obra da época de M. Antonio e o ismo que practicaban, que debes definir.
Quen fechou esta noite
a fiestra azul do Mar?... Este Mar fuxitivo de tódalas ribeiras... Náufrago do neboeiro que desviou o rumbo dos puntos cardinais (...) O sol era un paxaro triste que se pousaba no penol1. 1- ángulo superior da vela
De “Descuberta”, De catro a catro (1928), Manuel Antonio.
A temática que aparece en De catro a catro é de carácter existencialista: o ser humano
carece de rumbo na vida e presenta unha visión desorientada da súa existencia. Observámolo na pregunta que inicia os versos, que amosa confusión. Por outra banda, é usual o emprego recurso do oxímoro (asociación ilóxica na semántica de palabras), como un mar que carece de costas, o que nos leva a un mundo recreado polo autor, que é o que define o creacionismo, corrente practicada neste título, con claras influencias de Vicente Huidobro. A negatividade vital transmítea o autor a través do léxico (“fechou”, “fuxitivo”, “Náufrago”, “neboeiro”, “desviou o rumbo / dos puntos cardinais”, “triste”) para aumentar o sentimento existencialista da voz poética. Tamén se enxerga no poema o cubismo, consistente en acumular imaxes en cada estrofa (tamén coñecido como imaxinismo): as tres primeiras mostran unha navegación vaga, sen rumbo, nun mar bretemoso e desorientado, metáfora da vida desorientada do ser humano. Os elementos do mundo marítimo son constantes neste poemario, o que tamén se reflicte na última imaxe: un sol que se deita anunciando a chegada da noite dun xeito melancólico co emprego da metáfora “paxaro triste”, en clara contradición surrealista co inicio do poema (“esta noite”). Outro ismo exclusivamente galego é o hilozoísmo, encarnado na figura de Luís Amado Carballo (Proel), que consiste nunha constante prosopopea ou personificación de elementos da natureza a través do recurso cubista do imaxinismo, a xustaposición de imaxes. Finalmente, outra corrente vangardista desta época foi coñecida como neotrobadorismo. Nesta imitábase a forma das cantigas medievais de amigo, con recursos como o paralelismo e o refrán, e de temática amorosa. Bouza Brey publicou nesta liña Nao senlleira.