jajtp xa ve’e ku jayu tö’majaty töö’toki nyayjavaja jats

kyoo’kyaktsojknü ti yaktönüt, ku ja tsaatsyvinma’yün

xtuktëjkimta, jats yë njööjntkünamta myujijtikëjxnü
yakjava, ka’a tii y’ukyakmëjüpëëmnü, naxpük it
nyaknajxumdinü, juu’ n’uktsöjja’vimtup tü y’it, ka’a ja
tsyöjin njoo’k paatumdinü, jajtpaptse’e ja ni’xünkopkamta
masë’ëk nyak’ijtumtuva, küx vintso xa ve’e jayu tii dü jayep
jya’vinküjxp nayve’empats ja ve’e nyaknikä’xnatëjkimta
mëët nvitünxoxamta, axjö’n pö’öx yaknikonpäjt’ukva’any,
ve’emts ja ve’e vaa’njaty myaya jats ja ve’e
jyemütsi’ukvaannü, ax vintso tse’e it nyaxy ve’em tse’e ja
njööjnkünamta küükp tyaannü, jä’ä ku nkamëjüpë’mumta
uk tsojk nkanëja’vimta vintso yë ve’e dütsëk jatse’e
nyakpitsumumtat ti jatye’e nja’vimtup, ti jatye’e
xyaktsaatsyimtup uk juu’ njatsojkumtup jatse’e kya’oya;
vintso tse’e it nyaxy, nayve’emtse’e nyaktsö’öxjajtumta ja
tsoojypaatün (tsopyaatün), jatse’e njoo’ktsojkumdinüt
nvijts’oyimtat juu’ ve’e jekan naspük tü nyak’ijtumta,
yaktijupts yë ve’e jats ka’a ve’e ti tsoojy kum ka’a tse’e tii
ja pëjkpa aampa yakjava, koojyji xa ve’e akujkpsoj ja kak
yakjava y’atuk uk nja’vinamta tö’majaty tsyëjkp pyitsumnü
yakjava, uk jyakayakpayo’oyam tö’ma ja vinnëëj kyisvüj,
nayja’vimjada xejükutöka, ka’a tüv ja töö’ n’uk’ixumtinü,
töö’toky nayja’vimjada, ka’a tse’e pën jadö’k dünëjava ti
ve’e tööjnjup najxjup üü’mmetta, ka’a
y’ukyak’amotunajxnü ja oykojtsün ja oy ka’ama’yün,
jömatse’e dü ntöö’tokimtinü?, jöma ve’e dü
ntöö’ta’numtinü?, tikëjx tsyëjxkëjx, jöma n’ite’e
n’ukva’numtinuvat, vintso yë ve’e ntö’numtat jats
nvijts’o’yimtat juu’ dümya’tnü, npaatumtape’e nyütsoojy?,
taampnume’e ja n’itamta jats njööjntkünam
nü’ixumpijtumtat?, natsyojkumjüdupe’e nüyöjk axjö’n dü
paada dü akääga?, ka’a tse’e na’ixumtat jats kujëpit uk
kumaaxkup ja ve’e työnjüt uk y’oyat, küx axjön ja naxjok
uk ja pu’ut nyüyöka jovum xëëj jats n’ukva’numta
npöjumta uk nyakvaatsumta pën tii, vää’njatyts ja ve’e nëëj
yakpüüjmja, yakxëtsa, yakxatsy, yakpë’ët, van’itse’e
n’ix’ukva’numdinuva vintso yë ve’e tsyöjüpëjknuva juu’
jaa’tyoki uk masë’ëk dü y’it, npat’ukva’numdinuva ja
njootamta ja nja’vinamda, natsyojk’ukva’numjidinuva, ja
vinma’yün työ’kmöjk’ukvaannü, n’ajä’yimdinuva ja töö’ juu’
dü nkatsojkumta jats npëjkumtat uk n’ite dü
nnikujöö’nimta, ve’emts ja ve’e njaa’k’ixtimtat jats
njaa’kpaatumtat tijatye’e dü kyo’otyun dü pya’amtun,
ve’em ja vine’e yakkotsüt? uk vä’ä ja vine’e pyitsum jats
viinm üü’me’e nayjömtö’numjada natyitö’numjada, ax ku
tse’e njä’yumta jöma ve’e kyoo’kyakmuteninü, jätse’e tyëka
ja mëkin uk ja maju yak pëjkumpit, van’ittse’e ja mëjütöönk
yak’ukva’anüt, jatuptse’e jats yakjavat tö’majaty axjon
jääjyjam kü nta’numta, jääjyjam tü ntsë’kxumdinü, yakjava
axjö’n kü n’ëxnëjkxumta ku yaktsëk jats ntöö’vejkumtat
(ntöö’pëjkumtat), vinkopkts ja ve’e ooy jats
njaa’myäjtsumtat pën üü’me’eda, ti këjx üü’me
naxvinjööjntykümta, nëmay xa ve’e juu’ dü ka paattup ti
nyimuyo’oydap nyimutöntap, nyüvinkopkipts ja ve’e ooy
küx ku xa ve’e yaknëjava ti ve’e yaktsojkp ve’emts ja ve’e
xputëjkimtat mëët yë jotkëdaakün.
naxyantse’e vyä’nat yë mëktöönk jats tëvan ja namtöö’
n’ukvanumtinuva ka’atse’e nyakjajtumdinuvat ja
ëxnëjkxyo’oy, tëkap yë ve’e oy yë ixpëjkün juu’ ve’e dü
nyaknajxumta yaktsëkam uk kyayaktsëkam, të tse’e
ntuknajxumta.