Batas Republika Blg.

10533
May 15, 2013

S. No. 3286

H. No. 6643

Republika ng Pilipinas

Kongreso ng Pilipinas

Kalakhang Maynila

Ikalabinlimang Kongreso

Ikatlong Sesyong Regular

Sinimulan at isinagawa sa Kalakhang Maynila, noong Lunes, ikadalawampu’t tatlo ng Hulyo,

dalawang libo at labindalawa.

[BATAS REPUBLIKA BLG. 10533]

ISANG BATAS NA NAGPAPABUTI SA SISTEMA NG BATAYANG EDUKASYON SA

PILIPINAS SA PAGPAPALAKAS NG KURIKULUM NITO AT PAGDADAGDAG NG
BILANG NG MGA TAON PARA SA BATAYANG EDUKASYON, PAGLALAAN NG
PONDO PARA RITO AT PARA SA IBA PANG LAYUNIN

Ginagawang batas ng Senado at Mababang Kapulungan ng Pilipinas na natitípon sa Kongreso:

SEKSIYON 1. Maikling Pamagat. – Ang Batas na ito ang ay kikilalanin bilang “Batas sa
Pinabuting Batayang Edukasyon ng 2013.”

SEK. 2. Pagpapahayag ng Polisiya. – Ang Estado ay magtatatag, magpapanatili, at

magtataguyod ng isang ganap, sapat, at nakapaloob na sistema ng edukasyong tumutugon sa mga
pangangailangan ng mga mamamayan, ng bansa, at ng malawakang lipunan.

Gayundin, ipinapahayag dito ang polisiya ng Estado na ang bawat nagtapos sa batayang
edukasyon ay magiging indibidwal na may-kapangyarihan na natuto, sa pamamagitan ng isang
programa na nakaugat sa maiinam na prinsipyong pampagkatuto at nakatuon sa kahusayan, ng
mga batayan ng pagkatuto sa buong buhay, ng kakayahan na maghanapbuhay at maging
produktibo, ng kakayahang makipamuhay sa isang mabungang pakikipag-ugnayan sa mga
komunidad na lokal at pandaigdig, ng kakayahan na makilahok sa isang nakapagsasarili,
malikhain, at mapanuring pag-iisip, at ng kakayahan at pagkukusang baguhin ang iba at ang
sarili.
Para sa layuning ito, lilikha ang Estado ng isang gumaganang sistema ng batayang edukasyon na
huhubog ng mga mamamayang produktibo at responsable at may taglay na mga kasanayang
esensiyal, mga kakayahan at halagahang para sa pagkatutong panghabambuhay at empleo.
Upang makamit ito, kinakailangan itong gawin ng Estado:

(a) Bigyan ang bawat mag-aaral ng pagkakataon na makatanggap ng mabuting edukasyon sang-
ayon sa pamantayang pandaigdig na batay sa isang kurikulum na may mainam na pedagohiya na
katapat ng mga pamantayan sa ibang bansa;

(b) Palawakin ang mga layunin ng edukasyon sa mataas na paaralan para sa paghahanda sa
kolehiyo, mga oportunidad ng karerang bokasyonal at teknikal, gayundin sa mga malikhaing
sining, palakasan, at empleong pang-entrepreneur sa isang kaligirang mabilisang nagbabago at
tumataas ang antas ng pagiging globalisado; at

(c) Gawing nakatuon sa nag-aaral ang edukasyon at tumutugon sa mga pangangailangan,

kakayang kognitibo at kultural, mga kalagayan at kaibahan ng mga nag-aaral, mga paaralan at
mga komunidad sa pamamagitan ng angkop na wika ng pagtuturo at pag-aaral, kasama na ang
inang wika bilang isang bukal ng pag-aaral.

