ANG DAAN NG KRUS
PAMBUNGAD NA PANALANGIN:
Noong unang panahon, ang Visita Iglesia ay pagdalaw sa 7 simbahan tuwing
Huwebes Santo matapos ang Misa ng Huling Hapunan. Ang tradisyong ito ay
mula sa kinagawian ng mga unang Kristiyano sa Roma na bisitahin ang 7 basilica
para sambahin si Jesus sa Santisimo Sakramento. Ang mga basilicang ito sa
Roma ay: San Juan Laterano, San Pedro, Sta. Maria Mayor, San Pablo, San
Lorenzo, Santa Cruz ng Jerusalem, San Sebastian. Ang Visita Iglesia ay hindi
naglalayon na makita lang ang kagandahan ng altar na pinaglalagakan ng
Santisimo Sakramento o maghain ng hangad na kahilingan dahil sa sakripisyo
nating ginawa.
Nang ituro ng mga Kastila ang Visita Iglesia sa mga Filipino, hindi lamang ito
naging debosyon sa Santisimo Sakramento, ito rin ay naging pagninilay sa 14
estasyon ng Krus. Ito ay lalong nagbunsod sa kalooban ng mga tao upang
ipagdiwang ng makahulugan ang Pagpapakasakit, Kamatayan, at Muling
Pagkabuhay ni Jesus. Pitong simbahan ang karaniwang dinadalaw, dalawang
estasyon kada isang simbahan. Ang iba ay 14, dinarasal 1 estasyon sa bawat
simbahan. (Kapag may oras pa, mas mainam na yung 14, naroon ka na rin lang
sa probinsiyang iyon, puntahan na yung kayang dalawin.)
Mula sa Guide for Visita Iglesia - St. Pauls Media
Ang Estasyon ng krus na ito ay sinipi mula sa aklat na 'Papuri ng Sambayanan'
na gawa ng Apostolic Vicariate of Calapan (Orriental Mindoro), nilapatan lang
ng mga awit.
N: Panginoon, sinabi Mong “malibang mahulog sa lupa ang butil ng trigo at
mamatay, mananatili itong nag-iisa. Ngunit kung mamatay, ito’y mamumunga
nang marami. Ang taong labis na nagpapahalaga sa kanyang buhay ay siyang
mawawalan nito, ngunit kung napopoot sa kanyang buhay sa daigdig na ito ay
siyang magkakaroon nito hanggang sa buhay na walang hanggan”
B: Babakasin namin ngayon ang tinahak Mong landas ng kapaitan, ang
Daan ng Krus, upang sariwain ang bilin Mong ang tao’y hindi nabubuhay para
sa sarili lamang. Tulungan Mo kaming mga alagad Mo ay sumunod sa Iyo,
kung paanong binata Mo ang hirap at kaapihan para kami ay palayain. Ito
naman talaga ang dahilan ng pagparito Mo sa amin, upang danasin ang
kahirapang dulot ng kapalaluan, kasakiman at kalapastangan ng tao at nang sa
gayon, maparangalan Mo ang Diyos at tanghalin Ka bilang Ilaw ng sanlibutan.
N: Panginoon, sinabi Mo rin sa amin : “Kung ibig ninumang sumunod sa
Akin, limutin niya ang ukol sa kanyang sarili, pasanin ang kanyang krus at
sumunod sa Akin. Ang naghahangad na magligtas ng kanyang buhay ay siyang
mawawalan nito; ngunit ang nag-aalay ng kanyang buhay alang-alang sa Akin at
sa Mabuting Balita ay siyang magkakamit niyon”. Ano nga ba, Panginoon, ang
mapapala namin kung makamtam man namin ang ginhawa, tagumpay at
karangalan ng daigdig na ito kung katumbas naman nito’y aming kapahamakan?
B: Namatay Ka, Panginoon, hindi para sa Iyong sarili kundi para sa amin
upang papurihan ang Diyos Ama. Tunay na Ikaw ang daan, ang katotohanan at
ang buhay. Tulutan Mo kaming mag-alay ng aming sarili sa gitna ng mga
tukso, pagkutya at kapighatian. At nawa’y sa aming pagsunod sa Iyo at
pakikiisa, maalab naming maitaguyod ang pagmamahalan, katarungan,
kapayapaan at katotohanan sa aming lipunan at kasaysayan, lalo na ang
makiisa at magtanggol sa mga naghihirap at inaabuso. Sa diwa ng paghihirap
Mo, kamatayan at muling pagkabuhay, kasama Mo kaming maghihirap para
sa ikatatatag ng Kaharian Mo, kasama Mo kaming mamamatay sa aming sarili
at sa gayo’y kasama Mo rin kaming babangon bilang tunay na bayan Mo –
may bagong pagkatao, at ganap na Sambayanan Mo, ngayon at May mga pagkakataon, Panginoon, na napakahirap para sa amin ang makisalo
magpakailanman. Amen. sa iba, ang makiisa sa aming kapwa sa hapag ng pagkakapatiran. Tulungan Mo
kaming “pagpirapirasuhin” din ang kaunting meron kami upang maibahagi sa
aming mga kapatid, ang isagawa ang pag-aalay ng sarili para sa aming kapwa
ISANG PAGKAIN, ISANG KATAWAN, ISANG BAYAN bilang pag-aalaala sa Iyong pagliligtas.
(1) Katulad ng mga butil na tinitipon upang maging tinapay na nagbibigay (Tahimik na Pagninilay)
buhay, kami nawa’y matipon din at maging bayan Mong giliw.
KORO: Iisang Panginoon, iisang katawan, isang bayan, isang lahi sa N: O Jesus, Tinapay na bumaba mula sa langit upang magkaroon ng buhay
’Yo’y nagpupugay (2x) na walang hanggan ang sangkatauhan--
(2) Katulad din ng mga ubas na piniga at naging alak. Sinumang uminom B: Busugin ang pagkagutom ng daigdig sa kapayapaan at pagkakaisa.
nito, may buhay na walang hanggan, kami nawa’y maging sangkap sa N: Ibinigay Mo ang Iyong Katawan bilang Pagkain, at ang Iyong Dugo bilang
pagbuo nitong bayang liyag. (Koro) Inumin upang magkabuklod kami sa Iyong pag-ibig--
B: Busugin ang pagkagutom ng daigdig sa kapayapaan at pagkakaisa.
UNANG ESTASYON N: Itinagubilin mo sa amin ang pag-aalaala sa hapunang pinagsaluhan n’yo
ANG HULING HAPUNAN ng Iyong mga alagad upang kami ang maging buhay na Katawan Mo--
N: Sinasamba Ka namin at pinupuri, Panginoong JesuCristo. B: Busugin ang pagkagutom ng daigdig sa kapayapaan at pagkakaisa.
B: Sapagkat sa pamamagitan ng Iyong banal na krus, tinubos Mo ang
sanlibutan. MGA PERSONAL NA KAHILINGAN (Tahimik sandali)
Tagabasa: Lc. 22:14-20 N: O Diyos na aming Ama, tinawag Mo kaming maging isang pamayanan sa
Nang dumating na ang oras, dumulog si Jesus sa hapag, kasama ang Iyong pag-ibig. Magkaroon nawa kami ng lakas sa tulong ng Katawan at Dugo ng
Kanyang mga apostol at sinabi Niya sa kanila, “Malaon Ko nang inaasam- Iyong Anak upang maisabuhay namin ang pagsasalo na aming ipinagdiriwang.
asam na makasalo kayo sa Hapunang Pampaskuwang ito bago ako magbata. Gawin Mo kaming buhay na Katawan ni Kristo para sa daigdig.
