O Maria, tanglaw mo’y di nagmamaliw sa aming paglalakbay bilang tanda ng aming kaligtasan at pag-asa. Ipinagkakatiwala namin ang aming mga sarili sa iyo, Kagalingan ng Maysakit, na sa Krus ay naging malapit sa pagpapakasakit ni Kristo, na siyang nagpatibay sa iyong pananampalataya. Ikaw, Kaligtasan ng mga Romano, ay nakababatid ng aming mga pangangailangan, at nanalig kaming tutugunan mo itong aming mga kinakailangan upang, tulad ng sa Cana ng Galilea, manumbalik ang kasiyahan at pagdiriwang matapos ang sandali ng pagsubok na ito. Tulungan mo kami, Ina ng Banal na Pag-ibig, nang maiayon namin ang aming sarili sa kalooban ng Ama at maisakatuparan ang utos ni Jesus, na Siyang kusang nagpakasakit, at umako sa aming hapis, upang akayin kami, sa pamamagitan ng Krus, tungo sa Muling Pagkabuhay. Amen. Dumudulog kami sa iyong pagkalinga, O Mahal na Ina ng Diyos. Huwag mong siphayuin ang aming pagluhog — kaming nasa gitna ng pagsubok — at ipag- adya mo kami sa lahat ng kapahamakan, O maluwalhati at pinagpalang Birhen.