BOQONNAA AFUR: ASOOSAMA

Bal'ifnee yoo ilaalle, og-barruun asoosamaafi miti-asoosama jedhamee iddoo lamatti qoodama.
Asoosamni jecha ifaa hin taaneefi dimshaashummaa qabu kan hojii uumee yeroo hedduu
holooloon dhiyaatu. Yoo lamaan isaanii bifa hojii kalaqaa kan dhugaa hin taane ta'aniyyuu
ulaagaa kamiinuu walaloofi diraama hin qabatu. Kan inni yeroo ammaa of keessatti hammatu
asoosama gabaabaa, giddugaleessaafi dheeraa dha.
Asoosamni og-barruu bu'aawwan hedduu buusa. Kanneen ol aanaa ta'an keessa fedhii uumamaa
keenya gabbisuun isa tokko. Hojiin og-barruu bu'a qabeessi kan fuuldura nutti dubbatu fakkaata,
keessumaa yoo sanaaf bilchaannee jiraanne. Keessoon jireenyaa barreessitoonni gaariin nam-
fakkiiwwan isaaniin mul'isan yeroo hedduu walakkaa qaama keenyaa nutti hima. Nu dinquu,
iyyisiisuu, hollachiisuu, abjoochisuu, yaachisuu, boosisuu, nam-fakkiitti quba of nu
ciniinnachiisuu danda'a. Dhugaa mul'atu addaan baasee agarsiisa. Faayidaa wantoonni qaban
addaa baasee waan nu argisiisuuf erga kitaaba asoosamaa tokko dubbifnee ni jijjiiramna, yaada
gad fageenya qabu horannas. Ilaalcha jireenyaa akka gad fageenyaan qabaannuu fi bal'ifannu nu
gargaara. Kana malees, yaada gogaa qabanne akka jijjiirruufi akka addunyaa dhugaarraa
fagaannee jiraannu nu gargaara. Gammachuun seeneffama gochoota haarawaa irraa maddu
hawwii keenyaa guutuuf, kan akka kan hin ta'iin ta'uu, dandeettii guddaa qaba. Karaa biraa
ammoo, asoosamni yaaduu waan darbeef nu qabnu waggootan isaanii wajjin nutti mul'isa.
Asoosamni seenawaa kan mannaamaan isa darbe irra deebi'ee uumu kanaaf tajaajila hedduu
qaba.

4.1. Asoosamni Maal? (What is fiction?)

Hayyuuleen adda addaa asoosama bifa adda addaan hiikaniiru. Kanneen itti aanan isaan keessaa
muraasa. A Dictionary of Literary Terms (Martin Gray 1992: 119) akka jedhutti asoosamni:

Hojii fakkeessuu, sobuu, ykn burqisiisuu; wantoota dhugaa ta’uu caalaa yaadaman.
‘asoosama’ jechuun har’a asoosama dheeraafi kuufama seenaalee, ogbarruu kalaqaa
 kanneen al-kalaqaarraa adda godhuuf, fakkeenyaaf seena jireenya nama tokkoo ykn
seenaarra.

The action of feign, lying or invent; that which is feigned or invented; things imagined as
opposed to fact. ‘Fiction’ is nowadays used of NOVELS and stories collectively, to
distinguish imaginative literature from ‘non-fiction’, for example, biography or history.

Haala kana keessatti asoosamni faallaa dhugaati. San jechuun hojii aartii kalaqaafi yaadaati.
Asoosamummaanis faallaa haqummaa ykn dhugummaa ta’uu xiyyeeffata. Asoosamni akka bifa
qooqaatti daanga’aa miti. walaloonillee akka wiirtuu asoosamarra qubatetti mul’ifama. Kun akka
asoosamni gosa ogbarruu bifa qooqa addaa qabu caalaatti hojii ogbarruu hunda ta’e ibsu mul’isa.

As keessatti gosa ogbarruu daanga’aa ta’uu isaa irratti caalaa xiyyeeffanna. Mee hubannoo
Shlomith Rimmon-Kenan (1983: 1-3) asoosamaaf qabdu haa ilaallu. Ibsa maqaa ‘seenessa’ jedhu
dabaluun ‘asoosama seenessaa’ jettee moggaaste; kanas akkasitti hiikte: seenessa tartiiba gochoota
kalaqaa’ Itti fuftees hubannoo jechoota kana keessa jiraniif qabdu wal duraa-boodaan addeessite,
hiika isaaniis ibsite. Seenessi yaada lama mul’isa: (1) deemsa walii galtee kan seeneffamni akka
ergaatti maddaa galatti ce’uufi (2) uumamaan ergaan jechaan kan daddarbu ta’uu isaati. Kunis
addummaa asoosamaafi walaloo onnachiiftuu ykn barruu ibsaa jidduu jiru itti dabalee mul’isa.
Qooqni asoosamaa holooloodha; untaafi safara hin qabu. Kun akka walaloon adda ba’u isa
godha. ‘Gochi’ wanta raawatu tokko, wanta xumura ykn maqaa gochaan bakka bu’u. fakkeenyaaf
oyiruu keessaa xaafii haamuu. ‘tartiibni’ gochootaa gocha tokkoo ol kanneen seenessa keessatti
argaman mul’isa. Kitaaboleen seenaa, gabaasni raawwii, barruun seenaa ofii, hundi
asoosamarraa adda ta’uun yaanni asoosamaa akka dhimma yaadaa ta’e addeessa.

