NOVENARIO PARANGAL KING NUESTRA SEÑORA DE LA SOLEDAD DE

SULIPAN

Ang Orihinal na Estampa ng Mahal na Birhen ng Soledad ng Sulipan

ANG MAIKLING KASAYSAYAN NG NUESTRA SEÑORA DE LA SOLEDAD DE SULIPAN

Ang Imahen na ito ng Mahal na Birhen ng Soledad ay ang pinipintuhong Ina at Patrona ng Barrio ng
Sulipan,Apalit,Pampanga at kasalukuyang nasa pangangalaga ng La Venerable Hermandad de la Ntra.
Sra. de la Soledad.

Ayon sa mga nakatalang documentos, ang nasabing Hermanidad ay itinatag ni Capitan Don Bernave
Pablo de Santa Cruz noong taong 1794 at ito rin ang itinuturing na Pinakamatandang Pangkat ng mga
Devoto ng Mahal na Birhen ng Soledad dito sa Pilipinas.

Sinasabi na ang Orihinal na Imahen ng Nuestra Señora de la Soledad ng Barrio ng Sulipan ay nawala
(maaaring sa pamamagitan ng baha o ninakaw) at sa kasalukuyan, ang pinipintuho sa Barrio ng Sulipan
ay ang Matandang Nakapintang Larawan na nasa Estandarte at ang Imahe na nasa Retablo na ibinigay
ng Familia ni Apung Terang Zapata noong ika- 10 ng Setyembre taong 1969.

Sa kasalukuyan ang Virgen de la Soledad ay nakadambana sa dating Kapilya na ngayon ay ang Parokya ni
Cristo ang Walang Hanggan at Mataas na Pari at dito siya Nakaluklok bilang Ina at Reyna ng Parokya.

Ang kaniyang Kapistahan ay ipinagdiriwang tuwing ika-16 ng Noviembre na pinangungunahan pa rin ng

Hermandad de la Ntra. Sra. de la Soledad de Sulipan mula pa noong taong 1794.

Nuestra Señora de la Soledad de Sulipan,

Ruega por nosotros.

PAMAGMULA KING NOVENA:

DALIT A PAMUKLAT:

“Indung alang Musing” (talakad)

TANDA NING CRUS:

King Lagyu ning Ibpa at ning Anak at ning Espiritu Santo.

Amen.

PAMANISI:

Guinu ming Jesukristo,Dios a tutu at Tau mu naming tutu at kakung Talapangabus,makasiklaud ku

arapan mu kipnuan lungkut pauli ning pamikasala ku Keka Dios ko,a mangayintulid king sabla kung
lugud.Sasalpantaya ku Keka.Manalig ku Keka.At king pamanalig ku king alang sucad mung pacalulu
asahan ku ing emula salanan patawaran ding kakung kasalanan.

King saup ning mal mung grasya,tatantu kung ikumpisal ku la ring kakung kasalanan at ibayu ku na ing
pamibiye-bie ku.Parusan mu ku king bie iti,Oh Guinu,dapot ikabus muku sa king bie alang angga.Saupan
mu ku ban agawa keng matamang ayin ing pamibie-bie ku bilang kapaglarinan karing kakung kasalanan
at karing kasalanan da ring sablang tau.King kekaban na niting pamagnovena kang Nuestra Senora de
Soledad,ing Nuan a Virgen Maria,

O Guinu ku,Saupan mu kung akilala ra kang lakwas at milusuk lalu ing lugud ku keka at asuywan daka
king lalung maragul a katapatan,Oh Guinu.Ipagkalub mu kaku ing grasyang maka pibie-bie ku at
magparati king pamanyuyu Keka angga king oras ning kamatayan ku.

Amen.

PAMUKLAT A PANALANGIN ALDO ALDO:

Indu ning Lungkut,tulutan mu kung manatili king mal mung arapan,bista man balu kung eku
karapatdapat,uling yaku ing meging sangkan ning kekang kalungkutan.Oh Mal a Indu ding
Makasalanan,tingiran mu sa ing pamanisi ku’t pamanyawad kapatawaran.Patnubayan me pu ing Santa
Iglesia karing kayang kalungkutan at ganakan mula naman ding sablang kaladwa king purgatorio a
manayang micabus.

