Disenyo ng Pananaliksik – Ito ay ang pangkalahatang estratehiya na pinipili ng mananaliksik sa maayos at lohikal na paraan. Ito ay nagtitiyak na masasagot ng pananaliksik and suliranin at matutupad ang layunin na itinakda nito. Naglalaman ito ng paraan ng pangolekta, presentasyon, at pagsusuri ng datos. Nililinaw din nito kung anong uri ng pananaliksik ang pag- aaral. Mga Disenyo ng Pananaliksik 1. Kuwantitatibo – Nakatuon sa pag kalkula ng mga bilang. Tumutukoy ito sa empirikal at sistematikong imbestigasyon ng iba’t ibang paksa. Halimbawa ay mga sarbey, eksperimentasyon. 2. Kuwalitatibo – Ito ay personal sapagkat ninanais nitong maunawaan ang pag-uugali at katangian ng pakikipagrelasyon. Hindi ito nakapagbibigay ng tiyak na mapanlahat na konklusyon, bagkus ang layunin lamang nito ay mapaliwanag at magbigay ng inisyal na pagkaunawa tungo sa pagbuo ng desisyon. 3. Deskriptibo – Pinag-aaralan sa mga palarawang pananaliksik ang kasalukuyang ginagawa, pamantayan, at kalagayan. Nagbibigay ito ng tugon sa mga tanong na ano, sino, kailan, saan at paano na may kinalaman sa paksa ng pag-aaral. 4. Action Research – Inilalarawan at tinatasa ng isang mananaliksik ang isang tiyak na kalagayan, pamamaraan, modelo, polisiya at iba pa sa layuning palitan ito ng mas epektibong pamamaraan. 5. Historikal – Ang historikal na pananaliksik ay gumagamit ng iba’t ibang pamamaraan sa pangangalap ng datos upang makabuo ng mga konklusyon hinggil sa nakaraan. 6. Case Study – Ang pananaliksik na nasa ganitong disenyo ay naglalayong malalimang unawain ang isang partikular na kaso kaysa magbigay ng pangkalahatang konklusyon sa iba’t ibang paksa ng pag-aaral. 7. Komparatibo – Ito ay naglalayong maghambing ng anomang konsepto, kultura, bagay, pangyayari at iba pa. Madalas na gamitin sa cross-national na pag-aaral ang ganitong uri ng disenyo upang mailatag ang mga pagkakaiba at pagkakatulad sa pagitan ng mga lipunan, kultura at institusyon. 8. Normative Study – Madalas na inihahanay sa deskriptibong uri ng disenyo ang normative dahil naglalayon itong maglarawan ng anumang paksa. 9. Etnograpikong pag-aaral – Ang etnograpiya ay isang uri ng pananaliksik sa agham panlipunan na nag – iimbestiga sa kaugalian, pamumuhay at iba’t ibang gawi ng isang komunidad sa pamamagitan ng pakikisalamuha nito. Nakabatay ito sa pagtuklas ng isang panlipunang konteksto at ng mga taong naninirahan dito sa pamamagitan ng pag-unawa sa kanilang mga pagpapahalaga, pangangailangan, wika, kultura at iba pa. 10. Eksploratori – Isinasagawa ang disenyong eploratori kung wala pang gaanong pag-aaral na nagawa sa iang paksa o suliranin. Metodolohiya ng pananaliksik – Ito ay sistematikong kalipunan ng mga metodo o pamamaraan at proseso ng imbestigasyon na ginagamit sa pangangalap ng datos ng pananaliksik. Mga Pamamaraan ng Pananaliksik 1. Disenyo at pamamaraan ng pananaliksik – Ang Disenyo ng pananaliksik ay tumutukoy sa kabuuang balangkas at pagkakaayos ng pananaliksik, samantalang ang Pamamaraan naman ay kung paano mabibigyang katuparan ang disenyo. Narito ang iba’t ibang pamamaraan na ginagamit sa pananaliksik. a. Sarbey – Ginagamit upang mangalap ng datos sa sistemaktikong paraan sa isang tiyak na populasyon o sample ng pananaliksik. b. Pakikipanayam o Interbyu – Pagkuha ng impormasyon sa isang kalahok na may awtoridad o di kaya ay may personal na pagkaunawa. c. Dokumentaryong Pagsusuri - Ito ay isang pamamaraan sa pananaliksik na ginagamit upnag kumalap ng impormasyon na susuporta at pagpapatibay sa mga datos ng pananaliksik sa pamamagitn ng analitikang pagbasa sa mga nasusulat na komunikasyon at mga dokumento upang malutas ang mga suliranin. d. Nakabalangkas na Obserbasyon at Pakikisalamuhang Obserbasyon – Ito ay pagmamasid ng mananaliksik sa mga kalahok na pokus ng pag-aaral habang sistematikong itinatala ang pagkilos, interaksyon at pag-uugali sa pamamagitan ng gabay sa obserbasyon. 2. Lokal at Populayon ng Pananaliksik – Sa bahagi ito ng metodolohiya, nakasaad ang mga batayang impormasyon tungkol sa kalahok ng pananaliksik. Kabilang sa mga ito kung sino, tagasaan o kaya ay kung anong institusyon o organisasyon may kaugnayan ang kalahok. Ipinapaliwanag dito ang proseso ng sampling na pinagdaanan at kung ano kunh ano ang dahilan o pinagbatayan ng pamimili ng kalahok. 3. Kasangkapan sa Paglikom ng Datos – Sa bahaging ito ng metodolohiya, inilalahad kung ano ang uri ng kasangkapan o instrumentong gagamitin upang maisagawa ang pamamaraan ng pananaliksik. Nakabatay sa disenyo at pamamaraan ang instrumento. Binubuo ang instrumento bago ang aktwal na pangangalap ng datos. Nagsisilbing bahagi ng apendiks ng pananaliksik ang mismong talatanungan, checklist o ano mang bagay. 4. Paraan ng Paglikom ng Datos – Nilalaman naman ng bahaging ito ang mga hakbang na plano at proseso sa pagkuha ng datos. 5. Paraan ng Pagsusuri ng Datos – Nakapaloob sa bahaging ito kung paano gagawing sitematiko ang presentasyon ng datos para sa mas madaling iterpretasyon at pagsusuri.