Dhaloota Hojii Uummatu

1. Seensa

Biyya keenya keessatti yeroon amma keessa jirru yeroo humni nama baratee dhaabbilee
Barnoota Olaanoo irraa eebbifamuun baay’inaan oomishamaa jiranidha. Humni nama baratee
kun ammoo, carraa hojii bal’inaan argachuudhaan jiruuf jireenya isaa fooyyeffachuu bira darbee
guddina dinagdee biyyaa utubuutu isarraa eegama. Haata’umalee, dargaggootni hedduun
ogummaa qabaniin hojii uummachuun of jijjiiranii dinagdee biyyaa jijjirurra miindeffamanii
hojjechuu akka filannoo dursaatti ilaaluun bal’inaan ni mul’ata. Kanaafuu, ilaalcha
dargaggootaa hojii eeggachuurraa gara ogummaa gonfataniin hojii uummachuutti jijjiiruun
dhaloota aadaa hojii gonfate uumuun barbaachisaadha.

Mootummaan Naannoo Oromiyaas hawaasa ogummaa gonfateen carraa hojii uummachuu

danda’u uumuuf xiyyeeffannoo addaa kennee hojiilee abdachiisoo ta’an heedduu hojjechaa jira.
Biiroon Carraa Hojii Uumuufi Ogummaa Oromiyaas ergama humna namaa ogummaan leenji’ee
ga’oome horachuufi carraa hojii bal’inaan uumuun badhaadhina Oromiyaaf gumaacha gochuu
qabatee hojii bal’aa hojjechaa jira. haata’umalee, hojiin dhaloota hojii uummatu uumuu imala
dheeraa kan gaafatu ta’uu hubachuun nama hin rakkisu.

Barreeffamni kunis, hojii uummachuun maal akka ta’e, dhaloota hojii uummachuu danda’u
uumuurratti muuxannoon biyyoota kaanii maal akka fakkaatu, tooftaalee ittiin dhaloota hojii
uummatu uumuun danda’amu, dhaloota hojii uummatu uumuuf akka Mootummaa Naannoo
Oromiyaatti hojiileen hanga ammaatti raawwataman maalfaa akka ta’aniifi gara fuulduraattis
dhimmoota akkamiirratti xiyyeeffatamuu akka qabu kan haammatedha.

2. Maalummaa Hojii Uummachuu

Maalummaa hojii uummachuu ilaalchisee yaada adda addaatu kaa’a. Hayyoonni damee dinagdee
hiika interpiriinerummaa ilaalchisee qaaccessa hedduu kan kennan yoo ta’u, akka waliigalaatti
hunduu interpiriinerummaa gocha sochii hawaasummaafi dinagdee kan ilaalchifi yaanni
interpirinerichaa bakka guddaa qabatee jijjiirama dinagdee dhuunfaas ta’e biyyaarratti fidu ta’uu
irratti waliigalu. Dhaabbanni Idil addunyaa ‘Global Entrepreneurship Monitor (GEM) akka
jedhuttis hojii uummachuun ykn interpiriinerummaan galii maddisiisuufi oomishaalee irratti sona
dabaluun duudhaa hawaasa tokkoo ol kaasuufi lammii hojii uummatu qabaachuun biyya ijaaruu
keessatti dhimma murteessadha.

Hawaasni akka hawaasaatti rakkoo dinagdee keessaa ba’ee hojii uummachuuf ilaalchiifi yaanni
inni hojii uummachuu irratti qabu murteessadha. Kanamalees, hawaasni ilaalchaafi yaada hojii
uummachuu qabu badhaadhina maatii mirkaneessuu bira darbee badhaadhina biyyaa
mirkaneessuu keessatti shoora olaanaa kan taphatu ta’a.

Biiroon Carraa Hojii Uumuufi Ogummaa Oromiyaas ergama barnootaafi leenjii ga’umsaafi
qulqullina qabu kennuun hawaasa ogummaa gonfateen hojii uummmachuu danda’u uumuudhaaf
xiyyeeffannoon hojjechaa jira. Kanamalees, dhaloota hojii eeggatu osoo hintaanee dhaloota
ogummaa gonfateen carraa hojii uummachuudhaan hojjatee of jijjiiruudhaan, ijaarsa biyyaa
keessatti ga’ee isaa ba’achuun badhaadhina sadarkaa maatiifi biyyaatti mirkaneessuu danda’u
horachuuf xiyyeeffannoon hojjetamaa jira.

