paggamit ng wika sa nabasang pahayag mula sa mga blog, social media posts at iba pa (F11PB – IIa – 96 ) FLIPTOP Pagtatalong oral na isinasagawa nang pa- rap. Nahahawig sa balagtasan dahil ang bersong nira-rap ay magkakatugma bagamat sa fliptop ay hindi nakalahad o walang malinaw na paksang pagtatalunan. Kung ano ang paksang sisimulan ng unang kalahok ay siyang sasagutin ng katunggali. Gumagamit ng di pormal na wika at walang nasusulat na iskrip kaya karaniwang ang mga salitang binabato ay balbal at impormal. Pangkaraniwan ang paggamit ng mga salitang nanlalait para mas makapuntos sa kalaban. Laganap sa mga kabataan na sumasali sa mga malalaking samahan na nagsasagawa ng kompetisyon na tinatawag na “Battle League”. Bawat kompetisyon ay kinata-tampukan ng dalawang kalahok sa tatlong round at ang panalo ay dinedesisyunan ng mga hurado. Ito ay isinasagawa din sa wikang Ingles subalit ang karamihan ay sa wikang Ingles lalo na sa tinatawag nilang Filipino Conference Battle. Sa ngayon maraming paaralan na ang nagsasagawa ng fliptop lalo na sa paggunita sa Buwan ng Wika. PICK-UP LINES Itinuturing na makabagong bugtong kung saan may tanong na sinasagot ng isang bagay na madalas naiuugnay sa pag-ibig at iba pang aspekto ng buhay. Sinasabing nagmula ito sa bulalas ng mga binatang nanliligaw na nagnanais magpapansin, magpakilig, magpangiti at magpa-ibig sa babaeng nililigawan nito. Kung may mga salitang makapaglalarawan sa mga pick-up lines masasabing ito ay nakakatuwa, nakapagpapangiti, nakakakilig, cute, cheesy at masasabi ring corny. Madalas na marinig sa mga kabataang magkakaibigan at nagkakaibigan. Nakikita din ito sa mga facebook wall, Twitter at iba pang social networking sites. Ang wikang ginagamit dito ay karaniwan Filipino subalit may pagkakataon na nagagamit din ang Ingles o Taglish dahil mga kabataan ang kadalasang nagpapalitan ng mga ito. Kailangang ang taong nagbibigay ng pick up line ay mabilis mag-isip at malikhain para sa ilang sandali lang ay maiugnay o mai-konekta ang kanyang tanong sa isang nakapagpapakilig na sagot. HUGOT LINES Tawag sa mga linya ng pag-ibig na nakakakilig, nakatutuwa, cute, cheesy o minsa’y nakakainis. Tinatawag ding love lines o love quotes na nagpapatunay na ang wika nga ay malikhain. Karaniwang nagmula sa linya ng ilang tauhan sa pelikula o telebisyon na nagmarka sa puso’t isipan ng mga manonood. May mga pagkakataon na nakakagawa rin ang isang tao ng hugot line depende sa damdamin o karanasang pinagdadaanan nila sa kasalukuyan. Minsan ay nakasulat sa Filipino subalit madalas ay Taglish o pinaghalong Filipino at Ingles ang gamit ng salita sa mga ito. SPOKEN WORD POETRY Ito ay isa sa mga tinatawag na “performance art” o pagtatanghal (ng sining). Ito ay isang pasalitang uri ng sining at nakapokus ito sa aestetiko o arte ng mga pyesa, mga pagbigkas ng salita, mga punto at boses. Ito ay nagkukwento o nagsasaad ng iba’t ibang mga istorya. Kung minsa’y malungkot at kung minsan naman ay nakapagpapatawa. BLOG Ito pinaikling salita na weblog, na tumutukoy sa mga akda o sulatin na karaniwang makikita sa internet. Ang uri ng sulatin na ito ay naglalayong magbigay ng impormasyon, argumento, salaysay o ng iba pang layunin na karaniwang makikita sa lahat ng uri ng akda o panitikan. Kadalasang lakbay sanaysay ang nilalaman ng mga blogs sa internet. LAKBAY SANAYSAY Isang uri ng sulatin kung saan ang may-akda ay nagbibigay ng paglalarawan ng kaniyang mga naranasan, gabay, o damdamin sa paglalakbay. Maaaring maging replektibo o impormatibo ang pagsulat ng isang lakbay sanaysay. Kadalasang ginagamit ang mga lakbay sanaysay sa mga travel blogs upang manghikayat sa mga taong maglakbay sa isang particular na lugar.