Sinasabi Ko sa inyo, hindi na Ako muling kakain nito hanggang sa ito’y Hinihiling namin ito sa pamamagitan ni Cristong aming Panginoon.
maganap sa kaharian ng Diyos”. Hinawakan Niya ang isang saro, at matapos B: Amen.
magpasalamat sa Diyos ay ibinigay sa kanila. Sinabi Niya, “Kunin ninyo ito, at
paghati-hatian. Sinasabi Ko sa inyo na mula ngayo’y hindi na ako iinom CRISTO
nitong katas ng ubas hangga’t hindi dumarating ang kaharian ng Diyos”. At (1) Ikaw ang lagi kong kausap
dumampot Siya ng tinapay at matapos magpasalamat sa Diyos, Kanyang Ikaw ang laging tinatawag,
pinagpira-piraso at ibinigay sa kanila. Sinabi Niya, “Ito ang Aking katawan na gabay ka ng bawa’t pangarap,
ibinigay para sa inyo. Gawin ninyo ito bilang pag-alaala sa Akin”. Gayon din lakas ng bawa’t pagsisikap.
naman, dinampot Niya ang saro pagkatapos maghapunan, at sinabi, “Ang (2) Ikaw ang tunay na kaibigan,
sarong ito ang bagong tipan ng aking dugo na mabubuhos dahil sa inyo”. ginto ang puso’t kalooban.
Nguni’t hindi lahat ay may alam
N: O Jesus, Ikaw mismo ang lumalapit at nakikisalo sa amin tanda ng Iyong na Cristo ang Iyong pangalan
pagmamahal. Ibinibigay Mo sa amin ang pinira-pirasong tinapay na Iyong Koro: Cristo, Cristo, bakit minsan Ka lang nakikilala,
katawan, at sinasabing gawin ito bilang pag-alaala sa Iyo. kapag nakadama ng dusa’t pangamba.
Tinatawagan Ka, sana’y maawa ka.
Cristo, Cristo kulang pa ba ang pag-ibig na dulot Mo,
 bakit ba ang mundo ngayo’y gulong-gulo?
Anong dapat gawin, ako’y turuan Mo.
(Ulitin ang 2 at Koro)
O Cristo, Cristo, Cristo, Cristo, Cristo.
IKALAWANG ESTASYON
ANG PAGHIHIRAP SA GETSEMANI
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa: Mt. 26:36-38
At isinama sila ni Jesus sa isang lugar na tinatawag na Getsemani.
Sinabi Niya sa Kanyang mga alagad, “Dito muna kayo; mananalangin ako sa
dako roon”. Ngunit isinama Niya si Pedro at ang dalawang anak ni Zebedeo.
At nagsimulang mabagabag at maghirap ang kanyang kalooban. Sinabi Niya
sa kanila, “Ang puso ko’y tigib ng hapis na halos ikamatay ko! Maghintay
kayo rito at makipagpuyat sa Akin!”.
N: Dumanas Ka, Jesus, ng hirap at bigat ng kalooban sa pananalangin Mo sa
Getsemani. Ibinuklod Mo ang Iyong sarili sa lahat ng hapis at kapighatian ng tao,
tiniis Mo ang lahat ng hirap sa taus-pusong pakikiramay sa amin.
Ngunit sa kabila ng paanyaya Mo sa amin na manatiling kasama Mo at
makipagpuyat, nananaig pa rin sa amin ang kahinaan at pagkamakasarili. Ayaw
naming imulat ang aming mga puso sa paghihirap at kapighatian sa aming
kapaligiran. Turuan Mo kami na matutong makiramdam, makiramay at makiisa
sa mga paghihirap Mo at ng aming kapwa.
(Tahimik na Pagninilay)
N: O Jesus, tiniis Mo ang bigat ng kalooban sa pakikiisa Mo sa sangkatauhan
upang ipahayag ang kislap ng liwanag sa gitna ng karimlan ng gabi--
B: Magawa nawa naming tanggapin at isabuhay ang kalooban ng Ama.
N: Hindi ang sariling kalooban ang pinanaig Mo kundi kalooban ng Ama
alang-alang sa kapakanan ng sanlibutan, na kabaligtaran ng namamayani
sa aming mga puso--
B: Magawa nawa naming tanggapin at isabuhay ang kalooban ng Ama.
N: Inaanyayahan Mo kaming manatiling kasama Mo sa gitna ng dilim at
paghihirap; bigyan Mo kami ng paninindigan upang magawa naming
makiramay at makiisa sa aming kapwa--
B: Magawa nawa naming tanggapin at isabuhay ang kalooban ng Ama.
MGA PERSONAL NA KAHILINGAN (Tahimik sandali)
N: O Ama, sa pagkatao ng Iyong Anak, ibinuklod Mo nang ganap ang Iyong
kalooban sa paghihirap at kapighatian ng mga tao. Mismong kalooban Mo’y
bumibigat sa pangit na kalagayan ng buhay ng tao na taliwas sa gusto Mong
mangyari. Imulat Mo ang aming mga mata sa tunay na takbo ng mga pangyayari
upang mapagsikapan naming matanggap at maisakatuparan ang kalooban
Mong kaligtasan at ginhawa ng sangkatauhan.
Hinihiling namin ito sa pamamagitan ni Cristong aming Panginoon.
B: Amen.
TAWAG NAMI’Y LAGING DINGGIN
KORO: Tawag nami’y laging dinggin, samo nami’y ‘Yong pakinggan. Tinig nami’y
bigyang pansin, Ama nami’t Panginoon.
(1) Dinggin mo Panginoon, ang aming kahilingan. Kami ay kaawaan,
O Diyos na walang hanggan. (Koro)
(2) Bigyan Mo ng liwanag, tibay at pananalig kaming nagsusumikap dito sa
‘ming daigdig. (Koro)
(3) Sa’Yo nananambitan, sa’yo rin umaasa. Huwag Mong pababayaan ang
taong nagkasala. (Koro)
(4) At sa aming pagtahak sana ay patnubayan ang tulong Mo’t kalinga ang
aming kailangan. (Koro)
IKATLONG ESTASYON
SI JESUS SA HARAP NG SANGGUNIAN
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa: Mc. 14:53-55
At dinala nila si Jesus sa bahay ng pinakapunong saserdote; doo’y
nagkatipon ang matatanda ng bayan, at ang mga eskriba. Si Pedro’y
sumunod sa Kanya, ngunit malayo ang agwat. Nagtuloy siya hanggang sa
patyo ng bahay ng pinakapunong saserdote, naupo sa tabi ng apoy at
nagpainit na kasama ng mga bantay. Ang mga punong saserdote at ang
buong Sanedrin ay naghahanap ng maipararatang kay Jesus upang
maipapatay siya, ngunit wala silang makuha.
N: Jesus, iniharap Ka sa Sanggunian ng Iyong bayan at sinikap nilang
maipapatay Ka gayong wala Ka namang nagagawang kasalanan. At hinatulan Ka
nga ng kamatayan dahil sa mali at inembentong mga paratang laban sa Iyo.
