PANALANGIN SA STO NINO JESUS

Panginoong Hesus, Señor Santo Niño,

aming Diyos at Tagapagligtas,

pinili Mong magpakumbaba at magkatawang-tao

upang kami'y bigyan ng kaligtasan.

Turuan Mo po kaming maging katulad mo

sa lahat ng bagay upang kami nawa

ay humantong sa pangako Mong paraiso.

Gawin Mo po na ang aming mga puso

ay mapuspos ng Iyong espiritu upang

gaya ng mga batang kinalugdan Mo sa Ebanghelyo,

kami ay maging payak, mapayapa,

mapagpatawad, mapagkumbaba

at masunurin sa kalooban ng Ama sa langit.

Isinusuko po namin sa Iyo ang aming buhay at pagkatao.

Patawarin Mo po kami sa aming mga kahinaan at pagkukulang.

Gamitin Mo po kaming mga instrumento Mo

sa pagpapalaganap ng Iyong kaharian dito sa lupa.

PANALANGIN SA STO. NIÑO JESUS

O, Banal na Sanggol,

Diyos na Makapangyarihan

at bukal ng mga biyaya,

kami ay naninikluhod sa Iyong harapan.

Buong puso kaming sumasamba

at nagsisisi sa aming mga kasalanan.

Iniaalay namin sa Iyo ang aming sarili.

Itulot Mo na kami ay matulad sa Iyong Kabanalan.

Gawin Mo kaming maamo, mababa ang loob,

matiisin, malinis, maunawain sa kapwa

at masunurin sa kalooban Mo.

Hinihiling namin ito

sa pamamagitan Mo,

kasama ng Ama at ng Espiritu Santo

magpasawalang hanggan.

Amen!

O, Banal na Sanggol, kaawaan mo po kami!