PAOMBONG HIGH SCHOOL, INC.

School Year 2022-2023

LEARNING ACTIVITY SHEETS
EDUKASYON SA PAGPAPAKATAO 10

Bb. Niña Daquiz Dionisio

Guro

Aralin 9: Pagmamahal sa Diyos

Ika-22 na Linggo
Petsa: Enero 30 – Pebrero 3, 2022

Inaasahang Kasanayan:

1. Napangangatwiranan na: Ang pagmamahal sa Diyos ay pagmamahal sa kapwa

2. Nakagagawa ng angkop na kilos upang mapaunlad ang pagmamahal sa Diyos

Basahing mabuti ang mga sumusunod na paalala:

a) Unawaing mabuti ang bawat detalye na nakasaad sa araling ito.
b) Gamitin ang oras nang wasto at kapaki-pakinabang sa pagsagot at pagtuklas ng kaalaman.
c) Panatilihing malinis at maayos ang sagutang papel na kalakip ng aralin.
d) Maging tapat at totoo sa pagsagot ng mga gawain.
e) Gamitin bilang gabay ang mga sumusunod na icons:

Ang icon na ito ay tanda na ang kasunod na bahagi ng aralin ay naglalaman ng mga
paalala o di kaya ay mga impormasyon na dapat mong tandaan.

Ang icon na ito ay tanda na ang kasunod na bahagi ng aralin ay naglalaman ng mahahalagang
impormasyon na kailangan mong basahin at pag-aralan upang higit na maunaawan
ang paksang tinatalakay.

Ang icon na ito ay inilagay sa mga bahagi ng aralin na kailangang sagutan bilang
bahagi ng pagsasanay.

Sa araling ito ay mapangangatwiranan na ang pagmamahal sa Diyos ay pagmamahal sa kapwa.

Inaasahan ding makagagawa ka ng angkop na kilos upang mapaunlad ang pagmamahal ng Diyos. May
kalakip itong gawain upang higit na maintindihan ang mga aralin.

LAS – Edukasyon sa Pagpapakatao 10 Pahina 1 ng 4

 PAOMBONG HIGH SCHOOL, INC.
School Year 2022-2023
Simulan natin ang aralin!
Ang pagmamahal ng Diyos ang sentro ng pananampalataya ng bawat tao. Upang maunawaan ang
pagmamahal na ito at magkaroon ng kakayahang magmahal sa kapwa, mahalagang magkaroon ng matalik na
pakikipag-ugnayan sa Diyos.

Narito ang mga mahahalagang impormasyon tungkol sa aralin na kailangan mong malaman.

Ugnayan sa Diyos at Pagmamahal sa Kapwa

Sa pagmamahal, binubuo ang isang maganda at malalim na ugnayan sa taong iyong minamahal. Sa
ugnayang ito, nagkakaroon ng pagkakataon ang dalawang tao na magkausap, magkita, at magkakilala. Ito ay
nagsisimula sa simpleng palitan ng usapan at maaaring lumalim kung patuloy ang kanilang ugnayan. Mas
nagiging maganda at makabuluhan ang ugnayan kung may kasama itong pagmamahal.
Mula sa pagmamahal ay nagbabahagi ang tao ng kaniyang sarili sa iba. Naipakikita niya ang kaniyang
pagiging kapuwa. Sa oras na magawa ito ng tao, masasalamin sa kaniya ang pagmamahal niya sa Diyos dahil
naibabahagi niya ang kaniyang buong pagkatao, talino, yaman, at oras nang buong-buo at walang pasubali.
Ito ang makapagbibigay ng kahulugan sa kaniyang buhay. Ito rin ang makasasagot ng dahilan ng kaniyang
pag-iral sa mundong ito.

