Ang pagpapakitang-turo ay isa sa mga gawain na aming isinagawa sa aming
medyor sa Filipino sa asignaturang F110 Paghahanda at Ebalwasyon ng Kagamitang Panturo. Bawat isa sa amin ay inatasang magpakitang-turo bilang paghahanda na din sa aming nalalapit na pagpapakitang-turo sa aktwal na klase pagsapit namin sa ika-apat na taon sa kolehiyo. Inatasan kami na gamitin ang mga maikling kwentong aming sinuri para maging paksa sa aming pagpakikitang turo. Ika-pito ako sa nagpakitang-turo sa aming klase kaya naman ginawa ko ang lahat ng aking makakaya para mapaghandaan ito. Gumawa ako ng masusing banghay na magiging gabay ko sa aking pagpapakitang turo. Pumili din ako ng mga angkop na istratehiya na aking gagamitin para maisakatuparan ang layunin na aking tinakda. Ginamit ko din ang kaalamang aking natutunan sa pagpili ng nararapat na kagamitang panturo, gumamit ako ng graphic organizer na aking natutunan na aangkop sa paksang aking tatalakayin. Shempre kinondisyon ko rin aking sarili sa gagawing pagpapakitang-turo, humugot ako ng lakas ng loob sa mga taong walang sawang sumusuporta sa akin. Bago pa man ako magpakitang-turo ay pinag-aralan ko din ng mabuti ang mga dapat tandaan sa pagpapakitang-turo pati na rin ang pamantayan sa pagmamarka na binigay sa amin.
Araw ng Lunes nang ako’y magpakitang-turo sa oras na 9:30 ng umaga hanggang
10:30 nito. Sinimulan ko ang aking pagpapakitang-turo sa isang panalangin na pinangunahan ni Bb. Rizza Jamisola. Sinundan ito ng pagpapa-ayos ko ng silid sa klase katulad ng pagpapapulot ng mga kalat sa sahig at pati na rin pagpapa-ayos ng mga upuan at ng kanilang sarili. Matapos ito ay tinanong ko ang klase kung mayroon bang liban. Nagsimula ang daloy ng aking pagpapakitang-turo sa pagtuturo ko ng isang awitin sa aking klase na pinamagatang “Ako’y Isang Komunidad.” Pinili kong simulan ang aking klase sa ganitong motibasyon para makuha ang kanilang interes at mabuhay ang kanilang mga diwa at ganahang makinig sa aking pagtuturo. Masaya naman ang kinalabasan ng aking motibasyon dahil nagustuhan ng aking mga mag-aaral ang awitin at sayaw na itinuro ko sa kanila. Sinundan ko naman ito ng isa pang laro na 4-pics-one-word na kung saan may pinakita akong mga litrato sa estudyante at hinayaan ko silang hulaan kung ano ang pinapakahulugan ng mga larawang iyon. Pinaliwanag ko din sa kanila na ang mga larawang iyon ay may kaugnayan sa magiging aralin namin. Aktibo namang nakilahok ang mga mag-aaral sa nasabing laro at kanila ding nahulaan ang nais ipakahulugan ng mga larawan. Pakatapos ng mga isinagawang paunang gawain, akin nang inilahad sa klase ang magiging paksa namin ngayong araw at ito nga ay ang maikling kwentong “Tatlong Kwento ng Buhay ni Julian Candelabra” na isinulat ni Lualhati Bautista. Bagama’t may kaunti ng kaalaman ang mga mag-aaral sa aralin ay muli ko pa ring binalikan ang kwento. Binigay ko sa kanila ang mga mahahalagang pangyayari sa kwento sa pamamagitan ng paggamit ng Storyboard, may pinakita akong mga larawan sa kanila na talaga namang naglalarawan sa mahalagang pangyayari sa kwento, akin itong pinaliwanag at binigyan ko din ng pagkakataon ang mga mag-aaral na magbahagi din ng kanilang nalalaman sa aralin. Matapos ito, ay nagpatuloy na kami sa pagsusuri ng maikling kwento at para maging masaya ang aming talakayan ay gumamit ako ng istratehiyang pagtuklas sa “Lihim ng Mahiwagang Kahon.” Ang mahiwagang kahon na ito ay naglalaman ng mga katanungang may kaugnayan sa aming aralin, pina-ikot ko ang mahiwagang kahon sa klase sa saliw ng kantang tinuro ko sa kanila. Ang sinumang huling matatapatan ng mahiwagang kahon ay siyang bubunot dito at sasagutin ang nabunot na katanungan. Iikot ang kahon na ito sa buong klase hanggang sa maubos ang mga katanungang naroon. Naging masigla ang aming talakayan at naging aktibo ang lahat sa pagsusuri namin ng maikling kwentong “Tatlong Kwento ng Buhay ni Julian Candelabra.” Para naman sa pagpapalalim ng pag-unawa ng aking mga mag-aaral ay gumamit ako ng “Cause and Effect Chart” upang tukuyin ang mga suliraning kinaharap ng pangunahing tauhan sa kwento at ang naging sanhi at bunga nito. Para naman sa binigay kong paglalapat sa aming natalakay na aralin ay inatasan ko ang klase na magsulat ng pangyayari sa kanilang buhay na may pagkakatulad sa naging tema ng kwento, akin itong pinasulat sa isang kalahating papel at ang maswerteng dalawang mag- aaral na nabunot ko upang basahin ang kanilang nagawa ay sina Bb. Krisha Gantalao at Bb. Allona Mae Jejillos. At para malaman ko kung naunawaan talaga ng klase ang aming talakayan ay binigyan ko sila ng maikling pagsusulit. Naging madali para sa klase ang pagsagot ng pagsusulit na binigay ko kaya naman halos 99% sa kanila ang nakakuha ng 100% na marka. Nagtapos ang aking pakitang-turo sa pagbibigay ko ng takdang aralin sa klase na kung saan inatasan ko silang gumawa ng tula tungkol sa mga kinaharap nilang suliranin sa buhay at kung paano nila ito nasolusyunan, pinasulat ko ito sa isang buong papel at inaasahan kong ipapasa kinabukasan.
Napakagandang karanasan ang pagpapakitang-turo dahil kahit sa isang simpleng
pamamaraan ay naranasan ko ito at aking napagtagumpayan. Sa aking pagpapakitang- turo maraming bagay ang nalaman at natutunan ko, hindi pala talaga madali ang pagiging tagapagdaloy ng klase, napakahirap dahil magsisimula ka talaga sa sistematikong pagpaplano ng iyong aralin, kung paano mo ito ibibigay sa iyong mga mag-aaral at kung ano ang nararapat na kagamitang panturo ang naaangkop sa iyong layunin. Tunay ngang mahirap ngunit pakatapos mong maisakatuparan ang lahat ng ito’y makakaramdam ka ng matinding kasiyahan. Ngayon pa lang ang nasasabik na akong maging isang ganap na guro at kapag dumating ang araw na iyon ay gagawin ko ang lahat ng aking makakaya upang maging isang epektibong guro sa aking mga mag-aaral.