Kunis gaafaa asoosama akka gosa murtaa’aa ogbarruu barreeffamaatti ilaallu mudaa qaba.
Murtaa’ummaan isaas bifa qooqaan adda baha. Qooqni isaa walqixxummaa safaraafi unta
sagalee irraa adda. Bifti qooqaa isaa holooloodha; walaloo irraa adda. Kanaafuu, asoosama
holooloo yoo jenne hojii kalaqaa bifa aartii walaloo irraa adda ta’a.
Holooloon kan boodatti deebi’uufi boca addaa uumuuf baayyee hin dhamaane jechuudha. Kan
qajeelee fuuldura yaa’u, irra deddeebii hin qabne, wal qixxummaa safaraa kan hin qabne. Hojiin
ogbarruu kalaqaa bifa qooqaa kanaan beekamu dhimma kutaa kanaati. Kanaa booda asoosama
yoo jenne kana ta’uu ibsuu barbaanneeti.

Dheerina irratti hundaa’ee, hojiileen asoosamaa gabaabaa, jiddugaleessaafi dheeraatti qoodama.

Itti aansinee yaadaafi amaloota tokko tokkoo isaanii adda baasnee ilaalla; caacculeen isaanii
garuu waan tokkuma ta’aniif walitti ilaalla.

4.2. Qoqqooddii Asoosamaa

Kutaa dabre keessatti, maalummaa asoosamaa adda baasnee jirra. Kun gosoota ogbarruu
biraarraa adda baasuuf nu fayyada. Garuu gosa tokko gad fageenyaan qoqqooduu danda’uun
hubannoo keenya cimsa. Dheerinaan asoosamni iddoo sadiitti qoqqoodamuu mala: asoosama
gabaabaa, jiddugaleessaafi dheeraan. Inni jidduu bifaalee isaan hafan lamaanii waan fudhataniif,
kan jara moggaarra jiran lamaanii faaraan yoo ilaalle kan isaa nu hubachiisuu danda’a.

4.2.1. Asoosama Gabaabaa (Short Fiction)

Kaayyoolee: - dandeettii waa’ee asoosama gabaabaa barreessuu horachuuf.

- Amaloota asoosama gabaabaa adda ta'an akka hubattuuf

-Amaloota barreessitoonni asoosama gabaabaa fayyadaman

- Akka asoosama gabaabaa qo'attuuf

Asoosamni dur yeroo jalqabaa afoolaan ture. Asoosamni afoolaa sheekkoo, mammaaksa, baacoo,
dur durii, tapha ijoollee, qoosaa, seenaa, muuxannoofi mudannoo guyyuu hunda dabalata.
Barreeffama keessatti, asoosamni gabaabaan seenaa gabaabaa qaba. Guddina kanaafis afoolli
bu’aa guddaa gumaachee jira jedhamee yaadama. Asoosamni afoolaa waa’ee beekumsaa,
dhugaa, nagaroo, xuurii, abshaalummaa, dandeettii, kkf. Kaayyoon isaaniis kanneen barsiisuudha.
Kana hubachuuf seeneffamoota kanneen fakkaatan dubbisi.

Asoosama gabaabaan asoosama seenaa gabaabaa ykn seeneffama gabaabaa qabu. Akka Gordon-iifi
Kuehner (1999 viii) jedhanitti asoosamni jechoota dhibba shanan tokko qabu asoosama gabaabaa
gabaabaa jedhamee ramadamuu danda'a. Yoo dheerinni isaa jechoota kuma kudha shan ga'an ta'e ammoo
akka asoosama jiddu galeessaatti ykn asoosama dheeraa gabaabaatti fudhatamuu danda'a. Deebiin gaaffii,
"Asoosama gabaabaan maal?" jedhuu garuu ammas salphaa hin ta'u. Edgar Allan Poe, namichi akka
jalqabaa asoosama gabaabaatti fudhatamu, akkas jechuun asoosama gabaabaa addeessa: seenessa
holooloo gabaabaa kan dubbisuuf walakkaa sa'atii hanga sa'atii tokkoo ykn lamaa fudhatu.

4.2.1.1. Seeneffama Gabaabaa (The Short story)

4.2.1.1.1. Seeneffama Gabaabaa Jechuun Maal Jechuudha? (What is short story?)

Asoosamni gabaabaan kana jedhanii murteessanii adda baasuun nama dhiba. Asoosama seenaa
gabaabaa qabuutti kaa’uutu salphata. Asoosamoonni gaggabaabaan gosa adda addaa akka
asoosama gabaabaatti fudhatamu. Asoosama gabaabaafi giddugaleessa ykn dheeraa jidduu
daangaa buusuun rakkisaadha.

