ሑስኒ ኻድቤ ሒልቂዚኛ መነስ ዪልዛል ሒርቃኦትዚኛቤ በጂሕ ኡውጋችቤ ገልጌብ አሽነማ ሒርጊ ዋ ሚርጊ አሽነቤው። ዪው አሳስ

ሞሻቤም አኻእ መጣለልቲ(Conclusion) ዋ Recommendationዚኛው ዪቤ መትኼተልቤ ዛልኩትቤ ናርዲዛና ዩኹናል።

Conclusion ዋ Recommendation

1️⃣ ኡመትዚኛ ሒልቂ መነስሌ ጊዲር ጊዲር ሰበባችቤ ዚገደራ አትታይዞው ዪላሕዲዛል ኢማም አሕመድ አዳል ሱልጣኔት ዘማንቤ ሜገል
ዚናሩ ወቅታችቤ ዪግሊማ ኢላ ጨለንቆ ሐርቢቤ ዚሞታች አዞኩትዞም 700 በቅላ አሩዛች ሸሒድ ዚኻኑቦ ኹንቲው ቤሔርዞም ባድዚኛ ዋ
ኡመትዚኛ ዚትሊያዩ ጀኻጥ ዋ ዛሊም ሔራችቤ መንበርቲሌ መትዴረቅዞ ሰበባች ዪትገለጣሉ። ዪ አሳስቤም አብዛሕ ኡመትዚኛ ባድቤ
መውጣእማ መርሓቅቤ መንበርቲ አዞኩትዞም ዪትናሳኢማ ዪትዋለድዛል ኡመትዚኛ ፈስሊ በጂሕቤ አልመንበርቲ።
2️⃣ ቀዲም ባባችዚኛ ኢስላም ዲኑው መልመድ መትሌመድሌ አዞኩትዞም ዲኑው መዝጋጋሕሌ ያሾ ዚናራ ኩሽኩሽቲያች ዋ ጁሕዲያች ሰበብቤ
ጌይቤ ቃጪ ዚትሊያዩ ሺርቲያች ኩፎኝ መጋዛ ዋ መትቢታተንማ መንበርቲ ሉይቤም አዞ ዚሓሩቦ አትታይ ዋ ዚትሊያዩ ባድዚኛ ሑስኒያችቤ
መንበርቲ ሜገል ዋ አላይ ሐያት ኡስጡ መቦኣቤ አዞደቤዞ መትናሳእ ዋ መንበርቲቤ አዞ ኡውጋው መቅራ ማቤይና ዘመን ቤሔር
መትጠመስ።
3️⃣ ባድ ኡስጡቤ ዚናሩ ሲያሳ ኢስቲእማራች ዋ ደኻጥ ሔራችቤ አብዛሕ ኡመትዚኛ ፈስሊ ሉይቤም አዜባች ደረጃቤ ዪትረኸብዛል
ኡመትዚኛ ባድዞው ማሕደግ ዋ ባድዞው ሙሉእቤ ዪጠሊማ ባድዞቤ ዩጪኩት መኽናዞ ዋ ዪሌ መትዴረቅዞ ሰበብቤ ሒልቂዚኛ ባድዚኛቤ
ያንሲባ ኑቡር ኹንቲ መትኸለቅ።
4️⃣ ባድ ኡስጡቤ ዛሉ ሐረሪያቹም ኻኑጊር አላይዞኩት ፈጠን ፈጠንቤ አልመትናሳእ ዋ ዚትናሳኣቹም አሐድ ዋ ኮኦት ሙጥጢ መውለድቤ
መቃነን ሰበባችቤ ሒልቂዚኛ ወቅቲ ወቅቲቤ ያንሲኩት መኽናዞ።
5️⃣ ዚትሊያዩ ነትቱ ዋ አፋት ሰበባችቤ ሚሳልዞሌ ኤድሲ ዋ ዪው ዪመስሉ ነትቱያችቤ መሞታ ዋ መትፈጃ ሰበባች ሒልቂዚኛ መነስሌ ሰበብ
መኽናዞ።
6️⃣ ኢኮኖሚ ሰበብቤ ባድቤ መውጣእ ዋ ሐያቱው መማጃሌ ዪልዛልቤ ዚትሊያዩ አዱኚት ፈስሊያችቤ መንበርቲሌ መትዴረቅ ዋ ባዱው ኢላ
መርሳእ ደረጃች መቦረድ። ሉይቤም አዲስ አበባ ፣ ድሬደዋ ዋ አላይ ዚትሊያዩ ባድ ኡስጡ ሑስኒያችቤ መትፊጣጠንቤ መንበርቲ
ሌጦታቹም ሒልቂዚኛ ሑስኒዚኛቤ ዪናቅሲኩት ሰበብ መኽናዞ።
7⃣ ሑሉፍ ዛዩ ዚትሊያዩ ወቅታች ዋ አኻእ ዛል ኑቡር ኹንቲያቹው አሳስ ሞሻቤ ሑኩውማ ገረብደሌ ዚትሊያዩ አዱኚት ፈስሊያች ዋ ባዳችቤ
ዪነብሪዛሉ ሐረሪያች ኪም ባድዚዩ መርገገብ ዪፈርኩኩት ሙች ኹንቲያቹው መኽለቅ ዋ መትሚቻቻ ሌጦታች አልመንበርቲ ሰበባች።
8️⃣ ኦሮሞ ሑኩውማ አሕመራው መትማሓጥ ዋ መትጋበትሌ ዪልዛል ዚቅ ዚታ አቡራቹው ሞጫ ዋ አቡራዞ አሳስቤ ዚቅቲቤ ኩሽኩሽ
ባይቲዞ ሰበባችቤ Dimography ደረጃቤ ኦሮሞ ሻእቢ ኪልቲባዛሓ አብዛሕ ዚናሩና ደቺያች ዋ አላይ ከኡመት የትኺሹናዛል ሺኢያች
ኢጂዚኛቤ ዩጭቦ ኑቡር ኹንቲያች መንበርቲሌ መትዴረቅዚኛ። ሉይቤም ኢናቹው መዌከልቤ ኩርሲ ለአይቤ ዚትጌባ ሑኩውማ ከኡመት
ዚቅቲ ዪነብረናኩት አሐድ አይና Policyያቹው ሞጫም ኻና ሩሑቅ መሔሰብማ መድለግ አልመፍረክ ጪንቂያች።