3. Barbaachisummaa Hojii Uummachuu

Ogummaa gonfatanii hojii uummachuun bu’aa hedduu qaba. Isaan keessaa muraasa akka armaan
gadiitti ilaaluun ni danda’ama.

A. Hojii Dhabdummaafi Hiyyummaa Hir'isuuf

Hojii barbaaddoonni ogummaa gonfataniin carraa hojii itti fufiinsa qabu uummachuun hojii
dhabdummaafi hiyyummaa xiqqeessuu keessatti gumaacha guddaa qaba. Hojii uummachuun
galiin lammiilee kan guyyaa akka dabalu gochuudhaan tasgabbii siyaasdinagdee biyya tokkoo
keessattis hiika guddaa ni qabaata. Kana malees, ilaalcha interpiriinerummaa cimsuufi
jajjabeessuun dhaloota hojii uummachuu bira darbee namoota biroof carraa hojii uumuu danda’u
horachuuf murteessaadha.

Kanaafuu, lammiileen hojii akka uummatan taasisuun hojii dhabdummaa xiqqeessuu bira darbee
hiyyummaa hir’isuufi guddina dinagdee biyyaa mirkaneessuu keessatti ga’ee guddaa ni qabaata.

B. Tasgabbii Gabaafi Dinagdee Uumuuf

Hojii uummachuufi guddinni dinagdee walitti dhufeenya guddaa qabu. Namoonni carraa hojii
uummatanii hojiitti galan dinagdeen tasgabbaa’oodha. Keessumattuu, carraa hojii damee
manufaakchariingiifi qonnaa irratti uumamuun hawaasni bitataa ta’uu irraa gara oomishaa
ta’uutti akka ce’an waan taasisuuf, gumaachi inni qaala’insa gabaa tasgabbeessuufi oomisha alaa
galan biyya keessatti bakka buusuuf qabu baay’ee guddaadha. Kanaafuu, lammiileen carraa hojii
akka uummatan taasisuun tasgabbiin gabaafi dinagdee akka jiraatu gochuudhaan hawaasa
dinagdeen humneessuufi jireenya lammiilee fooyyessuuf ga’ee guddaa qabaata jechuudha.

C. Galii Biyyaa Guddisuuf

Hojii uummachuun galiin biyya tokkoo akka guddatu gochuu keessattis shoora olaanaa taphata.
Namoonni hojii uummatanii hojiitti yommuu galan hojii hojjetan irraa gibira kaffaluun galiin
biyyaa akka guddatu taasisuu keessatti ga’ee guddaa ni qabaatu. Kunis, kallattii lamaan
ilaalamuu danda’a. Gama tokkoon oomishaalee alaa galan biyya keessatti bakka buusuu yemmuu
ta’u, gama biraan alergii dabaluun sharafa biyya alaa argamsiisuun galii biyyaa guddisuu
keessatti ga’een hojii uummachuu guddaadha. Haala kanaan galiin nama dhuunfaa dabale
jechuun, galiin biyyaa dabaluu waliin hariiroo kallattii qabaachuu kan namatti agarsiisudha.

4. Dhaloota Hojii Uummachuu Danda’u Uumuu Ilaalchisee Muuxannoo Jiru

Dhaloota hojii uummachuu danda’u uumuu irratti biyyootni adda addaa muuxannoowwan
garaagaraa qabu. Muuxannoo biyyoota ariitiin guddachaa jiranii keessaa kan akka Indiyaa hojiin
isaan dhaabbilee leenjii keessatti qorqalbii lammiilee ijaaruu irratti hojjetan guddina har’a irra
ga’aniif gummaacha olaanaa taasisee jira. Biyyi Indiyaa warraaqsa eebbifamtoonni dhaabbilee
leenjii ittiin hojii jalqaban labsuun, eebbifamtoonni ilaalcha hojii barbaaduurraa gara hojii
uummachuutti akka dhufaniif hojii guddaa raawwatan akka muuxannootti ilaaluun
barbaachisaadha.