Garuu maaltu isa gabaabsa? Deebbii kanaaf yaada yaada Norman Friedman ka’uun yaada lamaan bu’a
qabeessa:
 Asoosamni gabaabaan tarii seenaa dhiphaa waan qabuuf gabaabbate. A short story may be short
because the material itself is narrow in its range or area of interest.
 Asoosamni gabaabaan tarii yoo seenaan isaa bal’achuuf humna qabaatellee, barreessaan waan hin
barbaanneef kutee keessaa hambisaa jennaan gabaabbate. Gama tokko irratti xiyyeeffatee, bu’aa
isaa cimseefi aartummaa isaa cimsuuf.

4.2.1.1.2. Amaloota Seeneffama Gabaabaa (Features of the short story)

Seenaa gabaabaan amaloota hedduun beekama. Amaloonni kunniin bifaalee ogbarruu biraa irraa
adda isa godhu. Kanneen keessaas isaan itti aanan heeruu dandeenya.
 Yeroo hedduu amala muraasa irratti xiyyeeffata (qamalee, jaldeessa, leenca;
abshaalummaa, gowwummaafi sodaa akkasumas gootummaafi gowwummaa). Irra caalaa
amala tokkorratti xiyyeeffata. Amaloota kanneen deemsaafi haala adda addaa keessatti
hin mul’isu. Jijjiiramaafi guddina isaanii irratti hin xiyyeeffatu. Garuu guddina
nameenyaa isaaniif wantoota jiruufi jireenya keessatti murteessoo ta’an keessa kan isaan
cehan argina. Waa’ee dabreefi ammaa irratti hubannoofi dandeettii sammuu isaanii
cimsa.
  Caasaan jaargocha isaa xaxamaa miti. garuu humna cimaa yaada rarraasuu qaba. Seenaan
hundi bantimiira hin ga’u; jireenya namfakkii keessatti raawwii aduu tokkoo agarsiisuu
danda’a. calaqqee yeroo tokkoo ykn muuxannoo jiru ta’uu mala. Tokko tokko hin
dhumiin karaatti dhaabata. Akka itti dhumu, dubbistoonni shakkii keessa galu. Kaan
immoo jaargocha ifaa hin qaban.
 Seenrffamni gabaabaan yoomessa addeessuu hanqisa. Jaargochi isaa waan gabaabbatuufi
dhuma jalaaa waan ka’uuf, kanaaf iddoo hin qabu. Gochi tokko kan biraan hordofamaa
gara xumuraatti fuuldura deema.
 Seenrffamni gabaabaan xumuratti dhiyaatee eegala. Kun akka dafee dhumu isa taasisa.
Caasaafi toora seeneffamichaa saffisiisa. Kun jalqabuma qajeelanii seeneffamichatti
seenuun, yoomessa isaa durduubee ifaan addeessuun, dubbisaan akka fuulchuun hubatu
gochuun, yaada dubbisaa hawaachuufi banuun, kanaafis jechoota ykn galeewwan
gaggabaaboon raawatu.
 Seeneffamni gabaabaan hedumminaan yaada tokko, yeroo muraasa, muuxannoo
daanga’aa qofarratti xiyyeffata. Kunis fuuldura qajeelee gochi tokko kan biraa hordofuun
gara xumuraatti himamaa deema. Garuu yeroon itti barreessaan caasaarratti xiyyeeffatus
jira. Kun yaada addaa tokko uumuufi gargaara. Kallattiin seenessaas tokkumaan fulla’a.
 Seeneffamni gabaabaan qusataafi hudumamaa (ukkaamamaa) dha.
Norman Friedman immoo (1997:96-7) yaadaalee lameen kanneenin hiikeera:

. Asoosama gabaabaan tarii kan gabaabbateef wanti inni jechuuf jiru bal'ina waan hin qabneef ykn
wanta bal'aa jechuuf waan fedhii hin qabneef.

. Asoosama gabaabaan tarii kan gabaabbateef wantichi yoo dheerachuuf humna qabaatellee barreessaan
bifa tokkoofi bu'aa seenichaa ykn dandeetti kalaqaarratti xiyyeeffachuuf kan irraa kute.

Akka hiikaatti isaan kunniin gaarii ta'uu danda'u, garuu guutuu hin ta'an. Yaada asoosama gaggabaabaa
hedduu of keessaa hin qaban. Kanneenis

. Of eeggannoon hojjetamuu- yaadaaleen seenaa hedduu jireenya barreessaarraa, gaazexootarraa maddu.

Garuu fayyuma irra deebiin himuu osoo hin taane, qindoomina karaa biraa uumuun, namfakkii jijjiiruufi
xaxuun, yoomessa uumuun-- isaan kunniin hundi kaayyoo tokkoof.

. Caasaa idilee qabu--seenaan bifa qaba-- jalqaba, gidduufi xumura.

