Mga Dapat Malaman sa Sakit na HIV Infection at AIDS
John N. Abletis
Instructor, Department of Sociology and Anthropology
Polytechnic University of the Philippines,
Mabini Campus, Sta. Mesa, Manila
Panimula
Sa Pilipinas, ang kalusugan ay itinuturing
na kayamanan hindi lang ng isang Pilipino
kundi ng buong lipunan. Sa personal na lebel,
ang pagiging malusog ay isang rekwisito para
sa isang masayang buhay. Kung ang isang tao
ay malusog, ang mga taong nakapaligid at
may malapit na kaugnayan sa kanya ay
magkakaroon ng kompyansa na makipagusap,
makipagugnayan, at magkaroon ng personal
na relasyon sa kanya. Gayun din naman, ang
isang taong malusog ay may sapat na
kompyansa para mabuhay ng masaya, ng may
dignidad, at ng may pagtanggap sa lipunang
kanyang ginagalawan. Kadalasan, ang
ganitong senaryo ay hindi tinatamasa ng isang
taong may malalang sakit, lalong-lalo na ang
mga biktima ng AIDS. Karamihan kasi ng
mga nagkakaron ng HIV/AIDS ay nakararanas
ng pagtangi sa kanilang totoong kalagayan,
pagkagalit sa sarili at sa mundo, at depresyon.
Marahil, ito ay dahil na rin sa ang HIV/AIDS
ay hindi nagagamot at karamihan sa mga
taong nagtataglay nito ay nakararanas ng
pagtangi at pagiwas ng mga dating kaibigan at
ng ibang mga tao, diskriminasyon sa paaralan,
trabaho, at iba pang social contexts, at
pagbabansag na sila ay mga bakla o mga drug
addict (Hyde & DeLamenter, 2000, p. 535).
Kaya nga, ayon kay Hyde at Delameter (2003,
p. 522), kung gusto mong sirain ang kalusugan
mo at bigyan ng katakot-takot na pasakit ang
sarili mo, isang magandang paraan ay ang
magkaroon ka ng isang pangsekswal na sakit
na walang lunas [AIDS at HIV infection ang
tinutukoy nila rito].
Sa pangmalakihang pagtingin naman, ang
banta ng HIV infection/AIDS ay isang
seryosong usapin pagdating sa seguridad ng
bansa, lalong-lalo na sa sektor ng ekonomiya.
Bukod sa banta nito sa lakas-paggawa ng
isang bansa, ito rin ay nakaaapekto sa
1
paghahati-hati ng budget para sa mga
PUP-CA-Department of Sociology and Anthroplogy Extension and Community Services Committee 2010
serbisyong panlipunan. Sa isang bansang
laganap ang AIDS, ang budget na dapat sana
ay napunta sa pagpapatayo ng paaralan,
pagpapaunlad ng industriya, at pagpapagawa
ng mga imprastraktura ay napupunta sa
serbisyong pangkalusugan partikular sa mga
kampanya at hakbangin laban sa HIV
infection at AIDS, at paggamot sa mga taong
biktima na nito. Ang higit na makararamdam
ng mabigat na pasaning ito ay ang mga
papaunlad palang at mga mahihirap na bansa
(Mooney, Knox, & Schacht, 2005, p. 38). Sa
institusyon naman ng pamilya, ang HIV
infection at AIDS ay nagbabantang gawing
ulila ang milyon-milyong kabataan. Noong
2003, inulat ng CBS News na mahigit 13
milyon nang mga kabataan ang ginawang ulila
ng AIDS at tinatayang lolobo pa ito sa 25
milyon pagsapit ng taong 2010 (Mooney,
Knox, & Schacht, 2005, p. 273). Ang
paglaganap ng HIV indection/AIDS ay lalo
pang bumilis sa makabagong panahon, kung
saan ang mga institusyon ng pamilya,
kasarian, relihiyon, moralidad, politika, at
ekonomiya ay mabilis ding nagpapalit ng
anyo.
