Ang sarsuwela ay isang komedya o melodramang may
kasamang awit at tugtog na nahihinggil sa mga punong damdamin ng tao tulad ng pag-ibig, kapootan, paghihiganti, kasakiman, kalupitan, o kaya naman ay tungkol sa mga suliraning panlipunan o pampolitika. Ayon sa kasaysayan, sinasabing hinango ng mga Espanyol sa opera ng Italya sapagkat magkahalo ang diyalogong ginamit dito (patula at pasalita). Ang patulang bahagi ay karaniwang diyalogo ng mga pangunahing tauhan, bukod sa ito ay nilalagyan ng komposisyon na maaaring awitin. Ang tulang diyalogo ay yaong gamit naman ng mga katulong na tauhan. Ang sarsuwela ay binubuo ng walong yugto. Ang mga tagpo ay magkahalong seryoso at katawa-tawa. Melodrama kung ito ay tawagin o kaya’y tragikomedya. Hango sa tunay na buhay ang paksa nito ay kung minsan ay nasosobrahan naman sa damdamin, lalo na sa pag-ibig kaya nagiging soap operatic. Ang sarsuwela, bagama’t ipinakilala noong panahon ng mga espanyol ay lubos na namulaklak noong panahon ng himagsikan Pilipino at Amerikano. Unti-unting nanghina ang sarsuwela nang nakilala sa bansa ang bodabil o stage show. Ang pagtatanghal na ito ay halos wala nang istorya, puro kantahan at sayawan lamang ang nangyari kung kaya sa paglaganap ng bodabil naging purong panlibangan na lamang ang teatro. Sa kasalukuyan, ang mga dulang pantanghalang ito ay patuloy pa ring ginagawa sa ating bansa bilang pag-alaala sa mahahalagang pagdiriwang na may kinalaman sa pananampalatayang Katolisismo at upang talakayin ang mga suliraning panlipunang nangyari sa bansa.