. Sababummaa agarsiisa-- sababaafi bu'aa hundeessuun namfakkileen maaliif akka waan dalagan san
dalaganiifi bu'aa dalagaaleen kunniin qaban mul'isa.
 . Haala danda'amuun guddisee xumura-- gochaalee, raawwileefi tartiibni gochoota seenicha keessaa kan
dhugaa fakkaatan.

. Kan haala hundeessu-- haalli seenaa gabaabaa kan namfakkileefi gocha isaanii gargaaran ta'uu qabu.

Asoosama gabaabaa hedduun gocha, yeroo, muuxannoo, tokkorratti yoo xiyyeeffatanuu kun kan ta'u yeroo hunda miti. Asoosama gabaabaa
hundi kan dhimmamuun barreessaan akka meeshaa bu'aa tokko fiduuf kalaqe miti. Seenaaleen tokko tokko bu'aa isaanii kan sababa wanta
tokko qofarratti hin xiyyeeffanneef argatan. Yeroo tokko tokko ammoo gosni seenaaleen 'bu'aa tokkoo' gabaabbatee mul'ata.

Maaliif asoosama gaggabaabaa ciminaan yaadaa keenya hawata? Ijoollees haa ta'u namni guddaan, hundi
keenyayyuu gaaffii kanaaf deebbii argachuuf baay'ee ariifanna: Itti aanee maaltu ta'e?

Seenaalee muuxannoo dhuunfaafi walii galaa tokkuma uumuu danda'u. Muuxannoo walii galaa kan
jedhamu namni kamiyyuu, yoomuu, kan arguu/hubachuu/irra ga'uu danda'u. Kan yeroo fi kutaa biyyaan
hin daangofne. Kunniinis waa'ee maatii, guddina, jiruu ofii addunyaa keessa barbaaduu, jaalala, gufuu
jireenyaa mo'achuu, milkaa'uufi milkaa'uu dhabuu fudhachuu. Seenaa himtoonni muuxannoo dhuunfaa
kan uuman namfakkilee addaa, kan aadaa tokkoo uumuun. Seena himtoonni bu'aa ba'ii qabatamaa
namfakkilee asoosamaa isaanii mudatu agarsiisuun, akka bu'aa ba'iin sun itti xumuramu filachuun,
naannoofi aadaa murtaa'aa tokko agarsiisu. Bu'aan kanaa seenessa namfakkilee murtaa'oo fedhii keenya
hawataniifi muuxannoon isaanii keenyaan wal gitu uumuudha. Seena-himaan dandeettii qabu akka nu
namfakkii tokko ykn kanneen biroo wajjin of madaallu ykn akka waa'ee isaanii dhimmamnu, yaada
isaanii waxalamnu nu taasisu, ykn hiika rakkoo isaaniin wal nu barsiisa.

‘Dungoo’ Halkan Sanaa (Asoosama gabaabaa)

Dhaabaa Wayyeessaan (Amajjii 1993)

Yeroo mooraa hoteelichaatti ol seenu koriiderii kutaalee hirribaa irratti dubartii arge. Mucayyoo
diimtuu, gabaabduu rifeensa akka guduruu tokko tokkoon gad dhahatteettu. Dafee achi irraa ilaale-
Boonsaan. Kakateera. Akka dubartii hin ilaalleef. Haadha manaa hin qabu isa hin kaksiifne. Garuu,
hiriyoota isaa tu sooma itti tume. ‘Yoo lamuu dhalaa ilaalte nagaa si hin gaafatnu; harka si hin fuunu;
mana kee hin seennuu; rakkannaan si hin gargaarru; dhukkubsannaan si hin badadnu; duunaan si hin
awwaallu….

Baayyee baayyee jedhanii sodaachisan. Kanaaf kakate. Erga sanaa dubartoota duraan beeku illee
dubbisee hin beeku. Amma immoo boqonnaaf jecha, ehama gafatee Finfinnee dhufe- barsiisaa
Boonsaan. Dhufee immoo waan hojjetu wallaale. Waan godhee yookaan tahee sammuu isaa haaressu
dhabe Utuu magaalaa keessa naanna’uu guyyaa sadii dabarseera. Karaa irratti dubartoonni itti dhufu;
hin ilaalu, kakuu dha. Dhugaatii yoo dhuge immoo onnee toosisee, kakuu busheessa, dogoggorsaa dha.
Mana tiyaatraa yoo seenes dhiiraa fi dhalaa wal hammatan arga-kan mataa wal booraasisanii taa’an.
Sagalee dur guyyaa tokkoof illee irraa obesee hin oolle dhaga’a-sagalee shamarranii isa akka ulullee
laga keessaa kufee kahu,… kahee kufu!... dogoggorsaa dha.

Intaloo yeroo mooraatti seenu biliqii arge sana lamuu ol jedhee hin ilaalle. ‘Ija tu dubbii qaba’ jedhee,
akka lafa ilaaletti balbala kutaa hirribaa isaa irra gahe. Bakka biraa tii jijjiiree har’a hoteela kana dhufuu
isaa ti. ‘Jijjiirama arguunnyaata sammuu ti, … Haaraa arguun hawaayii lubbuu gammachiisa, jedha ture.
Hamma miti, garuu.