Magpahanggang ngayo’y marami pa ring walang-malay ang hinahatulang
mamatay. Maraming walang kinalaman ang nadadamay sa paglalaban ng mga
makapangyarihan, at sila ang nagbubuwis ng buhay. Sa ganitong pagkakataon,
turuan Mo kaming mapanindigan ang aming pananampalataya at maitaguyod
ang katarungan.
(Tahimik na Pagninilay)
N: Jesus, hinatulan kang mamatay sa kawalang-katarungan at maling
patotoo at buong tatag Mo namang hinarap ang lahat ng ito--
B: Palakasin kami na mapanindigan ang katotohanan at katarungan.
N: Sa landas na ito ng Mabuting Balita, masundan Ka nawa namin nang
tuloy-tuloy at hindi “magpainit” para sa kaalwanan ng sarili--
B: Palakasin kami na mapanindigan ang katotohanan at katarungan.
N: Sa harap ng paniniil at pagbaluktot sa katotohanan ng malalakas at
makapangyarihan, madalas kaming magsawalang kibo at ayaw naming
itaya ang sarili--
B: Palakasin kami na mapanindigan ang katotohanan at katarungan.
MGA PERSONAL NA KAHILINGAN (Tahimik sandali)
N: O Ama, Ikaw ang takbuhan ng mga api; sa Iyo dumaraing ang mga
dumaranas ng kalupitan at kawalang-katarungan. Sa pagharap ng Iyong Anak sa
di-makatarungang hatol, namayani pa rin ang Kanyang kagandahang-loob at
pag-ibig sa tao. Kaya sa pagtatrabaho namin para sa katotohanan at
katarungan, ang pag-ibig nawa sa kapwa ang maging inspirasyon namin at
kagandahang-loob mo ang siyang mamayani.
Hinihiling namin ito sa pamamagitan ni Cristong aming Panginoon.
B: Amen.
ALAY SA KAPWA
Koro: Kapwa nating ialay ating sariling kamay. At bigyan natin ng
buhay itong pag-ibig na tunay.
(1) Ang ating sariling kakayahan, bigyan natin ng kahalagahan. Ang ating
sarili ay ating ilaan sa ating kapwa, sa kanyang kaunlaran. (Koro)
(2) Tayo’y nilikha ng Panginoon, kapwa kitang nagsisikap dito. Kaya sama-
sama nating pagyamanin at bigyang dangal ang buhay ng tao. (Koro)
IKAAPAT NA ESTASYON
SA HARAP NI PONCIO PILATO
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa: Mt. 27:11-14
Iniharap si Jesus sa gobernador. “Ikaw ba ang Hari ng mga Judio?
“tanong sa Kanya ng gobernador. Sumagot si Jesus, “Kayo na ang nagsasabi”.
Ngunit nang paratangan Siya ng mga punong saserdote at ng matatanda ng
bayan, hindi na Siya sumagot. Kaya’t sinabi sa Kanya ni Pilato, “Hindi Mo ba
naririnig ang mga ipinararatang nila sa Iyo?” Ngunit hindi sumagot si Jesus
gaputok man, kaya’t nagtaka ang gobernador.
N: O Jesus, hindi Ka natakot humarap kay Pilato na kinatawan ng
kapangyarihang dayuhan sa Iyong bayan. Panatag ang loob Mo sapagkat tiyak
Mong di Ka pababayaan ng Ama. At ipinakita Mo sa amin na tanging nasa Diyos
nga lamang ang lakas at kapangyarihan. Sa mga panahon ng pagsubok at
kaguluhan, Panginoon, madalas kaming panghinaan ng loob at mawalan ng
tiwala. Tulungan Mo kaming mapatotohanan ang aming pananampalataya sa
harap ng sinumang “Pilato” upang manatili kaming matatag at buo ang loob sa
pagsunod sa Iyo.
(Tahimik na Pagninilay)
N: O Jesus, ipinakita Mo sa harap ni Pilato na di Ka magagapi ng anumang
pagsubok o kapangyarihan upang magkaroon ng katatagan ang mga
pamayanang sumusunod sa Iyo--
B: Patatagin Mo ang pananalig ng aming mga pamayanan sa panahon ng
pagsubok at kaguluhan.
N: Nanatili kang walang imik sa harap ng kanilang mga paratang hindi
bilang kahinaan kundi patunay na tanging nasa Diyos lamang ang
kapangyarihan at kaligtasan--
B: Patatagin Mo ang pananalig ng aming mga pamayanan sa panahon ng
pagsubok at kaguluhan.
N: Ipinahayag Mo na kailangan naming buksan ang aming puso sa Diyos
upang magkaroon kami ng lakas ng loob sa pagharap namin sa mga
pagsubok at pagpupunyagi sa katarungan at katotohanan--
B: Patatagin Mo ang pananalig ng aming mga pamayanan sa panahon ng
pagsubok at kaguluhan.
MGA PERSONAL NA KAHILINGAN (Tahimik sandali)
N: O Amang mapagmahal, inaanyayahan Mo kaming manatiling panatag
ang loob sa aming mga pamayanan sa panahon ng gulo at mga pagsubok. Ang
harapin ang anuman, taglay ang pananalig sa Iyong tulong at awa. Sa halimbawa
ni Cristo, lagi nawa kaming manalig sa Iyo sa paggawa namin para sa
katotohanan at katarungan. Gawin Mo kaming isang pamayanang tunay na
umaasa at nananalig sa Iyo.
Hinihiling namin ito sa pamamagitan ni Cristong aming Panginoon.
B: Amen.
O YAHWEH KO
(1) O Yahweh ko, O aking Diyos, sa iyo ko nasumpungan yaong aking
minimithi at hangad na kaligtasan. Iligtas Mo sana ako sa pag-usig ng
kaaway, Tinutugis nila ako, hindi sila naglulubay.
(2) Kapag ako ay inabot, sila’y leon ang katulad, tatangayin nila ako, sa
malayo itatakas; At kung ito’y mangyayari, pihong walang magliligtas,
dudurugin nila ako, luluraying walang habag.
(3) O Yahweh ko, bumangon ka, puksain mo ang kaaway; Ako’y iyong
ipagtanggol sa malupit nilang kamay; Gumising ka’t sagipin mo, ako
ngayon ay tulungan, yamang ito ang hangad mo: maghari ang
katarungan.
IKALIMANG ESTASYON
ANG PAGHAGUPIT AT PAGPUPUTONG NG KORONANG TINIK
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa: Mc. 15:16-19
Dinala ng mga kawal si Jesus sa pretoryo, ang tirahan ng gobernador,
at kanilang tinipon ang buong batalyon. Sinuotan nila si Jesus ng isang
balabal na purpura. Kumuha sila ng halamang matinik, ginawang korona at
ipinutong sa Kanya. At sila’y patuyang nagpugay at bumati sa Kanya:
“Mabuhay ang hari ng mga Judio!” Siya’y pinaghahampas nila ng
tambo sa ulo, pinaglulurhan, at palibak na niluhud-luhuran.
