OORI

Akemakowentziri pairani ikantakota oori. Tema ikantaitzi tsimatsi apaani asheninka

jiyaatake jowashitaantawaita antamiki Tema irika asheninka irowake inkomintathate.
Jatake iroñaaka tonkaariki. Ari ikemakeriri apaani tsimeri ikantaitziri oori jimowaitzi ‘‘
jojojo,jojojo’’. Ikanta iroñaaka asheninka jaapaake kompiroshi jowetsikake iwamkoshiro.
Thaankiperoini ithonkakero. Ari isaiki iroñaaka inthomointa jimowaitzi irirori
joshiyakowetari oori tema osheki tsimeripayeeni pokayetapaintatsiri. Ikanta ikentawakeri
(chek, chek, chek) tema ikentake osheki tsimeri. Piyanaka iroñaaka asheninka ipankoki,
jatai areeta.
Opoñaashitaka pashine kitaiteri ari ipokakeri pashine asheninka ikantapakeri:
Asheninka noñaakero powashiro janta, nokowi iroñaaka niyaate nokyaashitakiteroota.
Ikantanake pashine asheninka ashitarori iwashiro, ikantzi.
Pimatero pinkyaashitakitero. Ikanta irika asheninka jatake kyaashitapaake, ikemitapaakari
eejatzi iroñaaka irirori tsimeri oori jimotawaitzi ‘‘jo, jo, jo jo’’ motawaitapaaka irirori tema
pokawetapaaka eejatzi tsimeripayeeni. Ikaantaawetari jomanawetawakari (cherok,
cherok,) te ikente tema kayetsi jinatzi irirori. Ari isaiki iroñaaka irika asheninka
jowashirewaita tema osheki okisaneentawaitakeri iina. Ari opoña ipampithashiryaanaka
iroñaaka irika asheninka ikaimakotakeri oori ikantziri:
Aritake piñaawaitake jo,jo,jo, pimpaajatena piwenkite pikominthatantari eeroka.
Ari ipeyanaka iroñaaka. Oori, te añaawaitanai mairitanake tema irika tsimeri oori
atziritanake pokake iroñaaka oirinkaka, ikemashitakari iroñaaka asheninka, joirinkapaaka,
sherok ,sherok. Iro jamenanakitziini, jiñaatziiri ipokake apaani atziri jiñaanatapaakeri
asheninka, ikantapaakeri:
Naakawe, ani ¿ipaitaka pikaimiri inkaaranki? Nokemakemi, akanake asheninka iroñaaka,
ikantanake:
Tekaatsi nonkaime, ani nokantashitari oori. Ipoña ikantake oori:
Tema naakatake, ani ¿paitakya pikowakotanari?
Nokantashita noñaawaitzi apaniroini, pimpaajatena piwenkite pikominthatantari eeroka.
Jaa, iro pikantzi je, tzimatsi, ani. Jamenanakena asheninka ithaateki, jiñatziiro
ikyaakoporokitakero iwenkite.iroñaaka oori ikantakeri asheninka.
¿tsika pinkantakaya, ani?
Tekaatsi nonkantya, ani te nonkomithatataite. Ikantzi oori:
pamakero pako, nonkishokemi. Ipampitanake ithaateki oori jaakero iriwenkite,
jatsikakero. Ikishokantzimaitari irakoki (kishok, kishok,) josapiryaakeri tema kantaka,
(pithari,pithari,) iyayetsinka kemiwaitanaka opoto oonkana. Ipoña jaake pashine
iriwenkite, ikishokantakari, ipoña ikantakeri:
Thamera ankiye iroñaaka powashiroki, ani kyagainakeni. Iroñaaka motawaitapaake
inthomainta. Tema kantapaaka tsimeripayeeni, ari ikentayetawake ‘‘chek, chek,’’ tema
kentawaitanai asheninka ikayetsitawetaka inkaaranki. Ipoña oori ikantakeri asheninka
ikantziri.
Ari eeroka powitari pikentakeri iroñaaka. Naka etawakyaarine noyari.
Jaakeri iroñaaka nompemiro niwenkitepayeeni: Jaakero iroñaaka oori iwenki ipakeri.
Ikantakeri, ani jiroka iwenki iro ikashiyakaitzirori arika amoweite antamiki impokantyaari
tsimeripayeeni. Jiroka pashine iwenki ikantaitziro shonkiriwenki. Jiroka pashine
thamiriwenki inatzi. Jiroka pashine manirowenki.
Ari okaratzi ithonkatakaakeri ipakei maaroni irashi tsimeriyetatsiri. Ipankitero iroñaaka
asheninka maaroni iroka iwenkipayeeni irotake añaantaarori otzimayetai
iriwenkitepayeepayeeni asheninka iroñaaka irootake ikominthatantayetaari aparopayeeni
ari opoñaari ikomithatantayetakari jinaakerira pairani asheninka asheninka tsimeri
ikantaitziri oori, okantakaantziro ikayetsitzi. Tema ipankitakerora asheninka iroka
iwenkipayeeni ipakeriri oori, oshekitanake iina tema okowawetaka ookerimi pairani.
Oñaakerira ikomithatai onintanairi iroñaaka. Ari okaratzi akemakowentzi ikantakota
pairani asheninka kayetsi.

ARI OTHONKAPAKA.