Ang sakit na HIV Infection/AIDS ay isang
seryosong banta sa ating lipunan, lalong-lalo
na sa mga kabataan. Noong taong 2003,
mahigit 8,000 katao kada araw ang namatay sa
sakit na ito (http://www.accessexcellence.
org/aids) at inaasahang lolobo pa ang bilang sa
pagdating ng mga karagdagang taon. Noong
2008, inulat ng WHO at UNAIDS na sa taon
palang na iyon, mahigit 2 milyon na ang
namatay sa sakit na AIDS, 280 libo rito ay
mga bata (WHO, 2009, p. 2). Sa taon ding
iyon, iniulat ng WHO at UNAIDS na mahigit-
kumulang 33.4 milyong katao na ang
nabubuhay nang may HIV infection/AIDS
 Global Trends [on HIV infections/AIDS]
Source: http://www.avert.org/worldstats.htm
(ibid). Sa ngayon, tinatayang 25 milyong
katao na ang namatay dahil sa AIDS mula
1981 hanggang 2008 (http://www.avert.org/
worldstats.htm). Sa itaaas ay isang bar graph
na nagpapakita ng pagtaas ng kaso ng
HIV/AIDs sa buong mundo (ibid).
Dahil sa trend na ito ay naalarma ang
United Nations upang gumagawa ng mga
hakbangin para mapigilan ang pagkalat ng
HIV/AIDS. Ang iba sa mga ito ay ang
paglalagay ng UN sa AIDS bilang layunin ng
bawat kasaping bansa na masugpo hanggang
2015 (MDG 6) at ang pagkakatatag ng
UNAIDS bilang pangunahing kamay ng UN
sa pagpigil ng paglaganap, at pagmomonitor
ng mga kaso, ng HIV infection at AIDS sa
buong mundo. Maraming mga bansang kasapi
ang tumugon, kabilang ang Pilipinas, sa
panawagan ng UN sa pamamagitan ng
paglulunsad ng mga information campaign at
pagtatayo ng mga institusyong nagaaral at
kumakalinga sa mga taong may HIV/AIDS.
Hindi rin nagpahuli ang pribadong sektor sa
pagtugon sa MDG 6. Sa ngayon, maraming
mga NGOs ang nagsasaliksik tungkol sa
kalagayan ng AIDS sa bansa, nagtatanggol sa
karapatan ng mga taong may HIV/AIDS, at
2
PUP-CA-Department of Sociology and Anthroplogy Extension and Community Services Committee 2010
nagmumulat sa mga kumunidad sa mga
basikong kaalaman patungkol sa HIV/AIDS.
Ang primer na ito ay may layuning
makibahagi sa pagkilos ng gobyerno at ng
mga NGOs na labanan at pigilin ang pagkalat
ng nakamamatay na sakit. Pangunahing
layunin ng primer na ito na ipaunawa sa
simpleng paraan ang banta ng HIV/AIDS, ang
kalikasan ng HIV/AIDS, ang paraan ng
pagkalat nito, mga paraan upang maiwasan
ito, at kung saan makakahingi ng tulong kung
sakaling nagtataglay na nito. Maginhawang
pagbabasa para sa lahat!
Sa Pilipinas
Bagamat ang bilang ng mga Pilipinong
may HIV/AIDS ay hindi kataasan kumpara sa
ibang mga bansa (halimbwa ay South Africa),
ang mga datos na nakalap ng UNAIDS at
WHO sa Pilipinas ay kakikitaan ng pagtaas ng
bilang ng mga apektado ng sakit na ito (chart
sa kabilang pahina). Ayon naman sa DOH,
bagamat maliit lamang ang bilang ng mga
nagkakasakit ng HIV/AIDS sa bansa,
pinapalala nito ang nararanasang kakulangan
sa serbisyong pangkalusugan partikular sa
mga mahihirap dahil imbis na mapunta ng buo

ang maliit na budget ng gobyerno para sa
kalusugan ng nakararami at iba pang
serbisyong panlipunan ay nababawasan pa ito
para sa mga biktima ng HIV/AIDS (mahal
kasi ang gamutan sa HIV/AIDS). Ang higit na
kaawa-awa ay ang mga mahihirap na kulang
ng access sa mga serbisyong pangkalusugan
ng gobyerno. Ang mga mahihirap din at mga
taong kulang sa edukasyon ay nasa alanganing
sitwasyon dahil sa kakulangan ng access sa
mga serbisyong pangkalusugan, kaalaman sa
HIV/AIDS, at hindi-ligtas na pakikipagtalik,
lalong-lalo na sa mga kabataan (http://www.