Sana mibilang ku karing tapat mung talasuyu at makimetung king kekang kalungkutan ban mibayu ing
marok kung bie.Saupan muku kaba ning bie ku lalu na king oras ning kamatayan,ban purian da ka’t
pasalamatan at ing Mal mung Anak,mangga man king alang angga. Amen.

MUMUNANG ALDO:
PAMIBULE KING MUMUNANG ALDO:

“SILDAK NA NING DIOS ING KAPARUSAN”

(GEN. 3:14-15)

“Kanita ngana ning Ginung Dios king ubingan,”king gewa mu misumpa ka;karing heganaganang animal
ika mung bukud ing misumpang anti kaniti:manibat ngeni gumapang ka king kapamilatan na ning kekang
atian at alikabuk ing kekang kanan kabang mabie ka,mikasama kayu ning babai;milaban la ding anak na
at ding anak mu.Lasawan de ring anak na ing buntuk mu at tuktukan mu noman deng sakung da”

(katahimikan at pamigunam)

PANALANGIN KING MUMUNANG ALDO:

Oh malugmang Indu ning Migpakasakit a Anak,balu ku pu ing sakit a penamdaman mu inyang ikutkut de
at tikpan ding taung migmalasakit king sugatan at ala nang bie ning Mal a Katawan na ning kekang
Anak.Alang-alang king kekang pamagkasakit,pagkaluban muku,mal a Indu,king Mal mung grasya a
kailangan ning tune sisisi.Burian mung mikutkut ya naman iting makasalanan kung sarili kayabe ning
kekang Anak at subling mie munaman king alang-anggang ligaya,iti ing kayaduanan ku kapamilatan ning
novenang iti.

Amen.

LETANYAS KING NUESTRA SENORA DE SOLEDAD

Guinu,pacaluluan mu kami, -Guinu,pacaluluan mu kami

Kristo,Pacaluluan mu kami, -Kristo,Pacaluluan mu kami

Guinu,pacaluluan mu kami, -Guinu,pacaluluan mu kami

Kristo,pakiramdaman mu kami, -Kristo,pakiramdaman mu

kami

Kristo,pakapakiramdaman mu kami - Kristo,pakapakiramdaman

mu kami

*Pacaluluan mu cami*

Dios,Ibpa Banua*
Dios Anak,a minyaklung king yatu*

Dios Espiritu Santo*

Banal a Trinidad,metung a Dios*

*Ipanalangin mu kami*

Nuestra Senora de Soledad*

Nuestra Senora de Soledad,Indu ning Pamibule,a nung kenu na pepabalu ning Alang-anggang Ibpa ing
lugud na karing tau*

Nuestra Senora de Soledad,Indu ning Pamibule,a mekataruk king misterio ning Santisima Trinidad*

Nuestra Senora de Soledad,Indu ning Pamibule,liguran mu ing katahimikan at pamagdili-dili*

Nuestra Senora de Soledad,Indu ning Pamibule,a migunam king pamikatawan nang tau ning Dios
Anak,bayu ya pa mibait*

Nuestra Senora de Soledad,Indu ning Pamibule,a mekabalu king lihim nang kaburyan ning Dios*

Nuestra Senora de Soledad,Indu ning Pamibule,a mekaintindi king planu ning Ibpa manibat pa king
simula ning panaun*

Nuestra Senora de Soledad,Indu ning Pamibule,a piasam-asam mu ing panyatang ning Mengabus*

Nuestra Senora de Soledad,Indu ning Pamibule,a tinangu kang maging Indu ning Mengabus*

Nuestra Senora de Soledad,Indu ning Pamibule,a inain me king Templo ing kekang Anak,anting
kapamintuan king Ibpa*

