Fans, dismayado sa
‘mahal’ na presyo
ng tiket para sa
Manila leg ‘Hello’
tour ng K-pop
group TREASURE
Mas mahal pa sa BLACKPINK!
Trending sa Twitter ang pagkadismaya
ng fans ng K-pop group na
TREASURE matapos ang anila’y
hindi makatarungang presyo ng tiket
para sa comeback concert ng grupo sa
bansa.
Sa anunsyo ng Live Nation Philippines
nitong Martes, ang opisyal na event
promoter ng inaabangang “Hello”
Tour ng K-pop group sa Pilipinas,
ibinahagi nga nito ang kabuuang ticket
prices at perks packages na maaaring
pagpipilian ng fans.
Mula sa general admission na P3,500,
aabot hanggang P19,500 ang
pinakamahal na ticket prices kalakip
na ang soundcheck at send-off perks
ng fans.
Ngayong araw din nagbukas ang
registration para sa online membership
ng fans na maaaring mauna sa
tinatawag na “Fanclub Presales” sa
darating na Enero 19.
Kasunod ng mga detalyeng ito, agad
namang nagpahayag ng pagkadismaya
ang maraming Pinoy fans ng K-pop
group, o ang “Treasure Maker” sa
anila’y mahal na presyo ng tiket.
Trending topic sa Twitter ang “ANG
MAHAL,” “LOWER THE PRICE” na
pinasimulan ng dismayadong fans para
almahan ang presyo ng tiket na
ipinagpapalagay nilang pakana ng
nabanggit na show operator.
Ilan sa kanila ang nagpuntong mas
mahal pa ang itinakdang presyo para
sa show ng TREASURE kumpara sa
naglalakihang K-pop groups kagaya ng
historic at soldout na “Be The Sun”
concert ng SEVENTEEN sa Philippine
Arena kamakailan, sa nalalapit na two-
day Bulacan leg ng “Born Pink” world
tour ng BLACKPINK sa parehong
venue sa Marso 2023, at sa
nakatakdang “Checkmate” Manila
concert din ng ITZY ngayong Enero
14-15.
Guro-vlogger sa
Misamis
Occidental, may
libreng almusal
sa mga mag-
aaral
Teacher Jeric Bocter Maribao
(larawan mula sa FB)
Patuloy na kinalulugdan ng mga
netizen ang viral teacher-vlogger
na si Teacher Jeric Bocter
Maribao, guro sa Bag-ong
Anonang Diut Elementary School
sa Bonifacio, Misamis Occidental,
dahil bukod sa kaniyang energetic,
kakaiba, at malikhaing paraan,
estratehiya, at teknik sa pagtuturo,
may libreng pa-almusal din siya sa
kaniyang mga mag-aaral.
Ibinahagi ni Teacher Jeric ang
kaniyang inihandang almusal para
sa mga mag-aaral ngayong
Martes, Enero 10.
“Our Breakfast for Tuesday”
Naniniwala umano ang guro na
kailangang busog ang tiyan at
malusog ang pangangatawan ng
mga mag-aaral bago magsimulang
mag-aral.
Bago kumain ay kinakailangan
munang magdasal at
magpasalamat ang mga mag-aaral
para sa mga biyayang
matatanggap nila.
Marami naman sa mga netizen ang
patuloy na nabe-bless at
nabibigyan ng inspirasyon dahil sa
dedikasyon ni Teacher Jeric sa
kaniyang propesyon.
Mapapanood ang mga video ni
Teacher Jeric sa kaniyang channel
na “Jerics Channel”.

