Դաս 12: Ոչ նյութական ակտիվներ

1.1. Ոչ նյութական ակտիվների սահմանումն ու բնորոշիչ

հատկանիշները /չափանիշները/
1.2. Ոչ նյութական ակտիվների օրինակներ
1.3. Հետազոտության և մշակման ծախսեր
1.4. Ոչ նյութական ակտիվների չափումը
1.5. Ոչ նյութական ակտիվների ամորտիզացիա
1.6. Գուդվիլ
1.7. Թեսթային որոշ առաջադրանքներ

1.1 Ոչ նյութական ակտիվների սահմանումն ու բնորոշիչ

հատկանիշները /չափանիշները/

Նախ սահմանենք ոչ նյութական ակտիվը.

 Ոչ նյութական ակտիվը ֆիզիկական բնույթ չունեցող

որոշելի ոչ դրամային ակտիվ է:

Առաջին հերթին նշմարելի է, որ ինչպես այլ տեսակի

ակտիվները, ոչ նյութական ակտիվը նույնպես
կազմակերպության կողմից վերահսկվող ակտիվ է, երևան է
գալիս անցյալում տեղի ունեցած դեպքերի արդյունքում, և
ակտիվի օգտագործմամբ ակնկալվում է ապագա տնտեսական
օգուտների ներհոսք կազմակերպություն:

Վերը բերված սահմանումից կարելի է մատնանշել ոչ

նյութական ակտիվների երեք հիմնական բնորոշիչ
հատկանիշներ /չափանիշներ/`

1
  որոշելիությունը,
 դրանց նկատմամբ վերահսկողությունը, և
 դրանցից ապագա տնտեսական օգուտների ակնկալումը:

Ոչ նյութական ակտիվը որոշելի է, երբ այն կարող է

առանձնացվել, վաճառվել կամ այլ կերպ օտարվել,
արտոնագրվել այլ կազմակերպության, հանձնվել
վարձակալության, փոխանակվել այլ ակտիվների հետ:

1.2 Ոչ նյութական ակտիվների օրինակներ

Բերենք ոչ նյութական ակտիվների մի քանի օրինակներ`

 համակարգչային ծրագրեր,
 արտոնագրեր,
 հեղինակային իրավունքներ,
 լիցենզիաներ,
 ներմուծման քվոտաներ,
 ֆրենչայզներ /վստահագրեր/,
 ֆիրմային անվանումներ,
 բանաձևեր, մոդելներ, նախագծեր, բաղադրատոմսեր և
փորձանմուշներ,
 շուկայավարման համար ստացած իրավունքներ, և այլն:

Պետք է նշել, որ կազմակերպությունը ոչ նյութական ակտիվները

կարող են ձեռք բերել առանձին պայմանագրով, դրանք ստանալ
անհատույց, ինչպես նաև այլ ակտիվների հետ փոխանակության
միջոցով: Կազմակերպությունը կարող է իր ոչ նյութական
ակտիվները ստանալ /ներստեղծել/ սեփական ուժերով:

1.3 Հետազոտության և մշակման ծախսեր

2
Կազմակերպությունն իր գործունեության ընթացքում կարող է
իրականացնել հետազոտության և մշակման գործընթացներ:
Օրինակ, կարող է ուսումնասիրել նորարարական
տեխնոլոգիական որևէ գործընթաց և այդ նոր գիտելիքները
փորձարկել և դնել կիրառության մեջ` հետագայում նպատակ
ունենալով կազմակերպել առևտրային արտադրություն
/գործունեություն/: Այս գործընթացների արդյունքում կարող են
առաջանալ /ստեղծվել/ ոչ նյութական ակտիվներ: Տարբերակենք
այդ երկու գործընթացները, ինչպես նաև դրանց արդյունքում
առաջացող ոչ նյութական ակտիվների ճանաչման և
ֆինանսական հաշվառման մոտեցումները:

 Հետազոտությունն իրենից ներկայացնում է`նոր գիտական

կամ տեխնիկական գիտելիքներ և իմացություն
ձեռքբերելու ակնկալիքով կատարվող ինքնատիպ և
ծրագրված ուսումնասիրություն:

 Մշակումն իրենից ներկայացնում է հետազոտության կամ

այլ գիտելիքների կիրառում` նոր կամ էականորեն
բարելավված նյութերի, սարքավորումների,
արտադրատեսակների, գործընթացների, համակարգերի
կամ ծառայությունների ստեղծումը պլանավորելու կամ
նախագծելու համար`մինչև դրանց առևտրային
արտադրության կամ դրանց օգտագործման սկիզբը:

Հետազոտության փուլում առաջացող /ստեղծվող/ ոչ նյութական

բնույթ ու հատկություններ ունեցող ակտիվները ֆինանսական
հաշվառման մեջ որպես այդպիսին /որպես ոչ նյութական
ակտիվ/ չեն ճանաչվում: Փոխարենը, հետազոտության գծով
կատարված ծախսումները ֆինանսական արդյունքներում

3
ճանաչվում են որպես ծախս`դրանց տեղի ունենալու պահին:
Սա հիմնականում կապված է այն հանգամանքի հետ, որ
հետազոտության փուլում նախագծի հավանական
հաջողությունը, հետևապես, ապագա տնտեսական օգուտները,
չափազանց անորոշ են:

Մշակումից առաջացող ոչ նյութական ակտիվը

հաշվապահական հաշվեկշռում ճանաչվում է որպես այդպիսին,
երբ կազմակերպությունը կարող է ցուցադրել, որ այդ ոչ
նյութական ակտիվն ավարտուն վիճակին հասցնելը
տեխնիկապես իրագործելի է և կազմակերպությունը
մտադրություն և ֆինանսական միջոցներ ունի այն ավարտելու և
հետագայում օգտագործելու կամ վաճառելու, որից կարող է
ակնկալել ապագա տնտեսական օգուտներ:

1.4 Ոչ նյութական ակտիվների չափումը

Ինչպես հիմնական միջոցների դեպքում, ոչ նյութական ակտիվը

սկզբնական ճանաչման ժամանակ չափվում է իր սկզբնական
արժեքով /ինքնարժեքով/:

Այնուհետ, ոչ նյութական ակտիվների հետագա չափման

նպատակով կազմակերպությունը ընտրում է ինքնարժեքի կամ
վերագնահատման մոդելները: Ընտրությունը պետք է կատարվի
ըստ ոչ նյութական ակտիվների դասերի:

Ինքնարժեքի մոդելի կիրառման դեպքում կազմակերպությունը

ոչ նյութական ակտիվը հաշվառում է ինքնարժեքով`հանած
կուտակված մաշվածությունն ու արժեզրկումից կորուստները:

4
Սկզբնական ճանաչումից հետո վերագնահատման մոդելով
հաշվառման դեպքում, կազմակերպությունը ոչ նյութական
ակտիվը հաշվառում է վերագնահատված արժեքով: Վերջինս
իրենից ներկայացնում է վերագնահատման ամսաթվի
դրությամբ ոչ նյութական ակտիվի իրական արժեքը`առանց
կուտակված մաշվածության և արժեզրկումից կորուստների:
Վերագնահատումները ենթակա են կատարման այնպիսի
պարբերականությամբ, որ ոչ նյութական ակտիվի
հաշվեկշռային արժեքը հաշվետու ժամանակաշրջանի վերջի
դրությամբ էականորեն չտարբերվի դրա իրական արժեքից:

Ինչպես հիմնական միջոցների դեպքում, վերագնահատման

մոդելի կիրառման ժամանակ, ոչ նյութական ակտիվների
վերագնահատման ավելացումը վերագրվում է սեփական
կապիտալին***, բացառությամբ, երբ այդ ավելացումը
հակադարձում է նախկինում ճանաչված վերագնահատման
նվազումը: Վերջին դեպքում վերագնահատման ավելացումը,
նախկինում արձանագրված նվազման չափով, նախ ճանաչվում
է ֆինանսական արդյունքներում`որպես եկամուտ:
Իսկ եթե առկա է վերագնահատման նվազում, ապա այն
ճանաչվում է ֆինանսական արդյունքներում`որպես ծախս,
սակայն, նվազումը նախ ճանաչվում է սեփական
կապիտալում***, եթե նախկինում արձանագրվել է
վերագնահատման աճ և սեփական կապիտալի
համապատասխան հաշվում առկա է կրեդիտային մնացորդ:
Սեփական կապիտալում վերագնահատումից նվազման
արտացոլումը կատարվում է նախկինում արձանագրված
վերագնահատման աճի`կրեդիտային մնացորդի չափով:

5
***Սեփական կապիտալում արտացոլումը /կուտակումը կամ մնացորդի նվազեցումը/
կատարվում է այլ համապարփակ ֆինանսական արդյունքներից` չիրացված
վերագնահատման գումարների /օգուտի կամ կորուստի/ տեղափոխման /շրջանառման/
ճանապարհով: Ընդհանուր /համապարփակ/ ֆինանսական արդյունքը ընթացիկ
ժամանակաշրջանում կապիտալի փոփոխությունն է, որն առաջանում է սեփականատերերի
հետ գործառնություններից բացի այլ գործառնություններից և դեպքերից առաջացող
փոփոխություններից: Ընդհանուր /համապարփակ/ ֆինանսական արդյունքը ներառում է ա.
շահույթ կամ վնասը և բ. այլ համապարփակ արդյունքը: Այն կարող է ներկայացվել ա.կամ
մեկ ընդհանուր հաշվետվությամբ /Հաշվետվություն համապարփակ ֆինանսական
արդյունքների մասին/, կամ բ. երկու առանձին հաշվետվություններով`1. Հաշվետվություն
շահույթ/վնասի մասին /Հաշվետվություն ֆինանսական արդյունքների մասին/, որը ցույց կտա
շահույթի ու վնասի բաղկացուցիչ տարրերը, և 2. Հաշվետվություն այլ համապարփակ
ֆինանսական արդյունքների մասին, որը կսկսվի 1-ի հաշվետվության շահույթ/վնասով
/որպես սկզբնական մնացորդ/ և ցույց կտա այլ համապարփակ արդյունքի բաղկացուցիչ
տարրերը: Շահույթը կամ վնասը իրենից ներկայացնում է ընդհանուր եկամուտների և
ծախսերի տարբերությունը, ինչը չի ներառում այլ համապարփակ ֆինանսական արդյունքի
բաղադրիչները: Այլ համապարփակ ֆինանսական արդյունքի /հաշվետվության/
բաղադրիչներից են, օրինակ, հիմնական միջոցների և ոչ նյութական ակտիվների
վերագնահատման փոփոխությունները, որոնք այլ համապարփակ արդյունքից իրենց
արտացոլումն են գտնում և կուտակվում սեփական կապիտալում /հաշվապահական
հաշվեկշռում/:

Օրինակ

“Ծրագրային իրավունքներ” ընկերության ձեռք բերած

համակարգչային ծրագրի հաշվեկշռային արժեքը ՀՀԴ 6 մլն. է:
Կազմակերպության կողմից առաջին հաշվետու տարվա
վերջում կատարված վերագնահատումից հետո այն կազմել է
ՀՀԴ 8 մլն.: Երկրորդ հաշվետու տարվա վերջում կատարած
վերագնահատման արդյունքում համակարգչային ծրագրի
հաշվեկշռային արժեքը կազմել է ՀՀԴ 5 մլն.: Երրորդ հաշվետու
տարվա վերջում կազմակերպությունը վաճառել է ոչ նյութական
ակտիվը`ՀՀԴ 7 մլն.-ով, ընդ որում, նախքան վաճառքը
կատարված վերագնահատման արդյունքում ակտիվի իրական
արժեքը կազմել է ՀՀԴ 6 մլն: Վաճառքի գումարն ամբողջությամբ
մուտքագրվել է հաշվարկային հաշվին: Արտացոլել
6
ընկերության վերագնահատման և վաճառքի
գործառնությունները ֆինանսական հաշվառման մեջ`ըստ
տարիների:

1-ին հաշվետու տարվա ավարտին`

Դտ Համակարգչային ծրագիր /ոչ նյութական ակտիվ/ 2
Կտ Ոչ նյութական ակտիվների վերաչափումից օգուտ /այլ
համապարփակ ֆինանսական արդյունք/

և վերագնահատման օգուտի արտացոլումը և կուտակումը

սեփական կապիտալում`

Դտ Ոչ նյութական ակտիվների վերաչափումից օգուտ /այլ

համապարփակ ֆինանսական արդյունք/ 2
Կտ Սեփական կապիտալ`/համակարգչային ծրագրի
վերագնահատումից արժեքի աճ/

2-րդ հաշվետու տարվա ավարտին`

ա. վերագնահատման պահուստի նվազում`

Դտ Ոչ նյութական ակտիվների վերաչափումից կորուստ /այլ

համապարփակ ֆինանսական արդյունք/ 2
Կտ Համակարգչային ծրագիր /ոչ նյութական ակտիվ/

Դտ Սեփական կապիտալ`/համակարգչային ծրագրի

վերագնահատումից արժեքի աճ/ 2
Կտ Ոչ նյութական ակտիվների վերաչափումից կորուստ /այլ
համապարփակ ֆինանսական արդյունք/

բ. մնացած նվազման գումարի արտացոլում ֆինանսական

7
արդյունքներում`որպես ծախս

Դտ Ոչ նյութական ակտիվների վերաչափումից

կորուստ /ֆինանսական արդյունք/
1
Կտ Համակարգչային ծրագիր /ոչ նյութական ակտիվ/

3-րդ հաշվետու տարվա ավարտին կատարված

վերագնահատման և ակտիվի օտարման արտացոլում`

ա. վերագնահատման աճ`

Դտ Համակարգչային ծրագիր /ոչ նյութական ակտիվ/ 1

Կտ Ոչ նյութական ակտիվների վերաչափումից օգուտ
/ֆինանսական արդյունք/

բ. Հասույթ և օգուտ վաճառքից`

Դտ “Հաշվարկային հաշիվ” 7
Կտ “Ոչ նյութական ակտիվներ” 6
Կտ “Օգուտ`ոչ նյութ. ակտիվի վաճ.-ից” 1

1.5 Ոչ նյութական ակտիվների ամորտիզացիա

Ոչ նյութական ակտիվների ամորտիզացիան ֆինանսական

հաշվառման մեջ արտացոլելու նպատակով
կազմակերպությունը կարիք ունի տարբերակելու, թե ոչ

8
նյութական ակտիվների օգտակար ծառայությունը որոշակի
ժամկետով է, թե`անորոշ:

Օգտակար ծառայության անորոշ ժամկետով ոչ նյութական

ակտիվը ամորտիզացիայի ենթակա չէ, այլ խոսքով նման ոչ
նյութական ակտիվների համար ամորտիզացիոն
հատկացումներ չեն հաշվարկվում և չեն կատարվում:

Ընդ որում, ոչ նյութական ակտիվը դիտարկվում է որպես

անորոշ օգտակար ծառայություն ունեցող, երբ դրան առնչվող
բոլոր գործոնների վերլուծության հիման վրա կարելի է
եզրակացնել, որ չկա որևէ կանխատեսելի սահմանափակում
այն ժամանակահատվածի, որի ընթացքում ակտիվից
ակնկալվում է տնտեսական օգուտների ներհոսք
կազմակերպություն:

Օգտակար ծառայության որոշակի ժամկետ ունեցող ոչ

նյութական ակտիվների գծով հաշվարկվում է ամորտիզացիա և
կատարվում են ամորտիզացիոն հատկացումներ:

Այդ նպատակով կազմակերպությունը գնահատում է ոչ

նյութական ակտիվի օգտակար ծառայության տևողությունը
կամ օգտակար ծառայությունը մարմնավորող արտադրանքի
կամ նմանատիպ միավորների քանակը:

Օգտակար ծառայության որոշակի ժամկետով ոչ նյութական

ակտիվներ
Այս ոչ նյութական ակտիվի ամորտիզացվող գումարը ենթակա է
պարբերական բաշխման ակտիվի

9
օգտակար ծառայության ընթացքում: Օգտակար
ծառայությունը`ըստ ժամկետի կամ քանակի, գնահատվում է
կազմակերպության կողմից`մասնագիտական դատողության
հիման վրա: Ամորտիզացիայի կիրառվող մեթոդը կամ մոդելը
պետք է արտացոլի ակտիվի օգտագործումից ակնկալվող
ապագա տնտեսական օգուտների սպառման բնույթը: Եթե ոչ
նյութական ակտիվի առանձնահատկությունից ու բնույթից
ելնելով նման մոդել հնարավոր չէ գնահատել կամ որոշել, ապա
կազմակերպությունը կիրառում է գծային մեթոդը:
Ամորտիզացիայի ժամկետը կազմակերպությունը պետք է
վերանայի /գնահատի, և պարտադիր չէ, որ փոփոխի/ առնվազն
տարեկան մեկ անգամ:

Տվյալ ժամանակաշրջանի համար հաշվարկված

ամորտիզացիայի ծախսը կազմակերպությունը ճանաչում է
ֆինանսական արդյունքներում, իսկ կուտակված
ամորտիզացիայի գումարները բացասական նշանով
արտացոլվում են հաշվապահական հաշվեկշռում`հանգեցնելով
տվյալ դասի զուտ հաշվեկշռային արժեքի ներառմանը
հաշվեկշռում: Կուտակված ամորտիզացիան արտացոլող
հաշիվը պասիվային է, կարգավորող: Որոշակի ժամկետով ոչ
նյութական ակտիվների ամորտիզացիայի հաշվեգրումը
կատարվում է հետևյալ ձևակերպմամբ`

Դտ “Ոչ նյութական ակտիվների ամորտիզացիայի ծախս”

Կտ “Ոչ նյութական ակտիվների ամորտիզացիա”

Ամորտիզացիայի ծախսերը կարող են ունենալ անուղղակի

արտադրական, վարչական, կամ այլ տեսակի ծախսերի բնույթ,
ըստ այդմ, արտացոլվել համապատասխան հաշիվներում:

10
Ոչ նյութական ակտիվների վաճառքի /օտարման/ դեպքում
կուտակված ամորտիզացիայի գումարները դուրս են գրվում`

Դտ “Ոչ նյութական ակտիվների ամորտիզացիա”

Կտ “Ոչ նյութական ակտիվներ”

1.6 Գուդվիլ

“Գուդվիլ” հաշիվը կամ հոդվածը արտացոլվում է

կազմակերպության հաշվապահական հաշվեկշռի ակտիվներն
ընդգրկող մասում: Առաջանում է գուդվիլ, երբ երբեմն մի
ընկերություն ձեռք է բերվում մեկ այլ ընկերության կողմից:
Ընդհանրական լեզվով ասած, գուդվիլն առաջանում է տվյալ
ընկերության հաշվեկշռային արժեքի նկատմամբ այդ
ընկերության ձեռքբերման համար մեկ այլ ընկերության կողմից
վճարված կամ վճարման ենթակա գնի գերազանցման
պայմաններում: Գուդվիլը հաշվապահական հաշվեկշռում
արտացոլվում է որպես ոչ նյութական ակտիվ, քանի որ այն
ֆիզիկական բնույթ չունի, ինչպես, օրինակ, շենքներն ու
սարքավորումները: Գուդվիլը սովորաբար մարնավորում է
նյութական բնույթ չունեցող այնպիսի առավելություններ ու
արժեքներ, ինչպես օրինակ, հայտնի ապրանքնային նշանը,
հաճախորդների հետ գերազանց հարաբերությունները, ունեցած
արտոնագրերը, աշխատակիցների հետ լավ
հարաբերությունները, բարձր վարկանիշը արտադրական և
հասարակական միջավայրում, և այլն:
Այսպիսով, գուդվիլը հաշվապահական հասկացություն է, որն
արտահայտում է, որ կազմակերպության արժեքը ավելի բարձր
է ունեցած ակտիվների արժեքից: Սկզբնապես այս եզրույթը

