SURIGAO STATE COLLEGE OF TECHNOLOGY

Lungsod ng Surigao

ELECTIVE 2
MALIKHAING PAGSULAT

Ipinasa ni
MARGIE L. CONSIGNA
BSEd-Filipino-3B

Ipinasa kay
GNG. GERALDINE A. SERDAN, M.A.
Assistant Professor II

A.Y. 2021-2022//2nd Semester

 PAUNANG
PAGSUBOK
Panuto: Humanap ng isang bagay na nasa loob lamang ng
inyong tahanan. Kumuha ng sariling larawan kasama ang
bagay na ito. At gumawa ng isang malayang pagsusulat
tungkol sa bagay na ito. Maaaring ito ay tula, sanaysay, awit o
kahit anong sulatin tungkol sa bagay na napili mo, gawing
malaya at malikhain ang pagsusulat.
Awtput 1: Larawang kuha kasama mo ang bagay na napili sa
loob ng tahanan
Awtput 2: Ang malikhaing sulatin na ginawa mo tungkol sa
bagay na ito
 Isang Libong Kulay

Itim na sinulid sa puting pahina

kung pagmasdan ko ang mga salita
Karugtong ng aking mga daliri
at kasabay ko nang huminga;

Minsan ay kasingtahimik ng gabi

ang kanyang mga sinasabi
Tila bulong na tinatangay ng hangin
at sa aking labi dumadampi;

Minsan ay kasingrahas ng bagyo

ang kanyang mga pangungusap
tumatagos sa gitna mismo
ng mga damdaming nabilanggo

Minsan kasing-init ng araw sa langit

ang kaniyang mga binabanggit
na parang yakap ng buong mundo
ang nadarama ko sa aking mga bisig;

Minsan naman ay parang ulan

na nagbubuhos ng mga yaman:
mga patak ng aral na kanyang hatid
ay siyang tubig nitong uhaw na isipan;

Mga eroplanong papel na aking nasakyan

Nagdala sa akin sa ibang kalawakan
Doon nagsasalita ang mga bituin
Doon may isang libong kulay ang bahaghari!
 GAWAIN
BILANG 1
Panuto: Sumulat ng iba’t ibang uri ng sulatin
(6) gaya ng nasa ibaba. Kailangan ito ay sarili
mong gawa.
❖Akademikong Pagsulat
❖Teknikal
❖Journalistic
❖Reperensiyal
❖Profesyunal
❖Malikhain
 AKADEMIKONG PAGSULAT
Repleksiyon sa Paksang Tinalakay sa Klase

Maraming wika ang mundo at bawat isa sa mga ito ay mahalaga. Ang wika ng bawat
bansa at ang mga varayti at baryasyon nito ay maituturing na yaman sapagkat ang pagkakaiba
ay nagbibigay ng kulay at nagpapatingkad sa mga katangian natin bilang indibidwal na may iba't
ibang pinagmulan at karanasan. Walang wika ang superyor o inferyor. Lahat ng wika sa mundo
ay mahalaga dahil taglay nito ang pagkakakilanlan ng isang lipunan ng taong may sariling
kasaysayan at panitikan pati na rin bokabularyong kabahagi ng kanilang pang-araw-araw na
pamumuhay.

Sa mga teoryang Linguistic Relativity at Cognitive Appropriation, nabibigyan ng diin ang

pagkakabuhol ng wika, kognisyon at kultura. Ang mga teoryang ito ay naglalahad ng mga
makabuluhang konsepto kung paano magkasabay na hinuhubog ng wika, kognisyon at kultura
ang isa't isa. Sa pamamagitan ng mga nabuong teorya gaya ng mga ito, nasisimulan ang mga
mahahalagang diskurso tungkol sa wika na naghahatid sa atin ng panibagong pananaw at pag-
unawa. Ang ganitong mga pag-aaral at pagsasaliksik sa wika ay walang tiyak na hangganan.
Habang patuloy na tumatakbo ang panahon, patuloy ring nagbabago ang lipunan ng tao kung
saan ginagamit ang wika. Dulot nito, hindi mapapasubaliang napakalawak ng wika. Kung ito ay
pag-aaralan, ang ating iisang katanungan lamang hinggil dito ay humahantong sa iba pa at mas
maraming katanungan. Bagaman mahirap, ito rin ang kagandahang lunan ng pag-aaral ng wika.