N: O Jesus, iniwan Kang nag-iisa ng Iyong mga kasamahan. At dumanas Ka
ng paglibak at insulto ng mga tao. Pinutungan Ka nila ng korona, hinampas at
dinuraan sa kanilang kalupitan. Ngunit ipinakita Mo sa amin kung paano tumayo
at manindigan sa harap ng di-makataong sitwasyon para sa ikabubuti ng
marami.
May mga pagkakataong dumaranas kami, lalo na ang maliliit at mahihina sa
amin, ng paglait ng aming kapwa. At kung minsa’y kami pa ang nagiging tinik ng
paglait sa kanila sa aming mga pamayanan.
(Tahimik na Pagninilay)
N: O Jesus, tinanggap Mo ang koronang tinik at ang mga pahirap upang
labanan at pagtagumpayan ang lahat ng di-makataong kalupitan--
B: Patatagin Mo ang aming kalooban at ng aming pamayanan upang
mapangatawanan namin ang pamumuhay Kristiyano.
N: Ipinamalas Mo ang tatag at paninindigan sa harap ng di-makataong
kalagayan upang maging handa rin kaming manindigan para sa
kabutihan ng aming kapwa--
B: Patatagin Mo ang pananalig ng aming mga pamayanan sa panahon ng
pagsubok at kaguluhan.
N: Marami sa aming mga kapatid ang iniinsulto, kinokoronahan ng tinik at
hinahampas; maalalayan nawa namin sila at masamahan sa kanilang
paghihirap--
B: Patatagin Mo ang pananalig ng aming mga pamayanan sa panahon ng
pagsubok at kaguluhan.
MGA PERSONAL NA KAHILINGAN (Tahimik sandali)
N: Ama ng buhay, sa paglakad namin sa daan ng krus, inaasam ng aming
pamayanan ang katapusan ng di-makataong pamumuhay, ang wakas ng
pagpapawalang-halaga sa buhay. Ipagkaloob Mo sa amin at sa aming
pamayanan ang lakas ng Iyong Espiritu upang maharap namin ang anumang uri
ng paghampas at pagpuputong ng tinik.
Hinihiling namin ito sa pamamagitan ni Cristong aming Panginoon.
B: Amen.
SA MALAYONG POOK
(1) Sa malayong pook, sa tabi ng bundok, naroon ang isang lumang krus.
Na pinagpakuan sa Anak ng Diyos, sa sala ng tao’y tumubos.
Koro: Kung kaya’t ngayon ay nag-aalay, ang lahat sa krus na iyan,
handog ko ay ayuno’t dasal, upang sala nami’y matubos.
(2) Krus na ‘yan ay tigmak ng Dugo at luha ni Jesus na mahal ng madla, nagtiis,
naghirap, namatay sa dusa, upang sala nati’y mawala. (Koro)
IKA-ANIM NA ESTASYON
ANG PAGPAPASAN NG KRUS
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa: Jn. 19:16b-17
Kinuha nga nila si Jesus. At lumabas Siya na pasan ang Kanyang krus,
patungo sa lugar na kung tawagi’y “Dako ng Bungo” (Golgota sa wikang
Hebreo).
N: O Jesus, tinanggap mo ang krus nang walang anumang pag-aalaala kahit
na alam Mong maghahatid ito sa kamatayan. Narito ang buhay na aral Mo sa
amin tungkol sa pagpapasan ng krus dahil sa pagmamahal at paglilingkod sa
kapwa. Ayaw namin ng krus, Panginoon, kaya’t iba ang malimit naming
pinagpapasan ng aming mga krus sa buhay. At kung minsa’y kami pa ang
nagiging pabigat at krus ng aming kapwa. Tulungan mo kaming pasanin ang
aming krus upang hindi kami maging pabigat sa iba, ang mayakap ang krus ng
kamatayan sa sarili tungo sa pagkakaroon ng buhay sa pakikipag-kapwa at
pagmamalasakit.
(Tahimik na Pagninilay)
N: Jesus, pinasan Mo ang krus tanda ng pakikiisa Mo sa paghihirap ng
sanlibutan upang maihatid ang lahat sa kaganapan ng buhay--
B: Bigyan Mo kami ng sapat na lakas nang mapasan namin ang aming
krus sa pagsunod sa Iyo.
N: Malaya Mong nilakad ang daan ng krus papunta sa Kalbaryo bilang aral
sa amin na pasanin nang bukal sa loob ang mga krus namin sa buhay--
B: Bigyan Mo kami ng sapat na lakas nang mapasan namin ang aming
krus sa pagsunod sa Iyo.
N: Isang kondisyon ng pagiging alagad Mo ang pagpapasan ng krus; huwag
nawa kaming magsawa at panghinaan ng loob sa pagsunod sa Iyo,
mangahulugan man ito ng pag-aalay ng buhay--
B: Bigyan Mo kami ng sapat na lakas nang mapasan namin ang aming
krus sa pagsunod sa Iyo.
MGA PERSONAL NA KAHILINGAN (Tahimik sandali)
N: Amang Diyos ng pag-ibig, nilikha Mo kami upang pangalagaan at
pagmalasakitan ang isa’t-isa tulad ng pag-aaruga ng ina sa kanyang mga anak.
Papag-alabin Mo sa aming puso ang pagnanasang makatulong at makiramay sa
aming kapwa at panatilihin kami sa pagsunod sa Iyong Anak sa landas patungo
sa iyo.
Hinihiling namin ito sa pamamagitan ni Cristong aming Panginoon.
B: Amen.
JESUS NA AKING KAPATID
(1) Jesus na aking kapatid sa lupa nami’y bumalik, Iyong mukha’y ibang-
iba hindi kita nakikilala.
Koro:Tulutan Mong aking mata, mamulat sa katotohan.
Ikaw Poon makikilala sa taong mapagkumbaba.
(2) Jesus na aking kapatid, putikin man ang ‘Yong sapin, punit-punit ang
‘Yong damit nawa Ika’y mapasaakin. (Koro)
(3) Jesus na aking kapatid, sa bukid Ka nagtatanim, O sa palengke din
naman Ikaw ang naghahanapbuhay. (Koro)
IKAPITONG ESTASYON
SI SIMON NA TAGA-CIRENE
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa : Mt.27:32
Paglabas nila ng lungsod, kanilang nakita ang isang lalaking
nagngangalang Simon, isang taga-Cirene. Pilit nilang ipinapasan sa kanya
ang krus ni Jesus.
N: Jesus, sinabi Mo sa Iyong mga alagad na kailangan nilang pasanin ang
kanilang krus kung gusto nilang sumunod sa Iyo. Narito ang isang tao na
napadaan lang, ngunit pinasan niya ang Iyong krus. Marami na kaming nalakad
na mga daan ng krus pero nilalampasan lang namin ang mga may pasang krus.
Ipinipikit namin ang aming mga mata sa kanilang mga paghihirap sapagkat ayaw
naming malaman na kami ang nagiging pabigat sa kanila. Sa paghakbang namin
ngayon sa daang ito ng iyong krus, Makita ka nawa namin sa aming kapwa na
nagpapasan ng krus at nangangailangan ng tulong. Oo, bukal sa loob Ka naming
lalapitan at dadamayan.
(Tahimik na Pagninilay)
N: Jesus, sa magandang halimbawa ni Simon taga-Cirene, tinanggap namin
ang aral kung paano ang maging tagasunod Mo sa daan ng krus--
B: Turuan Mo kaming pasanin ang krus ng aming kapwa.