11
հաշվապահության մեջ օգտագործվել է մատնանշելու համար
կազմակերպության ակտիվների համեմատ դրա արժեքի թեև
ֆիզիկական բնույթ չունեցող, սակայն քանակապես
արտահայտելի ու “շրջահայացորեն գնահատված”
մեծությունը /գերազանցումը/, որն օրինակ կարող է ծագել
որպես հաճախորդների շրջանակում կազմակերպության
ունեցած բարձր վարկանիշի հետևանք:

Ժամանակակից բնորոշմամբ, ֆինանսական հաշվետվության

մեջ արտացոլվում է գուդվիլ, երբ կազմակերպությունը ձեռք է
բերվում իր որոշելի զուտ ակտիվների իրական արժեքից ավելի
բարձր արժեքով: Գնման /ձեռքբերման/ արժեքի և զուտ
ակտիվների իրական արժեքի տարբերությունը կազմում է
ձեռքբերվող կազմակերպության “գուդվիլը”: Ձեռքբերող /գնող/
կազմակերպությունը գուդվիլը պետք է ճանաչի իր
ֆինանսական հաշվետվության մեջ և առանձին տողով
արտացոլի ակտիվների շարքում: Այս իմաստով, գուդվիլը
հանդես է գալիս որպես հավասարակշռող թիվ, որը
ֆինանսական տեղեկատվությունն օգտագործողներին
“պարզում” և տեղեկատվություն է ապահովում տվյալ
ընկերության կողմից մեկ այլ ընկերության`զուտ ակտիվների
արժեքից ավելի բարձր գնով կատարված ձեռքբերման
վերաբերյալ:
Գուդվիլը կարող է լինել նաև բացասական, երբ ձեռքբերման
ամսաթվի դրությամբ ձեռքբերվող /գնվող/ կազմակերպության
զուտ ակտիվների իրական արժեքն գերազանցում է ձեռքբերման
արժեքը /կազմակերպության ձեռքբերման համար ձեռքբերողի
կողմից վճարվող արժեքը/: Ձեռքբերման արժեքի և զուտ
ակտիվների արժեքի /ձեռքբերված ակտիվների և ստանձնած
պարտավորությունների զուտ գումար/ այս բացասական

12
տարբերության չափով ձեռքբերողը ճանաչում է օգուտ իր
ֆինանսական արդյունքներում:
Գուդվիլի նկատմամբ չի հաշվարկվում ամորտիզացիա:
Գուդվիլի ճանաչված արժեքը կարող է նվազել արժեզրկման
հետևանքով:
Պետք է նաև նշել, որ գուդվիլը տեխնիկական առումով,
այսինքն`բնութագրող չափանիշներով և հատկանիշներով,
համարվում է որպես ոչ նյութական ակտիվ, միևնույն ժամանակ,
ոչ նյութական ակտիվներն ու գուդվիլը կազմակերպության
հաշվեկշռում սովորաբար թվարկվում են /ընդգրկվում են/
առանձին տողերով /հոդվածներով/:

1.7. Թեսթային որոշ առաջադրանքներ

1. Ոչ նյութական ակտիվի բնորոշումը ներառում է հետևյալ
հատկանիշները /չափանիշները/`
ա. որոշելիությունը,
բ. ակտիվի նկատմամբ վերահսկողությունը,
գ.ապագա տնտեսական օգուտների ակնկալումը,
դ.մնացորդային արժեքը:
Ընտրել առավել ամբողջական և ճիշտ տարբերակը`
ա. ա-ից բ-ն /ներառյալ/,
բ. ա-ից գ-ն /ներառյալ/,
գ. ա-ից դ-ն /ներառյալ/,
դ. գ-ն:

13
2.Ոչ նյութական ակտիվների օրինակներ են`
ա. համակարգչային ծրագրեր,
բ. արտոնագրեր,
գ. հեղինակային իրավունքներ,
դ. լիցենզիաներ,
ե. ներմուծման քվոտաներ,
զ. ֆրենչայզներ /վստահագրեր/,
է. ֆիրմային անվանումներ,
ը. բանաձևեր, մոդելներ, նախագծեր, բաղադրատոմսեր և
փորձանմուշներ,
թ. շուկայավարման, ծառայությունների մատուցման,
շահագործման իրավունքներ,
ժ. գրասենյակային սարքավորումներ,
ի. համակարգիչ,
լ. գրասենյակի ճաշարանի խոհարարի նոթատետրում
աղցանների պատրաստման օրերի վերաբերյալ անձնական
գրառումներ:

Ընտրել առավել ամբողջական և ճիշտ տարբերակը`

ա. ա-ից ը-ն /ներառյալ/,
բ. ա-ից թ-ն /ներառյալ/,
գ. ա-ից ի-ն /ներառյալ/,
դ. ա-ից լ-ն:

3.Եթե նախկինում չվերագնահատված ակտիվի հաշվեկշռային

արժեքը վերագնահատման արդյունքում նվազում է, ապա այս
նվազումը`
ա. կապիտալացվում է,
բ. ճանաչվում է որպես հաշվետու ժամանակաշրջանի ծախս,

14
գ. ճանաչվում է որպես արտասովոր կամ չնախատեսված ծախս,
դ. ճանաչվում է որպես վերագնահատման աճի նվազում:

4. Որ պատասխանն է սխալ`
ա.օգտակար ծառայության որոշակի ժամկետով ոչ նյութական
ակտիվների համար հաշվարկվում է ամորտիզացիա,
բ.եթե ոչ նյութական ակտիվի ամորտիզացման մոդելը
հնարավոր չէ արժանահավատորեն որոշել, ապա պետք է
կիրառվի գծային մեթոդը,
գ. օգտակար ծառայության անորոշ ժամկետով ոչ նյութական
ակտիվի համար հաշվարկվում է ամորտիզացիա`20 տարուց
ավելի ժամկետով,
դ.ամորտիզացիայի ժամկետը պետք է վերանայվի տարեկան
առնվազն մեկ անգամ:

5. Հետազոտության ծախսերը կարող են կապիտալացվել`

ա. երբեք, ոչ մի դեպքում չեն կարող,
բ. միշտ, ամեն դեպքում կարող են,
գ. մշակման փուլի սկզբում,
դ. մշակման փուլի վերջում:

6. Որ պատասխանն է սխալ`
ա.գուդվիլի նկատմամբ հաշվարկվում է ամորտիզացիա,
բ. գուդվիլը, ընդհանրական իմաստով`ձեռքբերման արժեքի և
ձեռբերված զուտ ակտիվների իրական արժեքի դրական

15
տարբերությունը, ճանաչվում է ձեռքբերողի հաշվապահական
հաշվեկշռում`որպես ակտիվ,
գ.գուդվիլի հաշվարկման ժամանակ, ձեռքբերման ամսաթվի
դրությամբ, ձեռքբերման արժեքի և ձեռբերված զուտ ակտիվների
իրական արժեքի բացասական տարբերության չափով
ձեռքբերողը պետք է ճանաչի օգուտ`ֆինանսական
արդյունքներում,
դ. գուդվիլի նկատմամբ ամորտիզացիա չի հաշվարկվում:

Հաջորդ թեմաներ

Դաս 13: Պարտատոմսեր և բաժնետոմսեր

Դաս 14: Բաժնետիրական ընկերությունների ֆինանսական
հաշվետվություններ

16