Utuu isa banatee ol seene, gad hin taahiin. “Asham baga nagaan dhufte” jedhe-kan sagalee ijoollee xinnoo fakkaatu.

Yeroo of irra deebi’u harki nagaaf hiixate bira gaheera. Waan tahe qaama isaa weerare. Mucayyoo
duraan arge sana. Harka isaa qabatte utuu hin gaddhiisin,

“Nagaa dhuftee? …maal si gargaaru?” jette.

Mucaa xinnoo dha. Umriin ishee waggaa kudha afur hincaalu. Fuula naatee qabu sana haxaarroon
(muraa aadaa) maddii lamaani irra jiru daran miidhagseera. Guduruun rifeensa ishee sun qixa adda
isheetti qaarman hidhameera. Guntutni lakkuun, qomee cocorree isheen mudhii olitti uffatte
quqquuqaanii gaanfa dibichaa reefuu biqilu fakkaata.

Fuula googaa simboon itti hin qilleensa’iin akka gargar dhisuu godhee, “Ulfaadhu. Ammaaf rakkoo hin qabu.”
jedhe.

“Gaarii, nan deebi’a” jettee baate.

‘Nan deebi’a' jechuu isheetti hin gammadne-Boonsaan. Duras ammas yeroo dubartii ija boojitu argu ni
jeeqama. Dura, kiyyoo isaa keessa seensuuf amma kiyyoo ishee keessaa ba’uuf. Dura, hordofuuf amma
baaqachuuf.

…Utuu dubartii wajjiin akka eegee harkifamtuu, eedsiin inni eegee qabu inni gaanfa ciraaroo-inni
arrabni isaa qara ibiddaa, ibidda saniin foon kee arraabee fixennaan qoorshoo lafeen hafta. …Kan
du’uun hin oolle kan goggogan-kan maqaa badan!…Ati silaa hima hin dhageessuu…Dhiigni kee
hafuura dubartiin malee hin naanna’u fakkaata! …Amma, lamuu yaada kee jijjiirteennaan reeffi kee
akka reeffa saree diidatte tortoora! …

Sagaleen kun sammuu isaa keessaa lallaba. Qaamni isaa wal itti shuntuura’a. Dubartiin marti nama
osoo hin taane dhukkuba soofaa sana itti fakkaatu. Kana irratti immoo kakuu!… … Dur, du’a yaadatee
hin beeku. Amma garuu, duuti ilkaan qaratee, qeensa dheeraffatee fuul-dura isaatii ija shororkaasisaa
sana itti babaasa.

Ammas balballi cufaa isaa rukutame. Akka nama osoo rafuu kabalanii, bitit jedhe.

"Nan dhufe." jette.

 Simboon fuula sanaa sammuu isaa dhiphise.

“Ihi … Baheessa” jedhe.

“Bagaa nagaan dhufte hin jettuu? Amma immoo dabaree kee.” Jettee kolfite. Yeroo isheen qas-qas
jettu, tokko tokkoon sagalee ishee hededa onnee isaa kan tattaraaru se’e. Edaa ilkaan ishees kaarruu dha.

“Baga nagaan dhufte-taa’i.”

Fuula kolfa-sodaa itti ol qabee dubbate. Barcuma siree isaa miil-jala jiru irra qubatte. Ijoolleen akkanaa
maaliif akka hoteela dhaabattu hin galleef.

“Kutaa biyyaa tii dhufuu kee dhaa?” ittin jette.

“Ehee.”

“Yoos dadhabdee jirta kaa. Bishaan qulqulluun siif fida.” Jettee, qaruuraa siree mataa duraa fuute.

“Har’an dhufe miti. Hin dhama’iin” jedhe.

“Kun dhama’uu miti.” Jettee, osoo deebii isaa hin eegiin baate.

Boonsaan ija isaa faana erges of irra deebise. Yaada isaas gara keessa isaatti. Keessa isaa waliin
dubbachuuf. Keessi isaas utuu kan dubbatu hin dhabiin, kan dubbatu sodaate. Ofiin of sodaate. Ofiin of
qaanfate. Jireenyi jiraachuu ishee osoo hin taane baayyina ulaagaa ishee tu nama dadhabsiisa qormaata
daangaa hin qabne.

Uumaan-uumamni-namni-qaamni ofii-humni ofii-miirri ofii … … kun cufti si qora.

Kun cufti farada jireenyaa ati gulufsiistu irraa si kuffiisuuf si bubbuta. Jireenyi farada guulaa mitii?!
Yoo itti baatu si fuudhee figdee-ofii kaatee si sirbisiisee-kan fagoo hin geenyeef qaama si hurgufee-
lubbuu si fuudhee dafqa si roobsee-yoo itti beekteef kolfa qasaasee-itti wallaallaan si imimmaansisee--
utuu jira jettee itti rarraatuu-utuu ati hin se’iin biyyoon si maka … …

‘Osoo amma isheen …’ jedhe, fedhiin isaa inni du’ee hin du’iin.