Nuestra Senora de Soledad,Indu ning Pamibule,a pibata mu ing itakas me ing Mengabus papunta
Ehipto*
Nuestra Senora de Soledad,Indu ning Pamibule,a dinaun mu ing sarili mu at mekiagum ka king sacripisyo
nang Jesus king Calvario*

Nuestra Senora de Soledad,Indu ning Pamibule,a pibata mu ing anggang kasakitan inyang tangalan mu
at dungutan ing katampalasanan ding tau king Mengabus*

Nuestra Senora de Soledad,Indu ning Pamibule,a pibata mu ing ibili de ing ala ng bie katawan ning Anak
mu king kekang kandungan*

Nuestra Senora de Soledad,Indu ning Pamibule,a pibata mung mikutkut king gabun ing Anak mu kilub
ning atlung aldo*

Nuestra Senora de Soledad,Indu ning Pamibule,a inamyam ning lub mu na magdili-dili ka king
Cenakulo,pigugunaman ing mengapalyari king Anak mu*

Nuestra Senora de Soledad,Indu ning Pamibule,a piasam-asam mu ing pamanyubli ng mebie ning
Guinung Jesukristo*

Nuestra Senora de Soledad,Indu ning Pamibule,a pignasan mu ing manatili ka king Cenaculo ban
panayan ing panyatang ning Banal a Espiritu*

Nuestra Senora de Soledad,Indu ning Pamibule,a minantabe karing Apostoles at disipulos kabang atiu ka
keti sulip*

Nuestra Senora de Soledad,Indu ning Pamibule,a makibalu king parasan na ning Santa Iglesia,ing
misticong katawan nang Jesukristo*

Nuestra Senora de Soledad,Indu ning Pamibule,a menalangin king pangakabus ding makasalanan*

Nuestra Senora de Soledad,Indu ning Pamibule,a menalangin king pamagbalik da lub ding sismatico at
ereis*
Nuestra Senora de Soledad,Indu ning Pamibule,a mamingua karing Cristianos king kasalukuyan a
panaun*

Nuestra Senora de Soledad,Indu ning Pamibule,kambilan king tuksu ding demonyus*

Nuestra Senora de Soledad,Indu ning Pamibule,sanggalang karing manyira king kasalpantayanan*

Nuestra Senora de Soledad,Indu ning Pamibule,metung a patnube karing doctrina ning Sta.Iglesia*

Nuestra Senora de Soledad,indu ning Pamibule,a patuyag karing kabaldugan ding katuruan nang Jesus*

Nuestra Senora de Soledad,Indu ning pamibule,a paintindi king tune kapakumbaban*

Nuestra Senora de Soledad,Indu ning Pamibule,a mamantabe ban mibie-bie simpli at alang kapalaluan*

Nuestra Senora de Soledad,Indu ning Pamibule,a mamantabe papunta king bie alang-angga*

Nuestra Senora de Soledad,Indu ning Pamibule,a paganaka kekami king tauling oras ning bie mi*

Nuestra Senora de Soledad,Indu ning Pamibule,a sasaup kekami ban akilala mi ing kekaming keinan at
kakulangan*

Nuestra Senora de Soledad,Indu ning Pamibule,a tuturu kekaming manalig king Divinong pakalulu*

Nuestra Senora de Soledad,Indu ning Pamibule,a babie grasya ban aluguran mi la ring kaparang tau*

Nuestra Senora de Soledad,Indu ning Pamibule,a paganaka kekami king panga-atiu ning purgatorio,at ng
kaparusan king impyerno*

Nuestra Senora de Soledad,Indu ning Pamibule,a paganaca kekami king tula ning bie alang-angga kayabe
ning Santisima Trinidad*
Kordero ning Dios,a milalako king kasalanan ning yatu,

-Guinu patawaran mu kami

Kordero ning Dios a milalako king kasalanan ning yatu

-Guinu pakiramdaman mu kami

Kordero ning Dios a milalako king kasalanan ning yatu

-Guinu pacaluluan mu kami

MANALANGIN TAMU

Nuestra Senora de Soledad,Indu ning Pamibule,saupan mu kaming magsane anti ing kekang pamibule
king bie a delanan ning Guinung Jesukristo at manalangin king Alang-anggang Iboa,ban akit na ing
kapanisyan at tune lugud a yampang mi Keya at keka.Mangaintulid na ke man sanag miyabe king alang-
angga ng kayarian,kapamilatan na mu ring Jesukristong Guinu mi.