Dhaabbanni Barnootaafi Ogummaa AICTE jedhamu biyya Indiyaa keessatti kaka’umsa

ogummaawwan yeroon irra darbe fooyyessuu irratti ijjannoo cimaa fudhate. Sagantaan kun akka
milka’u taasisuuf Pirezidaantiin Indiyaa sadarkaa biyyoolessaatti labsii ‘AICTE National Student
Startup Policy’ kan barattoonni koolleejjii pirojektii xumura eebba isaanii gara “campus start-
up” ykn hojii uummachuurratti akka xiyeeffatu dirqisiisu labsan. Kana malees,
Yunivarsiitiiwwan biyyattiis warreen muuxannoo hojii uummachuuf fedhii horachuu jalqabaniif
deeggarsa interpirinershiippii digirii isaanii waliin akka kennuuf taasifame. Sirna baruufi
barsiisuu isaanii irrattis jijjiirama bu’uuraa taasisan. Sirnichis, leenjifamtoonni turtii leenjii
isaanii keessatti gurmii hojii uummatu hundeessuun gurmichas, akka qaama barnoota hordofaa
jiraniitti fudhatame. Indiyaan kana gochuun jalqabbii carraa interpirinershiippummaa sadarkaa
idil addunyaa taasisuun waggaa tokkotti barattoota damee injiineringii miliyoona afuritti
dhiyaataniif carraa hojii uumuu dandeesse.

Gama biyya keenyaatti yoodhufnu, sirni barnootaa seenaafi yaadiddama barsiisurra darbee
barattoonni ogummaa horataniin rakkoo akka furaniifi hojii akka uummatan kan isaan
dandeessisu miti.

Yaada kana ilaalchisuun Dr.Abiy Ahimed 2012: 235-237, kitaaba matadureen isaa ‘Ida’amuu’
jedhu keessatti waa’ee sirna barnootaa biyya keenyaa ilaalchisee dhimmoota armaan gadii kaasu.

….Rakkoo qulqullina barnootaa irraa kan ka’e itti fufiinsa humna namaafi dandeetti
hojii uumuu isaanii rakkoo guddaan mudateera. Kana irraa kan ka’e
barbaachisummaan isaa kan gadi bu’eefi ogummaa isaatinis hojii uumuu kan hin
dandeenye taasiseera. Kunis dargaggoota baratan hojii dhabdummaa hamaadhaaf
isaan saaxileera”.

Dhaloonni ogummaa gabaan barbaadu gonfatee gabaa hojii keessatti dorgomaa akka ta’u
gochuuf dhaabbileen barnootaa keenya barnoota qalamaan cinatti ogummaa gonfachiisuu irratti
fuulleffachuun barbaachisaa ta’a. Kanaafuu, ilaalcha hojii barbaaduu irraa gara hojii
uummachuutti tarkaanfachuuf dhaabbileen leenjiistootaa mootummas ta’e dhuunfaa qorqalbii
dargaggootaa daandii intarpiriinerummaa akka qabatuufi lammiileen yoo xiqqaate ogummaa
tokko akka qabaatan taasisuun dhimma yeroon gaafatudha.

5. Tooftaa Ittiin Dhaloota Hojii Uummatu Uumuun Danda’amu

I. Leenjii Bu’aarratti Xiyyeeffateen Dagaagina Ogummaa Cimsuun

Leenjii bu’aarratti xiyyeeffateen dagaagina ogummaa cimsuu yommuu jennu leenjiin kennamu
fedhii gabaa giddugaleessa kan godhate ta’uufi fedhiin gabaa jiru sun erga adda ba’een booda
sana irratti ogummaa fedhii gabaa sana ittiin guuttuun danda’amu akka horatan gochuudha.
Haala kanaan leenjiin kennamu ogummaa bu’aarratti xiyyeeffate ta’a. Akkasumas, sagantaaleen
leenjii BLTO fedhii industirii irratti hundaa’uun akka adda ba’an kan taasisudha. Leenjiin bu’aa
irratti xiyyeeffate yeroon kan daangeffamu osoo hintaane, ga’umsa barbaadamu irratti kan
xiyyeeffateefi garaagarummaa dhaabbilee leenjiifi fedhii gabaa gidduu jiru kan xiqqeessudha.

Kanamalees, leenjiin bu’aa irratti xiyyeeffate beekumsaafi dandeettii mana leenjiitiin ala
argameef beekamtii kan kennudha. Akkasumas, ogeessi ga’umsi isaa mirkanaa’e gabaa hojii
addunyaa keessatti beekamtii akka argatu kan taasisuufi leenjiin BLTO dhaabbilee barnoota
olaanoofi barnoota waliigalaan kennamu waliin walqixa beekamtii akka argatu kan taasisudha.