remedios.com.ph/fhtml/philstat_hivaids.htm
Bunga ng pagsusumikap ng mga NGOs,
GOs, at iba pang mga institusyon ay
naisabatas sa Pilipinas noong February 13,
1998 ang Philippine AIDS Prevention and
Control Act. Ito ay naglalayong magpalaganap
ng kaalaman, sa pangunguna ng gobyerno,
tungkol sa sakit na HIV/AIDS, isulong ang
mga karapatan ng mga taong may HIV/AIDS,
mga tagubilin sa tamang pagsasagawa ng HIV
testing, at pagbibigay ng ibat-ibang programa
gaya ng pagkabuhayan para sa mga taong
apektado nito.
3
PUP-CA-Department of Sociology and Anthroplogy Extension and Community Services Committee 2010
Ano ang HIV?
Ang AIDS o Acquired Immuno-deficiency
syndrome ay sanhi ng HIV o Human
Immunodeficiency Virus. Ito ay maliliit na
mga organismo na kapag nakapasok sa
katawan ng tao ay magdudulot ng unti-unting
panghihina ng katawan, partikular ang
resistensya/depensa ng katawan (immune
system) laban sa sakit, na maaaring
humantong sa kamatayan. Mangyari ay
inaatake at sinisira ng mga HIV ang mga
Lymphocytes o T-helper cells (T4), isang uri
ng white blood cell (leukocytes), na syang
dapat sumisira sa mga bacteria at virus na
pumapasok sa katawan (Hyde & DeLamenter,
2000, p. 530). Ang mga white blood cells o
leukocytes ay pangunahing depensa ng
katawan laban sa mga sakit. Kinakain nila ang
mga bacteria, virus at iba pang
microorganisms, o kung hindi naman ay
sinisira nila ang porma ng mga ito sa
pamamagitan ng paglalabas ng mga enzyme.
Dahil sa pagbaba ng bilang ng mga
leukocytes, partikular ang lymphocytes, sa
katawan ng biktima ng HIV, ang mga bacteria
at iba pang organismo na dapat sana ay hindi
nakakapanatili sa katawan ng tao ay
dumarami, sanhi para maging sakitin ang
taong may HIV. Ayon nga sa Philippines'
Health Guide (1996, p. 148), maski ang mga
simpleng sakit na kayang kaya naman ng
immune system kung tutuusin ay pwedeng
humantong sa malalang komplikasyon. Ilan sa
mga komplikasyon na maaaring danasin ng
isang biktima ng HIV/AIDS ay Kaposis
Sarcoma, ibat-ibang uri ng cancer,
tubercolosis, at matinding diarrhea.
Ang HIV ay may dalawang strain, o uri.
Ang HIV-2 ang syang kadalasang
natatagpuang strain sa mga biktima ng HIV sa
Africa (kung saan matatagpuan ang 70% ng
mga taong may HIV/AIDS sa buong mundo,
http://www.aidsinafrica.net/map. php).
Samantalang HIV-1 strain naman ang
kadalasang matatagpuan sa mga HIV/AIDS
victim sa Amerika (Hyde & Delameter, 2000,
p. 527).
Isa sa mga dahilan kung bakit
hanggang ngayon ay wala paring gamot sa
HIV/AIDS ay dahil sa ang mismong virus ay
nagpapalit-palit ng anyo, at kadalasang
nagtatago sa mga parte ng katawan na hindi
naaabot ng mga gamot na ARV
(antiretroviral), gaya ng utak at spinal cord
(Hyde & Delamater, 2000, p. 536; http://ww
w.sciencedaily.com/releases/2010/08/1008230
80816.htm).
Dahil dito, ang pinakamabisa parin na
dapat gawin ng isang taong ayaw magkaroon
ng HIV/AIDs ay iwasan ang mga gawaing
may mataas na tyansa ng pagsalin ng HIV sa
kapwa tao.
