EPEKTO

NG DUSKRIMINASYON
SA LAHING KATUTUBO
Ang diskriminasyon at mababang pagtingin na ito ay
nagamit nang lubos sa pamamahala sa kolonya. Naging
parang alipin ang pagtrato sa mga katutubong
mamamayan. Pinagbayad sila ng tributo upang
maisagawa ang mga gawain ng pamahalaan, suportahan
ang mga dayuhang namumno at payamanin ang Korona
o Kaharian ng Espanya. Ang perang kinita na dapat
sanang gamitin para sa mga kailangan ng pamilya ay
ibinayad sa pamahalaan. Sapilitang pinagtrabaho ang
kalalakihan sa mga simbahan, kalsada, paaralan,
gusaling pampamahalaan, at iba pang katulad nang
walang kaukulang bayad. Habang sila ay nasa
trabaho, napabayaan nila ang mga sakahan na
pinagkukunan ng panustos ng pamilya.
Ang mga dating taniman ng mga halamang panustos ng
mamamayan tulad ng palay at mga gulay ay pinataniman
ng mga produktong panluwas tulad ng tabako, bulak at
indigo sa hangad na palawakin ng Kalakalang Galyon.
Kumita at yumaman ang Korona ngunit nagutom ang mga
katutubong magsasaka at ang kanilang pamilya.
Maliban dito, naging biktima rin sila ng mga pang-aabuso
at katiwalian ng mga namumunong Espanyol. Dahil sa
napakalawak na kapangyarihan ng mga alcalde mayor,
ginamit nila ang mga mamamayan upang magkamal sila ng
yaman sa pagnenegosyo sa kanilang lalawigan. Nakontrol
nila ang presyo ng mga bilihin upang kumita nang malaki.
Hindi kumita ang mga magsasaka at nagutom ang kanilang
pamilya. Marami ring anomalyang nangyari sa pagkolekta
ng buwis.
 Ang Mababang Pagtingin sa Sariling Lahi
o Colonial Mentality
Ang mahigpit na 300 taon sa ilalim ng
pamamahalang Espanyol at ang karagdagang mga
taon ng pagiging kolonya sa kamay ng mga
Amerikano ay nag-iwan ng matinding bahid sa
kaisipan ng mga Pilipino. Hindi man sinasadya ay
nabuo sa isipan nila na sila nga ay mas mababang
uri ng tao, hindi kasintalino o kasingganda ng mga
puting Kanluranin. Nabuo ang tinatawag na
cononial mentality o kaisipang likas silang nilikha
bilang tagasunod lamang ng mga taong puti ang
balat.
Sa kasalukuyan , marami pa ring mga Pilipino ang
tumitingala sa mga puti-sa talino, sa kagandahan
sa uri ng pamumuhay, sa ugali at iba pa. Ang
anumang bagay na galing sa Europa o Amerika para
sa kanila ay mas magaling at mas mabuti kaysa
lokal na bagay; ang imported na produkto ay
palaging mas maganda kaysa sa gawa rito; ang
siyentipiko nila ay mas magaling kaysa sa mga
Pilipino; ang pag-aaral doon ay mas mabuti kaysa
edukasyon dito; ang mga ideyang nagmula sa
Europa at Amerika ay mas kapani-paniwala; ang
sinumang Pilipino na nakarating doon ay mataas ang
antas sa lipunan kaysa sa mga narito at iba pa.
 Ang Kababaihan
sa Sinaunang Lipunan
Ang kababaihan sa sinaunang lipunan ay may malaking papel
na ginampanan sa lipunan at sa ekonomiya ng komunidad at
ng pamilya. Mayroon silang mga karapatan na kapantay ng
mga lalaki sa pag-ari ng lupain at iba pang ari-ariang minana
sa magulang. Ang babaeng anak ng datu o rajah ay maaaring
pumalit sa ama kapag ito ay namatay ay walang naiwang anak
na lalaki. Mayroon pang mga babaeng sumabak sa mga labanan
kagaya ni Gabriela Silang na pumalit sa kanyang asawang si
Diego Silang bilang pinuno nang mapatay ang asawa. Mga
babaeng babaylan ang namuno sa mga ritwal ng pagsamba sa
kinikilala nilang diyos na maykapal na inaalayan ng mga dasal
at sakripisyo.
