Bago pa man bumalik sa sariling bayan si Jose Rizal noong
Oktubre 1887, marami ng kasawiang dinanas ang kanyang mga kamag- anakan at kaibigan dahil sa pagkakasulat niya ng Noli Me Tangere. Nang mga panahong yao’y nagdaranas din ng suliranin sa lupa ang mga magsasaka ng Calamba. Sa tindi ng kanilang dinaranas na mga paninikil mula sa kamay ng Espanya, ang suliraning ito ay kanila agad inilapit kay Rizal na nahaharap din sa isang kaso ukol sa pagpapalathala ng tinaguriang “makamandag” na babasahing Noli Me Tangere. Maraming mga pagbabanta ang natanggap ni Rizal at maging ang kaligtasan at kabuhayan ng kanyang pamilya ay nangaganib. Sa mga pangyayaring ito sinimulan ni Rizal ang kaniyang ikalawang nobela ang El Filibusterismo. Tuwiran at di-tuwiran, napektuhan ito ng wala pang anim na buwang pagkamalas niya ng mga kasamaang ginagawa ng mga pari, katulad ng pagpapayaman sa kanilang asyenda, pang-aakit sa mga babae, panggugulo at paninikil sa mga Pilipino lalong higit sa mga mahihirap na magsasaka. Muling nilisan ni Rizal ang Pilipinas sa takot niyang mapahamak ang kaniyang pamilya at malagay sa piligro ang kanilang buhay. Hindi nagwakas sa paglisan ni Rizal ang suliranin. Ang kanyang pamilya ay inusig. Umakyat ang kaso sa lupa ng mga Mercado- Rizal hanggang Kataastaasang Hukuman ng Espanya. Maraming kamag- anakan niya ang namatay at pinag-usig. May isa pang tinanggihang mapalibing sa libingang Katoliko. Isa pang nagdulot sa kanya na labis na kalungkutan ay ang pagtataksil ni Leonor Rivera na malaon na niyang iniibig. Ang mga pangyayaring ito ay dala-dala lahat ng ating bayani sa kanyang dibdib habang isinusulat niya ang kanyang ikalawang nobela, ang El Filibusterismo. Masigasig at malarawan ang ebolusyon ni Simoun mula kay Crisostomo Ibarra, bagaman hindi maiiwasang makilala ang mga kapaitan at kabiguan sa paraang hindi maipagkakamali, kasama na pati ang pangungulila at pag-aasam sa pag-ibig. Ang nobelang El Filibusterismo na literal na “Ang Pilibusterismo” o Ang Paghahari ng Kasakiman ay karugtong ng Noli Me Tangere. Ito ay kaniyang inialay sa tatlong paring Martir ang Gomburza at ang pagkakahandog na ito sa tatlong paring martir ay ang pangunahing dahilan kung bakit ito ay itinuturing na isang nobelang politikal. Tulad sa Noli, bago ito mailimbag, nagdanas muna si Rizal ng maraming hirap at ang nobelang ito ay nakasulat sa wikang kastila. Sinimulan niya ang akda noong Oktubre ng 1887 habang nagpapraktis ng medisina sa Calamba. Sa London, noong 1888, gumawa siya ng maraming pagbabago sa plot at pinagbuti niya ang ilang mga kabanata. Ipinagpatuloy ni Rizal ang pagtatrabaho sa kaniyang manuskrito habang naninirahan sa Paris, Madrid, at Brussel, at nakumpleto niya ito noong Marso 29, 1891, sa Biarritz. Inilathala ito sa taon ring iyon sa Ghent. Isang nagngangalang Valentin Ventura na isa niyang kaibigan ang nagpahiram ng pera sa kanya upang maipalimbag at mailathala ng maayos ang aklat noong Setyembre 22, 1891. Ang nasabing nobela ay pampulitika na nagpapadama, nagpapahiwatig at nagpapagising pang lalo sa maalab na hangaring makapagtamo ng tunay na kalayaan at karapatan ng bayan. Hindi tulad ng Noli na puno ng romansa, pag-ibig at komedya. Introduksyon