‘Ihii! Osoo isheen maal taatee?! … Majan! … Sooma! … kakuu! … Dhukkuba arraba ibiddaa! – isa foonii fi dhiiga harraabu?’

Sammuu isaa isa waardiyyaa dhaabachuuf kakkate tu morme.

‘Silaas isheen woo mucaa daa’ima. Utuu dhalchitee iyyuu geessista. Azalaa qormaataaf guddataa jirtu
…’

Cufaa bantee, yaada isaa gidduutti kutte-mucayyoon.

“Qofaa kee si dhiiseen ture mitii?’ jette, Sagalee qalloo miyooftuu sanaan. Waan dubbatu dhabe. Ol
ilaallaan ija bakkalcha sana irratti ibsiteetti-mucaan xiqqoon. Sagaleen isaa osoo hollatuu,
 “Lakkii…hin turre,” jedhe. Barcuma dhiistee siree irra teesse. Dugdi isaa lamatti tamsa’e.

“Irbaata nyaattee?” jette.

“Ihi … hin nyaanee.”

“As nyaanni mishaan hin jiru. Hoteela ollaa tanaan siif fida,” jette.

Qarshi itti kennuu abbalee,

“Ati as keessaa hojjettuu dha moo mucaa warra manaa ti.” jedhe.

“Lamaan iyyuu miti.”

“Ihii?”

“Ofii kee beeki.” jette.

“Akkamittan beekuu danda’a?” jedhe.

“Kana, kana, kana, laalii bari” jette-qomee ishee, haxarroo maddii ishee fi rifeensa ishee qubaan
agarsiiftee.

“Ammas naaf hin galle.” jedhe.

Takkaa kolfitee,

“Dubra Arsii hin beektuu?” jette.

“Ati woo mucaa xiqqoo dhaa maal hojjechuu as dhufte ree?

“Maal siif godha? Inni gatii hin qabu. Maallaqa kenni osoo irbaatni hin dhumiin, deemeen siif fidaa.”

Diduu hin dandeenye. Yaadni isaa garuu, daran waliin dhahame. Waa'ee ishee-waa’ee ofii isaa-waa’ee
ishee fi waa’ee ofii isaa yaade. Marti isaa akka fo’aa sariitii wal xaxe. Erga kakatee fi jireenya isaa
kakuun duraa wal bira qabee madaale. Kakuu saniin booda, shororkaa malee gammachuun akka onnee
isaatti hin goriin ni beeka. Yoo kakachuun isaa madda gammachuu hin tahuuf tahe maaliif kakuu
gaddaatti akka seene tu hibboo itti taha. Maaliif waadaa onneen hin sooranne seenu! … biyya iyyeessaa
dubartii lagatanii maal ilaalanii gammadu? … eessa dhaqu? Eessatti basha’u? … Isheen iyyuu kennaa
uumaan kennamte taatee ti … kanaaf ciisanaan ishee, teenyaan ishee, dhaabannaan ishee, deemnaan
ishee …halkan ishee, guyyaa ishee tahe-gammachuun …

Kalaankalaa lama qofa qofaatti qabdee dhufte-Mucayyoon.

“Nyaata ani qopheesse illee tahuu baatu, nyaata ani siif fide tanatti akka gammaddu nana abdadha,” Jette, xarapheessaa irra kaayaa.
Haasaan afaan ishee ti bahu kan umrii ishee irraa eegamu miti. Garaa isaatti ‘raajii dha’ jedhee, quqummaadee callise.

“Osoo hin dhandhamatiin hin dubbadhu jettee tii?”

 “Lakki isaaf utuu hin taane …”

“Isaaf tahes, arguuf hedda.”

Harka dhiqachiiftee dhiheessiteef.

“Atis kottu kaa?”

“Lakkii ani illee hin nyaadhu,” jette.

“Ihii! Maaliif?”

“Ani nyaadheera. Quufeen ijra.” Jette. Ofi ishee hin nyaattu taanaan buddeen lama fiduun ishee isa
dinqe.

“Kana hunda qofaa koo maalan godha ree?” jedhe.

“Tokko Haayyaa tiyyaaf geessuu?”jette.

“Haadha kee moo?”

“Ehee.”

“Eessa jirti … jiru?” –waan jedhu tu harkaa bade.

“Kutaa hirribaa tana irraa sadaffaa keessa ciistee jirti.”

“Ni dhukkuba moo?”

“Miti.”

“Maali ree?’

“Homaa”

“Tole-Geessiif.” Jedhee callise.

“Dhufe.” Jettee-buddeena tokko fuutee baate.

Waan marti keessummaa itti tahe-barsiisaa Boonsaatti. Irbaata dhihaateef, dafee dafee nyaatee
kahe. Mana bunaa seenee waa dhuguu barbaade. Saniin booda, waan itti aanee dhufu tilmaamuu hin
dhabne. Kakuu sana utuu beekuu dagachuu fedhe. Jarreen sooma itti tumaanis baadiyaatti hafan. Namni
isa argu hin jiru. Tarii, yoo waaqayyo! … itti fufee yaaduu hin barbaadne. Waa’ee mucayyoo sanii
garuu hoomti taha jedhee hin shakkine. Isaa harka isaaa dhiqatee, cufaa banuuf harkisuu fi mucayyoo banuuf
dhiibu tokko tahe. Inni keessatti deebi’e. Isheen ol seente.