Amen.

(mangading atlung Bapu Maria,at aduan ning balang metung ing grasyang buri nang akamtan keting
pamagnovena)

TAULING PANALANGIN

Oh Indung migsalbat balu ku ing alang kaparang kalungkutan at sukal a lub uli ning atlung aldo a miwale
ya keka ing Anak mung y Jesus,iniang mate yat mikutkut ba keng miligtas.Sisisian ko ngan pu ing kakung
kasalanan at buri kupa ing mate bayu ku mikasalang pasibayu keya.At manibat ngeni mal a
Indu,mangaku kung magsumikap at makapag bayung bie at lisian ing nanu mang kasalanan king saup
ning mal mung Anak.Aduan ku naman mal a Indu na tanggapan ku ing grasyang iti alang-alang king
kekang pamagdusa.

Amen.

MEMORARE(PANALANGIN KANG SAN BERNARDO)

Pigaganacan mu sa,Oh Malugud a Birhen Maria king kapilan man e pa meramdam king ating katau
muman,karing e pabilang a migsantung king kekang pacalulu,miniawad king kekang saup at menigapu
king mal a pamanampun mu a sikwil mung emu mo sa lingapan.Aku king pamagnasa ku,king anti keting
kapanaligan dururup ku keka,Oh Indung Birhen ding Birhenes,keka ku magsantung at keka ku naman
magkanlung king mitmung lungkut at dine pauli ning kasalanan ku,magsakab ku mu rin karing mal mung
bitis,Oh Indu nang Jesus,emu saou isakwil ining pakakalulung kayaduanan ku,nune bagkus tingiran mu sa
pung panayunan at damutan mu sa pung manga yapianan.

Amen.

CRISTO ING ALANG ANGGANG MATAS A PARI,

Pacaluluan mu kami!

NUESTRA SENORA DE LA SOLEDAD DE SULIPAN,

Ipanalangin mu kami!

KADWANG ALDO:

PAMIBULE KING KADWANG ALDO

“ING ULA NANG SIMEON”

(LUC.2:25-35)

“Ating metung a lalaking manuknangan Karin Jerusalem,ing lagiu na Simeon.Metung yang taung mayap
at ating takut king Dios.Panayan na ing pangaligtas na ning Israel.Ing Banal a Espiritu atyu ya kang
Simeon.Pepabalu na kang Simeon ning Banal a Espiritu king eya mate anggang ene akit ing Cristo a
pengaku na ning Guinu.King agkat ning Banal a Espiritu,linub ya I Simeon king Templo.Inyang ding
pengari nang Jesus dela re king Templo ban daptan ing aduan ning Kautusan,kimunan neng Simeon ing
anak karing takde na at pepasalamat ya king Dios.

Ngana:”Guinu ngening tiparan mu ing kekang pangaku,paburen mu neng paynawa ing kekang
talasuyu.Ikit da na murin ding mata ku ing kekang pamagligtas a kekang sidia king arapan ding sablang
bansa.Metung a sala a pakilala king kekang dalan karing paganu at munie dangalan king Israel a kekang
balen.”