Napakahalaga ng papel na ginampanan ng mga tauhan sa
El Filibusterismo. Makikita sa bawat tauhan ang iba’t ibang ugali na kumakatawan hindi lamang noong panahon ni Rizal kundi maging sa ngayon ay talamak at maaari pa ring makita. Ang kalagayan ng bansa ay maaari nating salaminin sa pamamagitan ng dalawang nobelang nailathala ni Rizal. Maaaring sabihin natin na tapos na ang pananakop sa ating bansa at wala na tayong pakialam doon. Nagkakamali tayo sapagkat hindi pa tayo nakakalaya sa sarili nating pang-aalipin sa ating inang bayan. Pilipino laban sa kapwa pilipino. Tama nga si Heneral Antonio Luna na may isa pa tayong higit na kalaban liban sa mga dayuhan at iyon ay ang ating mga sarili. Malaki ang naging katulungan ng Noli lalong higit ng El Filibusterismo sa pagpapamulat sa kamalayan ng mga pilipino. Ang papel na ito ay maglalahad ng dalawang tauhan mula sa El Filibusterismo sina Ben Zayb at si Mr. Leeds. Masasabi nating sila ay laman lamang ng kaisipan ni Rizal ngunit malaki ang naging impluwensya sa mga mambabasa. Malaki ang pinagkaiba ni Benzayb at ni Mr. Leeds at napakaganda ng mga papel na kanilang ginampanan sa nobelang El Fili. Si Ben Zayb ay isang mamamahayag (journalist) na pawang kabalintunaanan lamang ang mga inilalathala niya. Malimit niyang siraan ang mga pilipino. Natutuwa siya kapag nakakarinig ng mga pangyayaring masasama o mga krimen. Magaling siyang magbago at magtahi ng mga kwento. Ang maliit ay kanyang pinapalala. Samantala sa kabilang dako, si Mr. Leeds, isang mahikero na laging nakasuot ng Amerikanang itim at magaling magsalita ng wikang kastila. Siya ay kaibigan ni Simuon. Isa sa mga katangian niya ay ang pagiging malihim sa mga bagay na dapat lamang isatago para sa ikabubuti ng nakararami. Hindi tulad ni Ben Zayb na walang inatupag kundi magbunyag ng kahit ano kahit hindi totoo. Ang mga ugaling ganito ay patuloy paring umiiral sa ating kapanahunan. Makikita natin sila kahit saan lalong higit sa mga nakaluklok sa ating lipunan. Kaya napakagaling ni Rizal sapagkat ang mga tauhan ng kanyang nobela ay patuloy paring nabubuhay ngayon at ang El Felibusterismo ay hindi na para sa paglaban sa maling pamamalakad ng Espanya bagkus ito ay ang pagtatama na sa sistema ng ating bansa. Ito ay magsisilbing salamin sa bansang Pilipinas na malaon ng dinungisan ng mananakop at maging ng sariling nitong mamamayan. Ben Zayb
Si Ben Zayb ay isang mamamahayag at manunulat sa sarili niyang
