Hakbang Tungo sa Tagumpay

Magandang umaga sa lahat, binabati ko ang lahat para sa unang araw ng

pasukan. Magandang umaga rin sa ating kagalang-galang na punong guro na si

Gng. Brenda P. Maroleña. Tayo’y dapat magpasalamat dahil nabigyan tayo ng

pagkakataong makapag-aral at makatongtong ng Senior High School.

Para sa kapwa kong mag-aaral na bagong pasok palang sa grade 11, alam ko

nakakatamad pang pumasok dahil tayo’y bitin pa sa ating summer vacation, ngunit oras

na para ihanda ang ating mga sarili dahil unang araw na ng pasukan. Alam ko na ang

iba sa atin ay nahuli ng gising dahil nga unang araw palang ng klase, panahon na para

ating baguhin ang tradisyong ito at makipagkilala sa ating mga kaklase.

Ang unang araw na ito ay inilaan para makipag-usap kayo sa inyong mga

kaklase, makipaghalubilo sa pamamagitan ng pagpapakilala at pagkukwento ng iyong

mga karanasan sa naganap na bakasyon. Ang inyong mga guro ay may mga aktibidad

na ipapagawa ng sa ganun ay kayo’y maaliw sa unang araw ng iyong pagpasok.

Ayon sa aking kaalaman bawat isa sa atin ay may asignaturang kinaiinisan, sa

kadahilanang hindi natin ito maintindihan o matagal nating maintindihan ang mga

tinalakay sa asignaturang ito, ngunit ginagawa parin natin ang lahat upang makapasa.

Alam kong ang iba sa atin ay minsan tinatamad gawin ang mga ipinagagawa ng ating

guro, napipilitang magsumite ng mga proyekto na hindi lubusang ginandahan. Lalo na

pagdagsa na ang mga gawain na ipinagagawa kagaya ng mga takdang-aralin, proyekto

at may pagsusulit ka pa, napapaisip nalang tayo na ayoko na mag aral, nakakatamad

na. Ganyan talaga ang tungkulin ng isang mag-aaral ang gawin ang mga gawain na
ipinapagawa ng iyong guro. Kahit na mahirap ginagawa natin ang lahat ng ating

makakaya upang ito ay gumanda at maging maayos, upang makakuha ng mataas na

marka. Paraan din ito upang tayo’y matuto at maipakita sa ating guro ang ating mga

natutunan sa mga talakayang naganap, at isa din ito sa mga dahilan upang matuto

tayong maging responsible at maging independente.

Para sa mga grade 11 na mag-aaral nawa’y mag-aral kayo ng mabuti at wag

niyong sayangin ang pagkakataong makapag-aral. Balang araw, tayo din ang

makikinabang sa ating mga natututunan sa paaralan, magagamit natin ito sa pagkamit

ng ating mga mithiin sa buhay. Tayo’y matututo kung paano ang tamang pakikipag-

ugnayan sa kapwa at magiging produktibong mamamayan.

Normal lamang na ang isang mag-aaral ay maghihirap sa kanyang pag-aaral,

intindihin na lamang natin ito at tanggapin, dahil sa kabila ng lahat meron tayong

natutunan sa pang-araw-araw hindi tayo nagiging mangmang sa mga nangyayari sa

ating kapaligiran, hindi tayo basta-basta’t naapakan ng ating kapwa dahil sa

karunungang ating tinataglay.

Kung may gusto tayong abutin sa buhay dumadaan muna tayo sa paghihirap

bago ito mapagtagumpayan, kagaya nalang ng mithiin nating makapagtapos, hindi biro

ang mga pinagdadaanan ng isang estudyante, may mga panahon na umiiyak tayo dahil

napakaraming gawain ang kailangan nating gawin. Dapat nating hikayatin ang ating

mga sarili na kaya natin to para sa kinabukasan ko, kailangan nating magtiwala sa ating

mga sarili na kaya nating mapagtagumpayan ang isang bagay. Marami na tayong mga

karanasan sa pagiging isang estudyante, simula palang noong kinder tayo hanggang

grade 10, nalagpasan natin ang mga hamon sa ating pag-aaral at tayo ay nakatongtong
sa baitang ito. Kaya kahit anong hirap pa ang iyong dadanasin ngayong grade 11 wag

kayong mawalan ng pag-asa dahil dalawang baitang na lamang ang iyong kailangan na

mapagtagumpayan, maari kanang makapagtrabaho o di kaya’y magpatuloy sa

pagkokolehiyo.

