Kahulugan Ng Wika
Ayon kay:
 Henry Gleason (mula sa Austero et al. 1999)
Ang wika ay masistemang balangkas ng sinasalitang tunog na pinipili at isinasaayos
sa paraang arbitraryo upang magamit ng mga taong kabilang sa isang kultura.
 Bernales et al. (2002)
Ang wika ay proseso ng pagpapadala at pagtanggap ng mensahe sa pamamagitan
ng simbolikong cues na maaaring berbal o di berbal
 Mangahis et al. (2005)
May mahalagang papel na ginagampanan ang wika sa pakikipagtalastasan. Ito ang
midyum na ginagamit sa maayos na paghahatid at pagtanggap ng mensahe na susi sa
pagkakaunawaan
 Pamela C. Constantino at Galileo S. Zafra (2000)
Ang wika ay isang kalipunan ng mga salita at ang pamamaraan ng pagsasama-sama ng
mga ito para magkaunawaan o makapag-usap ang isang grupo ng mga tao.
 Bienvenido Lumbera (2007)
Parang hininga ang wika. Gumagamit tayo ng wika upang kamtin ang bawat
pangangailangan natin.
 Alfonso O. Santiago (2003)
Wika ang sumasalamin sa mga mithiin, lunggati, pangarap, damdamin, kaisipan o
saloobin, pilosopiya, kaalaman at karunungan, moralidad, paniniwala, at mga kaugalian ng
tao sa lipunan
 UP Diksiyonaryong Filipino (2001)
Ang wika ay lawas ng mga salita at sistema ng paggamit sa mga ito na laganap sa isang
sambayanan na may iisang tradisyong pangkultura at pook na tinatahanan.
Ang wika ay kabuuan ng mga sagisag na binubuo ng mga tunog na binibigkas o
sinasalita at ng mga simbolong isinusulat.
Bawat bansa ay may sariling wikang nagbibigkis sa damdamin at kaisipan ng mga
mamamayan nito.
Kahalagahan ng Wika
 Isa sa mga pangunahing gamit o kahalagahan ng wika ang pagiging instrumento
nito sa komunikasyon.
 Mahalaga ang wika sa pagpapanatili, pagpapayabong, at pagpapalaganap ng
kultura ng bawat grupo ng tao.
 Kapag may sariling wikang ginagamit ang isang bansa, nangangahulugang ito ay
malaya at may soberanya.
 Wika ang nagsisilbing tagapag-ingat at tagapagpalaganap ng mga karunungan at
kaalaman.
 Mahalaga ang wika bilang lingua franca o bilang tulay para magkausap at
magkaunawaan ang iba’t ibang grupo ng taong may kani-kaniyang wikang
ginagamit.
 Hindi matatawaran ang kahalagahan ng wika sa pakikipagtalastasan at
pakikipagugnayan tungo sa pagkakaunawaan at pagkakaisa.
Kalikasan ng Wika
 Ang wika ay may masistemang balangkas.
 Ang wika ay arbitraryo.
 Ginagamit ang wika ng pangkat ng mga taong kabilang sa isang kultura.
Heterogenous ang sitwasyong pangwika sa Pilipinas dahil maraming wikang umiiral dito at
may mga diyalekto o varayti ang mga wikang ito.
Homogenous ang sitwasyong pangwika sa isang bansa kung iisa ang wikang sinasalita ng
mga mamamayan dito.
Ang Tagalog, Sinugbuanong Binisaya, Ilokano, Hiligaynon, Samar-Leyte, Pangasinan,
Bikol, at iba pa ay mga wika.
Ang diyalekto ay nangangahulugang varayti ng isang wika, hindi hiwalay na wika.
Bernakular ang tawag sa wikang katutubo sa isang pook.
Ang bilingguwalismo ay tumutukoy sa dalawang wika. Ngayon, hindi na bilingguwalismo
kundi multilingguwalismo ang pinaiiral na patakarang pangwika sa edukasyon.
Wikang Opisyal (Filipino at Ingles)
Gagamitin ang Filipino bilang opisyal na wika sa pag-akda ng mga batas at mga dokumento
ng pamahalaan.
Gagamitin naman ang Ingles bilang isa pang opisyal na wika ng Pilipinas sa pakikipag-usap sa
mga banyagang nasa Pilipinas at sa pakikipagkomunikasyon sa iba’t ibang bansa sa daigdig.