SEK. 3. Batayang Edukasyon. – Ang batayang edukasyon ay nilalayong tugunan ang mga
pangangailangan sa batayang pagkatuto na nagkakaloob ng mga pundasyon na siyang
pagbabatayan ng mga kasunod na pagkatuto. Binubuo ito ng kindergarten, elementarya, at
mataas na paaralan gayundin ang mga sistema ng alternatibong pagkatuto para sa mga nag-aaral
na out-of-school at sa mga may espesyal na pangangailangan.

SEK. 4. Programa sa Pinabuting Batayang Edukasyon. – Binubuo ang pinabuting program ng

batayang edukasyon ng isa (1) man lamang taon sa edukasyong kindergarten, anim (6) na taon sa
edukasyong elementarya, at anim (6) na taon sa edukasyong sekondarya, sa ganoong
pagkakasunod-sunod. Kasama sa edukasyong sekondarya ang edukasyon na apat (4) na taon ng
junior high school at dalawang (2) taon ng senior high school.

Mangangahulugan ang edukasyong kindergarten ng isang (1) taon ng edukasyong

pampaghahanda para sa mga batang di bababa sa limang (5) taong gulang bilang kinakailangan
para sa Baitang I.

Tinutukoy ng edukasyong elementarya ang ikalawang yugto ng kinakailangang batayang

edukasyon na binubuo ng anim (6) na taon. Ang edad ng pagpasok sa antas na ito ay karaniwang
anim (6) na taon.

Tinutukoy ng edukasyong sekondarya ang ikatlong yugto ng kinakailangang batayang edukasyon

na binubuo ng apat (4) na taon ng edukasyon sa junior high school at dalawang (2) taon ng
edukasyon sa senior high school. Ang edad ng pagpasok sa mga antas na junior at senior na high
school ay karaniwang labindalawa (12) at labing-anim (16) na taon, sang-ayon sa pagkakasunod.
Ipahahatid ang batayang edukasyon sa mga wikang nauunawaan ng mga nag-aaral sapagkat
isang estratehikong papel ang ginagampanan ng wika sa paghubog sa mga taon ng pagkahubog
ng mga mag-aaral.

Para sa kindergarten at sa unang tatlong (3) taon ng edukasyong elementarya, ang pagtuturo, mga
materyal sa pagtuturo at pagtatasa ay sa wikang rehiyonal o katutubo ng mga mag-aaral.
Magbubuo ang Kagawaran ng Edukasyon (DepEd) ng isang programa sa transisyong pang-inang
wika mula Baitang 4 hanggang Baitang 6 upang dahan-dahang maipakilala ang Filipino at Ingles
bilang mga wika ng pagtuturo hanggang sa ang dalawang (2) wikang ito ang maging mga
pangunahing wika ng pagtuturo sa antas sekondarya.

Para sa mga layunin ng Batas na ito, ang inang wika o unang wika (LI) ay tutukoy sa wika o mga
wika na unang natutuhan ng isang bata, kung saan siya nakauugnay, at kinikilala bilang isang
katutubong wikang ginagamit niya sang-ayon sa iba, na siyang pinakaalam niya, o
pinakaginagamit. Kasama rito ang Filipinong sign language [wikang de-senyas] na ginagamit ng
mga indibidwal na may kaugnay na kapansanan. Ang rehiyonal o katutubong wika ay tutukoy sa
tradisyonal na uri ng pagsasalita o uri ng Filipinong wikang de-senyas na naroon sa isang
rehiyon, lunan, o lugar.

SEK. 5. Pagbubuo ng Kurikulum. – Magbubuo ang DepEd ng disenyo at mga detalye ng

kurikulum sa pinabuting batayang edukasyon. Makikipagtulungan ito sa Komisyon sa Lalong
Mataas na Edukasyon (CHED) upang magbuo ng magkaugnay na mga kurikulum sa batayan at
tersiyaryong edukasyon para sa kasanayang pandaigdig ng mga Pilipinong nagsisipagtapos.
Upang matiyak ang kahandaan sa kolehiyo at upang maiwasan ang remedyal o pag-uulit ng mga
klase sa batayang edukasyon, makikipag-ugnayan ang DepEd sa CHED at sa Pangasiwaan sa
Edukasyong Teknikal at Pagpapaunlad ng Kasanayan (TESDA).

