Gusto ba ng Diyos na Yumaman Ka?

“Salamat sa Diyos! Yayaman na ako!”

“Gusto kong yumaman, tutal iyon naman ang gusto ng Diyos.”
“Binibigyan tayo ng Diyos ng lakas para makapagpayaman tayo.

MASASALAMIN po sa mga pananalitang iyan ang pananaw ng maraming relihiyon

na pagpapala raw mula sa Diyos ang kayamanan. Kung gagawin mo raw ang gusto
ng Diyos, payayamanin ka niya ngayon at pagpapalain pa sa hinaharap. Pero
ganiyan nga ba ang itinuturo ng Bibliya?

Totoo, gusto ng ating Maylalang, na tinatawag sa Bibliya na “maligayang Diyos,” na

maging maligaya tayo at matagumpay. (1 Timoteo 1:11; Awit 1:1-3) At ayon sa
Kawikaan 10:22 pinagpapala niya ang mga sumusunod sa kaniya. Ang tanong
ngayon, tumutukoy lamang ba sa materyal na kayamanan ang mga pagpapalang
iyon? Malalaman natin ang sagot kung mauunawaan natin kung nasaan na tayo sa
agos ng panahon ayon sa layunin ng Diyos.

Ang tanong, Panahon ba ngayon Para tayo ay Magpayaman?

Noon, pinagpala ng Diyos na Jehova ang ilan sa kaniyang mga lingkod ng

maraming kayamanan, gaya ng patriyarkang si Job at ni Haring Solomon. (1 Hari
10:23; Job 42:12) Pero mahirap lamang ang marami sa mga may-takot sa Diyos,
gaya nina Juan Bautista at Jesu-Kristo. (Marcos 1:6; Lucas 9:58) Ano ipinakikita
nito? Maliwanag sa Bibliya, nakikitungo ang Diyos sa kaniyang mga lingkod kaayon
ng layunin niya sa kanila noong panahong iyon. (Eclesiastes 3:1) Ano ang ibig
sabihin nito para sa atin sa ngayon mga kapatid?
Isinisiwalat ng hula ng Bibliya na nabubuhay na tayo sa “katapusan ng sistema ng
mga bagay,” o “mga huling araw” ng kasalukuyang sanlibutan. (Mateo 24:3;
2 Timoteo 3:1-5; Lucas 21:10, 11; Apocalipsis 6:3-8) Kaya maihahalintulad ang
sanlibutang ito sa barkong malapit nang lumubog! Kung gayon isipin po natin ito,
makatuwiran bang pagpalain ng Diyos ang bawat isa sa kaniyang mga lingkod ng
materyal na mga kayamanan?

Tandaan inihalintulad ni Jesu-Kristo ang ating panahon sa mga araw ni Noe at

gayundin sa mga araw ni Lot. Ang mga tao ay ‘kumakain, umiinom, bumibili,
nagtitinda, nagtatanim, at nagtatayo.’ Pero dahil hindi nagbigay pansin ang mag
tao sa panahon noon pinuksa silang lahat, at idinagdag pa niya: “Magiging
gayundin sa araw na iyon kapag ang Anak ng tao ay isiniwalat.”—Lucas 17:28-30.

Totoo wala namang masama sa pagkain, pag-inom, pag-aasawa, pamimili, at

pagtitinda. Ang masama ay kung dito na lamang nauubos ang ating panahon at
nakakalimutan na natin na mahalagang maging apurahan ngayon sa ating
paglilingkod sa Diyos. Kaya pwedeng tanungin ang sarili, ‘Ginagawan ba tayo ng
Diyos ng pabor kung ang ibinibigay niyang mga pagpapala sa atin ay ang mismong
mga bagay na gagambala sa ating paglilingkod sa kaniya?’ Tiyak po na Hindi nga,
hindi tayo bibigyan ni Jehova ng isang bagay na makasasama sa atin. Hindi iyan
gagawin ng Diyos ng pag-ibig!—1 Timoteo 6:17; 1 Juan 4:8

Kaya mga kapatid sa mapanganib na panahong ito, ang bayan ng Diyos ay may
apurahang gawain. Sinabi ni Jesus: “Ang mabuting balitang ito ng kaharian ay
ipangangaral sa buong tinatahanang lupa bilang patotoo sa lahat ng mga bansa; at
kung magkagayon ay darating ang wakas.” (Mateo 24:14) Kaya Napakahalaga ng
gawaing ito para sa atin bilang mga saksi ni Jehova.

Pero hindi naman hinihiling ng Diyos sa kaniyang tapat na mga lingkod na

pagkaitan nila ang kanilang sarili. Sa halip, gusto niyang maging kontento sila sa
pangunahing mga pangangailangan sa buhay para makapagpokus sila sa
paglilingkod sa kaniya. (Mateo 6:33) Sa bahagi naman niya, titiyakin niyang
masasapatan ang kanilang materyal na mga pangangailangan. Ating basahin ang
Sinasabi sa Hebreo 13:5: “Maging malaya nawa mula sa pag-ibig sa salapi ang
inyong paraan ng pamumuhay, habang kayo ay kontento na sa mga bagay sa
kasalukuyan. Sapagkat . . . sinabi [ng Diyos]: ‘Hindi kita sa anumang paraan iiwan
ni sa anumang paraan ay pababayaan.’”

Tutuparin ng Diyos ang mga salitang iyon sa kamangha-manghang paraan kapag

iniligtas niya ang “isang malaking pulutong” ng tunay na mga mananamba sa
katapusan ng kasalukuyang sistemang ito ng mga bagay para mamuhay sa isang
bagong sanlibutang may kapayapaan at tunay na kasaganaan. (Apocalipsis 7:9, 14)
Kung gayon mga kapatid huwag tayong palilinlang sa turo na pinayayaman ng
Diyos ang mga naglilingkod sa kaniya dahil ang totoo, ililihis tayo ng turong ito
mula sa mga bagay na higit na mahalaga.
Kaya ayon sa ating natalakay, sa halip na umasang payayamanin tayo ng Diyos,
nawa’y maging abala tayo sa espirituwal na gawain at magtiwala na hindi tayo
pababayaan ni Jehova ngayon at saganang pagpapalain sa malapit na bagong
sanlibutan.