N: Ipinakita Mo sa amin kung paano dumamay at magmalasakit bilang
pagsasabuhay namin ng pagiging mga alagad Mo--
B: Turuan Mo kaming pasanin ang krus ng aming kapwa.
N: Tinawag Mo kaming lahat na maglingkod sa isa’t isa upang makasama Ka
sa paglakad patungo sa piling ng Ama---
B: Turuan Mo kaming pasanin ang krus ng aming kapwa.
MGA PERSONAL NA KAHILINGAN (Tahimik sandali)
N: O Diyos, tinawag Mo kami bago pa man nagsimula ang anuman. Sa isang
taong napadaan lamang, ipinakita Mo sa amin ang paraan ng pagsunod sa
daang ito. Gaano pa kami na tinawag Mo at kusang-loob na sumagot sa Iyong
paanyaya! Huwag nawa kaming magdalawang-salita sa pagsunod sa Iyo at
maging buo ang loob sa pagpapasan ng krus bilang mga alagad ng Iyong Anak.
Hinihiling namin ito sa pamamagitan ni Cristong aming Panginoon.
B: Amen.
DI BA’T SADYANG MAY KAPWA
Di ba’t sadyang may kapwa ang sariling dapat hainan ng pagsisilbi?
At mamangha, ligaya’y dadalisay pag sa kapwa buhay mo ay naalay.
Ref. Bawat galing gamitin sa paglingap, laging damhin kung may naghihirap at
tandaan ganyang pagmamahalan, unang-unang atas ng kabanalan. 2x
IKAWALONG ESTASYON
MGA KABABAIHAN NG JERUSALEM
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa : Lc. 23:27-31
Sinusundan si Jesus ng maraming tao kabilang ang mga babaing
nananaghoy at nananambitan dahil sa Kanya. Nilingon sila ni Jesus at sinabi
sa kanila, “Mga kababaihan ng Jerusalem, huwag ninyo Akong tangisan. Ang
tangisan ninyo’y ang inyong sarili at ang inyong mga anak. Tandaan ninyo:
darating ang mga araw na sasabihin nila, “Mapalad ang mga baog, ang mga
sinapupunang hindi nagdalangtao, at ang mga dibdib na hindi nagpasuso.” Sa
mga araw na iyo’y sasabihin ng mga tao sa mga bundok, “Gumuho kayo sa
amin!’ at sa mga burol, “Tabunan ninyo kami!’ Sapagkat kung ganito ang
ginagawa sa kahoy na sariwa , ano naman kaya ang gagawin sa tuyo?”
N: O Jesus, sa daan ng krus, nagawa Mo pang dumamay sa kababaihan ng
Jerusalem , tanda ng Iyong malasakit sa kanila. Ipinakikita Mo sa amin ang daan
ng pagdamay at pakikiisa sa kanila na mga biktima ng kawalang-katarungan at
nagpapasan din ng kani-kanilang krus. Panginoon, naging makasarili kami at
walang pakialam sa kalagayang namamayani sa aming kapaligiran. Natatakot
kaming dumamay sa aming kapwa na biktima ng karahasan sa aming lipunan.
Pagtangis hindi sa luha kundi sa gawa ng pagmamalasakit sa mga naghihirap at
inaapi. Ito ang hinihingi Mo, Panginoon, at hindi ang pagkahabag sa sarili kundi
paggawa at pagpupunyagi sa tulong ng Diyos.
(Tahimik na Pagninilay)
N: O Jesus, nakiisa Ka’t nakiramay sa amin upang magkaroon kami ng
ginhawa sa paglakad namin sa daan ng krus---
B: Damayan Mo ang mga tumatangis at naghahanap ng dangal at
katarungan sa buhay.
N: Pinahalagahan Mo ang mga kababaihan sa kasaysayan ng kaligtasan
upang sama-sama kaming maging saksi sa orihinal na plano ng Ama na
pagkakapantay-pantay ng lahat---
B: Damayan Mo ang mga tumatangis at naghahanap ng dangal at
katarungan sa buhay.
N: Ibinilin Mo sa amin na pagmalasakitan ang mga inaapi at naghihirap
upang makibahagi kami sa Iyong mapagligtas na pagmamahal---
B: Damayan Mo ang mga tumatangis at naghahanap ng dangal at
katarungan sa buhay.
MGA PERSONAL NA KAHILINGAN (Tahimik sandali)
N: Ama ng pagdamay at malasakit sa sangkatauhan, nilikha Mo ang lahat sa
pagkakaisa at pagkakapantay. Bigyan Mo ng lakas at sigla ang aming pamayanan
upang mapanagutan namin at mapangatawanan ang plano Mong ito sa
sangkatauhan. Gawin Mo kaming isang sambayanang marunong dumamay at
magmalasakit sa mga inaapi at nagpapasan ng krus ng kawalang-dangal.
Hinihiling namin ito sa pamamagitan ni Cristong aming Panginoon.
B: Amen.
KAILAN PA
(1) Kailan pa ibibigay ang buhay mo’t lakas sa Kanya na nagbigay sa’yo ng
buhay na wagas.
(2) Ang pangalan N’yang banal kailan itatanyag kung wala ng pagkakataon
at huli na ang lahat.
Koro:At kung ang araw mo’y lumipas na, makuha mo pa kayang S’ya ay
paglingkuran, kailan pa kaya maglilingkod sa Diyos? Kung hindi
ngayon…kailan pa… (Kailan pa)
IKASIYAM NA ESTASYON
ANG PAGHUHUBAD KAY JESUS AT PAGPAPAKO SA KRUS
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa : Mt. 27:33-35
Pagdating sa lugar na tinatawag na Golgota, na nangangahulugang
Pook ng Bungo, binigyan nila si Jesus ng alak na hinaluan ng apdo. Ngunit
nang matikman Niya ay hindi ininom. Nang maipako na Siya sa krus,
pinaghati-hatian nila ang kanyang mga damit matapos magsapalaran.
N: Jesus, matagal Mong nilakad ang daan papunta sa Kalbaryo na pasan ang
krus ng kasalanan ng tao. At pagdating sa Bundok ng Bungo, hinubaran Ka nila
at ipinako sa krus. Naririnig at nababalitaan araw-araw ang maraming
paghuhubad at pagpapako sa aming kapwa. Paghuhubad sa dangal ng tao at
walang awang pagkitil ng buhay. At walang -konsiyensyang ipinagpapalit ang
buhay at dangal sa pera at kayamanan. Matauhan nawa kami sa kahibangang
ito ng aming panahon, at masabing tama na ang lahat ng paghuhubad at
pagpapako.
(Tahimik na Pagninilay)
N: Jesus, hinubaran Ka at ipinako sa krus upang damitan ng dangal at
bagong buhay ang tao--
B: Matauhan nawa kami at mabigyang-halaga ang buhay.
N: Tinanggap Mo ang mga pako ng paghihirap upang ipako sa krus ang
aming mga kasalanan.
B: Matauhan nawa kami at mabigyang-halaga ang buhay.
N: Ibinigay Mo sa amin ang kahulugan ng Krus: buhay na pakikibahagi sa di-
kanais-nais na pamumuhay upang maiangat namin ang aming kapwa---
B: Matauhan nawa kami at mabigyang-halaga ang buhay.