Mipamulala la ding pengari na ning Anak king sinabi nang Simeon tungkul king Anak da.Binendisyunan
na lang Simeon at ngana kang Mariang Ima ng Jesus,”Pinili ne ning Dios iting Anak para king
kapahamakan at king kaligtasan da ring dacal king Israel.Makatalaga yang maging tanda ibat king
Dios;oneng insultuan de ring dacal a tau.Makanyan mibulalag ing isipan ding dakal.At sugatan ne ing
pusu mu ning kalungkutan a kasing taram ning metung a Punyal”

(katahimikan at pamigunam)
PANALANGIN KING KADWANG ALDO:

Oh Indu ning Lungkut,talastas ku pu ing sakit a penamdaman mu inyang panuli mu king kekang
tuknangan,alabasan me ing makatirik a Krus a nung nukarin de pinaku y Jesus a Anak mu.Ing mesabing
Krus ya ing sagisag ning alang-angga nang pamagligtas.Ing dutung na ning bie,a mabilug mung pusung
peparangalan,uling kapamilatan na ning mesabing dutung migkamit tang alang anggang bie at
ligaya.Balu ku naman,ing pamagwalang bahala ku a makaragdag king beyatan ning krus at kasakitan a
kekang denasan.Manigapu ku ngeni Mal a Indu,na saupan mu kung maniawad king kekang Anak,sapat a
tapang bakung asundu ing kakung katungkulan at bakung alisian ing sablang marok.Pagkalub mu sa pu
ing kakung kayadwanan kapamilatan na niting novena nung iti maging karapatdapat king kekang ligaya.

Amen.

KATLUNG ALDO:

PAMIBULE KING KATLUNG ALDO

“ING PAMANAKAS PAPUNTA EHIPTO”

(MAT.2:13-15)

“Kalako da ring Mangabiasa,pepakit ya ing anghel ning Guinu kang Jose king kapamilatan na ning
paninap.Ngana,”Mibangun ka,idala me ing Anak ampon y Ima na at munta kayu Ehipto.E kayu mamako
Karin hanggang e ku sabian uling papanintun neng Herodes ing Anak ba neng ipapate.”Mibangun ya y
Jose at kanita mu ring benging ita,dela na la ding mi-ima at minta la king Ehipto.Menatili la Karin angga
king mete ya y Herodes.Makanian metupad ing amanung sinabi na ning Guinu king kapamilatan ning
Propeta,”Inaus keng lumual ibat Ehipto ing kakung Anak.”

(katahimikan at pamigunam)

PANALANGIN KING KATLUNG ALDO:

Oh Malugmang Indu ning megpakasakit a Anak,penamdaman ku ing lungkut a pibata mu iniang kuldas
ka king bunduk ning Kalbaryo a nung nu tikian me ing Mal mung Anak a megpakasakit.Buri kung tangisan
ing marok a pamakiabe ku karing mangarok a barkada,kerokan a meging sangkan ning pangawale ku
king kayampunan ning kekang Anak.Saupan muku,bang sumala ku kaisipan at akilala ing kamalian ku at
atuntun ing dalan ning tune bie nung maging karapatdapat king keyang kapurian at ikakayap ning bie
ku,pagkalub mu pu sana ining grasyang aduan ku kaniting pamagnovena.

Amen.

KAPAT A ALDO:

PAMIBULE KING KAPAT A ALDO

“ING PANGAWALE NING ANAK A JESUS KARIN JERUSALEM”

(LUK.2:41-56)

“Balang banua pupunta la Jerusalem ding pengari nang Jesus ban tumagun king Piyesta ning
Pamaglagpus.Inyang labi neng aduang banwa tua y Jesus,mekipamiyesta la antimo ing sadia rang
daraptan.Kaibat na ning fiesta,minuli la,oneng pepailakwan ya Jerusalem ing anak a y Jesus.E ra
apansinan iti ding pengari na;inisip da king kayabe da ne king grupu ra.Pepatingapun nalang maglakad
inyang apansinan da king e re kayabe.Penintun de karing kamag-anak da at kakaluguran,oneng e re
ikit.Inya migbalik la Jerusalem ban panintunan de.King katlung aldo,ikit de kilub ning templo,makalukluk
yang kayabe ding Judio a talaturu,makiramdam ya at mangutang karela.Mengapamulala la ding sablang
mekaramdam kang Jesus king kabiasnan na at pakibat.Mipamulala la ding pengari na inyang ikit de at
nganang Ima na,”Anak,obat depatan mu kekami iti?Y tatang mu ampon aku migaganaka kami king
pamanintun keka.”

