Pangalan: Cabaña, Kristine Mae Allyza L.

Petsa:01-25-2024
Seksyon at Baitang: XI - Mahogany

Patimpalak-Kagandahan: Malikhaing
Pagpapahayag ng Pagkakakilanlan
Ano ang patimpalak-kagandahan? Marami ang mga skeptikal tungkol sa tunay na dulot
ng ganitong paligsahan sa kalinangan ng Pilipinas. Ano ang mga aspeto ng panloob na
kagandahan na ngayon ay isinasaalang-alang na rin sa mga Beauty Pageant, at paano ito
nagbabago sa paglipas ng panahon? Paano ang pagsali ng Pilipinas sa mga Beauty Pageant
nakatutulong sa pagpapakita at pagpapahalaga sa kultura ng bansa, lalo na sa mga sagot sa mga
katanungan na nagpapakita ng talino ng mga kandidato/kandidata? Ang Patimpalak ng
Kagandahan o Beauty Pageant ay isang tradisyunal na paligsahan na naglalayong magbigay ng
ranggo sa pisikal na anyo ng mga kalahok. Sa paglipas ng panahon, ito’y nagbabago at nagiging
mas inklusibo sa pagsasama ng aspeto ng panloob na kagandahan tulad ng personalidad, talino,
talento, ugali, at partisipasyon sa mga kawanggawa. Ang panayam at pagsagot sa mga tanong sa
publikong entablado ay nagiging pundasyon ng pagpapasya ng mga hurado. Sa aking opinyon,
ang pagsali ng Pilipinas sa ganitong mga patimpalak ay isang oportunidad na nagbibigay diin sa
yaman at kagandahan ng kultura ng bansa. Ang mga kandidato at kandidata ay nagbibigay ng
representasyon sa makulay na sining ng Pilipinas sa pamamagitan ng pagrampa sa iba’t ibang
klaseng artistikong damit sa entablado at sa kanilang mga sagot sa mga katanungan. Ang pagsali
sa mga ganitong paligsahan ay hindi lamang nagdudulot ng saya at inspirasyon kundi nagbibigay
din ng pagkakakilanlan at ipinapakita ang tagumpay ng mga kabataang nangangarap na maabot
ang kanilang mga pangarap sa larangan ng kagandahan. Ang mga patimpalak na ito ay nagiging
daan upang ipakita ang pagmamalaki sa pagiging Pilipino. Ito ay isang plataporma ng
inspirasyon at pagpapakita ng yaman at pagkakakilanlan ng Pilipinas sa pandaigdigang
komunidad. Kaya naman sana ay mas marami pa ang maging aktibo sa pagsuporta at
pagtangkilik sa mga timpalak na naglalabas ng ganda at talino ng mga pinoy. Nawa’y patuloy na
yumabong ang larangan na ito upang patuloy rin nating mapagyaman ang ating kultura sa
pamamagitan nito.