“Nyaattee?” jette, fuula ifa saniin ija isaa keessa ol ilaaltee.

“Ehee, nyaadheera”
 “Rabbi siif haa laatu, osoo ati hin dhufne tahee Haayyaan kiyya agabuu bulti.” Jette.

“Maaliif?”

“Isa dhiisi. Amma eessa dhaquu kaate?” waan jedhu tu itti bitaacha’e.

“Mana Bunaa dhaquuf.”

“Maal goota?”

“Xinnoo dhuguuf.”

“Maaloo hin dhugiin. Nama dhugu hin jaaladhu” jette-Mucayyoon xiqqoon sun. Ni na’e. Jaalala isa
kam akka isheen odeessitu isaaf hin galle. Harka isheetiin harka isaa tuqxee jennaan dafee irra deebi’ee
siree irra gad taahe.

Bakka dhaabattutti haftee ija isaa keessa ilaaltee kolfite. Kolfa naansisaa-sodaachisaa sani.

“Joonjee, dubra baadiyaan sitti fakkadhe mitii?” jette.

“Akkam?”

“Huccuu kiyya, fuula kiyya, rifeensa kiyya tana ogguu laaltu. Aadaa dhaa bar. Achitti ni bareeda”

Dhuftee isa cinaa siree irra teesse.

“I … Ehee”

Hafuurri isaa dhaqee deebi’uu dadhabe barsiisaa Boonsaan.

“Maali ree?”

“Maal?”

“Maaliin sitti fakkaadhe?”

“Maal …maal jedhu ree? … Mucayyoo xinnoo haasaan ishee miyaa’u.”

“Bareeddu maaf nan hin jenne?” jette.

“Gaafa guddattee, geesse jedhamta kaa.”

“Isa dhiisi. Hayaa, amma nan deema” jettee, kaate.

Dhugaa dha hin seene. Sodaatee ture. Dafee harka isaa itti hiixate.

“Nagaan buli” jettee, harka fuute.

“Atis nagaan buli.”

 Yeroo isheen baatu, balbala cufee deebi’ee siree isaa keessa seene. Qormaata sana irraa furamuu
isaaf boqonnaa tu itti dhaga’ame. Silaas, ofii sodaatee of jeeqe malee umriin mucayyoo kanaa waan
shakkisiisu miti. Iccitii ishee duubaa garuu, hibboo dha.

Baayyee hin turre. Kan ammas balbalichi rurukkutame. Hafuura isaa dhaabee dhaggeeffate. Ni
dabalame.

“Eenyu dha?” jedhee.

“Ana. Bani.”

Gurra isaa keessaa qofa osoo hin taane mara qaama isaa keessaa dhaga’ame-sagaleen sun. Maaliif
akka isheen deebite tilmaamuu hin dandeenye. Huccuu hirribaa adii dheeraa uffatteetti. Ija isaa amanuu
dadhabe.

“Qofaa kee taate jedheeni” jettee, ofii ishee balbala cufte.

“Ihii … Anii …”

Akka kakuu qabu itti himuu fedhee arrabni isaa dadhabe.

“Dhufuu koo mufatte moo?”

Harka ishee lamaaniin harka isaa lamaan jabeessitee qabde. Harki ishee akka sibiila diimatee guba.
Kan isaa dafqeera. Itti hirkatte. Mataan ishee qixa laphee isaatti hafe. Yeroo madaalii isa eeguu
dadhabee bitintiraa fudhatee sireetti bahu hunda waan godhaa jiru hin beeku.

“Huccuu kee of irraa baasi” jettee, kootii isaa irra baaftee keesse.

Yeroo inni hammachuu yaalu,

“Natti hin bu’iin” jettee, dugdaan ciiste.

Akka ribuu ibidda bu’ee shuntuura’ee achumaan callise.

“Har’a gochaan marti haaraa dha.” Jette.

“Akkam?” jedhe, sagalee sodaan du’een.

“Hayyaan koos jalqabde.” Jette.

“Maal?”

“Nama waliin ciisuu kaa. Bar, erga dheengaddaa, amma nyaachuu keenyaa. Agabuun asitti nu fixe.
Kan irratti immoo idaa siree kan guyyaa torbaa ti nu irra jira. Dhibba tokkoo fi shan”jette.

“Maal hojjettuu asii?”

 “Sitti hin himu. Lakkii, nan hima. Dubartiin takkaa dhiiraa waliin ciiftee waan dhoksattu hin qabdu.
Qaama itti afarsiistee, iccitii tana caaluu hin qabdu bari.”

Calluma jedhe.