Kaya naman, bilang mga mag-aaral ng mayoryang Filipino, marapat lamang na tayo ay
magkaroon ng aktibong papel sa pagtuklas at paggalugad ng kahit anong may kaugnayan sa
wika. Ang pagtataglay ng sariling pagkukusa sa pagsasagawa ng mga obserbasyon, pananaliksik
at pagsusuri ay makakatulong sa pagpapaunlad ng ating kaalaman tungkol sa wika. Ang mga
gawaing ito, kahit nagsisilbi mang hamon, ay kinakailangang ugaliin sa ating mga silid-aralan. Sa
ganitong paraan, ang mga mag-aaral at mga guro ay makakatuklas ng mga impormasyon na
hindi lamang purong lingguwistika ngunit maaari ring magkaroon ng implikasyon sa pagtuturo ng
wika sa klasrum.

Sa kabuuan, ang wika ay isang malawak at malaking puwersa sa ating lipunan na patuloy
lamang na nagpapatunay na ang tao ay isang bukod-tanging likha. Maraming mga pagkakataon
sa ating kasaysayan ang hinulma at pinagtibay ng wika. Ang pagkakaroon ng maraming wika sa
mundo ay nag-uukol din ng higit na pangngailangan sa pagsagawa ng mga pananaliksik at pag-
aaral na may hangaring maging daan sa preserbasyon at pagyayaman sa mga ito. Sa panahon
ng ika-21 siglo, ang ating sistema rin ng edukasyon ay naghahangad na makapagluwal ng mga
mag-aaral na may sapat na kakayahan sa pagtugon sa ganitong mga pangangailangan. Habang
patuloy na umiinog ang panahon, walang humpay rin ang mga nababagong nagaganap sa wika.
Kaya naman, tulad ng kung paano sinubukang tustusan ng mga teorya nina Sapir at Whorf ang
iilan sa mga pinakakontrobersyal na katanungan sa wika, maaari din tayong magsimula sa
pagtuon ng ating panahon at kagiliwan sa pagsasagawa ng mga makabuluhang pagtuklas hinggil
sa wika sa ating sariling pamamaraan.
 TEKNIKAL NA PAGSULAT
Liham-Aplikasyon

Ika-23 ng Marso, 2022

AMY P. FEBRA
HR Direktor
Kiddie Star Tutorial Center
Narciso-Espina Street, Brgy. Taft
Lungsod ng Surigao

Kagalang-galang na Gng. Amy:

Isang mapagpalang araw po!

Bilang isang tutor na may dalawang taon nang karanasan sa parehong face-to-face at online tutorial, lubos
ko pong ikinagalak nang makita sa isang patalastas na bukas ang inyong posisyon para sa isang tutor sa
asignaturang Matematika.

Ako po ay kasalukuyang nag-aaral sa Surigao State College of Technology at nasa aking huling taon na sa
programang Bachelor of Secondary Education sa mayoryang Matematika. Nakapagturo na po ako sa
Mathinik Tutorial, Inc. at sa loob ng dalawang taon doon, 60 estudyante ang natulungan kong tumaas ang
kabuuang marka sa kanilang asignaturang Matematika. 50% sa kanila ang nakakuha ng pinakamataas na
posibleng marka sa kanilang mga eksaminasyon. Ang mga tagumpay na ito ay nakamtan nila dahil na rin
sa mga ginawa kong kagamitan sa pagtuturo at mga de-kalidad na banghay-aralin.Nakatanggap rin po ako
ng 98% na approval rating mula sa parehong mga mag-aaral at kanilang mga magulang.
Masaya man po ang naging karanasan ko sa Mathinik Tutorial, Inc., ako po ay matagal na talagang
naghihintay ng pagkakataon na maging bahagi ng inyong tutorial center. Ito ay hindi lamang sa inyong
mabuting reputasyon, kundi ay pati na rin sa inyong misyon na makatulong sa mga nangangarap na maging
guro sa pamamagitan ng pagbibigay ng sertipikasyon.