Pekibat na karela,”baket penintun yuku?Eyu wari balu king kailangan kung atyu king bale ng Ibpa ku?”
Oneng e ra aintindian ing burin ang sabian.”

(katahimikan at pamigunam)

PANALANGIN KING KAPAT A ALDO:

Oh Indung malugma king Lungkut ning lalung misakitan a Anak,ninu mo kaya ing makaunawa king
kasakitan a pibata mu iniang lumakad ka king lansangan a delanan ning pepasakitan mung Anak?
Pepasakitan,timpalasanan at pinaku king Krus at ing bage a iti yang meging sangkan ning kekang
matinding kalungkutan.Sana mitanam king kaisipan ku ing kasalpantayanan ilang magsilbing guia ku king
tune pamaglugud keka at keyang kaligayan at ikakayap ning bie ku ipagkalub mu ing grasyang aduan ku
kaniting novena.

Amen.

KALIMANG ALDO:

PAMIBULE KING KALIMANG ALDO

“Y MARIA ASALUBUNG NE Y KRISTO KING DALAN PAPUNTA KING KALBARYU”

(LUC.23:26-31)

“Inyang dela ra ne y Jesus ban ipaku king krus,akasalubung de ing metung a lalaking ibat king baryu.Ing
lagyu na Simon;tau ya Cirene.Pinigil de at pepapusan ing krus kang Simon kagulutan nang Jesus.Tutukian
de ring dakal a tau y Jesus,kabilang la kareti ding babaing manangis at managulele uli na.Belikdan na
lang Jesus at sinabi na karela,”Anak nang babai ning Jerusalem ,e yu ku tatangisan! Ing tangisan yu ya ing
kekayung sarili at ding kekayung anak,Tandaan yu ini;datang la ding aldo nung nu ra sabyan ding
tau,”Kapalad da ring babaing baug,ding kapilan man e menganak at kapilan man e pepasusu!” Karing
aldo reta sabian da ring tau karing bunduk,’pairagsa kayu kekami!’ at karing bunduk-
bundukan,’kambilan yu kami!’ Uling nung makanyan ing ararapat da king tanaman potang sagiwa ya
nanu kaya ing marapat potang malangi ya?”

(katahimikan at pamigunam)

PANALANGIN KING KALIMANG ALDO:

Oh Malungkut a Indu ning Migdusang Anak minsan pa dinanas kang lungkut at kaplas lub iniang lungub
ka king siyudad ning Jerusalem,ing balen a misakwil at pepasakit king kekang Anak,ing kekatang
talapagligtas.King tahimik mung pamibule-bule pasibayu mung aganaka ing sinabi na ning kekang Anak;
“Makalunus ka Jerusalem,sinayang mu ing kekang kapalaran” Nanung kasalanan ing gewa ning Anak ku
keka at pepasakitan ye at pete?.Oh Mal a Indu,saupan muku at pasalan kaisipan ba kung akilala ing
kakung kasalanan at ing parusang marapat kaku ba kung asisiyan mitmung katapatan at nung ikaligaya
ning Dios at ikakayap ning bie ku ding kekaming kayaduanan kapamilatan ning pamagnovenang
iti,maging karapat-dapat la sana ba milang akamtan.

Amen.

KANAM A ALDO:

PAMIBULE KING KANAM A ALDO

“Y MARIA KING IMPUN NA NING KRUS”

(JUAN 19:25-27)

“Makatalakad ya lele na ning krus nang Jesus y Ima na at ing babaing kapatad nang Ima na at y Mariang
asawa nang Cleopas at y Maria Magdalena.Panakit nang Jesus kang Ima na at king pakamalan ng alagad
a makatalakad Karin,sinabi na kang Ima na,”Babae iyan ing anak mu”At ngana king alagad,”Oyan y Ima
mo” at manibat na kanita inampun na ne ning alagad king pibale-bale na.”