“Maal godhan, biyyaa baanee rakkoon nu argatte. Argitee, abbaan kiyyaa loltuu turre-koloneera.
Waraana irratti du’e, waggaa lamaan dura. Magaalaa kanatti mana ijaaree ture. Nuyi Asallaa jiraanna.
Ana, haadha kiyya if obboleeyyan kiyyaaf qabeenya waan tokko hin hambifne, mana kana malee. Mana
kana immoo seeraan yoo murtaa’e malee hin fudhattan jedhan. Seerri immoo murtaa’uu dide. Nama tu
murteessa tahee ofii murtaa’a tahee ani hin beeku. Osoo eegnuu, eegnuu ji’a kudhan dabarsine. Horoon
nu harkatti dhumte. Si hin dinquu? …Abbaan ofii abbaa ofii ti seera maal barbaachisa. Manni isaan kan
ofii ti. …”

Waan hundi akk inni eege hin taane. Hammachuuf harka isaa mudhii ishee irra dabarse.

“Haayyaan koo osoo hin jaallatin har’a kanatti seente. Guyyaa booyaa turte. … Lakkiin, ani daa’ima, homaa hin beeku. Ani dubraa, bari.
Waanan tahu dhabee malee ani hin fedhu. Kun aadaa keenyaatti qaanii guddaa dha.” Jette. Waan tahe garaa isaa raasee, iji isaa imimmaan
calalee.

“Hin yaadda’iin. Ati ammaa jalqabee obboleettii koo ti.” Jedhe. Kakuu isaas deebi’ee yaadate. Ammas
ka biraa kakate. Akka obboleettii koo jedhetti, lubbuu biqiltuu kanaaf of kennuuf.

Shaakala
1. Namfakkilee, yoomessaafi jaargocha asoosamichaa addaan baasi.

2. Jechi "mana" jedhu mallattoo ta'uu danda'aa? Yoo danda'e mallattoo maaliiti jetta? Sagaagalummaan
hoo?

3. Dheerinaan alatti, asoosama kana Godaannisa irraa maal maaltu adda baasa?

4. Amaloota faayida qabeeyyii asoosama gabaabaa kana waan inni ta'e isa taasisan tarreessi.

5. Asoosamni gabaabaan kun yaada Poe moo yaada Friedman irra calaqqisiisa?

6. Yaanni bu'uuraa asoosamni kun dhiyeessu maal? Haala kamiin caaseffame? Ruqoonni adda addaa asoosamichaa
walitti dhufeenya akkamii qabu? Gochoonni tartiiba raawwiin qindeeffamanii? Dhimma maaliif kana ta'an jettee
yaadda?

7. Seenicha eenyu hima? Seenessaan seenicha ammam beeka? Seeneffama moo waliin dubbiitu irra iddoo
guddaa qaba? Barreessaan maaliif kana filate? Kun deebbii dubbistootaan walitti dhufeenya maal qaba?
Bu'aa/miidhaa akkamii qaba?

6. Barreessaan namfakkilee haala kamiin kalaqe, guddise? Walitti dhufeenya namfakkilee addeessi.
7. Yoomessa seenichaa addeessii yaada bu'uuraaf bu'aa isaafi akkamii akka kana dhugoomsu himi.

8. Wanti yaada namaa rarraasu jiraa? Yoo jiraate kam? Yoo hin jiraanne seenicha hin miidhuu? Maaliif
seenaa kana himuun barbaachise?

Waraabbiin itti aanu faaraan dubbisii gaaffilee booda jiran deebisi.

Uumaan-uumamni-namni-qaamni ofii-humni ofii-miirri ofii … … kun cufti si qora. Kun cufti farada
jireenyaa ati gulufsiistu irraa si kuffiisuuf si bubbuta. Jireenyi farada guulaa mitii?! Yoo itti baatu si
fuudhee figdee-ofii kaatee si sirbisiisee-kan fagoo hin geenyeef qaama si hurgufee-lubbuu si fuudhee
dafqa si roobsee-yoo itti beekteef kolfa qasaasee-itti wallaallaan si imimmaansisee--utuu jira jettee itti
rarraatuu-utuu ati hin se’iin biyyoon si maka … …

Tartiiba kanaan Hojjedhu.

a. Dubbisii yaada 'ni ibsa' jettu himmoota 2-5 ta'aniin himi.

b. Jechi "si" jedhu kun eenyuun argisiisa?

c. Gocha 'qoruu' keessatti, maalummaa fi ga'ee kanneenii addaan baasi!

i. uumaa

ii. uumama

iii. nama

iv. Qaama ofii

V. Humna ofii

vi. miira ofii

d. Jechoota raawwii mul'isan addaan baasii tarreessi. Erga tarreessitee booda haala asiin gadiin
qoqqoodi.

i. Jechoota gadda mul'isan

ii. Jechoota gammachuu mul'isan

iii. Jechoota dhamaatee mul'isan

iv. Jechoota ka'uu mul'isan

v. Jechoota kufuu mul'isan

vi. Jechoota dhumuu mul'isan

vii. Tarreeffamni kun haala Barsiisaa Boonsaan keessa jiruun walitti dhufeenya qaba?

viii. Walii gala, haalaa fi amala ilmoo namaa akkamiin mul'isa?