Upang makamit ang isang mabisang kurikulum sa pinabuting batayang edukasyon, magsasagawa
ng mga konsultasyon ang DepEd sa iba pang mga ahensiya ng pambansang pamahalaan at iba
pang mga stakeholder gaya ng, bagaman hindi limitado sa, Kagawaran ng Paggawa at Empleo
(DOLE), Komisyon sa Regulasyong Pampropesyonal (PRC), mga samahan ng mga paaralang
pribado at publiko, mga pambansang organisasyon ng mga mag-aaral, mga pambansang
organisasyon ng mga guro, mga samahan ng mga magulang at guro at mga samahang
pangkalakalan sa mga bagay na makaaapekto sa mga naturang sangkot na stakeholder.

Susunod ang DepEd sa mga sumusunod na pamantayan at prinsipyo sa paggawa ng kurikulum

ng pinabuting batayang edukasyon:

(a) Ang kurikulum ay kinakailangang nakasentro sa mag-aaral, mapansangkot at angkop sa antas

ng pag-unlad;

(b) Ang kurikulum ay kinakailang makabuluhan, tumutugon, at batay sa pananaliksik;

(c) Ang kurikulum ay kinakailangang sensitibo sa kultura;

(d) Ang kurikulum ay kinakailangang isakonteksto at pandaigdigan;

(e) Ang kurikulum ay kinakailangang gumamit ng mga pagdulog na pedagohikong mapagbuo,
batay sa pagsisiyasat, mapagmuni, nakikilahalok, at mapambuod;

(f) Ang kurikulum ay kinakailangang umayon sa mga prinsipyo at balangkas ng Edukasyong

Multilingguwal na Batay sa Inang Wika (MTB-MLE) na nagsisimula kung saan nagmumula ang
mga mag-aaral at kung ano na ang alam nila, umuusad mula sa alam patungong di-alam;
kinakailangang may mga materyales na panturo at mga gurong may kakayahang ipatupad ang
kurikulum na MTB-MLE;

(g) Ang kurikulum ay gagamit ng pagdulog na spiral na pagsulong upang matiyak ang
pagkadalubhasa sa kaalaman at kasanayan matapos ang bawat antas; at

(h) Ang kurikulum ay kinakailangang bukas upang maaaring isalokal, isakatutubo, at pabutihin
pa ito ng mga paaralan batay sa kanilang mga partikular na kontekstong pang-edukasyon at
panlipunan. Ang produksiyon at paggawa ng mga lokal na materyales sa pagtuturo ay
hihikayatin at ang pagtanggap sa mga materyales na ito ay nakasalalay sa mga panrehiyon at
pandibisyong yunit sa edukasyon.

SEK. 6. Komiteng Kasangguni sa Kurikulum. – May bubuuing komiteng kasangguni sa

kurikulum na ang magiging tagapangulo ay ang Kalihim ng DepEd o ang kaniyang
pinahintulutang kinatawan at ang mga kasapi ay binubuo ng, bagaman hindi limitado sa, tig-
iisang kinatawan mula sa CHED, TESDA, DOLE, PRC, Kagawaran ng Agham at Teknolohiya
(DOST), at isang kinatawan mula sa sangay pangnegosyo tulad ng samahang pang-industriya sa
Information Technology–Business Process Outsourcing (IT-BPO). Ang komiteng kasangguni
ang titingin sa rebyu at ebalwasyon sa pagpapatupad sa kurikulum ng batayang edukasyon at
maaaring magmungkahi sa DepED ng pagbubuo ng kinakailangang pagpipino sa kurikulum.