Kanaafuu, carraan hojii lammiileef uumamu itti fufinsa akka qabaatuufi bu’aa qabeessa akka
ta’uuf, qorqalbii dhalootaa ogummaa gonfachiisuun akka ijaaramu gochuu keessatti dhaabbileen
BLTO leenjii bu’aarratti xiyyeeffate hojiirra oolchuun humna namaa leenji’ee ga’umsi isaa
mirkanaa’e horachuuf xiyyeeffannoon hojjechuun barbaachisaadha.

II. Walitti Hidhamiinsa Dhaabbilee Leenjiifi Industiriiwwanii Cimsuun

Hawaasa ogummaa gonfatee carraa hojii uummachuu danda’u horachuuf walitti hidhaminsa
dhaabbilee leenjiifi industiriiwwanii cimsuun barbaachisaadha. Leenjiin kennamu bu’aa
qabeessa akka ta’uuf industiriin deeggarsa kallattii sadarkaa ogummaafi sirna leenjii qopheessuu
irraa eegalee hanga leenjifamtoonni leenjii isaanii xumuranii gara hojiitti galaniitti deeggarsa
taasisaa deemuun dhimma xiyyeeffannoo barbaadudha. Kanamalees, industiriin damee isaatiin
hanga carraan hojii irratti uumamuu danda’u adda baasuun hojii barbaaddattoonni akka irratti
gurmaa’an taasisuufi bakki oomishaafi gurgurtaa akka mijatuuf taasisuun murteessadha.

III. Paakejjiiwwan Deeggarsaa Onnachiisaa Ta’an Hojiirra Oolchuun

Hawaasa aadaa hojii uummachuun hin dagaagfanne keessatti sodaa guddaan dargaggoota carraa
hojii uummachuu yaalanii deeggarsa murteessoo hojii uummachuu keessatti barbaachisan
argachuudha. Sodaa hojii uummachuu keessatti dargaggootni qaban maksuun hojii uummachuuf
haamileefi abdii akka horatan taasisuuf paakejjiiwwan deeggarsaa onnachiisoo ta’an kanneen
akka: dhiyeessii iddoo oomishaa, dhiyeessii iddoo gurgurtaa, walitti hidhaminsa gabaa,
dhiyeessii faayinaansii ka’umsa kaappitaalaafi leenjii hojiitti ittiin galuu danda’an mijeessufiin
murteessadha.
 IV. Ilaalchaafi Aadaa Hojii Jijjiiruun

Akka biyya keenyaatti hojii uummachuu irra hojii barbaaduun bartee ta’eera. Sirnoota darban
keessa namni ogummaa barate ykn muuxannoo horateen hojii ogummaa adda addaa hojjetee
maallaqa argatuuf maqaa balleessiin adda addaa itti kennamuun hawaasa irraa qoollifatamaa
tureera. Kun immoo aadaa hojii keenya miidhee jira. Gochi kunis, ogummaan hawaasni keenya
qabaachaa ture akka dagatamuufi ilaalchi hojii tuffachuu akka dagaagu taasisee jira. Akkasumas,
namni ogummaa leenji’uurra barnoota qalamaa qofa baratee hojii mootummaa qofa akka
eeggatuuf balbala saaqeera. Kanaafuu, ilaalchaafi aadaa hojii irratti jiru jijjiirudhaan hojiin
kabajaafi bu’uura badhaadhinaa ta’uu irratti qorqalbii dhalootaa ijaaruun murteessadha. Kanaaf
immoo ga’een mootummaa, dhaabbilee amantaa, dhaabbilee mitimootummaa, maatiifi qooda
fudhattootaa murteessadha.

V. Dirree Dorgommii Biizinasii Jajjabeessu Diriirsuun

Dhaloota carraa hojii uummatu uumuu keessatti namoonni carraa hojii uummachuun milkaa’anii
kanneen biroof fakkeenya ta’uu danda’an jiraachuun murteessadha. Intarpiriinaroota yaada
biizinasii keessoo isaanii irraa madde qabatanii hojiitti galuuf qophii qaban deeggaruufi
jajjabeessuun hojiitti akka galan taasisuuf dirree dorgommii yaada biizinasii diriirsuun
murteessadha. Kanaanis, intarpiriinaroota yaada biizinasii isaaniin dorgomanii hojiitti galan akka
milkaa’aniifi kanneen biroofis muuxannoo akka ta’aniif deeggarsa walirraa hincinne taasisuun
bu’aa guddaa qaba.