Sa ekonomiya, malaki ang naiambag ng kababaihan.
Aktibo sila sa ekonomiya. Marami sa kanila ang
namahala at nangunguna sa kalakalan upang kumita ng
karagdagan para sa pamilya. Ang iba ay natuto ng
mga industriyang pantahanan tulad ng paghabi ng
tela, paglala ng banig, paggawa ng palamuti sa
katawan, paggawa ng palayok, pag-aalaga ng mga
hayop na ipinagbili, pagtatanim ng gulay ng pagkain
ng pamilya at pangkalakal, at pagtulong sa asawa sa
mga gawain sa bukid. Ginawa nila ang mga ito habang
inaasikaso ang asawa at anak at gumagawa ng mga
gawaing pantahanan.
Ang kababaihan ay iginagalang at inaalagaan ng
kalalakihan bilang hiyas. Habang naglalakad, pinauuna
sila ng mga lalaki upang matiyak ang kaligtasan.
Ipinagbubukas sila ng pinto. Inuuna silang bigyan ng
upuan at inaalalayan. Pinagsisilbihan sila ng manliligaw
sa kanilang tahanan at hinahandugan ng bigay-kaya
bago ikasal.
Sa kabuoan, bagama’t itinuturing silang mas mahina
kaysa kalalakihan, ginamit nila ang kanilang pamilya at
nagamit ang kanilang mga karapatan bilang
mamamayan. Sa panahong iyon, ang mga kababaihan
ng Timog-Silangang Asya ay itinuring na may
pinakamataas na antas ng katayuan kung ihahambing
sa ibang bahagi ng daigdig.
 Ang Kababaihan sa Ilalim ng
Pamahalaang Kolonyal
Ang lahat ng ito ay nagbago sa ilalim ng pamahalaang kolonyal.
Para sa mga Espanyol, ang babae ay mahina at para sa tahanan
lamang. Tungkulin nila ang pagsilbihan ang asawa at alagaan ang
mga anak. Wala silang papel sa pamahalaan at sa iba pang aspeto
ng pamumuhay.
Ang babae sa panahong kolonyal ay isang kimi o mahiyaing babae
na hindi nararapat magpakita ng kalakasan at mapusok na
damdamin. Inilarawan siya ni Jose Rizal bilang Maria Clara, isang
babaeng mahina, walang karapatang magpahayag ng damdamin at
masunurin sa lahat ng nais ng magulang kahit ito ay labag sa
kanyang kalooban. Karaniwang gawain ng mga babae sa panahong
iyon ang magdasal, magsimba, magnobena at magrosaryo.
Libangan nila ang pagbuburda at iba pang gawaing pangkamay.
Noong una, walang paaralan sa mga babae. Ang
itinatag ay mga paaralan para sa mga lalaki. Ito
ang dahilan kung bakit hiningi at ipinaglaban ng
kababaihang taga-Malolos sa Bulacan ang
kanilang karapatan upang magbukas ng isang
paaralang panggabi para sa kababaihan.
Sa kasalukuyan, malaki na ang ipinagbago ng
papel ng kababaihan. Malaya na nilang nagagamit
ang kanilang mga karapatan at kasanayan sa iba’t
ibang larangan ng buhay. Dahil dito, malaki na
ang nagagawa ng kababaihan upang makatulong sa
pag-unlad ng bansa.
Ang kolonyalismo sa Pilipinas ay napababa
ng pagtingin sa mga Pilipino. Sa katagalan,
pati mga Pilipino mismo ay nasanay na sa
pagtingin sa sarili na mas mababa kaysa sa
mga lahing puti. Matatanggal lamang ito
kung ang mga Pilipino ay titingin nang may
pagmamalaki sa sariling lahi at
magkakaroon ng lubos na tiwala sa sariling
talino at kakayahan.
 Sagutin:
Bilang isang Pilipino, naniniwala ka bang walang
magandang produkto ang Pilipinas? Bakit?
Bilang isang mag-aaral, Paano mo maaalis ang
pananaw na Colonial Mentality?
Ano ba ang kaibahan ng mga Sinaunang
kababaihan noon kaysa ngayon? Ipaliwanag.
Ano ang epekto ng mga pagbabago sa katayuan
ng mga Pilipino sa kanilang pamumuhay?