KAMALAYAN SA KASAYSAYAN SA PAGSASAWIKA NG KARANASAN TUNGO SA
BAYANIHAN SA PANAHON NG KRISIS AT PANDEMYA
I.
Ilang Buwan narin tayong
Nasa gitna ng pandemya
Ilang buwang pagtitiis
Dulot ng takot sa Corona
Subalit di lang ito
Ang nasaksihan ng aking mga mata
Hindi na ako magbubulag-bulagan
Panahon na para akoy magsalita
Panahon na para gisingin ang
Natutulog nating diwa
II.
Mula sa telebisyon at social media
Kaliwa`t kanan ang parehong
Balitang maririnig
Unti unting pagtaas ng kaso`t
Bansa`y wala sa tamang tindig
Gulantang ang masa,
Balot ng takot ang madla
Ang kinabukasan ba`y
Matatanaw ko pa?
III.
Sakabila ng mga pagsubok
Na kinakaharap ng bawat isa
Nasaksihan ko ang paglitaw ng nakakubling
problema
Isang bagong banta,
Bantang siyang susubok sa kapalaran ng bansa
IV.
Pinipilit kong isiping
Tayong mga Pilipino`y may pagkakaisa
May pinanghahawakang dignidad
At disiplina
Subalit saking nasaksihan
Ang lahat ay mali na,
Sinubok ng pandemya ang moralidad
At ang ating pagkakaisa
V.
Naaalala ko kung paano lamangan
Ng Pilipino ang kapwa Pilipino,
Sunod-sunod na protesta
Dahil sa paglabag sa karapatang pantao,
Pagkagutom ng karamihan
Nakakulong na parang preso
At di matigil na korapsyon
Na nagdulot ng kawalan ng tiwala
Ng mga tao sa gobyerno
VI.
Naisantabi ang tunay na kaaway
Dahil sa nakapang-gagambalang senaryo
Ito ba? Ito ba ang ugali ng isang Pilipino?
Kaaway ang Kaaway At kaaway ang kakampi?
Hanggang kailan pa ba tayo di magkakasundo?!
Kulang pa rin ba ang pagdurusang
Ibinabato mula sa langit
Para tayo`y matino?
Dapat ko na bang tanggapin ang katotohanang..
Hindi na tayo magkakaisa`t
Kinabuksa`y bigla nalang tayo maglalaho?
VII.
Sa kawalan ng atensiyon
Sa tunay na problemang
Nagdulot ng away at gulo
Lingid sa ating kaalaman
Ang labang sinusuong ng mga bagong bayaning
Pilipino
Sila ang mga frontliners tapat sa katungkulan
At handang magsakripisyo
Haharapin ang unos
Alang-alang sa buhay ng kapwang nasa gitna ng
alimpuyo
VIII.
Hindi maitatanggi ang ipinamalas
Nilang katapangan
Marahil kung wala sila`y
Wala na tayong kahahantungan
Kahanga hangang katapangan
Para sa mga bayaning nasa unahan
Mga bagong mandirigmang
Tunay at patuloy sa paglaban
IX.
Ngunit sa likod ng kanilang kabayanihan,
Sadya ba talagang matapang sila?
Naisip mo ba minsan kung may takot rin sila?
Sapagkat ang katotohanay
OO, sa bawat araw ng kanilang pakikibaka
Laban sa kaaway na di nakikita,
Nandiyan ang takot, alinlangan.. at kaba
X.
Ang kaligtasan may walang kasiguraduhan
Puno man ng pagaalalang
Pamilya pa ba`y mauuwian?
Sila`y naririyan,
Hinaharap ang sigwa`t patuloy sa paglaban
Kahit posibleng makauwi sa pamilya
Bilang isang alabok na lamang
XI.
Ang lahat ay may takot
Subalit ang kanilang responsibilidad
Ang siyang bumubuo ng kanilang katapangan
Upang labanan, harapin, suungin
At tumalon sa kawalan
XII.
Ngayon kayo ay aking tatanungin:
Tayo bay ganito na lamang?
Habang sila`y nasa bingit ng kamatayan
Ay patuloy parin tayo sa pagbabangayan?
Habang unti unti silang pinanghihinaan
Tayo ba`y patuloy sa paglalamangan?
Magkukubli na lamang ba tayo`t hahayaang
mawala ang ating mga karapatan?
Mananatili na lamang ba tayo sating mga
pedestal at tatalikuran ang responsibilidad na
dapat panagutan?
XII.
Mga kapatid sanay ating pahalagahan!
Ang walang tigil na harap harapang
Pakikipaglaban ng mga kawani ng kalusugan!
Sanay ating pahalagahan!
Mga taong handang sumuong sa daan,
Maipagsigawan lamang ang boses ng
karamihan,
Maipaglaban ang karapatang pantao at
matulungan ang mga nangangailangan!
Sana ating pahalagahan
Ang sakripisyong ginagawa ng mga social
worker, militar at lahat ng frontliner para sa
ating kaligtasan
Sanay ating pahalagahan
Ang mga makataong Pilipinong patuloy sa
pagtulong sa bawat tahanan
At sanay ating pahalagahan
Ang lahat ng mga guro at kagawaran ng
edukasyon
Na nagsusumikap na pagaaral nati`y makamtan!
Sanay atin silang pahalagahan
SAPAGKAT HINDI NATIN MAISASAGAWA
ANG ISANG ADHIKAIN KUNG PATULOY TAYONG
MAGBABANGAYAN
XIII.
PANAHON NA MGA KAPATID!!!
Isantabi na natin ang mga hidwaan,
Harapin na naten at tapusin ang nagiisang
kalaban
Panahon na para magbayanihan
Ipakita ang tunay Pagka-Pilipino
Sa pagmamalasakit at pagdadamayan
Tayong lahat ay may takot at kahinaan
Subalit Patuloy tayong babangon at magkakaisa
PARA SA ATING MAHAL NA INANG BAYAN!