Pasalamatan natin ang ating mga magulang dahil ginabayan at binigyan nila tayo

ng pagkakataong makapag-aral. Alam kong ang iba sa atin ay may kaalaman na kung

bakit pinag-aaral tayo ng ating mga magulang, tama ba?

Ayaw nila tayong mapariwara, gusto nilang maging maganda ang ating

kinabukasan, hindi tayo maghihirap ng husto sa buhay, at higit sa lahat lumaki tayong

may disiplina, hindi lang sa ating sarili kundi maging sa ating kapwa.

Ngunit may iba sa atin na binabalewala na lamang ang kanilang mga paghihirap,

nakukuha paring magloko, ni hindi inisip kung saan galing ang perang binibigay ng

kanilang mga magulang upang sila’y makapunta sa paaralan at mabigay ang kanilang

mga kinakailangan. Sa halip na ating ebalewala ang kanilang mga paghihirap, tayo’y

magpursige sa ating pag-aaral ng sa ganun ay maipagmalaki nila tayo balang araw at

ng masuklian naman natin ang kahirapang dinanas nila sa buhay para lamang tayo’y

masuportahan sa ating mga pangangailangan.

Pasalamatan din natin ang ating mga guro. Hindi sila nagsasawang ibahagi ang

kailang mga kaalaman kahit na tayo ay mabagal makaintindi, kahit minsan sakit tayo sa

ulo, nandiyan pa din sila patuloy na gumagabay. Kung wala sila wala din tayong mga

karunungan na magagamit sa pang araw-araw. Ang mga kaalamang kanilang ibinahagi

ay magsisilbi nating gabay tungo sa ating mabuting kinabukasan.

 Ang paaralang ito ay hindi lamang puro akademiya, may mga kaganapan ring

ginaganap upang magpakasaya ang mga mag-aaral at makapagpahinga sa mga

gawain. Sa mga kaganapang ito, dito mo maipapamalas sa iba ang iyong mga

tinatagong talento at mga kakayahan. Ito na ang oras na malalasap mo kung gaano

kasaya pala ang buhay estudyante, kahit na may mga panahon na tayo’y naghihirap,

meron din namang panahong masaya tayo kasama ang ating mga kaklase na

kailanman ay hindi natin malilimutan, kaya pag may kaganapang mangyayari sa

paaralan dapit tayong lumahok at makipagsaya.

Maging sa mga patimpalak na ginaganap sa paaralan, kung kaya nating gawin

ang nasabing patimpalak ay mas mabuting tayo ay sumali, nang sa ganun ay mas

malinang at mas mapabuti natin ang ating mga gawa at kakayahan. Makisali din tayo sa

mga klub ng ating paaralan upang mas matuto tayo sa ilang bagay na gusto nating

alamin.

Magtakda ng mga layunin na nais mong makamit sa baitang ito, ito ang mag

sisilbi mong gabay at inspirasyon sa pagpasok mo araw-araw. Magtalaga din ng mga

tuntunin na dapat mong sundin, kagaya na lamang ng pagiging maaga sa pasok sa

silid-aralan at iba pa.

Matuto din tayong sumunod sa mga patakaran ng eskwelahang ito, mabisang

paraan ito upang madisiplina ang ating mga sarili. Mahalin, ipagmalaki at pahalagahan

natin ang ating paaralan. Tulungan at igalang ang ating mga guro, pati na din ang ating

kapwa mag-aaral. Tayo ay magtulungan para sa ika-uunlad ng ating paaralan. Matuto

tayong maki-bagay sa ating kapaligiran.

 Handa na ba kayong matuto at lumaban upang malagpasan ang mga balakid sa

baitang ito?

Ito lamang ang aking mga masasabi para sa mga bagong mag-aaral ng Ormoc

City Senior High School, matuto tayong lagpasan ang mga hamon ng pagiging mag-

aaral at tumayo sa sarili nating mga paa.

Uulitin ko maligayang pagbati para sa mga mag-aaral ng ika-labing isang

baitang!

Sabay-sabay tayong matuto at linangin ang iba’t-ibang kaalaman, sabay-sabay

nating salubungin ang taon ng pag-aaral na ito, ng matatag at may tiwala sa sarili.