MGA PERSONAL NA KAHILINGAN (Tahimik sandali)
N: Amang bukal ng buhay, dinamitan Mo ang tao sa Iyong larawan at
binigyan Siya ng hininga ng buhay. Ngunit sa paghihimagsik ng tao sa Iyong pag-
ibig, pilit naming hinuhubaran ang aming kapwa at ipinapako sa di-pagtao sa
kanila. Matauhan nawa kami sa paghihirap ng Iyong Anak upang mabigyang-
halaga ang buhay at dangal ng tao. Hinihiling namin ito sa pamamagitan ni
Cristong aming Panginoon.
B: Amen.
ANG KALULUWA KO’Y NAUUHAW
(1) Katulad ng lupang tigang, walang tubig ako’y nauuhaw; O Diyos
hangad kitang tunay, Sa Iyo ako’y nauuhaw.
Koro: Ang kaluluwa ko’y nauuhaw sa Iyo, O Panginoon ko. Ang
kaluluwa ko’y nauuhaw sa Iyo, O Panginoon ko.
(2) Kaya’t ika’y minamasdan, doon sa Iyong dalanginan; Nang makita kong
lubusan, lakas mo’t kaluwalhatian. (Koro)
(3) Ang kagandahang-loob Mo, higit sa buhay sa mundo; kaya ako’y
magpupuri, Ngalan mo’y aking sasambitin. (Koro)
IKASAMPUNG ESTASYON
ANG ISA PANG KRIMINAL
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa : Lc. 23:39-43
Tinuya Siya ng isa sa mga salaring nakabitin, at ang sabi, “Hindi ba
Ikaw ang Mesias? Iligtas Mo ang Iyong sarili pati na kami!” Ngunit
pinagsabihan siya ng kanyang kasama, “Hindi ka ba natatakot sa Diyos? Ikaw
ma’y pinarurusahang tulad Niya! Matuwid lamang na tayo’y parusahan nang
ganito dahil sa ating mga ginawa; ngunit ang taong ito’y walang ginawang
masama.” At sinabi niya, “Jesus, alalahanin Mo ako kapag naghahari Ka na.”
Sumagot si Jesus, “Sinasabi Ko sa iyo: ngayon di’y isasama kita sa paraiso.”
N: Jesus, ipinakita Mo sa amin kung paano magpatawad sa kapwa.
Pagpapatawad sa nagkamali o nagkasala sa amin na patunay na pagtanggap
namin sa kapatawarang alok ng Diyos. Ang kapatawarang ito sa Ama ang bukal
ng lakas at dahilan upang kami’y magpatawad din tulad niya. Kung ang Diyos ay
nagpapatawad, kami pa kayang mga tao?
Ngunit parang nawawalang-kahulugan ang paghingi namin ng tawad
dahil matigas pa rin ang aming mga puso sa pagpapatawad sa iba. Oo,
Panginoon, mahaba pa nga ang dapat naming lakarin sa daang ito ng
kapatawaran: ang matutong magpatawad at humingi ng tawad.
(Tahimik na Pagninilay)
N: Jesus, sa kagandahang-loob Mo, pinatawad Mo hindi lamang ang
kriminal kundi ang sangkatauhan--
B: Matuto nawa kaming magpatawad at humingi ng tawad.
N: Ipinakita Mo sa amin ang paghingi ng kapatawaran sa pagsisisi at
pagbabalik-loob at ang daan ng pagpapatawad at pagtanggap sa kapwa--
B: Matuto nawa kaming magpatawad at humingi ng tawad.
N: Sinabi Mo na hindi ilang beses lamang ang pagpapatawad kundi walang
hanggan itong pagtanggap sa kapwa upang lubos kaming magkabuklod
sa pagmamahalan---
B. : Matuto nawa kaming magpatawad at humingi ng tawad.
MGA PERSONAL NA KAHILINGAN (Tahimik sandali)
N: O Diyos na aming Ama, sa Iyong kagandahang-loob, ibinabangon Mo
kami sa aming pagkadapa, itinutuwid Mo kami sa aming landas at inaakay kami
pabalik sa Iyo. Ipagkaloob Mo nawa sa amin kahit tilamsik man lang ng Iyong
kagandahang-loob. Palambutin Mo ang aming puso upang magkaroon kami ng
habag at pang-unawa para makapagpatawad at makahingi ng tawad. Hinihiling
namin ito sa pamamagitan ni Cristong aming Panginoon.
B. : Amen.
INA NG PAGLAYA
(1) Kami’y dumudulog, O Mahal na Ina, dinggin ang pagsamo ng bayan
mong sinta. Kami’y tulungan Mo sa pakikibaka, upang makalaya
sa’ming pagdusa.
Koro: O sana’y dinggin mo, O Mahal na Birhen, taos na dalangin ng bayan
mong giliw. Tulungan mong put'lin ang pagkaalipin, dangal
ipagtanggol, laya’y pasulungin.
(2) O Birheng mapagpala’t mapagkalinga, ilapit mo kami sa Diyos na
dakila. Lingapin mo kami’t mamagitan nawa, nang makamit lubos ang
naglahong laya. (Koro)
IKALABING-ISANG ESTASYON
SINA MARIA AT JUAN
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa : Jn. 19:25-27
Nakatayo sa tabi ng krus ni Jesus ang Kanyang ina at kapatid na babae
nitong si Maria, na asawa ni Cleopas. Naroon din si Maria Magdalena. Nang
makita ni Jesus ang Kanyang ina, at ang minamahal Niyang alagad sa tabi
nito, Kanyang sinabi, “Ginang, narito ang iyong anak!” At sinabi sa
alagad,”Narito ang iyong ina!” Mula noon, siya’y pinatira ng alagad na ito sa
kanyang bahay.
N: Jesus, ibinigay Mo sa isa’t isa ang Iyong Ina at ang pinakamamahal Mong
alagad bilang patunay na nais Mo para sa amin: na maging pamilya kami ng
Diyos sa maliit na mga pamayanan.
Nakakaligtaan namin ang pagkakapalagayang-loob na ito sa isa’t isa at
patuloy kaming nagkakanya-kanya. Mula sa krus, Panginoon, buksan Mo ang
aming puso sa paanyaya Mong ito upang maging pamilya kami ng Diyos at
mabuhay bilang magkakapatid.
(Tahimik na Pagninilay)
N: Jesus, ibinigay Mo si Maria kay Juan upang maging ina ng Iyong
pamayanan--
B: Pagbuklurin Mo kami sa pag-ibig at malasakit bilang pamilya ng Diyos.
N: Hanggang sa mga huling sandali ng Iyong buhay, kapakanan pa rin ng iba
ang Iyong inaalala, malampasan nawa namin ang pagkakanya-kanya
alang-alang sa kabutihan ng aming kapwa--
B: Pagbuklurin Mo kami sa pag-ibig at malasakit bilang pamilya ng Diyos.
N: Tinipon Mo kami bilang mag-anak ng Diyos at Ikaw ang lakas namin sa
pagsasabuhay nito sa aming mga pamilya at pamayanan--
B: Pagbuklurin Mo kami sa pag-ibig at malasakit bilang pamilya ng Diyos.