SEK. 7. Pagtuturo at Pagsasanay sa mga Guro. – Upang matiyak na natutugunan ng programa

sa pinabuting batayang edukasyon ang mga kahingian para sa mahuhusay na guro at pinunong
pampaaralan, magsasagawa ang DepED at CHED ng mga programa para sa pagtuturo at
pagsasanay sa mga guro, sa pakikipagtulungan ng mga kaugnay na katuwang sa pamahalaan,
akademya, industriya, at mga samahang di-pampamahalaan, tulad ng nakasaad:

(a) Pagsasanay sa Nilalaman at Pedagohiya na In-service. – Muling sasanayin ang mga

kasalukuyang guro ng DepEd upang matugunan ang mga pamantayan sa nilalaman at
pagsasakatuparan ng bagong kurikulum na K hanggang 12.

Titiyakin ng DepEd na ang mga institusyon ng edukasyong pribado ay mabibigyan ng

pagkakataon upang magkaroon ng naturang pagsasanay.

(b) Pagsasanay ng mga Bagong Guro. – Ang mga bagong nagsipagtapos sa kasalukuyang
kurikulum ng Edukasyong Pangguro ay sasailalim sa dagdag na pagsasanay, kapag natanggap na
sila sa trabaho, upang maingat ang kanilang mga kasanayan sa mga pamantayang pangnilalaman
ng bagong kurikulum. Maliban dito, titiyakin ng CHED, sa pakikipag-ugnayan sa DepEd at mga
may-kaugnayang stakeholder, na ang mga kurikulum ng Edukasyong Pangguro na ibinibigay sa
mga Institusyon ng Edukasyong Pangguro (mga TEI) ay nakatutugon sa kinakailangang kalidad
ng mga pamantayan para sa mga bagong guro. Ang mga samahang may kaukulang pagkilala na
gumaganap bilang mga TEI, sa pakikipag-ugnayan sa DepEd, CHED, at iba pang mga may-
kaugnayang stakeholder, ang titiyak na ang kurikulum ng mga organisasyon ito ay nakatutugon
sa kinakailangang kalidad ng mga pamantayan para sa mga gurong sinanay.

(c) Pagsasanay sa Pamumunong Pampaaralan. — Ang mga superintendénte, mga prinsipal, mga
tagapag-ugnay ng aralin, at iba pang mga pinuno ng mga paaralang pampagtuturo ay sasailalim
din sa mga palihan at pagsasanay upang mas mapabuti ang kanilang mga kasanayan sa kanilang
mga papel bilang mga pinunong akademiko, administratibo, at pangkomunidad.

Mula rito, ang mga naturang programang para sa pagpapaunlad na propesyonal ay pasisimulan at
isasagawa nang regular sa kabuuan ng taong pampaaralan upang matiyak ang palagiang
pagpapataas ng mga kasanayan ng guro.

SEK. 8. Pagtanggap sa Trabaho ng mga Nagtapos sa Agham, Matematika, Estadistika,

Inhinyeriya at Iba Pang mga Espesyalista sa mga Aralin na may Kakulangan sa mga
Katanggap-tanggap na Aplikante at Kaguruan sa mga Kursong Teknikal-Bokasyonal at
Institusyon ng Lalong Mataas na Edukasyon. — Sa kabila ng mga probisyon ng Mga Seksiyon
26, 27, at 28 ng Batas Republika Blg. 7836, na kilala rin bilang ”Batas Propesyonalisasyon ng
mga Gurong Pilipino ng 1994,” tatanggap ang DepED at mga pribadong institusyong pang-
edukasyon, sang-ayon sa kahingian ng mga partikular na aralin, ng:

