Maraming nagsasabi na libre lang raw ang mangarap. Kaya
nga kung mangangarap ka, itodo mo na. Tiyak na may mga pangarap ka sa buhay. Ang mga pangarap na ito ay sinisimulan mo nang tuparin. Ang pangarap ay kakaiba sa panaginip. Ang panaginip ay nangyayari lamang sa iyong isipan habang ikaw ay natutulog. Kapag nagising ka na, natatapos din ito. Hindi rin pagpapantasya ang pangarap. Ang pantasya ay likha ng malikhaing isip. Ito ay ang pagbuo ng mga sitwasyon o pangyayari ayon sa iyong kagustuhan. Ang pagpapantasya ay ginagamit ng marami upang takasan ang kanilang mga problema. Lumilipas ang panahon kaya dapat kung mayroon kang pangarap ngayon, umpisahan mo nang magplano upang maisakatuparan ito. Tandaan mo na ang taong may pangarap ay: 1. Handang kumilos upang maabot ito 2. Nadarama ang higit na pagnanasa tungo sa pangarap- Hindi siya nagdududa na matutupad niya ang mga ito. Maging positibo sa buhay. 3. Nadarama ang pangangailangang makuha ang mga pangarap 4. Naniniwala na magiging totoo ang mga pangarap at kaya niyang gawing totoo ang mga ito Bilang tao ang katuparan ng ating pangarap ay nakatali sa ating pinipiling bokasyon. Nakasalalay dito ang pagtatamo ng tunay na kaligayahan. Ang bokasyon ay higit sa trabaho o propesyon o negosyo. Ang bokasyon ay kalagayan o gawain na naayon sa plano ng Diyos sa atin. Sabi nga ng iba, ito ang iyong “calling” sa buhay. Ang Pangarap at Pagtatakda ng Mithiin Sa ngayon, ang unang hakbang na kailangan mong gawin ay ang pagtukoy sa iyong mga pangarap at pagpapasya kung alin sa mga pangarap na ito ang, sabi nga ng After Image band, “itatanim sa puso” bilang iyong mga mithiin sa buhay. Ang “goal” o mithiin ay ang tunguhin o pakay na iyong nais na marating o puntahan sa hinaharap. Ang mithiin ang magbibigay ng direksyon sa iyong buhay. Ang pagkamit nito ang magbibigay ng saysay sa iyong buhay. Kaya mahalaga ang pagiging mapanagutan sa pagpili ng iyong mithiin. Ang mga Pamantayan sa Pagtatakda ng Mithiin Upang magkaroon ng higit na pag-unawa sa pagtatakda ng mithiin, alalahanin ang mga sumusunod na mga praktikal na pamantayan. Tiyak Nasusukat Naaabot Angkop Mabibigyan ng Sapat na Panahon May Angkop na Kilos Ang Pangmadalian at Pangmatagalang Mithiin
Hindi lamang sapat na itakda ang mithiin kundi dapat ito ay
itakda sa parehong hangganan: pangmadalian at pangmatagalan. Tandaan: Ang pangmadaliang mithiin (short-term goal) ay maaaring makamit sa loob ng isang araw, isang linggo, o ilang buwan lamang. Ang pangmatagalang mithiin (long-term goal) ay maaring makamit sa loob ng isang semestre, isang taon, limang taon o sampung taon. Mga Hakbang sa Pagtatakda ng Mithiin
Narito ang mga hakbang sa pagkamit ng itinakdang mithiin.
1. Isulat ang iyong itinakdang mithiin 2. Isulat ang takdang panahon ng pagtupad ng iyong mithiin 3. Isulat ang mga inaasahang kabutihang maidudulot mula sa itinakdang mithiin at sa paggawa ng plano para rito 4. Tukuyin ang mga maaaring maging balakid o hadlang sa pagtupad ng iyong mga mithiin 5. Isulat ang mga maaaring solusyon sa mga balakid o hadlang na natukoy