Si Mildred ay inang may dalawang anak. Iniwan niya ang mga ito sa kaniyang asawang tricycle driver sa kanilang bayan sa Bambang, Nueva Viscaya, upang mamasukan bilang isang domestic helper sa Hongkong. Sa umpisa, maayos naman ang kalagayan ni Mildred subalit ang lahat ay nagbago noong 2007 nang siya ay pinagsamantalahan ng kaniyang amo. Katulad ng isang disenteng Pilipina, si Mildred ay nagreklamo sa mga awtoridad sa Hongkong sa ginawa sa kaniya at umalis bilang katulong sa kaniyang amo. Ang masaklap sa regulasyon pala ng pamahalaan ng Hongkong, pinagbabawalang ma-empleyo ang complainant kapag ang kaso nito ay naka-pending pa sa korte tulad ng kaso ni Mildred. Kaya sa isang iglap biglang naglaho ang magandang kinabukasang pangarap ni Mildred sa kaniyang mga anak. Nahinto sa pag-aaral ang kaniyang mga anak, at siya mismo ay hindi malaman kung papaano susuportahan ang sarili sa Hongkong Kaya napilitan si Mildred na mamuhay katulad ng scavengers na ating nakikita rito sa atin na naghahalungkat sa mga basurahan upang makahanap ng mga bagay na maaaring ipagbili upang kumita. Sa kaso ni Mildred, ito ay mga lata ng softdrinks, mga cardboards at iba pa na maaaring mabenta, at kahit papaano’y nakapagbibigay sa kaniya ng HK$38 o Php228 sa isang araw kung siya ay palarin na makakuha ng marami-rami nito sa mga basurahan. Ganito ang naging buhay ni Mildred sa Hongkong sa loob ng mahigit sa isang taon hanggang sa ngayon. Subalit posibleng magbago na ito kahit papaano matapos mangyari ang isang dakilang desisyon na kaniyang ginawa noong April na talaga namang kahanga-hanga at maipagmamalaki nating mga Pilipino. Noong April 24, habang si Mildred at ang kaniyang kasama ay naghahalungkat ng basura sa kanto ng Pottinger Street at Des Voeux Road sa Yueng Long area doon sa Hongkong, siya ay nakadampot ng isang envelope na ng kaniyang buksan ay tumambulad sa kaniyang paningin ang maraming dolyar at mga tseke. Ayon sa report, ang pera ay may kabuuang cash na $176,000 na binubuo ng tig-iisang libong dolyar at mga tseke sa US dollars at Hongkong dollars. Ang kabuuang halaga na nakapaloob sa envelope kung pagsasamahin ang cash at tseke ay umaabot sa HK$350.545 o nasa P2.1 million sa peso. Ang una niyang naisip ay tawagan ito at alamin kung ito ang tunay na nagmamay-ari ng naturang pera upang kaagad niya itong maisauli. Subalit dahil sa lagpas na sa office hours ng siya ay nakatawag nag-iwan na lamang siya ng mensahe sa recorder tungkol sa perang napulot niya at nais niya itong isauli sa tunay na nagmamay-ari. Kinabukasan, nakipagkita sa kaniya ang isang opisyal ng kompanya kasama ang empleyado na may dala ng nawalang pera na dapat pala ay idedeposito niya sa banko. Sobra ang pasasalamat ng mga ito sa ginawa ni Mildred at bilang pagtanaw ng utang na loob, binigyan nila si Mildred ng isang lata ng butter cookies. Sa isang panayam, sinabi ni Mildred na nahirapan daw siyang matulog sa pag-iisip sapagkat napakalaki ng halagang kaniyang napulot at sobra o higit na ito sa kakailanganin niya upang makauwi na rito sa Pilipinas. Subalit naisip din daw niya na baka ang taong nakawala ng pera ay isang ordinaryong empleyado lang na may pamilyang umaasa rin sa kaniya at maaaring mawalan ng trabaho dahil sa pagkawala niya ng pera. Hindi raw makaya ng kaniyang konsensiya na itago ang pera sapagkat habang buhay ito ay magpapahirap sa kaniyang kaisipan. Kaya minabuti niyang ibalik ang pera sa tunay na may-ari. Kinikilala ng Provincial Government ng Nueva Viscaya ang ginawa ni Mildred sa pamamagitan ng pagpasa ng isang resolusyon na nagbigay puri sa kaniya “for her display of exemplary honesty”. Bilang pasasalamat ang provincial government ng Nueva Viscaya ay naglaan ng Php50,000 bilang initial assistance sa pamilya ni Mildred.