Gadyet, sa literal nitong kahulugan, ito ay isang maliit na gamit pang
teknolohiya. Ito ay isang bagay na maraming naitutulong at madaling
gamitin. Ngunit, sa kabila ng mga pakinabang nito, mayroon din itong mga hindi magandang maidudulot sa atin. Sa maikling pelikulang pinamagatang, “Disconnected,” ipinakita rito ang tungkulin ng mga gadyet sa pang araw-araw na pamumuhay ng iba’t-ibang klase ng tao. Mapa-bata man o matanda sa panahon ngayon ay gumagamit na ng mga gadyet. Hindi na nakakabigla ang ganitong sitwasyon sapagkat ito ay parati na lamang nating naoobserbahan. Tipikal na sa pagkagising pa lang ng tao ang unang hinahanap ay “cellphone.” Hindi na rin natin kayang umalis ng hindi dala ang ating mga gadyet. Saan man tayo magpunta, mapa-banyo man, sa hapag-kainan, at maging sa simbahan ay dala natin ito. Sanay man tayong nasusulyapan ang ganitong problema, hindi pa rin mapagkakailang ito ay nakakalungkot isipin. Nang dahil sa mga gadyet, hindi na natin nabibigyan ng oras ang ating pamilya. Maraming tayong oras na nagagamit at nasasayang dahil lamang sa paggamit ng mga teknolohiyang ito. Nakakatawa na lamang na realidad na ang mga bagay na ginagamit natin upang makonekta tayo sa isa’t-isa ay sila rin ang dahilan upang tayo ay magkalayo-layo. Hindi natin namamalayan na tayo ay nakaposas na sa ating mga maliliit na teknolohiya.