Espiritwalidad at Pananampalataya: Daan sa pakikipag-ugnayan sa Diyos at Kapwa

Ang tao ang pinaka-espesyal sa lahat ng nilikha dahil hindi lamang katawan ang ibinigay sa kaniya ng
Diyos kundi pinagkalooban din siya ng espiritu na nagpapabukod-tangi at nagpapakawangis sa kaniya sa
Diyos. Ngunit ang nagpapakatao sa tao ay ang kaniyang espiritu na kinaroroonan ng persona. Ang persona,
ayon kay Scheler ay, “ang pagka-ako” ng bawat tao na nagpapabukod-tangi sa kaniya. Kaya’t ang
espiritwalidad ng tao ay galing sa kaniyang pagkatao. Ito ay lalong lumalalim kung isinasabuhay niya ang
kaniyang pagiging kalarawan ng Diyos at kung paano niya minamahal ang kanyang kapuwa. Kaya’t ang tunay
na diwa ng espiritwalidad ay ang pagkakaroon ng mabuting ugnayan sa kapuwa at ang pagtugon sa tawag ng
Diyos na may kasamang kapayapaan at kapanatagan sa kalooban. Ang espiritwalidad ay nagkakaroon ng
diwa kung ang espiritu ng tao ay sumasalamin sa kaibuturan ng kaniyang buhay kasama - ang kaniyang kilos,
damdamin, at kaisipan. Kaya’t anuman ang relihiyon ng isang tao, ang espiritwalidad ang pinakarurok na punto
kung saan niya nakakatagpo ang Diyos.
Ang tao ay naghahanap ng kahulugan ng kaniyang buhay. Mula sa kaniyang pagtatanong kung bakit
siya umiiral. Sa harap ng mga pagsubok o problema na kaniyang pinagdaraanan, marahil nagtatanong ang tao
kung may Diyos bang makapagbibigay ng kasagutan sa kaniyang mga pagtatanong. Dito kailangan niya ang
pananampalataya. Ang pananampalataya ay ang personal na ugnayan ng tao sa Diyos. Isa itong malayang
pasiya na alamin at tanggapin ang katotohanan ng presensiya ng Diyos sa kaniyang buhay at sa pagkatao
niya. Isa itong biyaya na maaaring malaya niyang tanggapin o tanggihan. Sa pananampalataya, naniniwala at
umaasa ang tao sa mga bagay na hindi nakikita. Sa aklat ng Hebreo sinasabi na, “Ang pananampalataya ang
siyang kapanatagan sa mga bagay na inaasam, ang kasiguruhan sa mga bagay na hindi nakikita.” (Hebreo
11:1) Ibig sabihin, nagiging panatag ang tao dahil siya ay naniniwala at nagtitiwala sa Diyos kahit pa hindi niya
ito nakikita at mula rito, nararanasan niya ang kapanatagan, ang tunay na kaginhawahan at kaligayahan.

Marahil ay handang handa ka na sa pagpapalalim at pagpapalawak ng ating aralin,

Halina’t magbasa at umunawa!

ARALIN 9: Ang Pagmamahal sa Diyos at Kapuwa ang Tunay na Pananampalataya

Ang pananampalataya ay dapat ding alagaan upang mapanatili ang ningas nito. Katulad ng dalawang
tao na nagmamahalan, kailangang alagaan nila ang kanilang ugnayan upang mapanatili ito. Naririto ang ilan
sa mga dapat gawin upang mapangalagaan ang ugnayan ng tao sa Diyos.
1. Panalangin – Ito ay paraan ng pakikipag-ugnayan ng tao sa Diyos. Sa pananalangin, ang tao ay
nakapagbibigay ng papuri, pasasalamat, paghingi ng tawad, at paghiling sa Kaniya. Kung hindi natutupad
ang hinihiling sa panalangin, huwag agad panghinaan ng pananampalataya dahil may dahilan ang Diyos
kung bakit hindi Niya ibinibigay ito sa tao. Maaaring hindi pa ito dapat mangyari, o di kaya’y maaaring
makasama ito sa taong humihiling.
2. Panahon ng Pananahimik o Pagninilay – Sa buhay ng tao, napakahalaga ang pananahimik. Ito ay
makatutulong upang ang tao ay makapag-isip at makapagnilay. Mula rito mauunawaan ng tao ang tunay
na mensahe ng Diyos sa kaniyang buhay. Makatutulong ito upang malaman ng tao kung ano ang
ginagawa niya sa kaniyang paglalakbay, kung saan siya patutungo.
3. Pagsisimba o Pagsamba – Anuman ang pinaniniwalaan ng tao, mahalaga ang pagsisimba o pagsamba
saan man siya kaanib na relihiyon. Ito ang makatutulong sa tao upang lalo pang lumawak ang kaniyang