Mga Moda ng Transmisyon
Ang HIV ay nasasalin sa kapwa tao sa
mga sumusunod na paraan:
1. Pakikipagtalik ng walang proteksyon
(i.e. gamit na condom), vaginal, oral, o
anal man (Hyde & Delameter, 2000, p.
528). Kalimitan itong naisasalin sa
pamamagitan ng semen ng lalaki at
vaginal mucus ng babae.
2. Pagtangap ng dugo mula sa taong
mayHIV/AIDS (ibid).
3. Pagamit ng parehong karayom lalong-
lalo na sa mga nagtuturok ng
ipinagbabawal na gamot (ibid).
4. Pagsalin ng HIV mula sa ina patungo sa
anak gawa ng panganganak (ibid) at
4
pagpapasuso (Bryjak & Soroka, 2001,
p. 279).
5. Paggamit ng mga hindi malilinis na
PUP-CA-Department of Sociology and Anthroplogy Extension and Community Services Committee 2010
karayom, patalim, o kahit anong bagay
na pwedeng ipasok sa balat, lalong-lalo
na kapag nagpapatattoo o
nagpapabody-piercing (UNAIDS,
2008, p. 2).
Mas mataas ang tyansa ng pagsalin ng
HIV sa mga bakla at bisekswal kaysa
heterosekswal na pakikipagtalik (Hyde &
Delameter, 2000). Isa sa mga paliwanag dito
ay dahil sa ang semen ng mga lalaki ay mas
madaling naipapasa sa katalik kaysa vaginal
mucus ng mga babae. Mas mataas din ang
tyansa na maisalin ang HIV sa mga hindi tuli.
Gayun pa man, sa pangkalahatan, ang
pakikipagtalik ng walang proteksyon (i.e.
condom) o pakikipagtalik sa ibat-ibang
kapareho ay parehas na may mataas na
probabilidad ng pagsalin ng HIV sa ibang tao.
Ayon nga kay Hyde at Delameter (2000, p.
544), ang pagkakaroon ng ibat-ibang katalik
ay nagpapahamak sa isang tao na makatalik
din ang iba pang mga taong may ibat-iba ring
katalik.
Ang HIV/AIDS ay hindi naisasalin sa…
Ayon sa Philippines’ Health Guide (1996,
p. 148), ang HIV ay hindi naisasalin sa mga
sumusunod na gawain:
1. Pakikipaghalikan
2. Pakikipaghawakan
3. Pagbahing o pagsinga
4. Pagdodonate ng dugo (hindi ang
pagtanggap nito)
5. Kagat ng lamok o ng insekto
6. Pakikihati sa kutsara, tinidor, at baso ng
may HIV/AIDS
7. Pagamit ng mga pampublikong
palikuran
8. Paliligo sa pampubikong swimming
pool
 9. Pakikipaglaro (sports) sa mga taong
may HIV/AIDS
Kailan nagiging AIDS ang isang HIV
infection?
Ayon sa Center for Disease Control ng
US noong 1986, ang mga taong biktima ng
HIV ay pwedeng mauri sa apat na klase (Hyde
& Delameter, 2000, p. 531):
1. Mga taong bago pa lamang nahawa,
kung saan ang kanilang mga katawan
ay gumagawa ng mga antibodies laban
sa HIV dalawa hanggang walong
linggo pagkatapos na mahawa.
Kadalasan, ang sakit ay wala pang
sintomas o manipestasyon.
2. Asymptomatic carrier state, kung saan
ang katawan ng taong apektado ng HIV
ay hindi nagpapakita ng sintomas ng
inpeksyon. Kadalasan itong tumatagal
ng mula pito hanggang siyam na taon.
3. Lymphadenopathy. Ito ay kakikitaan ng
mas seryosong kondisyon kumpara sa
mga naunang uri, kung saan ang mga
lymph nodes o kulani ay namamaga,
pagpapawis tuwing gabi, lagnat,
pagkasira ng tyan at pagtatae,
pangangayayat, at panghihina.