Recommendation

1️⃣ አኻእ ዛል ሑስኒዚኛ ሑኩውማ ኢኛ ሐረሪያች ከኡመት ሺርቲዚኛ ዋ ሑስኒዚኛቤ ኢልማና ሒልቂዚኛ ኪለነሳ ዋ ሒልቂ መነስ
ጪንቂያችቤ ኡመትዚኛ ኪልቲጠመሳ ዘይሌጥኩት Dimography ጪንቂያችዚኛው አክካዞቤ መፍታሕ ኒፈርኪባዛና ዚቅቲቤም ኪም
ኤቀድ ኒደልጊባዛና Policy ጠብ ሞሻቤ መድለግ ዪነብሪባሓል። ሉይቤም Pro Natal ዪሎዛል Policyው ሞጫማ ኢሾትዋል ሞሻሌ
ዚቅቲቤ መድለግ ዪነብሪባሓል።
2️⃣ ኢትዮጵያ ሑኩውማ ኡመት ሒልቂ መብዛሕ ዋ መትዋለድ ቢዝሓ ሰበብቤ ሻእቢ ቢዝሓው Control ሞሻሌ ዪልዛል Anti Natal
ዪሎዛል policyው ዪትኼተላል ኢኛ ሐረሪያች ለኪን አኻእ ዛል ኑቡር ኹንቲው አሳስ ሞሻቤ ከኡመት ሒልቂዚኛ መነስ ዋ መትጠመስቤ
መስለጥሌ ዪቤ ዚትላያ ቤጆት መስጣቤም ዪትደለግባሌ ዪትፈረክባዛል ዚሩሕዚኛ Pro Natal policy ሞጫቤ መድለግ ዋ ኢሾትዋል ሞሻ
ዪቴቀበናሓል። ዪቤም

1️⃣ ሑኩውማዚኛ ደረጃቤ ሐረሪያች ወቅቲ ወቅቲቤ መትናሳእ ዋ መትዋለድ ዪፈርኩኩታ ሙች ኹንቲያቹው መኽለቅቤ መድለግ
ዪነብሪባሓል።
2️⃣ ሑስኒዚኛቤ ዚትሊያዩ አትታያች ዋ ሺርቲያችቤ ዪሰፍሪዛላች ዘይኒበሩኩት ዋ ዪ ከኡመት ዛለነ ሒልቂ መነስ ሰበብቤ ኪም ኤቀድ በጂሕ
ጪንቂያቹው የዲጅበናዛል ኹንቲው ዪኸልቂበናዛል መኽነዞቤ መትኻተር ዪነብሪበናሓል።
3️⃣ ኡመትዞም ዪ ጪንቂያችዚኛ ሐልሊ መርኸብ ዪፈርኩኩት ኩልሉ ሺኢያችቤም ሩሕዞው ዚቅ ሞሻ ዋ ጠብ ባይቲ ዪነብሪባሓል። ከኡመት
አብዛሕጊር ሐንጉራችዚኛው አጋረድኔዩጊር በሰር ባሕ ዚትላሓዳንታ ዪም ዚሩሕዞ ዛጥ ጊዲር ጪንቂያች የትኺትሊዛል መኽነዞቤ መትቄራሕ
ባሕ ዋ ሩሑቅ መሔሰብ መፍረክ ባሕ መኽና ዪነብሪባሓል።
4️⃣ ኡመትዚኛ መትናሳእ ዋ መትዋለድ ሌጦት ለአይቤ ዛልበና ኡመትዚኛ ሒልቂ መነሱው መቤጃ ዋ መሬመጥቤ ሒጃጆትዞው ሙሉእቤ
መናወጥ ሐልባ።

ኼይሪ ጀዛእ