Ito ang mga samu’t saring pakiramdam na aking naramdaman at patuloy na nadarama sa halos humigit kumulang limang libong araw na pagiging guro. Katulad ng pagdaloy ng ilog ay ang tuloy-tuloy at paulit ulit ding pagsikat at paglubog ng araw bilang isang gurong paulit-ulit ding nakakaramdam ng iba’t ibang emosyon na para bang laging nakasakay sa sasakyang rodilyo. Hindi kaila sa akin bilang isang guro ang makaramdam ng iba’t ibang emosyon sa tuwing pumapasok ako sa apat na sulok ng aking silid-aralan at maging sa pag uwi ko sa aking munting tahanan. Marahil ito nga talaga ang normal na pakiramdam ng isang guro. Sa labing-anim na taon ng aking panunungkulan, sari-saring emosyon na ang aking napagdaanan. Ito ay batay na rin sa mga kaganapan at mga pangyayaring araw-araw kong dinaranas at patuloy pang daranasin. Mga pakiramdam na dulot marahil ng mundong aking ginagalawan na siyang nakakaapekto sa akin bilang isang dakilang guro. Hindi kaila sa atin na kamakailan lamang ay nagpalabas ng panibagong Memorandum ang ating Kagawaran na nag -uutos na isagawa ang Catch-Up Friday. Ito ay sa bisa ng DepEd Memorandum 001 s . 2024 na ipinalabas noong unang araw ng Enero 2024. Ayon sa memorandum na ito, ang araw ng Biyernes ay ilalaan bilang isang espesyal na araw upang magsagawa ng iba’t ibang gawaing pambata na mas maghahasa pa sa kanyang kakayahan sa pagbabasa at pag-unawa. Ito ay upang mas lalong paigtingin din ang programang National Recovery Program na nakapaloob sa MATATAG AGENDA na ipinaiiral ng kasalukuyang administrasyon. Ngunit hindi maikakaila na sa tatlong buwang pa lamang na pagsasagawa nito ay marami pa rin ang naguguluhan at hindi pa matiyak kung paano nga ba dapat isagawa ang panibagong programang ito. Marahil katulad kong pakiramdam ay sumasakay sa sasakyang rodilyo, ang kapwa kong mga guro ay paniguradong ganun din ang nararanasan. Sa tatlong buwang pagsasagawa ko ng nasabing programa, hindi ko maitatanggi sa aking sarili na ang Catch-Up Friday ay isang panibagong hamon na namang gaya ng dati ay aking haharapin ng buong tapang. Katulad ng isang sundalo, pakiramdam ko ako ay may panibagong labang kailangang harapin at sagupain. Pakiramdam ko din ay sa tuwing araw ng Huwebes ay may kakaibang puwersang dumadaloy sa aking isipan sapagkat sa kaibuturan ng puso ko ay may kailangang paghandaan sa susunod na bukas. Kailangang paghandaan at isaalang -alang, pag - isipan at magbuwis ng pawis at lakas upang maplanuhang mabuti kung ano-anong gawain ang angkop na ibigay sa mga mag-aaral na walang kamuwang muwang. Sa kabila nito, may malaking katanungan pa ring umiiral sa likod ng aking isipan. May patutunguhan na naman ba ang gawaing ito? Saan kaya ako dadalhin at ang aking mga mag-aaral ng panibagong yugtong ito? Bilang isang gurong itinuturing na bayani ng bayan kong mahal, marahil wala naman akong magagawa kundi ay lakasan at pagtibayin ang aking kalooban. Masugatan man ay patuloy na lalaban at tatayo upang harapin ang hamon ng buhay, tatagan ang isipan at sabihin lagi sa sarili na kaya ko to! Araw-araw na papasok at itatak sa isipan na ang kabataan ay siyang pag-asa ng bayan. Mga kabataang sa akin ay umaasa ta patuloy na umaangkla. Mga kabataang may kalakasan at kahinaang kailanganang gabayan. Mga kabataang kailangang hubugin at himukin na sa pagtitiyaga ay tiyak na may magandang patutunguhan at aanihin. Ang mga kabataang ito ang dahilan ng iba’t ibang emosyong aking nararamdaman sa araw-araw na pagpasok ko sa silid- aralan. Katulad ng pagsakay sa rodilyo, samu’t samong emosyon at pakiramdam ang kanilang hatid na masasabi kong nagbibigay kulay din sa aking buhay. Alam kong sa mga susunod na araw ay marami pang mga iba’t ibang programa at panunutunang iimplementa ang Kagawarang aking kinabibilangan. Kaakibat nito ay ang kaisipang ang mga ito at paniguradong magbibigay sa akin ng masasaya, malulungkot at magugulong pakiramdam katulad ng pagsakay sa sasakyang rodilyo. Lagi ko ring ng sinasabi sa aking sarili na ang lahat ng mga nangyayari sa aking buhay ay may dahilan. Alam kong ang lahat ng mga programang ipinapatupad na siya ring nagiging hamon sa atin bilang isang guro ay may kaakibat na mabigat na kadahilanan. At alam ko rin na ang kadahilanang ito ay para sa ikabubuti ng ating pangunanging pinagsisilbihan na walang iba kundi ang ating mga mag-aaral. At ang mga ito ay aking itatanim sa puso’t isipan na sa pagdaloy ng mga araw, magpapatuloy ako sa pagsakay sa daloy ng buhay. Dahil ang buhay ng guro ay parang buhay na laging nakasakay sa sasakyang rodilyo, saya,lungkot, tawa, kaba, saya, lungkot, tawa, at kaba.