Umaasa po ako na inyong isasaalang-alang ang aking kwalipikasyon. Ako po ay maghihintay ng inyong
paanyaya sa isang panayam sa ano mang oras na inyong mararapatin. Maaari niyo po akong maabot sa
numerong 09078638262 o sa aking e-mail address na mconsigna@gmail.com.

Maraming salamat po sa oras at pagkakataon.

Lubos na gumagalang,

Margie L. Consigna
 JOURNAL
Liham sa Patnugot

Ika-23 ng Marso, 2022

FERN T. TABUDLO
Punong Patnugot
Ang Sinagtala
P-Santan, Espina Extension
Brgy. Taft, Lungsod ng Surigao

Kagalang-galang na G. Tabudlo:

Pagbati mula sa Kagawaran ng Edukasyon!

Kami ay sumulat upang magalang na hingin ang inyong atensyon ukol sa isang balitang nailimbag sa inyong
marangal na pahayagan ngayong araw na may pamagat na “MGA GURO SA FILIPINO: PINIPILIT NG
DepEd NA MAGTURO NG IBANG ASIGNATURA” na mahahanap sa pahina 4 at isinulat ni Mona Mae
M. Lopez.

Maging maalam sana kayo na batay sa orihinal na press release na aming ipinasa sa iba’t ibang miyembro
ng midya noong Sabado, ika-22 ng Marso, 2022 na makikita ninyong kalakip ng liham na ito, hindi
kailanman ipinahayag ng mga guro sa Filipino na pinipilit sila ng kagawaran na magturo ng ibang
asignatura.

Sa paglilinaw, ang press release ay nakatakdang magbigay ng karampatang atensyon sa kakulangan ng mga
guro sa mga asignaturang Matematika, Agham at Araling Panlipunan na patuloy na nagiging hamon para
sa departamento at sa mga kasapi at empleyado nito at higit sa lahat, sa mga mag-aaral.

Sa kabila nito, nagtutulungan ang mga guro sa pagtuturo sa mga nabanggit na asignatura sa mga paraan na
pinakamabuti para sa mga mag-aaral. Ang mga mapiskay nating guro sa Filipino ay hindi pinipilit ngunit
dahil sila ay malaking kabahagi ng kagawaran, naiintindihan nilang sumusunod lamang na ang kalagayang
ito ay may mga naidudulot sa kanilang papel bilang mga guro.

Uulitin lamang na hindi pinipilit ng DepEd ang mga guro sa Filipino na magturo ng ibang asignatura.

Sa kadahilanang ito, umaasa kami na makitang nailimbag ang paglilinaw na ito sa inyong pahayagan na
nanumpa ng obhektibo at tumpak na pamamahayag.

Pauna ang aming pasalamat.

Lubos na sumasainyo,

MARGIE L. CONSIGNA
Kalihim – Kagawaran ng Edukasyon
 REFERENSYAL NA PAGSULAT
Kaugnay na Literatura at Pag-aaral

