Professional Documents
Culture Documents
Eski̇ Türkçe - Meti̇n I
Eski̇ Türkçe - Meti̇n I
1 bilge ton͡ yuḳuḳ ben özüm tabġaç ilin͡ ge ḳılıntım türk bodun tabġaçḳa körür erti
2 türk bodun ḳanın bulmayın tabġaçda adrıltı ḳanlantı ḳanın ḳodup tabġaçḳa yana içikdi ten͡ gri ança timiş
erinç ḳan birtim
3 ḳanın͡ gın ḳodup içikdin͡ g içikdük üçün ten͡ gri ölütmiş erinç türk bodun ölti alḳıntı yoḳ boltı türk sir bodun
yirinte
4 bod ḳalmadı ıda taşda ḳalmışı ḳubranıp yiti yüz boltı iki ülügi atlıġ erti bir ülügi yadaġ erti yiti yüz kişig
5 uduzuġma uluġı şad erti ayġıl tidi ayıġması ben ertim bilge ton͡ yuḳuḳ ḳaġan mu ḳışayın tidim saḳıntım
toruḳ buḳalı semiz buḳalı ıraḳda
6 bilser semiz buḳa toruḳ buḳa tiyin bilmez ermiş tiyin ança saḳıntım anta kisre ten͡ gri bilig birtük üçün
özüm ök ḳaġan kışdım bilge ton͡ yuḳuḳ boyla baġa tarḳan
7 birle iltiriş ḳaġan boluyın biriye tabġaçıġ ön͡ gre ḳıtan͡ yıġ yırıya oġuzuġ üküş ök ölürti bilgesi çabışı ben
ök ertim çoġay ḳuzın ḳara ḳumuġ olurur ertimiz
Güney Yüzü
1 kiyik yiyü tabışġan yiyü olurur ertimiz bodun boġuzı toḳ erti yaġımız tegre uçuḳ teg erti biz es [t]eg
ertimiz ança olurur erkli oġuzduntun küreg kelti
2 küreg sabı antaġ toḳuz oġuz bodun üze ḳaġan olurtı tir tabġaçġaru ḳunı sen͡ günüg ıdmış ḳıtan͡ yġaru ton͡ gra
esimig ıdmış sab ança ıdmış azkın͡ ya türk
3 yorıyur ermiş ḳaġanı alp ermiş ayġuçısı bilge ermiş ol iki kişi bar erser sini tabġaçıġ ölürteçi tir men
ön͡ gre ḳıtan͡ yıġ ölürteçi tir men bini oġuzuġ
4 ölürteçik tir men tabġaç biridin yan teg ḳıtan͡ y ön͡ gdün yan teg ben yırıdınta yan tegeyin türk sir bodun
yirinte idi yorımazun usar idi yok ḳışalım