pahayagan na tinatawag na El Grito de la Integridad. Sumusulat siya sa ilalim na panulat na Ibanez. Malimit siyang tawagin ng mga tao na Padre Ybanez dahil kahawig niya ang mga prayle at may kabigatan ng katawan, pero hindi niya ito pinapansin. Madalas niyang purihin ang Kapitan-Heneral, sina Padre Irene at Padre Salvi, si Don Timoteo Pelaez, at may malaki rin siyang paghanga kay Don Costudio. Tunay na siya ay isang manunulat, isang uri ng manunulat na laging sinasabi sa mga tao kung saan patungkol ang susunod na artikulo na kaniyang gagawin. Makikita sa kaniyang mga gawa ang kaniyang katalinuhan sa anumang kanyang lathalain lalo na at kung may kaugnayan sa siyensya na pawang sinasarili na niya lahat. Siya ay isang uri ng tao na hindi marunong tumanggap ng sariling kamalian. Isang taong walang pakialam at may pagkaignorante lalo na sa kalagayan ng mga mahihirap na tao. Palagay niya sa kanyang sarili na isa siya sa iilang matatalinong tao sa Pilipinas at naniniwala siyang ang pagkakaroon ng ganoong karunungan ay nararapat lamang sa isang mamamahayag (journalist) na katulad niya. Medyo naiireta siya kapag wala siyang maisulat na artikulo at lagi niyang hiling na may krimen sanang mangyari nang sa gayon ay may maisulat siya tungkol dito. Pero kahit na may ganoon siyang ugali tapat naman siya sa kaniyang mga kaibigan lalo na at laging pinupuri niya ang mga ito. Itinatrato niya ng may pagrespeto ang kaniyang mga kaibigan at lagi niyang sinasang-ayunan ang mga argumento ng mga ito kahit siya ay tila hindi napapansin. Karibal niya sa pagsusulat si Horatius na laging pinapatamaaan at tinitira ang kaniyang mga gawa at ideya. Hindi siya nagpapadaig lalo na sa usaping pahayagan at sa pagalingan ng ideya. Si Ben Zayb ay unang ipinakilala sa unang kabanata sa may Bapor Tabo. Nakaupo kasama ang mga prayle, sina Doña Victorina, Don Custodio at si Simuon. Pinagtatalunan nila doon kasama si Padre Camorra ang tungkol sa ilog, patubig o irigasyon at ang mga Indio. Minsang naitanong din ni Ben Zayb kung saan namatay si Ibarra habang sila ay nasa Bapor Tabo. Sinabi naman ni Padre Sibyla na napasama na sa bangkay ni Don Rafael ang ama ni Ibarra. Bigla na lamang nakita ni Ben Zayb na si Simuon ay biglang nanahimik kaya ipinalagay nito na siya ay may sakit. Siya ay isang tao ring mapagduda lalo na nang sabihin ni Juanito ang tungkol sa mahika ni Mr. Leeds. Hindi naniwala si Ben Zayb at sinabi pa niyang may daya ang palabas. Siya ay isang taong punong puno ng kuryosidad sa buhay. Pumunta si Ben Zayb sa Quiapo upang masaksihan ang nasabing pandaraya ngunit siya ay namutla sa hiya dahil wala siyang nakita kahit anong ebidensya ng kadayaan. Mula sa kanyang napanood sumulat siya tungkol sa sikreto ng siyensya. Sa mga pahayagan lagi niyang ibinibilang si Don Custodio, isang mayaman at kilalang kilala tao, dahil sa paniniwala nitong ang bawat sabihin ng Don ay pawang tunay lalo na at kung ito ay tungkol sa pagpapayo at pagbibigay ng impormasyon. Kung may natutuwa man sa hindi pagpapatupad ng isang paaralan para sa mga mag-aaral ay isa na rito si Ben Zayb. Sinabi niya sa isa sa mga artikulo niya na kanyang naisulat na ang edukasyon ay masama para sa Pilipinas. Siya rin ang nagbigay ng suhestiyon kay Simuon na mas mainam na siya ang bumili ng bahay ni Kapitan Tiyago sa halip na si Don Timoteo Pelaez. Ito ang naging dahilan ni Simuon kung kaya’t napalapit siya sa bahay ng huli. Sinasabing si Ben Zayb at si Padre Camorra ay mabuting magkaibigan kahit na sila ay laging nagtatalo sa kadahilanang si Ben Zayb sa bawat pagtatalo ay gumagamit ng siyensya samantalang si Padre Camorra naman ay relihiyon. May isa paring katangian si Ben Zayb, nang hindi niya maipalimbag ang kanyang isinulat na balita dahil sa pagbabawal ng Kapitan-Heneral, siya ay naghimutok at tila nagtampo. Mr. Leeds