Sa mga nakalipas na taon, ang online na pagtuturo at pagkatuto ay malawakan nang

ginagamit sa iba’t ibang panig ng mundo (Beck et al., 2013; Culp et al., 2005). Ayon kay Cojocariu
et al. (2014), karamihan sa mga nauusong termino gaya ng online learning, open learning, web-
based learning, computer-mediated learning, blended learning, m-learning ay pare-parehong
ginagamitan ng kompyuter na maaaring ikonekta sa isang network na siyang gumagawang
possible sa pagtuturo at pagkatuto na maaaring mangyari kahit saan, kahit sa anong oras at
pagkakataon, at sa kahit anong bilis at pamamaraan. Higit pa dito, ang online learning ay isang
kagamitan at kaparaanan na may kakayahan na ilagay ang mga mag-aaral bilang sentro sa
kanilang sariling pagkatuto. Ito rin ay maituturing na mga karanasan sa pagkatuto na maaaring
maging synchronous o asynchronous sa pamamagitan ng paggamit ng iba’t ibang teknolohiya
gaya ng cellphone, tablet, laptop at marami pang iba na mayroong Internet access. Ang mabilis
na pag-usbong ng modernong teknolohiya ay nakatulong nang lubos sa pagpapadali ng mga
prosesong kalakip ng distance learning (McBrien et al., 2009).
Ayon sa pag-aaral na isinagawa nina Chua et al. (2020), ang mga institusyon ng mataas
na edukasyon ay nakapagdesisyong mag-implementa ng online classes o tinatawag na e-
classrooms upang patuloy na maihatid sa mga mag-aaral ang iba’t ibang aralin at gawaing
nakapaloob sa kurikulum gamit ang iba’t ibang plataporma. Napag-alaman sa kanilang pag-aaral
na karamihan sa mga institusyon at sa mga guro nito ay gumagamit ng libreng mga plataporma
gaya ng Google Classroom, Edmodo, Zoom, FB messenger, Google Meet, We Chat, Schoology,
at Moodle. Kaugnay nito, nalaman nilang ang mga guro at mga mag-aaral ay may kakayahang
mabilis na umangkop sa mga pagbabago sa edukasyon na dulot ng pandemyang CoVid-19 dahil
na rin sa kanilang taglay na “21st Century skills” na patuloy namang hinuhubog ng mga
modernong paaralan.
Sa kabilang banda, ayon naman kay Bashitialshaaer, et.al (2021), mayroong marami pa
ring mga balakid na kinakailangang matutugunan sapagkat nakakaapekto ito sa kalidad ng
pagtuturo at karanasan sa pagkatuto ng mga mag-aaral batay na rin sa nakalap nilang datos
mula sa mga guro at mag-aaral ng mga pamantasan sa Saudi Arabia at China. Kalakip sa kanilag
binanggit na mga balakid, ang nangunguna ay ang kalidad ng Internet connection. Ito ay sinundan
naman ng mga suliraning naidudulot dahil sa kakulangan ng mga software at hardware na
makatutulong upang makalikha ng makabuluhan at produktibong karanasan sa pagkatuto.
 PROFESYONAL
Propesyon ng Pagtuturo – Banghay-Aralin

SURIGAO STATE COLLEGE OF TECHNOLOGY

Lungsod ng Surigao

Masusing Banghay-Aralin sa Baitang 8

Filipino 8 Ikalawang Markahan
Taong Panuruan 2020 – 2021

I. INAASAHANG BUNGA
Sa loob ng isang oras ng talakayan, inaasahang malinang ng mga mag-aaral ang mga sumusunod:

Naipamamalas ng mag-aaral ng pag-unawa sa

mga akdang pampanitikang lumaganap sa
Pamantayang Pangnilalaman
Panahon ng Amerikano, Komonwelt at sa
Kasalukuyan
Naisusulat ang sariling tula sa alinmang
Pamantayang sa Pagganap anyong tinalakay tungkol sa pag-ibig sa tao,
bayan o kalikasan
Kasanayan sa Pagkatuto Tiyak na Layunin
1. Naiuugnay ang mga kaisipan sa akda sa
Pag-unawa sa Binasa
mga kaganapan sa sarili, lipunan, at
(PB)
daigdig (F8PB-IIg-h-27)
Pagsulat 2. Nakakagawa ng dalawang grapikong
(PU) disenyo
3. Nabibigyang-katangian ang piling tauhan
Wika at Gramatika sa maikling kuwento gamit ang mga
(WK) kaantasan ng pang-uri
(F8WG-IIg-h-28)
4. Nauunawaan ang kahalagahan ng
Pagpapahalaga maikling kuwento at kaantasan ng pang-uri

II. NILALAMAN
PANITIKAN
Akda: Paglalayag sa Puso ng Isang Bata ni Genoveva Edroza Matute
Taon: 1974
Mga Manunulat: Enrijo, Willita, et. al.
Tagapaglathala: Book Media Press, Inc.
Printwell, Inc.