4. AIDS, kung saan ang tao ay kakikitaan
na ng mga sintomas ng mga
nakamamatay na sakit gaya ng cancer,
tuberculosis, herpes, HPV (human
papillona virus), candida, Kaposi’s
Sarcoma, cervical cancer at iba pang
mga cervical diseases (para sa mga
babae), Penumocystis Carinii
Pneumonia, at problema sa pagiisip.
Sa makatuwid, hindi lahat ng may HIV ay
may AIDS. Ang isang biktima ng HIV ay
magkakaroon ng AIDS kapag ang resistensya
nya ay napakahina na na nagiging sanhi para
ang mga oportunistang sakit ay magdomina sa
sistema ng katawan.
Ang normal na bilang ng T4 cells o
lymphocytes sa kada cubic millimeters ng
dugo ng tao ay mahigit-kumulang 1000.
Kapag ito ay bumaba sa 200, ang depensa ng
katawan ng tao laban sa sakit ay humihina at
lumalaki ang probabilidad na ang ibat-ibang
sakit na nasa paligid lamang ng biktima ay
sabay-sabay na makapasok sa katawan at
magdulot ng ibat-ibang karamdaman, na
maaaring humantong sa kamatayan. Sa
5
ngayon, ang T4 count na 200 ay itinuturing
nang indikasyon na ang biktima ay may AIDS
(Hyde & DeLamenter, 2000, p. 531).
PUP-CA-Department of Sociology and Anthroplogy Extension and Community Services Committee 2010
Gamot para sa HIV/AIDS?
May mga nadevelop na ARV
(antiretroviral) drugs gaya ng mga protease
inhibitors na nagpapabagal sa pagdami ng
HIV sa katawan, pero bukod sa mahal ang
medikasyon at mga gamot para sa HIV/AIDS
at mahirap makita sa mga botika at ospital,
nananatiling WALANG LUNAS ang sakit na
HIV infection at AIDS. Katulad nga ng nasabi
na kanina, ang HIV ay nagbabago ng anyo at
nagtatago sa mga sensitibong parte ng
katawan gaya ng utak, mata, at bayag na
mahirap maabot ng epekto ng gamot (Bryjak
& Soroka, 2001, p. 281; Hyde & Delameter,
2000, pp. 532, 536). Dahil dito, ang sino mang
tao na dumaraan sa gamutang ARV, bagamat
napapababa nito ang bilang ng HIV sa
katawan, ay hindi parin dapat ituring na wala
nang HIV/AIDS sa katawan. Siya ay may
tyansa pa rin na makahawa ng HIV sa
pamamagitan ng mga nabanggit na gawi sa
itaas.
Mga Gawi upang Maiwasan ang HIV at iba
pang STD
Ayon kina Hyde at Delameter (2000, p.
546), ang mga sumusunod na gawain ay may
mataas na probabilidad na makapagiiwas sa
isang tao na mahawaan ng STD (Sexually
Transmitted Disease, kabilang rito ang
HIV/AIDS):
1. Paglimita sa sarili sa isa o limitadong
bilang ng mga katalik na walang STD.
2. Hindi pakikipagtalik.
3. Paggamit ng condom sa pakikipagtalik.
4. Paghuhugas ng ari bago ang
pakikipagtalik para maalis sa balat ang
mga bacteria at viruses.
5. Pagsusuri sa ari ng [mga] katalik.
Kapag nakakita ng mga “kakaibang”
 sugat, kulugo o nana, agad na magbihis
at umalis o simulan agad na kausapin
ang kapareha tungkol sa STD.
6. Hindi dahil sa walang sugat, kulugo, o
nana ang ari ng kapareha ay wala na
itong sakit. Marami ring klase ng STD
ang hindi nagpapakita ng external na
sintomas.
7. Ang pagihi bago ang, at pagkatapos ng,
pakikipagtalik ay nakatutulong para
maalis ang mga bacteria sa urethra
(daluyan rin ng semen sa lalaki).
8. Responsibilidad ng bawat isa, lalong
lalo na ang mga aktibo sa
pakikipagtalik sa maraming kapareha,
ang regular na pagpapakonsulta sa
doktor. At kung saka-sakaling
napagalaman nga na ikaw ay may STD,
responsibilidad mo na sabihin sa katalik
at naging mga katalik ang iyong
medikal na kondisyon.