LAS – Edukasyon sa Pagpapakatao 10 Pahina 2 ng 4

 PAOMBONG HIGH SCHOOL, INC.
School Year 2022-2023
kaalaman sa Salita ng Diyos at maibahagi ito sa pamamagitan ng pagsasabuhay ng kaalaman na napulot
sa pagsisimba/pagsamba.
4. Pag-aaral ng Salita ng Diyos – Upang lubos na makilala ng tao ang Diyos, nararapat na malaman ang
Kaniyang mga turo o aral. Tulad ng isang tao na nais makilala nang lubos ang taong kaniyang minamahal,
inaalam niya ang lahat ng impormasyon ukol dito. Hindi lubusang makikilala ng tao ang Diyos kung hindi
siya mag-aaral o magbabasa ng Banal na Kasulatan o Koran.
5. Pagmamahal sa Kapuwa – Hindi maaaring ihiwalay sa tao ang kaniyang ugnayan sa kapuwa. Ito ang
isang dahilan ng pag-iral ng tao, ang mamuhay kasama ang kapuwa. Hindi masasabi na maganda ang
ugnayan ng tao sa Diyos kung hindi maganda ang ugnayan niya sa kaniyang kapuwa. Mahalagang
maipakita ng tao ang paglilingkod sa kaniyang kapuwa.
6. Pagbabasa ng mga aklat tungkol sa espiritwalidad – Malaki ang naitutulong ng pagbabasa ng mga
babasahin na may kinalaman sa espiritwalidad. Ito ay nakatutulong sa paglago at pagpapalalim ng
pananampalataya ng isang tao.
Gawain Blg 1: Minitask 2: Mahal ko ang Diyos

Matapos mong basahin at unawain ang mga mahahalagang impormasyon tungkol sa aralin,
tumungo sa paggawa ng Gawain Blg 1: Minitask 2: Mahal ko ang Diyos sa pahina 4.

Sa bahaging ito ay naunawaan mo na ang mga aralin at natapos ang mga kalakip na
gawain. Isang masayang pagbati!

Talasanggunian:
• https://www.slideshare.net/daniholic/esp-grade-10-learners-module
• Punsalan, Twila G., Caberio, Sylvia C., Nicolas, Myra Villa D., & Reyes, Wilma S. Paano Magpakatao Batayan at
Sanayang Aklat sa Edukasyon sa Pagpapakatao 10 2019 REX Book Store, Inc.
• DepEd Modyul Edukasyon sa Pagpapakatao 10

LAS – Edukasyon sa Pagpapakatao 10 Pahina 3 ng 4

 PAOMBONG HIGH SCHOOL, INC.
School Year 2022-2023
LEARNING ACTIVITY SHEETS
EDUKASYON SA PAGPAPAKATAO GRADE 10

Pangalan: _______________________________ Baitang & Pangkat: _____________

Ika-22 na Linggo Petsa: Enero 30 – Pebrero 3, 2022
Gawain Blg 1: Minitask 1: Mahal ko ang Diyos
Panuto: Gumawa ng isang plano kung paano maipakikita ang pagmamahal sa Diyos. Ang plano ay dapat na
naglalaman ng mga angkop na kilos na makakatulong upang mapaunlad ang pagmamahal sa Diyos.

Mahal ko ang Diyos kaya..

Pagninilay: Pangatwiranan na ang pagmamahal sa Diyos ay pagmamahal sa kapwa.

LAS – Edukasyon sa Pagpapakatao 10 Pahina 4 ng 4