(katahimikan at pamigunam)

PANALANGIN KING KANAM A ALDO:

Oh Indung mitmu king lugma ning migpakasakit mung Anak,e kaya lalung miragdag ing kekang
kalungkutan iniang linub ka king bale ning Cenakulo,uling aganaka mu iniang benging ita,kayabe me at
kasabi ing Mal mung Anak,dapot alayu at makakutkut ne.Nanu mo ing sukat kung daptan ban malibang
king kalungkutan mu keta king Cenakulo?Memun ya keka y Jesus inyang Jueves bengi uling balu na
kabukasan panabilin ne keka na ampunan mung anting anak ding sablang tau,at uling yaku metung ku
kareti.Tanggapan mu kung anak mu,bista man eku karapat-dapat.Saupan mu ku sana ba kung maging
karapat-dapat king kayampunan mu.Makanian man sana,matanggap la ring kakung kayaduanan
capamilatan na niting novena.

Amen.

KAPITUNG ALDO:

PAMIBULE KING KAPITUNG ALDO

“TINGGAP NENG MARIA KARING TAKDE NA ING BANGKE NING KAYANG ANAK”

(MAT.27:55-56/JUAN 19:33-37)

“Inyang linapit la kang Jesus,e da la pikli ding puad na uling ikit dang mete ne,oneng tindus ne
katalindikingan ning metung kareng sundalus at biglang linual ing daya ampon danum.(Ing menakit
kaniti yang patutu;tutu ing sasabian na at balu na king katutuan ing sasabian na ban maniwala
kayu)Mepalyari iti ban matupad ing sasabian na ning kasulatan.”Alang mepakli metung man karing butul
na.”

Atyu la naman Karin magumasid makarayung bagya ding dacal a babaing tinuki kang Jesus manibat
Galilea at liningap king miyayaliwang pamangailangan na.Kabilang kareti di Maria Magdalena,I Mariang
ima da ri Santiago at Jose at ing asawa nang Zebedeo.”
(katahimikan at pamigunam)

PANALANGIN KING KAPITUNG ALDO:

Oh Mangulilang Indu ning Pacamalan mung Anak,birian mung menahimik king kekang kalungkutan bista
ma’t kasanmetung mu la ring alagad nang Jesus.Paintulutan mung makirame ku keka,at kabang
tatangisan me ing kamatayan ning kekang Anak,bustan mung tangisan ku ring kakung pamagkulang at
kasalanan.Pamilatan mu ku king Dios,pauli ning kasakitan at kakaluluan king bie a iti,eku magnasa king
kerokan at labag king keyang pamagkasakit.At nung marapat king kekang kaligayan at ikakayap ning
kekeng pamibie-bie,pagkalub mu sana kekami ing grasyang aduan ku kaniting novena.

Amen.

KAWALUNG ALDO:

PAMIBULE KING KAWALUNG ALDO

“ATANGALAN NENG MIBILI KING KUTKUTAN MARIA ING DIVINONG ANAK NA”

(JUAN 19:38-42)

“Kaibat na nita,y Jose ning Arimatea pekisabi ne kang Pilato ing bangke nang Jesus,(Y Jose metung yang
alagad nang Jesus,oneng makalihim mu uli na ning takut na karing Judio).At peintulutan neng Pilato,inya
meko ya at kinua ne ing bangke nang Jesus.Tinuki ya keya y Nicodemo;magdala yang pisamut a mira at
aksibal a titimbang maygit apat apulung kilu,(Y Nicodemo ya itang mekikit misan a bengi kang
Jesus)kinua re ing bangke nang Jesus at kayabe ning pisamut a mira at aksibal binalut de king telang
pamburul.Makayagpang iti king kaugalian da ring Judio king pamangutkut.Ating mulahan king lugal nung
nu re pinaku y Jesus at karin atin bayung kutkutan a e pa megamit.Anti na ning aldo ne kanita ning
Pamagsadia da ring Judio at uling malapit ne man iting kutkutan,Karin de kitkut y Jesus”