6. Xiyyeffannoo Mootummaa Dhaloota Hojii Uummatuuf

Mootummaan Naannoo Oromiyaa ummata naannichaa dinagdeen humneessuudhaan karaa hiika

qabuun hiyyummaa xiqqeessuuf waggoottan jijjiiramaa dabarsine kana keessatti hojiilee bu’aa
qabeessa ta’an raawwachaa tureera. Hojimaatawwan dhaloota hojii uummatu uumuu
dandeessisan uumuuf haalawwan mijataa qopheessuun hojiirra oolchaa jira. Isaan keessaas
kanneen ijoo haala armaan gadiin ilaaluun ni danda’ama.

o Imaammataafi tarsiimoo carraa hojii uumuufi ogummaa deeggaran baasuudhaan hojiirra

oolchaa jiraachuu,
 o Dhaabbileen leenjii humna namaa sadarkaa giddugaleessaan leenjisuun gabaa hojiif
dhi’eessan akka babal’atan ta’ee jiraachuu,
o Imammataafi tarsiimoon hiyyummaa xiqqeessuu dandeessisan qophaa’anii hojii irra oolaa
jiraachuu,
o Fedhiifi kutannoon mootummaan hojii dhabdummaa hir’isuuf qabu guddaa ta’uu isaati.

7. Dhaloota Hojii Uummatu Uumuuf Hojiilee Hanga Ammaatti Raawwataman

Mootummaan Naannoo Oromiyaa rakkoo hojii dhabdummaa bu’uura irraa xiqqeessuuf
tarsiimoofi imaammata bocuun hojii bal’aa hojjechaa tureera. Kanaanis, bu’aaleen abdachiisaa
ta’an galmaa’uu jalqabaniiru.

Haata’u malee, rakkoolee hojii dhabdummaa akka naannoo keenyatti jiran waliin yoo ilaalamu
ammallee carraa hojii bal’inaan uumuu keessatti hojiin dhaloota hojii uummatu horachuu
dhimma xiyyeeffannoo guddaa barbaadudha. Kana milkeessuuf hojiilee gurguddoo hanga
ammaatti raawwataman akka armaan gadiitti ilaaluun ni danda’ama.

A. Hawaasa Ogummaa Gonfate Uumuuf Leenjii Idileefi Gaggabaaboo Kenname

Leenjii Idilee kan Leenjii Idileen Hojiitti Leenjii Gaggabaaboo Leenjii Gaggabaaboon
Bara Argatan kan galan Kenname Hojiitti Kan Galan
Dhi Dub Id Dhi Dub Id Dhi Dub Id Dhi Dub Id
2005 46641 45537 92178 36889 36136 73025 139116 136543 275659 139116 136543 275659
2006 41401 39811 81212 21772 19139 40911 907861 554180 1462041 407033 864943 1271976
2007 43708 45931 89639 15037 15288 30325 607474 254251 861725 476667 248451 725118
2008 63278 60936 124217 13216 14766 27982 235646 131806 367452 235646 131806 367452
2009 53593 50981 104574 10461 11139 21600 277418 145599 423017 277418 145599 423017
2010 69113 49805 118917 6587 4990 12035 240574 113499 354073 240574 113499 354073
2011 73150 60842 133992 6519 6221 12740 412500 412500 825000 290576 144686 435262
2012 51656 37758 89414 4874 3411 8285 189267 103019 292578 189267 103019 292578
2013 50378 45005 95380 4499 4074 8241 345217 157690 502907 345217 157680 502907
2014 39502 30999 70501 14088 12003 26091 684579 336891 1021470 684579 336891 1021470
Ragaa armaan olii kana irraa hubachuun akkuma danda’amu, hawaasa ogummaa gonfateen hojii
uummachuu danda’u horachuuf hojiilee hojjetamaniin bara baraan simannaan leenjifamtoota
leenjii idileefi gaggabaaboon jiru fooyya’aa jiraachudha.

B. Dagaagina Ogummaa Cimsuuf Babal’ina Dhaabbilee Leenjii Hanga Bara 2014’tti

 Kolleejjii Poolii Dhaabbilee
Gosa Kolleejjootaa Teekinikaa KBLTO Leenjii Ida’ama
Kan mootummaa 40 160 108 308
Kan dhuunfaa 0 159 0 159
Kan miti mootummaa (NGO) 0 7 0 7
Kolleejjoota Baajata Sekteraa
Qindoomina Naannootiin Bulan 1 7 0 8
Ida’ama Waliigalaa 41 333 108 482