(a) Mga nagtapos ng agham, matematika, estadistika, inhinyeriya, musika, at iba pang kursong
may kakulangan sa mga kalipikadong aplikante sa Pagsusulit na Panlisensiya sa mga Guro
(LET) upang magturo sa kanilang araling espesyalisasyon sa edukasyong elementarya at
sekundarya. Ang mga kalipikadong aplikante sa LET ay binubuo rin ng mga nagsipagtapos na
tinanggap ng mga foundation na may kaukulang pagkilala para sa kanilang kadalubhasaan sa
sektor ng edukasyon at natapos nang katanggap-tanggap ang mga kahingiang itinalaga ng mga
samahang ito: Basta at, Na naipasa nila ang LET sa loob ng limang (5) taon matapos ang petsa
ng pagtanggap sa kanila: Basta at, gayundin, Na kung ang mga naturang nagsipagtapos ay
handang magturo nang part-time, hindi na hihilingin ang mga probisyon ng LET;

(b) Mga nagtapos ng mga kursong teknikal-bokasyonal na ituturo sa kanilang mga

espesyalisasyong aralin sa edukasyong sekundarya: Basta at, Na ang mga nagtapos na ito ay
nagtataglay ng sertipikasyong inilabas ng TESDA: Basta at, gayundin, Na sasailalim sila sa
angkop na pagsasanay na in-training na pangangasiwaan ng DepEd o ng mga institusyon ng
lalong mataas na edukasyon (HEI) sa paggugol ng DepEd;

(c) Pagpapahintulot sa kaguruan ng mga HEI na magturo ng edukasyong panlahat at mga

espesyalisasyong aralin sa edukasyong sekundarya: Basta at, Na ang kaguruan ay may taglay na
kaugnay na digring batsilyer, at kinakailangang katanggap-tanggap na nakapagsilbi bilang isang
full-time na bahagi ng kaguruan ng HEI;

(d) Maaaring tumanggap ang DepEd at mga pribadong institusyong pang-edukasyon ng mga
practitioner, na dalubhasa sa mga natatanging araling inihahadog sa Kurikulum ng Batayang
Edukasyon, upang magturo sa antas sekundarya; Basta at, Na magtutro sila nang part-time
lamang. Para rito, titiyakin ng DepEd, sa pakikipag-ugnayan ng mga angkop na ahensiyang
pampamahalaan, ang mga pamantayan ng kinakailangang kalipikasyon sa pagtanggap sa mga
dalubhasang ito.

SEK. 9. Adbokasiya sa Gabay at Pagpapayong Pangkarera. — Upang magabayan nang wasto

ang mga mag-aaral sa pagpili nila ng direksiyon ng karera na balak nilang isulong, magsasagawa
ang DepEd, sa pakikipag-ugnayan ng DOLE, TESDA, at CHED, ng mga regular na gawaing
pang-adbokasiya sa karera para sa mga mag-aaral ng antas sekundarya. Sa kabila ng mga
probisyon ng Seksiyon 27 ng Batas Republika Blg. 9258, na kilala rin bilang ”Batas Paggabay at
Pagpapayong 2004,” pahihintulutan ang mga tagapayong gabay sa karera at empleo, na hindi
nakarehistro o walang lisensiya bilang tagapayong gabay, na magsagawa ng mga gawaing pang-
adbokasiya sa karera sa mga mag-aaral ng antas sekundarya ng paaralan kung saan sila
kasalukuyang nagtatrabaho; Basta at, Na sasailalim sila sa isang programang pagsasanay na
isasagawa o kikilalanin ng DepEd.

SEK. 10. Pagpapalawak sa mga Benepisyaryo ng E-GASTPE. — Palalawakin ang mga

benepisyong ipinagkakaloob ng Batas Republika Blg. 8545 o ang “Batas sa Pinalawak na Tulong
Pampamahaalan para sa mga Mag-aaral at mga Guro sa Pribadong Edukasyon” sa mga karapat-
dapat na mag-aaral na pumapasok sa ilalim ng pinabuting batayang edukasyon.

Gagamitin ng DepEd ang mga serbisyo ng mga institusyon ng pribadong edukasyon at mga
paaralang di-DepEd na nag-aalok na senior high school sa pamamagitan ng mga programa sa
ilalim ng Batas Republika Blg. 8545, at iba pang pagsasaayos na pampananalapi na binuo ng
DepEd at ng Kagawaran ng Badyet at Pamamahala (DBM) batay sa mga prinsipyo ng tambalang
publiko-pribado.