Bukod sa mga nakasulat na sa itaas, ang
mga tao ay ginaganyak rin na (Philippines’
Health Guide, 1996, p. 148):
1. Umiwas sa pakikipagtalik sa mga
prostitute o “pokpok”, mga “kakilala”,
at mga drug addict.
2. Huwag manghiram ng mga hypodermic
needles (mga karayom na itinutusok sa
balat kapag nagiinjection ng gamot),
toothbrush, at pangahit.
3. Ipagpilitan ang paggamit ng mga
disposable (naitatapon pagkatapos
gamitin) na gamit kapag daraan sa
operasyon (kasama ang sa ipin),
acupuncture, body piercing, o
pagpapabutas ng tenga, o kung hindi
man ay siguraduhing ang mga gamit ay
naesterilized (i.e. nalinis ng mabuti at
napakuluan) bago gamitin ng doktor,
nurse, nagtatato, o nagbubutas ng
tenga.
4. Kung daraan sa isang mabigat na
operasyon, pinapayuhang magdonate
ka ng dugo bago ang operasyon bilang
reserbang dugo para iyong magamit
kung sakasakaling kailanganin ng
iyong katawan na salinan ng dugo
(autologous blood transfusion).
Dagdag pa ng WHO (2009, p. 2), ang
“pakikipagtalik” ng hindi ipinapasok ang ari
6
ng lalaki sa vagina, puwet, o bibig ng
kapareha (i.e. orgasm o pagsasalsal) ay
nakatutulong upang maiwasan ang pagsalin ng
PUP-CA-Department of Sociology and Anthroplogy Extension and Community Services Committee 2010
HIV/AIDS sa kapareha. Paalala rin ng WHO,
bagamat ang pagpapatuli ay hindi dapat
gawing kapalit ng iba pang mga pamamaraan
sa pagiwas ng HIV/AIDS, dapat parin itong
isama bilang parte ng isang komprehensibong
programa sa pagiwas sa HIV/AIDS. Ang
pakikipagtalik sa wastong gulang at panahon
ay nakatutulong din upang maiwasan ang
pagkahawa sa HIV/AIDS (UNAIDS, 2008, p.
1). Dagdag din ng WHO (2009, p. 2), bagamat
ang paggamit ng condom ay may mataas na
probabilidad na ikaw o ang iyong katalik ay
hindi mahahawa ng HIV/AIDS, wala paring
tatalo sa abstinence (hindi pakikipagtalik)
bilang epektibong paraan sa pagiwas sa
HIV/AIDS (ito ay 100% epektibo).
Ayon sa UNAIDS (2008, p. 3), ang mga
sumusunod ding gawi ay nakatutulong upang
maiwasan ang pagsalin ng HIV sa iba pang
tao.
1. Caesarian section imbis na normal
delivery sa panganganak.
2. Pagpapagamot sa tulong ng mga ARV
drugs.
3. Hindi pagpapasuso sa anak at paglipat
sa mga replacement feeding [gaya ng
formulated milk o mga gatas pambata
na nabibili sa botika at groceries],
maliban nalang kung hindi
rekomendado ng doktor.
4. Paginom ng gamot sa bibig, hindi ang
pagturok nito sa katawan.
5. Hindi paghati sa paggamit ng injection
(syringe), karayom, at gamot sa ibang
tao.
6. Paggamit ng bagong injection
(syringe).
7. Pagpahid ng alkohol sa balat na
tuturukan bago iinject ang gamot.
8. Pagtapon ng mga gamit nang karayom,
syringe, kutsilyo, blade, [mga gamit
 pangospital at hospital waste], at basag
na salamin sa tamang tapunan.
9. Pagtapon ng mga kontaminadong dugo
at iba pang likido ng katawan sa
tamang tapunan.
10. Paglilinis at pagdidisinfect ng mga
gamit [pangmedikal at yung mga
nabahiran ng dugo, dumi ng tao, at iba
pang likido ng katawan], kasama ang
mga kobrekama at damit.
