Кожата е надворешна обвивка на организмот. Таа има заштитна улога: штити од повреди на
внатрешните органи, штити од навлегување на микроорганизми во телото; регулаторна улога: ја регулира топлината на телото преку крвните садови и потните жлезди и има улога да прима дразби од надворешната средина за: допир, притисок, топло, ладно, болка, простор и рамнотежа. Поради бројите функции кои ги има кожата таа се смета и за посебен систем- КОЖЕН СИСТЕМ. На внатрешна градба на кожата разликуваме три слоја: површински слој (покожица или епидермис) Епидермисот е површински слој од кој надворешните клетки постојано отпаѓаат и се заменуваат со нови. Површинските клетки создаваат кератин, кој ја дава цврстината на кожата. Најдлабоките клетки на епидермисот создаваат пигмент- меланин, кој ја дава бојата на кожата. Во овој слој се сместени рецепторни клетки за болка. среден слој (вистинска кожа или дермис) Дермисот е слој во кој се наоѓаат влакна. Основата на влакното се нарекува фоликул кој го хранат крвни садови. Влакното е прицврстено со мускул кој му прави контракција, а во основата на влакното се наоѓа лојна жлезда, која лачи секрет што ја штити кожата од сушење. Во дермисот има и потни жлезди, во основата свиени како клопче од кое на површината излегува каналче низ кое се лачи пот со отпадни материи. Во овој слој се сместени рецепторните клетки за допир и притисок, како и за температура поткожен слој (хиподермис) Овој слој е изграден од масно ткиво, кое служи за термоизолација на телото и за резерва на енергија.