
edukasyon sa kakayahan ng mga tagapakinig
na umunawa sa paksa. Kung ang mga
makikinig ay kabilang sa masang pangkat,
mahalagang gumamit ng mga salita o
halimbawa na akma para sa kanila. Kung
ang karamihan naman sa mga makikinig ay
mga edukado at kabilang sa mataas na antas
ng lipunan, iba ring pamamaraan ng
pagtalakay ang dapat gamitin sa kanila.
5. Mga saloobin at dati nang alam ng mga
nakikinig
Dapat mabatid din kung gaano na kalawak
ang kaalaman at karanasan ng mga nakikinig
tungkol sa paksa. Kung may alam na ang
mga tagapakinig tungkol sa paksa, sikaping
maglalaman ito ng mga bago at karagdagang
impormasyon upang hindi sila mabagot o
mawalan ng interes.
B. Tema o Paksang Tatalakayin
Mahalagang matiyak ang tema ng pagdiriwang
upang ang bubuuing talumpati ay may
kinalaman sa layunin ng pagtitipon.
1. Pananaliksik ng datos at mga kaugnay na
babasahin
Ito ay maaaring maisagawa sa pamamagitan
ng pagbabasa at pangangalap ng
impormasyon sa ensayklopedyam aklat,
pahayagan, magasin at dyornal, maaari rin
itong maisagawa sa pamamagitan ng
interbyu, mula rito ay maaaring makakuha
ng mahahalagang datos na makatutulong sa
pagbalangkas ng talumpati.
2. Pagbuo ng tesis
Mahalagang matukoy ang tesis o
pangunahing kaisipan ng paksang
tatalakayin sapagkat dito iikot ang
pangunahing mensaheng ibabahagi sa mga
tagapakinig.
3. Pagtukoy sa mga pangunahing kaisipan o
punto
Tukuyin ang mga mahahalagang punto na
magsisilbing batayan ng talumpati.
Mahalagang mahimay o matukoy ang
mahahalagang detalyeng bibigyang-pansin
upang maging komprehensibo ang susulatin
at bibigkasing talumpati.
C. Hulwaran sa Pagbuo ng Talumpati
Mahalaga ring matukoy ang Balangkas o ayos
ng isusulat na Talumpati:
1. Kronolohikal na hulwaran
Gamit ang hulwarang ito, ang mga detalye o
nilalaman ng talumpati ay nakasalalay sa
pagkasunod-sunod ng pangyayari o
panahon. Maaaring isagawa ang paghahanay
ng detalye mula sa unang pangyayari,
sumunod na mga pangyayari, at panghuling
pangyayari. Ang paksa ay maaari ring
talakayin sa pamamagitan ng mga hakbang
na dapat
2. Topikal na hulwaran
Ang paghahanay ng mga bahagi ng
talumpati nakabatay sa pangunahing paksa.
Kung ang paksa ay kailangang hatiin sa mga
tiyak na paksa ay mainam na gamitin ang
hulwarang ito. Halimbawa, kung tatalakayin
ang kultura ay maaaring hatiin ito sa
espesipikong paksa tulad ng sosyolohiya,
antropolohiya at maging ang uri ng
heograpiyang kinalalagyan ng mga tao.
Mainam na gamitin ito upang buo at
malinaw na nauunawaan ng mga nakikinig
ang tinatalakay ng paksa.
3. Hulwarang problema-solusyon
Kalimitang nahahati sa dalawang bahagi ang
pagkakahabi ng talumpati gamit ang
hulwarang ito, ang paglalahad ng suliranin at
ang pagtalakay sa solusyon na maaaring
isagawa. Kalimitang ginagamit ang
 hulwarang ito sa mga uri ng talumpating Malaking tulong sa pagbuo ng nilalaman nito
nanghihikayat. ang pagtiyak sa nilaang oras.

D. Kasanayan sa Paghabi ng mga Bahagi ng

Talumpati
1. Introduksiyon— Ito ang pinakapanimula ng
talumpati. Ito ay naghahanda sa mga nakikinig
para sa nilalaman ng talumpati kaya naman
dapat angkop ang pambungad sa katawan ng
talumpati. Mahalaga ang isang mahusay na
panimula upang:
a. Mapukaw ang kaisipan at damdamin ng mga
makikinig
b. Makuha ang kanilang interes at atensiyon
c. Maihanda ang mga tagapakinig sa
gaganaping pagtalakay sa paksa
d. Maipaliwanag ang paksa
e. Mailahad ang balangkas ng paksang
tatalakayin
f. Maihanda ang kanilang puso at isipan sa
mensahe
2. Diskusyon o Katawan— Dito makikita ang
pinakamahalagang bahagi ng talumpati sapagkat
dito tinatalakay ang mahahalagang punto o
kaisipang nais ibahagi sa mga nakikinig.
Mga katangiang dapat taglayin ng katawan ng
talumpati
a. Kawastuhan— Tiyaking wasto at
maayos ang nilalaman ng talumpati.
Dapat na totoo at maipaliliwanag ang
paksa. Kailangang gumamit ng angkop
na wika at may kawastuhang
pambalarila ang talumpati.
b. Kalinawan— Kailangang maliwanag
ang pagkakasulat at pagkakabigkas ng
talumpati upang maunawaan ng mga
nakikinig.
c. Kaakit-akit— Gawing kawili-wili ang
paglalahad ng mga katwiran o
paliwanag para sa paksa. Sikaping
makabuo ng nilalaman na kaugnay sa
paksa at gigising sa kaisipan at
damdamin ng mga makikinig. Higit sa
lahat, sikaping mapaniwala ang mga
nakikinig sa mga katotohanang
inilalahad ng talumpati.

3. Katapusan o Kongklusyon — Dito nakasaad

ang pinakakongklusyon ng talumpati. Maaaring
ilagay rito ang pinakamatibay na paliwanag at
katwiran upang mapakilos ang mga tao ayon sa
layunin ng talumpati.

4. Haba ng Talumpati – Ang haba ng talumapti

ay nakasalalay kung ilang minuto o oras ang
inilaan para sa pagbigkas o presentasyon nito.