SEK. 11. Mga Apropriyasyon. — Isasama ng Kalihim ng Edukasyon sa programa ng Kagawaran

ang pagpapatupad ng pinabuting programa sa batayang edukasyon, na ang paunang pondo ay
kukunin sa kasalukuyang mga apropriyasyon ng DepEd. Matapos iyon, ang halagang
kinakailangan para sa patuloy na pagpapatupad ng programa ng pinabuting batayang edukasyon
ay isasama sa taunang Batas Apropriyasyong Panlahat.

SEK. 12. Mga Probisyong Pantransisyon. –– Magbubuo ang DepEd, CHED, at TESDA ng mga
angkop na estratehiya at mekanismong kinakailangan upang matiyak ang maayos na transisyon
mula sa kasalukuyang sampung (10) taong siklo sa batayang edukasyon patungo sa pinabuting
siklo ng batayang edukasyon (K hanggang 12). Maaaring saklawin ng mga estratehiya ang mga
pagbabago sa pisikal na imprastruktura, paggawa, mga usaping pang-organisasyon at pang-
estruktura, mga huwarang pantawid mula sa mga kakayahan sa baitang 10 at mga kailangan sa
pagpasok sa bagong mga kurikulum na tersiyaryo, at pag-uugnayan ng pamahalaan at iba pang
mga entidad. Ang pagmomodelo para sa senior high school ay maaaring ipatupad sa piling mga
paaralan upang gagarin ang proseso ng transisyon at magbigay ng mga kongkretong datos para
sa planong transisyon.

Upang pangasiwaan ang paunang implementasyon ng pinabuting programa para sa batayang

edukasyon at upang matugunan ang inaasahang mababang bilang ng mga magmamatrikula sa
iba’t ibang antas para sa mga HEI at mga Institusyong Panteknikal Bokasyonal (TVI) simula
Taong Pampaaralan 2016-17, makikipag-ugnayan ang DepEd sa mga HEI at TVI para sa
paggamit ng mga tao at pisikal na gamit ng huli. Higit pa rito, makikipag-ugnayan ang DepEd,
CHED, TESDA, mga TVI at HEI sa isa’t isa upang ipatupad ang mga estratehiya upang tiyakin
ang mga kakayahang pang-akademiko, pisikal, pinansiyal, at pantao ng mga HEI at TVI upang
magkaloob ng mga serbisyong pang-edukasyon at pampagsasanay sa mga nagsipagtapos sa
pinabuting programa ng batayang edukasyon na hindi gaanong naapektuhan. Bibigyang-
priyoridad ang kaguruan ng mga HEI at TVI na pinahintulutang magturo sa mga mag-aaral ng
edukasyong sekondarya sa ilalim ng Seksiyon 8 nito sa pagkuha ng mga guro para sa saklaw ng
panahon ng transisyon. Para sa layuning ito, ibibigay sa mga tuntunin at regulasyong
pampatupad (IRR) ang panahon ng transisyon.

SEK. 13. Komite ng Pinagsamang Oversight na Pangkongreso sa Programa ng Pinabuting

Batayang Edukasyon (Programang K hanggang 12). – Binubuo rito ang isang Pinagsamang
Komite sa Oversight upang pangasiwaan, bantayan, at tayain ang pagpapatupad ng Batas na ito.

Bubuuin ang Komite sa Oversight ng tiglimang (5) kasapi mula sa Senado at mula sa Mababang
Kapulungan, kasama na ang mga Tagapangulo ng mga Komite sa Edukasyon, Mga Sining at
Kultura, at Pananalapi ng parehong Kapulungan. Ang bubuo sa Komite ng bawat Kapulungan ay
kinakailangang may dalawa man lamang oposisyon o kasaping nasa minorya.