Si Mr. Leeds ay isang Amerikanong mahikero na laging nagsusuot
ng Amerikanang itim at magaling magsalita ng kastila. Marami na siyang mga narating na lugar na kung saan natuto siya ng iba’t ibang linggwahe. Siya ay isang mabait na tao, may paggalang sa nakakarami at isang mabuting kaibigan ni Simuon. Sinasabing siya ay isang misteryosong tao, matangkad, may mapuputing balat, itim na buhok at may matipunong pangangatawan. Si Mr. Leeds ay nabanggit sa ilang kabanata ng El Felibusterismo, particular sa mga kabanata 16, 17 at 18. Siya ang tagapamahala ng isang perya sa Quiapo na sikat dahil sa pagtatanghal niyang kasama ang isang ulong nakakapagsalita. Ang ulong ito ay tinatawag na Imuthis na may buhay na maiihalintulad kay Ibarra. Ayon sa kabanata 18, nang magtanghal si Mr. Leeds kasama ang ulong si Imuthis. Bumigkas ng isang salita si Mr. Leeds at lumabas ang ulo ni Imuthis. Nagsalita ang ulo at nagsalaysay na siya ay umuwi sa sariling bayan pagkatapos ng pag-aaral at mahabang paglalakbay. Sa kanyang pagdaraan sa Babilonia ay nasabi niya ang isang lihim na hindi ang tunay na Sumerdis ang namamahala doon kundi si Gautama, isang magnanakaw ng kapangyarihan at namamahala sa tulong ng pandaraya. Siya at umibig sa isang anak ng pari at naging kaagaw niya rito ang pari sa Abidos. Nagpanukala ang pari ng kaguluhan at siya ang sinangkalan. Isinakdal siya at napiit, tumakas at napatay. Ayon sa ulo siya ay nabuhay muli upang ipahayag ang gayong kataksilan. Biglang hinimatay si Padre Salvi dahil sa sobrang takot. Binanggit dito na habang nagsasalita ang espinghe, nakatitig ito sa prayle. Ang espingheng ito ay si Simuon. Kinabukasan, ipinag-utos ng gobernador ang pagbabawal kay Mr. Leeds na magtanghal sa Quiapo. Ngunit bago pa ito, siya at tumungo na sa Hongkong dala na ang sikreto nila ni Simuon. Napakagaling ni Mr. Leeds. Siya ay isang taong magaling maglihim sa mga bagay na dapat lamang isatago para sa ikabubuti ng nakararami. Siya rin ay napakabuti sa mga taong nakapaligid sa kanya. Itinatrato niya ang lahat sa kanyang tanghalan ng may pagrespeto at paggalang. Mga Gabay na Katanungan… Anu-ano ang mga katangian nila na mamasid at umiiral parin ngayon sa ating lipunan? Bakit? Patunayan. Hindi pa natatapos hanggang ngayon ang papel na ginampanan ng bawat tauhan sa El Filibusterismo. Sila ay nanatiling buhay pa rin ngayon na maaari nating Makita sa ating lipunan, pamahalaan, paaralan at maging sa ating simbahan. Ang dalawang tauhan na sina Ben Zayb at Mr. Leeds ay ilan lamang sa mga tauhan ng El Felibusterismo na maaari pa ring Makita hanggang sa ngayon.
