Professional Documents
Culture Documents
Tulang Pasalaysay
“Si Matandang Simeon”
ni: Tess C. Alikapala
Gumising sa umaga,
Nag-inat-inat muna,
Nagpatulak ng sigla,
Sa kapeng walang lasa.
Magpapawis maghapon
Itong si Tandang Simeon,
Siya ay isang piyon,
Sa isang konstruksyon.
Kanina’y nagbaon
Ng kanin sa dahon,
Ulam na talong,
Wala man lang bagoong.
Nagmeryenda siya
Ng buntunghininga,
Walang laman ang bulsa
Kahit na barya.
Palad na makalyo,
Ipinahid sa noo,
Upang matuyo
Ang pawis at dugo!
Mata’y ipinikit,
Nagdasal ng saglit,
Pagal na sa lupit,
Sa abang sinapit!
At napapawi na
Ang pagod at dusa
Galak ang pamilya
Karugtong ng hinga.
At sa kinabukasan
Muling ipapasan
Mga krus sa daan
Sa lubak ng bayan.
Ipupuhunan na naman
Ang mga buto at laman
Upang may mailaman
Sa kalam na tiyan!