‘Bahay-jeep’
kinabiliban
ng netizens
Larawan: Francis Cañaveral Amoros/ FB
‘’Bahay na, pang-travel pa!’’
Viral ngayon ang nakamamanghang likha
ni Francis Cañaveral Amoroso, mula sa
Dasmariñas Cavite, matapos niyang
ibahagi sa kaniyang Tiktok account ang
ideyang ‘bahay-jeep’ – isang jeep na sa
halip na dalawang mahabang bangko para
sa mga pasahero, ito ay may kama, maliit
na kusina, upuan, at comfort room.
Ang pagkahilig niya sa pag-travel at
panonood niya ng mga video tungkol sa
‘van life’ ang naging inspirasyon niya sa
paggawa ng ‘bahay-jeep’. Naikuwento rin
niya na mas mura ang jeep kaysa bumili
pa ng van o bagong sasakyan.
Aniya, “Yung inspirasyon talaga ng jeep o
story ng jeep, bata pa lang ako talagang
pangarap ko na ang mag-travel at malibot
ang buong mundo, at gamit itong bahay-
jeep ikutin ko muna yung buong Pilipinas.
Mahilig din akong manood ng ‘van life’ sa
ibang bansa o yung bus na ginawang
bahay. So, dito sa Pinas, naisip ko na
bakit hindi pwedeng gawin yung jeep mas
maraming available at mura siya kaysa
bumili ng bagong sasakyan o bus.”
Nasimulan na nila ang paglilibot noong
Mayo 2022 sa Bicol, Sorsogon, Albay,
Camarines Sur, Quezon Province, 
Batangas, Maragondon, at Naic Cavite,
gamit lamang ang bahay-jeep.
Naikuwento rin niya na hindi umano
maiwasan ang mga challenge sa 
pagkakaroon ng bahay-jeep at sa
paglilibot, dahil sa gastos sa gasolina at
ang maintenance nito.
“Yung challenges na naranasan namin sa
bahay-jeep ay yung gasolina, siguro dahil
mas malaki siya kumpara sa ordinaryong
sasakyan kaya mas malakas siya mag
konsumo ng  gasolina. At sa amin kasi,
ako, wala pa akong masyadong alam sa
pagmemekaniko, ‘yan minsan ang naging
problema namin, dapat yung kasama
naming sa jeep o driver naming ay
marunong tumingin sa ilaw, wirings o
kaya kung masiraan man yung sasakyan
dapat papaano meron siyang solusyon.
Hindi rin mawawala yung challenge sa
paghahanap ng parking,” paglalarawan
niya.

Dagdag pa niya, sa pag-customize at

presyo ng jeep ay hindi lalagpas ng 600k
ang nagastos niya.
“Yung nagastos namin sa paggawa ng
jeep, umabot ng 200k na siguro, yung
paglagay ng kwarto, Kusina, CR, sala,
makina, wirings at kasama yung
maintenance. Ang presyo ng jeep ay
nagkakahalaga ng 300K,” pagbabahagi
niya.
Maraming netizens ang natuwa at na-
inspired sa ideyang ibinahagi ni Francis.
Sey ng mga netizens na  magandang
konsepto ito upang simulan nila ang
pang-travel. 
Voter registration,
matumal pa rin; publiko,
hinikayat ng Comelec na
magparehistro na
Hinikayat ng Commission on Elections
(Comelec) nitong Martes, Enero 10, ang
publiko na magtungo na sa mga local
Comelec offices at satellite registration
sites sa mga malls upang magparehistro
para sa 2023 Barangay at Sangguniang
Kabataan Elections (BSKE).
Ayon kay Comelec Chairman George
Garcia, hanggang nitong Lunes, Enero 9,
2023, ay nasa halos 400,000 pa lamang
ang nagparehistro para sa eleksyon.
Wala pa aniya ito sa kalahati ng 1.5
hanggang 2 milyong bagong registrants na
target nilang mairehistro mula Disyembre
12, 2022 hanggang Enero 31, 2023.
Maaaring dulot na rin aniya ito ng
mañana habit ng mga Pinoy.
“So far po hanggang kahapon, kulang-
kulang na 400,000 pa lamang ang
nagpaparehistro na ating kababayan. Ang
atin pong expectation sana mula
December 12 hanggang sa katapusan
nitong January ay makapagparehistro
tayo ng 1.5 to 2 million voters subalit
ganyan pa lang karami ang
nagpaparehistro,” ani Garcia, sa isang
panayam.

Paalala pa niya sa publiko, ang

pagpaparehistro ay obligasyon at ang
pagboto ay karapatan ng bawat
mamamayan.