(katahimikan at pamigunam)

PANALANGIN KING KAWALUNG ALDO:

Oh Indung malungkut,misakitan mung Anak,magdili dili king metung a kwarto mitmung lumbe itang
malungkut a bengi pahiwatig na keka king ing aldo ning Hustisya limbug ne uling y Jesus ngeni mete ne
king bunduk ning Calvario.Ding masasayang aldo a minie sala milabas na at aliwa na ngeni kesa ketang
iniang lilungan naka ning Banal a Espiritu at kumagli ka kaya at makanyan mu naman mebait ya
Bethlehem.Makananu kung maging karapat dapat ngening balu ku ding kakung kasalanan ilang meging
sangkan ning kekang kalungkutan?Pangaku ku Mal a Indu,pagsikapan kung itulid ding kakung
pamagkulang at mibie-bie mitmung katuliran ban makimetung king keyang ligaya.At sana ding kekeng
kayaduanan akamtan mila,kapamilatan niting pamagnovena.

Amen.

KASIAM A ALDO:

PAMIBULE KING KASIAM A ALDO

“ING BABAING MAKAIMALAN ALDO”

(KAPAHAYAGAN 12:1-6)

“Kanita linto ya king banua ing metung a makapagmulalang Tanda;metung a babaing makaimalan king
aldo at makatuklu king babo ning bulan.At atin yang labing-aduang batuin ing koronang atyu king buntuk
na.Malapit neng manganak;inya sasaingsing ya at kukulisak king pamiramdam na.

Atin pang metung a tandaa linto king banua;metung yang maragul a dragon.Atin yang pitung buntuk at
apulung sagu;balang buntuk na atin yang korona.Keladkad nala ning iki na ing katlung dake karing batuin
na ning banua at bildug nala king yatu .Kaibat na nita,tinalakad ya arap ning babaing malapit nang
manganak ba neng kanan ing anak kabud mibait ya.At menganak yang metung a lalaki ing babai,oneng
ating sinamsam kling anak at dela ne king Dios at king tronu na.Ing anak a iti mitalaga yang magari karing
sablang bansa king kapamilatan na ning palupalung bakal.At ing tinakas ya ing babai papunta king
disyerto;king lugal a sidia na ning Dios ban Karin maingat ya kilub ding libu aduang dalan at anam
apulung aldo.”

(katahimikan at pamigunam)

PANALANGIN KING KASIAM A ALDO:

Oh mangulilang Indu ning pakamalan mung Anak,malambat a kasakitan ing atlung aldo king
pamanenaya mu king pamanyubling mie ning kekang Anak.Emu nanung kasabikan ing penamdaman mu
kabang panayan mung sunlag ne ing aldo,ba mung akit ing pamagtagumpe na ning kekang Anak.Ing
keyang ligaya,ing pamanalig mu ,ing minye sikanan keka ban apanaya mu ing katuparan king pangasubli
ng mebie.Ing lugud mu at kapibabatan yang migsilbing sikanan king kekang pangaulila.Ing kababan
mung lub yang migdala keka ban magpakasakit alang-alang king meto sikluban.Ing alimbaua mu Mal a
Indu,ing minie tapang ban ipanalangin me ing Indung Santa Iglesia,anti murin ding miyayaliwang
manimunu king meto yatu,dapot maigit king sabla,ding kekaming manimunu keti Pampanga,balen ning
Apalit at king mabilug a bansa ming Pilipinas.Ipanalangin kula naman ding atyu keti ngeni at ding
pacamalan ming miembro ning familia a makarayu kekami.Sana kapamilatan ning pamagkasakit at
pamangulila mu mirinan katuparan ing kekaming kayaduanan kapamilatan na ning pamagnovena mi.

Amen.
Ang Matandang Imahen ng Mahal na Birhen ng Soledad ng Sulipan

VIVA NUESTRA SEÑORA DE LA SOLEDAD DE SULIPAN!!!

VIVA APUNG SOLEDAD DE SULIPAN!!!