MGA PERSONAL NA KAHILINGAN
N: O Ama, paano naming di malalaman ang dakila Mong kalooban sa buhay
na aral ng Iyong Anak? Hangad Mong magkaisa kami bilang pamilya sa Iyong
pag-ibig. Sa tulong nina Maria at Juan, magkaroon nawa kami ng lakas na
mabuhay bilang mag-anak sa ilalim ng iisang bubong, ang bubong ng Iyong
makaamang kalinga. Hinihiling namin ito sa pamamagitan ni Cristong aming
Panginoon.
B: Amen.
DAKILANG PAG-IBIG
Koro: Dakilang pag-ibig, saan man manahan, D’yos ay naroon,
walang alinlangan.
(1) Tinipon tayo sa pagmamahal, ng ating Poong si Jesus; Tayo’y lumigaya
sa pagkakaisa, sa Haring nakapako sa krus. (Koro)
(2) Purihi’t ibigin ang ating D’yos na S’yang unang nagmamahal; Kaya’y
buong pag-ibig rin nating mahalin ang bawat kapatid at kapwa. (Koro)
(3) Iwasan lahat ang pagkapoot, pag-aalinlanga’t yamot; Sundin ang
landasin ni Jesu Cristo, at ito’y halimbawa ng D’yos.
(4) Mapalad ang gumagalang sa D’yos, at sumusunod sa Kanya,
tatamasahin n’ya ang Kanyang biyaya, pagpalain S’ya’t liligaya. (Koro)
IKALABINDALAWANG ESTASYON
ANG PAGKAMATAY NI JESUS
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa : Lc. 23:44-46
Nang mag-iikalabindalawa ng tanghali, nagdilim sa buong lupain
hanggang sa ikatlo ng hapon. Nawalan ng liwanag ang araw, at ang tabing
ng templo ay napunit sa gitna. Sumigaw ng malakas si Jesus, “Ama, sa mga
kamay Mo’y ipinagtatagubilin Ko ang Aking Espiritu!” At pagkasabi nito,
nalagot ang Kanyang hininga.
N. : O Jesus, nakikiisa sa Iyong pagkamatay sa krus maging ang kalikasan.
Ipinagkatiwala Mo ang Iyong Espiritu sa Diyos Ama, tanda ng malaya at kusang-
loob na pag-aalay Mo ng buhay. Isang marahas na wakas sa lahat ng karahasan.
Namamatay nga rin sa aming buhay at sa aming pamayanan ang Iyong Espiritu
hindi dahil sa pag-aalay ng sarili kundi dahil sinasarili namin ang mga dapat
ibahagi. Hindi namin ipinagkakatiwala sa Ama ang aming buhay sapagkat gusto
naming kami mismo ang may hawak nito. Ngunit ipinakita Mong nasa
pagkamatay nga ang pagsilang sa buhay, na kailangang mamatay ang binhi para
tumubo at mamunga.
(Tahimik na Pagninilay)
N: O Jesus, na nag-alay ng buhay na kaloob ng Ama upang ibalik sa kanya
ang lahat-lahat sa lubos na pananalig sa maka-Amang kalinga ng Diyos--
B: Pawiin Mo sa amin ang takot sa kamatayang nagbibigay-buhay
N: Tinuruan Mo kaming ipagkatiwala ang sarili sa Ama ng buhay upang
maging bahagi kami ng pagbibigay-buhay Niya sa aming kapwa--
B: Pawiin Mo sa amin ang takot sa kamatayang nagbibigay-buhay
N: Ibinigay Mo ang Iyong buhay sa paglilingkod sa pamayanan upang
maialay rin namin ang aming buhay sa kapakanan ng aming pamayanan-
B: Pawiin Mo sa amin ang takot sa kamatayang nagbibigay-buhay
MGA PERSONAL NA KAHILINGAN (Tahimik sandali)
N: O Diyos, hindi Mo ikinagagalak ang kamatayan ninuman sapagkat Ikaw
ang bukal ng buhay. Ikaw ang Diyos ng buhay! Tinatawag Mo kami upang
ipagdiwang ang buhay ni Jesus at hindi ang Kanyang kamatayan. Ipagkaloob Mo
sa amin ang biyayang mabuhay nang lubos sa paglilingkod at pakikipagkapwa-
tao tulad ng ginawa ni Jesus, mangahulugan man ito ng kamatayan. Hinihiling
namin ito sa pamamagitan ni Cristong aming Panginoon.
B: Amen
SINO AKO
(1) Hiram sa Diyos, ang aking buhay, ikaw at ako’y tanging handog lamang
Di ko ninais na ako’y isilang, ngunit salamat dahil may buhay.
(2) Ligaya ko nang ako’y isilang pagkat tao ay mayroong dangal.
Sino’ng may pag-ibig, sino’ng magmamahal,
kundi ang taong Diyos ang pinagmulan.
(3) Kundi ako umibig, kundi ko man bigyang halaga ang buhay kong
handog, ang buhay kong hiram sa Diyos,
kundi ako nagmamahal, sino ako? (Ulitin ang 2 & 3)
IKALABINTATLONG NA ESTASYON
ANG BAGONG LIBINGAN
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa : Mt. 27:57-60
Bago magtakipsilim, dumating ang isang mayamang taga-Arimatea,
na ang ngala’y Jose. Siya’y alagad din ni Jesus. Lumapit siya kay Pilato at
hiningi ang bangkay ni Jesus. Iniutos naman ni Pilato na ibigay ito sa kanya.
Kaya't kinuha ni Jose ang bangkay at binalot ng bagong kayong lino. Inilagay
niya ito sa sariling libingan na di pa nalalaunang ipinauka niya sa bato.
Pagkatapos, iginulong niya sa pintuan nito ang isang malaking bato, saka
umalis.
N: Jesus, tapos na ang lahat ng paghihirap Mo. Kung minsan nga’y parang
mas nakahihinga pa kami ng maluwag matapos ilibing ang mga patay, matapos
ilibing sa limot ang lahat ng problema. Ngunit kinukuha ni Jose ang Iyong
katawan hindi para limutin Ka kundi upang manatiling buhay sapagkat hindi Mo
nais na makalimot ang Iyong pamayanan. Ibang paglilibing ang hinihingi Mo sa
amin: paglilibing sa aming sarili upang mabuhay ang bagong tao, paglilibing sa
di-pagtao sa kapwa upang mamalagi Kang buhay sa aming pamayanan sa
malasakit at pagmamahalan. Paglilibing hindi para makalimot kundi para
maharap ang anuman dahil may magandang magaganap bukas.
(Tahimik na Pagninilay)
N: Jesus, inilibing Ka upang mabigyan ng bagong buhay at dangal ang sang-
likha mula sa kailaliman nito--
B: Buhayin Mo ang pag-asa ng aming pamayanan sa bukang-liwayway na
darating sa aming bayan.
N: Kinuha ni Jose ang iyong katawan dala ng kanyang malasakit at
pagbibigay-galang sa Iyo, isang magandang halimbawa sa pagkilala at
paggalang sa dangal ng tao--
B: Buhayin Mo ang pag-asa ng aming pamayanan sa bukang-liwayway na
darating sa aming bayan.
N: Hindi katapusan ang paglilibing sa Iyong katawan kundi isang landas sa
pagsikat ng bagong umaga at simula ng panibago Mong katawan na
aming pamayanan--
B: Buhayin Mo ang pag-asa ng aming pamayanan sa bukang-liwayway na
darating sa aming bayan.