Mga Katangian ni Ben Zayb
Una, si Ben Zayb, siya ay isang magaling na manunulat (journalist) kung ihahalintulad sa kapanahunan natin ngayon. Sinasabing kaya niyang baguhin ang bawat detalyeng kaniyang isinusulat at naniniwala siyang kaya niyang paniwalain ang sinumang makababasa nito maging ang mga Indio. Mahilig magsulat ng sariling bersyon ng mga pangyayari o balita. Ipagsasawalang bahala ang lahat maging ang katotohanan alang-alang sa Espanya. Siya ay isang mamamahayag na may kinikilingan tulad na lamang sa pag-ayon niya kay Don Custodio na isang sikat at mayaman na tao. Magaling siyang pumuri ng mga tao kaya’t ang hangad niya’y papuri rin mula sa kanila. Walang hinangad si Ben Zayb kundi ang magkaroon sana ng krimen araw-araw para siya ay may maisulat sa kanyang pahayagan. Lagi rin siyang umaayon sa bawat sabihin ng mga prayle at ng kaniyang mga kaibigan at ni kailanman ay hindi siya tumutol sa panukala ng mga ito. Malimit niyang ibilang ang kaniyang sarili sa iilang taong matalino kuno at naniniwala siyang ang talino niya ay karapatdapat lamang sa manunulat, mamamahayag na tulad niya. Ang mga artikulo na kaniyang isusulat pa lamang ay sinasabi na niya agad at ipinapahayag sa publiko at taumbayan, kung baga advance siyang mag-isip. Sa bawat argumento niya ay lagi niyang hinahaluan ng siyensya lalo na sa pakikipagtalo sa relihiyon. Si Ben Zayb ay isang taong punong-puno ng pagdududa. Lagi niyang tinatanong ang mga bagay-bagay isa na rito ang tungkol sa mahika ni Mr. Leeds. Siya rin ay isang taong palaban at mahilig sa kumpetensya. Nagpupuyat siya sa paggawa ng kaniyang balita at ginagawa niyang pinakamaganda ito. Kaya nga naiinsulto at nagagalit siya kay Horatius sa tuwing nilalait nito ang kaniyang artikulong isinulat.
Si Ben Zayb Ngayon
Sa ating kapanahunan ngayon sila ay yaong mga taong mamamahayag (journalist) o reporter ng balita. May mga ilan sa kanila na maaaring katulad ni Ben Zayb ngayon. Ilan sa kanila ay may kinikilingan na laging ang front liner ng kanilang mga article ay yaong mga sikat at mga kilalang tao lamang nang sa gayon ay mapapalapit sila sa mga ito at upang sila ay makikilala rin ng mga tao. Hindi sila padadaig kanino man maisulat lamang ang kanilang pinakamagaling at pinakamagandang balita. Magaling silang gumamit ng mga mapalamuting salita upang mas mapaganda ang kanilang artikulo kahit ito ay pawang walang kalamanlaman. Ang masakit pa nito ay pili lamang ang mga balitang kanilang ilalahathala at pilit na itatago ang mga balitang dapat na malaman ng taumbayan. Tulad ni Ben Zayb tuwangtuwa din sila kapag may krimen at isyu silang mapag-uusapan sa kanilang mga isusulat o ipapahayag. Magaling din silang maglagay ng mga scientific feature sa mga article na siyang ginagamit ni Ben Zayb sa bawat diskusyon niya. Ibig nilang malaman ang lahat at malimit din nilang pagdudahan ang mga bagay-bagay at kapag nalaman naman ang totoo ay kanila namang itatago. Malaki ang impluwensya ng mga mamamahayag at tagapagbalita ngayon sapagkat madali nilang napapaniwala ang mga mamamayan sa mga bagay-bagay.
Mga Katangian ni Mr. Leeds
Si Mr. Leeds ay isang napakabait na tao at napakagalang sa lahat ng nakapaligid sa kanya. Hinahayaan niya ang lahat na siyasatin ang mga bagay-bagay bago at pagkatapos ng kaniyang pagtatanghal, ngunit nakikiusap siya na manahimik ang lahat kapag nagtatanghal na siya. Kaibigan ni Simuon. Napakamisteryosong tao at magaling magtago ng lihim na alam niya kung kailan, saan at kanino lamang sasabihin ang mga ito. Sinasabi pa na siya ay napakaagap na tao. Para hindi siya maimbistigahan ng gobernador ay bigla siyang lumipad patungong Hongkong dala ang lahat nilang sikreto ni Simuon.