Matagal na ring usapin ang pagtatanggal ng asignaturang Filipino sa kolehiyo dito sa bansa. Dulot nito ay may iba't ibang opinyong isinalang alang ang mga tao. Ngunit anonga ba ang nararapat na gawin sa isyung ito? Dapat bang panindigan ang pag-aalis ng Filipino sa kolehiyo o panatilihin ito bilang pagsasapuso na rin ng ating nakagawiang kultura. Wika nga ni Dr. Jose Rizal "ang hindi marunong magmahal sa sariling wika ay daig pa ang hayop at malansang isda". Walang bansa ang umuunlad ng walang wikang Pambansa o sariling wika at panitikan. Isang malaking hakbang ang ginawa ng Commission on Higher Education (CHED) sa pagbabalak na alisin ang asignaturang Filipino sa mga ubod na asignatura sa kolehiyo. Ang pagpapatupad ng Memorandum Order Blg. 20 ang nagpapatibay dito, ngunit kung susuriing mabuti ang Memorandum ay makikitang ito ay sumasalungat sa batas Konstitusyon Artikulo XIV Seksyon 6-7 na sinasaad ang kahalagahan ng wikang Filipino sa atin bilang mamamayan at sa paaralan bilang panturo. Ang ma itinuturo sa Filipino sa kolehiyo ay hindi pag-uulit ng mga inaral sa elementarya at secondarya bagkuas ay pagpapalawig sa teorya, praktika, at silbi nito sa Pamantasan, bansa at buhay. Ang pagtatanggal ng asignaturang Filipino sa kolehiyo ay hindi sasagot sa kahit anong problema ng bansa o kahit saan pa mang isyu. Sa halip ay maaaring dumagdag lamang ito sa mga kakaharapin na problema sapagkat ang ma guro na nagtuturo nito ay mawawalan ng trabaho at ang mga studyanteng sa halip ay makakatulong sa pagpapaunlad ng kultura ay bababaw lamang ang tingin nito sa ating kultura. Kaya ako nakikiisa sa mga tumututol sa pagpapatanggal ng asignaturang Filipino sa kolehiyo upang lalong mapaunlad ito. Kung kaya't hindi ba mas dapat natin pahalagahan ang asignaturang Filipino? Sapagkat ito ay ang ating pagkakakilanlan, dito tayo mahuhubog na lalong kilalanin ng ating wika, lahi at bansa. Nasa Filipino ang identidad ng mamamayan sa bansang Pilipinas, nasa Filipino ang diwang makabansa na makatutugon sa mga kahingiang panlipunan at makatutulong sa pangangailangan ng mamamayang Pilipino. Sa halip na alisin, dapat pang mas lalo itong patatagin, ang disiplinang Filipino sa kurikulum ng kolehiyo sa pamamagitan ng mga asignaturang Filipino na magiging pundasyon nito. Mas mabuting panindigan upang mapaglingkuran ang bansa gamitang sariling wika, ang Filipino. Sa hakbang ng CHED na pag-aalis ng asignaturang Filipino sa kolehiyo ay pinapakita nila ang paurong nilang pag-iisip ukol sa pagpapatibay ng wika sa kultura ng Pilipinas. Ang pagpapatupad ng Memorandum na ito ay makikitang hindi sapat ang taong pinagkonsultahan. Ako bilang mag-aaral na pinanganak at nagkamuwang sa Pilipinas kikilos at magpapatuloy ipaglaban ang wikang kinagisnan at ang asignaturang mayroon dito upang hindi isantabi at tuluyang mapanatili ang Filipino sa kolehiyo. Manghihina at malulusaw nang tuluyan ang wikang Filipino kung hindi magtutuloy-tuloy ang paglinang nito hanggang sa kolehiyo. Sa ganitong punto, muli at muli kong igigiit ang karapatan ng Wikang Pambansa na nakasaad sa batas Konstitusyong ng Pilipinas. Hindi natin maaalis ang katotohanang sa Pilipinas ang wikang panlahat ay ang Filipino na laging ginagamit sa pakikipagtalastasan. Tayong mga Pilipino ay tinanggap at isinabuhay ito bilang wikang Pambansa at nagging katangi-tangi ang tatag nito dahil ito ang identidad ng lipunang Pilipino. Kaya't kung aalisin sa pag-aaralan sa kolehiyo ang asignaturang Filipino para na rin nitong tinanggal ang identidad ng bawat isa bilang Pilipino.