Para sa Suporta at Karagdagang Kaalaman…
Para sa mga taong may STD na
naghahanap ng suporta, o mga interesado na
pagaralan pa ang paksa at ibahagi ang
napagalaman sa kapwa nila, maaaring
pumunta sa mga address sa ibaba, tawagan
ang mga numero, magemail, o bisitahin ang
website ng mga organisasyong nagnanais na
makatulong sa mga taong biktima ng
HIV/AIDS at STD.
Community Based AIDS Prevention and Care
in Sex Trade
2nd floor Marina Apt. 1602 DM Adriatico
Manila
Tel: 536-02-03
Dial-A-Friend
Tel: 525-1743 and 525-1881
Monday to Friday 9:00 am to 6:00 pm
http://www.teenfad.ph/dialafriend.php
DOH AIDS/STD Unit
San Lazaro Compound, Sta. Cruz
Manila
Tel: 743-83-01 loc. 2254, 2256 or 2257
http://www.doh.gov.ph/
Health Action Information Network (HAIN)
9 Cabanatuan Road, Philam Homes 1104
Quezon City
Tel: 929-8805 ; 927-6760
http://www.hain.org/
Email: hain@mnl.sequel.net
Kabalikat ng Pamilyang Pilipino Inc.
(KABALIKAT)
93 Cambridge St. Cubao 1109 Quezon
City, MM
Tel: 437-3038, 438-0171
Open from Monday to Saturday 8am to
6pm
7
Pinoy Plus Bahay Lingap HIV + Center Home
San Lazaro Hospital Compound,
PUP-CA-Department of Sociology and Anthroplogy Extension and Community Services Committee 2010
Quiricada St., Sta. Cruz, Mla.
Tel: 732-3776 to 78 loc. 401-402
Email : nenetgem@pacific.net.ph
Reachout International
216 Moriones St. Tondo, Manila near
Pier 10
Tel: 525-5845/47
Open from 9am - 7pm
Remedios AIDS Foundation
1066 Remedios St., Malate, 1004 Manila
Tel:524-0924, 524-4831
Monday to Saturday (10:00am-10:00pm)
http://www.remedios.com.ph/
Email: reme1066@pldtdsl.net
Pinagsangunian:
Bryjak, G. J. and Soroka, M. P. (2001).
Sociology: Changing Societies in a Diverse
World, 4th ed., MA: Allyn & Bacon
Hyde, J. S. and Delamater, J. D. (2000).
Understanding Human Sexuality, 7th ed., MA:
Mc Graw-Hill Companies, Inc.
Mooney, L. A., Knox, D. & Schacht, C.
(2005). Understanding Social Problems, 4th
ed., CA: Wadsworth
Philippines' Health Guide (2nd ed.). (1996).
Makati: MediMedia Asia Pte Ltd
United Nations Programme on HIV/AIDS
[UNAIDS] (2008, April). Fast facts about
HIV prevention. Retrieved October 25, 2010
from
http://www.pnac.org.ph/uploads/documents/p
ublications/Fast%20Facts%20about%20HIV%
20Prevention%20-%20UNAIDS%202008.pdf

United Nations Programme on HIV/AIDS

[UNAIDS] /World Health Organization
8
[WHO] Working Group on Global HIV/AIDS
and STI Surveillance (2008, December).
Epidemiological Fact Sheet on HIV and AIDS:

PUP-CA-Department of Sociology and Anthroplogy Extension and Community Services Committee 2010
Core data on epidemiology and response of
the Philippines 2008 Update, Switzerland:
UNAIDS/WHO/Unicef. Retrieved October
25, 2010 from
http://apps.who.int/globalatlas/predefinedRepo
rts/EFS2008/full/EFS2008_PH.pdf

World Health Organization [WHO] (2009,

November). HIV/AIDS Online Q & A. WHO.
Retrieved October 25, 2010 from
http://www.pnac.org.ph/uploads/documents/p
ublications/WHO%20-%20HIV%20Info.pdf

http://www.accessexcellence.org/aids/

http://www.aidsinafrica.net/map.php

http://www.avert.org/worldstats.htm

http://www.remedios.com.ph/fhtml/philstat_hi
vaids.htm

http://www.sciencedaily.com/releases/2010/08
/100823080816.htm