Aralin 5: Pagsulat ng Posisyong Papel

Ayon kay Jocson et al. (2005), sa kanilang aklat na Pagbasa at Pagsulat Tungo sa Pananaliksik,
ang pangangatwiran ay tinatawag ding pakikipagtalo o argumentasyon na maaaring maiugnay sa
sumusunod na mga paliwanag:
 Ito ay isang sining ng paglalahad ng mga dahilan upang makabuo ng isang
patunay na tinatanggap ng nakararami.
 Ito ay isang uri ng paglalahad na nagtatakwil sa kamalian upang maipahayag ang
katotohanan.
 Ito ay isang paraang ginagamit upang mabigyang-katarungan ang mga opinion at
maipahayag ang mga opinyong ito sa iba.
Ang posisyong papel ay naglalayong maipakita ang katotohanan at katibayan ng isang tiyak na
isyung kadalasan ay napapanahon at nagdudulot ng magkakaibang pananaw sa marami depende
sa persepsiyon ng mga tao.
Ang layunin ng posisyong papel ay mahikayat ang madlang ang pinaniniwalaan ay katanggap-
tanggap at may katotohanan.
Ayon kay Grace Flemming, sumulat ng artikulong “How to Write an Argumentative Essay.” ang
posisyong papel ay ang pagsalig o pagsuporta sa katotohanan ng isang kontrobersiyal na isyu sa
pamamagitan ng pagbuo ng isang kaso o usapin para sa iyong pananaw o posisyon.
Ang pagsulat ng posisyong papel ay hindi lamang sining ng paglalahad ng mga argumento at
pangangatwiran kundi ito rin ay isang agham na kinapapalooban ng mga katibayang kinalap sa
pamamagitan ng pananaliksik.
Mga Dapat Isaalang-alang para sa Isang Mabisang Pangangatwiran
1. Alamin at unawain ang paksang ipagmamatuwid.
2. Dapat maging maliwanag at tiyak ang pagmamatuwid.
3. Sapat na katwiran at katibayang makapagpapatunay.
4. Dapat ay may kaugnayan sa paksa ang katibayan at katwiran upang makapanghikayat.
5. Pairalin ang pagsasaalang-alang, katarungan, at bukas na kaisipan sa pagpapahayag ng
kaalamang ilalahad.
6. Tiyaking makapagkakatiwalaan ang mga ilalahad na katwiran.

Mga Hakbang sa Pagsulat ng Posisyong Papel

1. Pumili ng paksang malapit sa iyong puso.
Ang posisyong papel ay kadalasang naglalaman ng mga paniniwala at paninindigan ng may-akda
kung kaya’t mahalaga na ang paksang tatalakayin ay malapit sa iyong puso.
 2. Magsagawa ng panimulang pananaliksik hinggil sa napiling paksa.
Ang pagsasagawa ng panimulang pananaliksik ay naglalayong malaman kung may sapat na
ebidensyang makakalap hinggil sa nasabing paksa.
3. Bumuo ng thesis statement o pahayag ng tesis.
Ayon kina Pamela C. Constantino at Galileo S. Zafra (1997) sa kanilang aklat na Kasanayan sa
Komunikasyon II, ang pahayag ng tesis ay naglalahad ng pangunahin o sentrong ideya ng
posisyong papel na iyong gagawin. Kadalasang ito ay maikli lamang na binubuo ng isa o
dalawang pangungusap.
4. Subukin ang katibayan o kalakasan ng iyong pahayag ng tesis o posisyon.
Ito ay napakahalagang bahagi sa pagsulat ng posisyong papel. Kailangang mabatid ang mga
posibleng hamong maaaring harapin sa gagawing pagdepensa sa iyong napiling tesis o posisyon
hinggil sa isyu.
5. Magpatuloy sa pangangalap ng mga kakailanganing ebidensiya.
Matapos mapatunayan na may matibay at kalakasan ang posisyon, maaari nang magsagawa nang
mas malalim na pananaliksik.
6. Buoin ang balangkas ng posisyong papel.
Sanggunian sa Pangangalap ng mga Katibayan batay sa Kakailanganing Impormasyon
Uri ng Impormasyon Uri ng Sangguniang Maaaring Gamitin
panimulang impormasyon at pangkalahatang talatinigan, ensayklopedya, handbooks
kaalaman tungkol sa paksa
mga pag-aaral hinggil sa paksa o isyu aklat, ulat ng pamahalaan
mapagkakatiwalaang artikulo dyornal na pang-akademiko
napapanahong isyu pahayagan, magasin
estadistika sangay ng pamahalaan at mga organisasyon/
samahan

Ayon kay Constantino at Zafra (1997), nauuri sa dalawa ang mga ebidensiyang magagamit sa
pangangatwiran:
a. Mga Katunayan (facts) – ito ay tumutukoy sa mga ideyang tinatanggap na totoo dahil
ang mga katibayan nito ay nakabatay sa nakita, narinig, naamoy nalasahan, at nadama.
b. Mga Opinyon – ito ay tumutukoy sa pananaw ng tao, mga ideyang nakasalig hindi sa
katunayan kundi sa ipinapalagay lamang na totoo. Hindi ito katunayan kundi pagsusuri o
judgment ng katunayan.

Balangkas ng Posisyong Papel

I. Panimula
a. Paksa
b. Paunang paliwanag
c. Pahayag ng tesis
Sa pagsulat ng panimula, mahalagang maunawaan na ito ay may dalawang layunin: upang
ipakilala ang paksa at ang tesis at upang maantig ang interes ng mga babasa nito.
II. Paglalahad ng Counterargument o mga Argumentong Tumututol o Kumokontra
sa Iyong Tesis
a. Mga argumentong tutol sa tesis
b. Impormasyon para mapasubalian ang binanggit na counterargument
c. Pagpapatunay na mali ang counterargument
d. Pagpapatibay ng ginawang panunuligsa gamit ang ilang patunay

III. Paglalahad ng Iyong Posisyon o Pangangatwiran Tungkol sa Isyu

a. Unang punto
b. Ikalawang punto
c. Ikatlong punto
Upang higit na maging matibay ang iyong pangangatwiran o posisyon, sikaping maglahad ng
tatlo o higit pang mga puntos tungkol sa isyu.
IV. Kongklusyon
a. Paglalahad muli ng argumento o tesis
b. Plano ng gawain o plan of action