C. Milkaa’ina Carraa Hojii Uumuu Hanga Ammaatti Jiru

Mootummaan jijjiirama rakkoo hojii dhabdummaa biyyaafi naannoo keenya keessatti hudhaa
guddaafi rakkoo hawaas dinagdee ta’ee jiru furuuf imaammataafi tarsiimoo ifa ta’e bocuudhaan
hojiiwwan lakkaa’amuu danda’an hojjechaa tureera. Hojiilee hojjatamaniinis bu’aawwan
gurguddaan galmaa’aniiru. Keessattuu, carraa naannootti argaman fayyadamuun waggoottan
arfan darban keessa dinagdee naannoo keenyaa sochoosuun rakkoo hojii dhabdummaa hir’isuuf
hojii hojjatameen hojii dhabeeyyii gurmiifi qacarriidhaan carraan hojii dhaabbii namoota
4,120,085 ta’aniif uumamee kan jiru yoota’u, waldaan IMX 348,952 qaama seera
qabeessummaa fudhachuun gurmaa’anii jiru.

Raawwii Carraa Hojii Bara 2010 - 2014

 8. Rakkoolee Hojii Uummachuu Irratti Jiraniifi Furmaata Isaanii

Adeemsa hojii uummachuu keessatti rakkooleen dargaggoota keenya quunnaman qorannoo gadi
fagoon adda baasuu kan barbaachisu ta’ullee, rakkoolee armaan gadii raawwii hojiilee hanga
ammaatti raawwanne keessatti adda baasuun danda’ameera.

• Hojii uummachurra qaxaramanii hojjechuu akka filannoo dursaatti ilaaluun bal’inaan kan
mul’atu ta’uu,
• Aadaa hojiifi ogummaa hawaasni qabaachaa ture tuffachuun kan jiru ta’uu,
• Dargaggoonni hojii akka uummatan taasisuun ga’ee mootummaa qofaa akka ta’eetti
ilaaluun jiraachuu,
• Ogummaa hojii keessa nama tursiisu qabaachuun hojiitti galuu dhabuun kan mul’atu
ta’uu,
• Dargaggootni akka hojiitti galaniif dhiyeessiin faayinaansii, iddoon oomishaa, iddoon
gurgurtaafi deeggarsi ogummaa taasifamu fedhii jiru duukaa walsimuu dhabuudha.

Rakkoolee hojii uummachuun walqabatee mul’atan kanneen maqsuuf wantoota armaan gadii
hojiitti hiikuun barbaachisadha.

• Mootummaa dabalatee dhaabbileen leenjii, abbootiin amantaafi maatiin ilaalcha hojii

jijjiiruu irratti itti fufiinsaan hojjechuu,
• Biizinasii jajjabeessuun qorqalbii dargaggootaa hojiin walqabatee kufe kaasuun
milkaa’uun akka danda’amuu itti agarsiisuu,
• Raawwattootnifi qooda fudhattoonni carraa hojii uumuufi hawaasa ogummaa gonfatee
hojii uummachuu danda’u uumuuf xiyyeeffannoo kennuun hojjechuu,
• Dhiyeessiiwwan faayinaansii, iddoo oomishaa, iddoo gurgurtaa, deeggarsa ogummaa
si’ataafi dhaqqabamaa karaa itti fufiinsa qabuun taasisuun murteessadha.

9. Xumuura
Dhaloota hojii uummatu horachuuf ilaalcha jiru sirreessuu irraa kaasee hanga ogummaa
gonfachiisuun hojiitti galchuutti hojiileen hojjetamuu qaban sirnaan yoo hoogganaman bu’aa
barbaachisu galmeessuun akka danda’amu muuxannoon addunyaa ni agarsiisa.

Haala qabatamaa biyya keenyaatiin dhaloota hojii uummatu horachuuf hojiin sirna barnootaafi
leenjii keenyaa irratti jijjiirama bu’uuraa barnoota qalamaarraa gara barnoota ogummaatti
ceesisuu xiyyeeffannoo argachuu qaba. Kana gochuuf immoo, hojiilee aadaa hojii jijjiiruu,
qorqalbii biizinasii ijaaruu, fedhii hojii dargaggoota keessatti uumuu, adeemsa walxaxaafi
rakkoolee bulchiinsa gaarii hojii barbaaddota hojiitti galchuu keessatti mul’atan hiikaa deemuufi
intarpiriinaroota yaada biizinasii qaban deeggaruun hojii uummachuu bira darbanii kaaniif iyyuu
carraa hojii uumuu akka danda’an taasisuuf xiyyeeffannoon hojjechuun barbaachisaadha.