MGA PERSONAL NA KAHILINGAN (Tahimik sandali)
N: O Ama, Ikaw ang bukang-liwayway ng aming buhay sapagkat maging sa
dilim ng kawalang-pag-asa, pinasisikat Mo pa rin ang bagong araw ng aming
lakas at kaligtasan. Sa paglilibing sa katawan ng Iyong Anak, pinasibol Mo ang
binhi ng bagong buhay upang tumubo ang bagong Katawan ni Cristo sa aming
pamayanan. Maging tanda nawa ng bagong simulang ito ang aming pamayanan
upang makita ng daigdig ang Bagong Araw ng Iyong pagliligtas. Hinihiling namin
ito sa pamamagitan ni Cristong aming Panginoon.
B: Amen
SAAN KAMI TUTUNGO
(1) Saan kami tutungo kaming makasalanan? Saan kami susulong dahas
laging kapisan? Ikaw Jesus ang susundan, Ikaw Poon ang hantungan.
(2) Sino kayang uusig sa di makatarungan? Sino kayang lulupig sakim na
umiiral? Sa sinumang sa Diyos mulat, katarungan magbubuhat.
(3) Kaloob Mong talino, atas Mo’y pagyamanin sa pakikihamok lagi
naming gamitin, karahasa’y pipiitin, kamalia’y tutuwirin.
IKALABING APAT NA ESTASYON
ANG PAGKABUHAY NI JESUS
N: Sinasamba Ka namin at pinupuri, Panginoong JesuCristo.
B: Sapagkat sa pamamagitan ng Iyong banal na krus, tinubos Mo ang
sanlibutan.
Tagabasa : Lc. 24:1-3
Umagang-umaga nang araw ng Linggo, ang mga babae’y nagtungo sa
libingan, dala ang mga pabangong inihanda nila. Nang dumating sila,
naratnan nilang naigulong na ang batong nakatakip sa pintuan ng libingan.
Ngunit nang pumasok sila, wala ang bangkay ng Panginoong Jesus.
N: Jesus, nagpunta sila sa libingan hindi para makita ang Iyong pagkabuhay
kundi para dalawin ang inaasahan nilang patay Mong katawan. Pero hindi nila
nakita ang iyong katawan. Kahanga-hanga ang mga gawa ng Diyos, at di namin
maiisip ni sa panaginip. Wala nga ang katawan Mo dahil hindi Ka nanatiling
patay. Wala nang kapangyarihan ang kamatayan, pinatay Mo mismo ang
kamatayang kinatatakutan naming mga tao. Binuhay Ka ng Ama, at kami ang
bago Mong katawan.
(Tahimik na Pagninilay)
N: Jesus, Ikaw ang buhay, manatili Ka sa aming piling upang maging
pamayanan kami ng Pagkabuhay---
B: Ipadala Mo ang Iyong Espiritu upang maging buhay na katawan Mo
ang aming pamayanan.
N: Pagbuklurin Mo kami sa aming pamayanan sa kapatiran at pagbibigayan
upang makita ng daigdig ang buhay na katawan Mo---
B: Ipadala Mo ang Iyong Espiritu upang maging buhay na katawan Mo
ang aming pamayanan.
N: Ibinigay Mo ang Iyong Espiritu sa mga alagad Mo, manahan nawa Siya sa
aming piling upang mamunga ang aming pamayanan sa mga gawa ng
Espiritu---
B: Ipadala Mo ang Iyong Espiritu upang maging buhay na katawan Mo
ang aming pamayanan.
MGA PERSONAL NA KAHILINGAN
N. : O Diyos na aming Ama, sa Iyong pag-ibig at kapangyarihan ibinangon
Mo’t binuhay ang Iyong Anak. Sa pagkabuhay Niyang ito, ibinangon Mo ang
dangal ng tao, at inihatid kami sa kaganapan ng buhay na kalooban Mo para sa
amin. Ipadala Mo ang Iyong Espiritu sa aming pamayanan upang maging
matapat kami sa pagsasabuhay sa kalooban Mong ito. Hinihiling namin ito sa
pamamagitan ni Cristong aming Panginoon.
B. : Amen
AWIT SA PAGNINILAY
MAGPASALAMAT KAYO SA PANGINOON
1.Magpasalamat kayo sa Panginoon
na S'yang lumikha ng lahat ng bagay dito sa mundo.
Sya'y gumawa ng buwan at mga bit'win upang magbigay ng liwanag sa pagsapit
ng dilim. O magpasalamat sa Kanyang mga biyaya at awa.
2. Magpasalamat kayo sa Panginoon dahil sa kagandahang loob N'ya'y
magpakailanman. At papurihan ang Diyos habang buhay na S'yang
nagligtas sa Kanyang hinirang bayang Israel. O ating purihin ang Poon na
mahabagin sa atin
PANGWAKAS NA PANALANGIN
N.: Sumaatin nawa ang kapayapaan at pag-ibig ng Panginoon.
B.: Sapagkat nabuhay Siya at namamalagi sa ating piling.
N.: Siya ang Buhay at Pagkabuhay!
B.: Buhay Siya, ngayon at magpakailanman!
Tagabasa: Roma 6:9-11
Alam nating si Cristo na muling binuhay ay hindi na muling mamamatay.
Wala nang kapangyarihan sa kanya ang kamatayan. Nang Siya'y mamatay,
namatay Siya nang minsan para sa kasalanan, at ang buhay niya ngayo'y para
sa Diyos. Kaya dapat ninyong ibilang ang inyong sarili na patay na sa
kasalanan datapwat buhay naman para sa Diyos sa inyong pakikipag-isa kay
Cristo Jesus.
(Tahimik na Pagninilay)
N.: Kapiling Ka nga namin, Jesus, sa pamayanang-Simbahan.
B.: Buhay Ka nga, Panginoon, ngayon at magpakailanman.
N.: Buhay Kang nangungusap sa amin sa iyong salita.

B.: Buhay Ka nga, Panginoon, ngayon at magpakailanman.

N.: Namamalagi ka sa piling ng iyong Sambayanan sa Banal na Eukaristiya.

B.: Buhay Ka nga, Panginoon, ngayon at magpakailanman.

N.: Kasama Ka namin sa aming kapwa at kasabay sa paglakad patungo sa Ama,

lalo na sa mga dukha at nangangailangan.

B.: Buhay Ka nga, Panginoon, ngayon at magpakailanman.

N.: Sa Iyong pagkabuhay, ibinahagi Mo sa amin ang pagiging Anak ng Diyos

kaya't naging Ama namin ang iyong Ama, at buong pananalig naming nasasabi:

AMA NAMIN......
N.: O Ama, salamat sa maluwalhating pagdating namin sa dulo ng daan ng
krus. Inihahatid Mo nga sa kabutihan ang lahat. Manatili nawang nakatuon ang
aming puso at kalooban sa Iyong kabutihan at kagandahang-loob sa gitna ng
dilim at mga krus ng aming buhay. Hinihiling namin ito sa pamamagitan ni
Cristong aming Panginoon.

B.: Amen

N.: Pagpalain tayo ng Diyos, ipagsanggalang sa lahat ng masama at ihatid sa

buhay na walang hanggan.

B.: Amen.