SEK. 14.  Kinakailangang Ebalwasyon at Rebyu. – Sa katapusan ng Taong Pampaaralan 2014-

2015, magsasagawa ang DepEd ng isang kinakailangang rebyu at magpapasa ng ulat pang-
midterm sa Kongreso tungkol sa estado ng pagpapatupad ng programang K hanggang 12 sa
usapin ng pagpupuno sa mga sumusunod na kasalukuyang kakulangan sa: (1) mga guro; (b) mga
klasrum; (c) mga teksbuk; (d) mga upuan; (e) mga palikuran; at (f) iba pang kakulangan na
kailangang tugunan.

Kailangang isama ng DepEd sa ulat pang-midterm ang mga sumusunod na susing panukat sa
akses sa at kalidad ng batayang edukasyon: (a) antas ng pakikilahok; (b) antas ng pananatili; (c)
mga resulta ng Pambansang Pagsusulit na Pangkakayahan; (d) antas ng pagtatapos; (e)
kapakanan ng mga guro at mga profile sa pagsasanay; (f) kasapatan ng mga kahingian sa
pagpopondo; at (g) iba pang pasilidad sa pag-aaral, kasama na ang, bagaman hindi limitado sa,
mga laboratoryo para sa computer at agham, mga silid-aklatan at aklatang hub, at palakasan,
musika, at mga sining.

SEK. 15. Pananagutan sa mga Pamantayang Pandaigdig. – Aakuin ng DepEd ang pagpapataas

ng paggasta kada capita sa edukasyon tungo sa agarang pagkakamit ng mga pamantayang
pandaigdig.

SEK. 16. Mga Tuntunin at Regulasyong Pampatupad. – Ang Kalihim ng DepEd, Tagapangulo

ng CHED, at Direktor-Heneral ng TESDA ay magsasabatas ng mga kinakailangang tuntunin at
regulasyon para sa pagpapatupad ng Batas na ito nang hindi lalampas sa sandaan at walumpung
(180) araw simula sa pagkakabisà ng Batas na ito.
SEK. 17. Takda sa Kakayahang Mapaghiwalay. – Kapag ang alinman sa mga probisyon ng
Batas na ito ay ipinahayag na walang bisa o labag sa konstitusyon, hindi niyon maaapektuhan
ang pagiging katanggap-tanggap at bisa ng iba pang mga probisyon dito.

SEK. 18. Takda sa Pagbawi. – Mga probisyong may kaugnayan sa Batas Pambansa Blg. 232 o
“Batas Edukasyon ng 1982,” Batas Republika Blg. 9155 o “Batas sa Pamamahala ng Batayang
Edukasyon ng 2001,” Bastas Republika Blg. 9258, Batas Republika Blg. 7836, at lahat ng iba
pang mga batas, mga dekreto, at mga kautusang tagapagpatupad at mga tuntunin at mga
regulasyon na kasalungan o hindi sang-ayon sa mga tuntunin ng Batas na ito ay binabawi rito o
binabago nang naaayon dito.

SEK. 19. Pagkakaroon ng Bisà. – Magkakaroon ng bisà ang Batas na ito nang labinlimang (15)
matapos ang pagkakalathalà nito sa Official Gazette o sa dalawang (2) pahayagang may
malawak na sirkulasyon.

Pinagtibay,

(Lagda) FELICIANO BELMONTE JR. (Lagda) JUAN PONCE ENRIL

Ispiker ng Mababang Kapulungan Pangulo ng Senado

Ang Batas na ito na konsolidasyon ng Panukalang Batas ng Senado Blg. 3286 at Panukalang
Batas ng Mababang Kapulungan Blg. 6643t ay naipasá sa wakas ng Mababang Kapulungan at ng
Senado noong Enero 30, 2013.

(Lagda) MARILYN BARUA-YAP (Lagda) EDWIN B. BELEN

Kalihim Heneral Kalihim na Tagaganap ng Senad
Mababang Kapulungan