TEMA 5: OS MUSULMÁNS NA PENÍNSULA: ETAPAS POLÍTICAS E
REALIDADE HISTÓRICA
O ímpeto expansivo do Islam polo Mediterráneo aproveitou a crise interna do reino
visigodo no s. VIII para que o gobernador bérber Muza e o seu xeneral Tariq cruzaran o estreito de Xibraltar e derrotaran ao rei Rodrigo na batalla de Guadalete (711). A conquista foi rápida e doada: os visigodos ofreceron escasa resistencia e moitas cidades e nobres pactaron o seu sometemento (pactos de capitulación).
A primeira etapa política de al-Ándalus foi o emirato dependente (718-756), no que
al-Ándalus converteuse nunha provincia do Califato Omeia de Damasco. Córdoba foi a capital e os gobernadores recibían o título de valí do califa. Durante o emirato independente (756-929), os Abasidas tomaron o poder do Califato asasinando a maioría da familia Omeia, agás Abd Al Rahman I, que fuxiu e se proclamou emir en Córdoba. Os gobernadores de al-Ándalus gozaban de independencia política pero non relixiosa. No califato de Córdoba (929-1030), Abd Al Rahman III proclamouse califa, concentrando os poderes político e relixioso. No último cuarto do s. X Al Mansur protagonizou exitosas campañas contra os reinos cristiáns do Norte. Trala súa morte produciuse a crise do Califato. Ao longo dos reinos de Taifas e invasións norteafricanas (XI-XIII), as guerras civís provocaron a fragmentación do poder político e a abolición do Califato no 1030. Al-Andalus quedou dividida en pequenos reinos independentes (taifas). Ante a presión dos reinos cristiáns, os reis andalusís pediron auxilio aos almorábides e almohades (norte de África) que incorporaron o territorio de al-Ándalus aos seus imperios. Pero a derrota na Batalla das Navas de Tolosa (1212) marcou o comezo do seu declive. O reino nazarí de Granada (1232-1492) foi o último estado musulmán da Península. Logrou manter a súa independencia grazas ao pagamento de tributos (parias) á Coroa de Castela, pero viuse sumido en loitas polo poder, debilidade aproveitada polos reinos cristiáns, que no s. XV (Reis Católicos) puxeron fin ao dominio musulmán na Península.
Socioeconomicamente, en al-Ándalus formouse unha sociedade complexa pola
diversidade étnica e relixiosa. A maioría da poboación eran musulmáns: árabes, bérberes norteafricanos ou muladíes (hispano visigodos convertidos ao Islam). A poboación non musulmá (mozárabes e xudeus) constituíu unha minoría que pagaba impostos extraordinarios e vivía nos arrabaldes das cidades. A economía tivo un carácter urbano e monetario (circulación de moedas de ouro e prata). Destacou a expansión agraria e unha potente actividade artesanal (tecidos de seda ou liño, ourivaría...) e comercial (escravos, especias e produtos de luxo). Isto permitiu a revitalización das cidades, cun urbanismo caracterizado polas súas rúas estreitas de trazado irregular. Destacou a medina como núcleo central amurallado, onde está o foco relixioso –mezquita aljama–, a sede do poder –alcázar–, e áreas comerciais –zocos– e residenciais.