GRAMATIKA/RETORIKA
Paksa: Kaantasan ng Pang-Uri
Sanggunian: Ona, Luzviminda, et. al.
Libro sa Filipino V: Hiyas sa Wika
Lexicon Inc., Tandang Sora
Quezon City, Phil. (2003), pp. 5-8.

III. KAGAMITANG PANTURO

Kagamitan: Batayang Aklat, Laptop, LCD Projector, Biswal, at Handouts
Mga Estratehiya: Awral, Pangkatang Gawain, Interaktibong Pagtuturo
 MALIKHAIN
Pagsulat ng Tula

Ang Makata

Hinahawi ang tabing sa paningin

Nadatnang tuyo na ang mga dahong
Iniilawan ng natatanging buwan
Kumot na maitim, pilak ang linyang
Iginuguhit nito sa kalangitan
Sa isang gabing kaydakila
Bakit 'di mapigilan ang buntonghininga
Sa pagitan nitong misteryo at ganda
Ay walang laban ang sino mang makata
Sapagkat alipin lamang siyang tuwina -
may lungkot sa lahat ng kanyang tawa
at bawat galak niya'y nababahiran ng luha!
Ang kariktang naaabot ng kanyang mata
At ang kaguluhang kita o 'di man halata
Ay nasisisid ng kanyang buong kaluluwa
pansinin man niya o talikuran ang ideya
siya'y magkasabay na ginagapos at pinapalaya
nitong mga salita at parirala
Sa tanang magdamag, tinatahan
ang hindi mapigilang pagmumuni ng isipan
Tila isang gagamba kung maghabi ng tugmaan
sa isang puno na tuyo na ang mga dahong
iniilawan ng natatanging buwan
 GAWAIN BILANG 2
Panuto: Sumulat ng 2 malikhaing akda, isa (1) batay sa paggamit ng
Panlabas at Panloob na Pandama at isang (1) Masining na
Paglalarawan. Nasa ibaba ang gabay kung ano ang isusulat.

Panlabas na Pandama batay sa:

a. Paningin
b. Pang-amoy
c. Panlasa
d. Pandinig
Panloob na Pandama batay sa:
a. Kamalayan
b. Memorya
c. Imahinasyon
d. Instinct
Masining na Paglalarawan, pumili lang ng isa:
a. Paglalarawan sa tao
b. Paglalarawan sa damdamin
c. Paglalarawan sa bagay
d. Paglalarawan sa tanawin/lugar
 Larawan ng mga Salita
Malikhaing Akda
Panlabas at Panloob na Pandama

“Maaari mo bang ilarawan sa akin ang kulay ng langit ngayon?” Nabigla ako sa boses na narinig ko. Kanina
pa akong nakatayo sa dulo ng tulay na ito at pinag-iisipan nang seryoso kung itutuloy ba ang pagtalon. Sa
lalim ng aking pag-iisip, hindi ko man lang narinig ang yapak ng sinumang papalapit. Nabitawan ko ang
matagal nang pinipigilang paghinga. Mabagal at nagdadalawang-isip akong umalis sa dulo ng tulay at
tuluyan nang hinarap ang isang estranghero na sa aking hula ay higit 40 taong gulang na. Suot niya ang
isang lumang sombrero at itim na salamin at hawak niya ang isang mahaba at puting tungkod.

“Maaari mo bang ilarawan sa akin ang kulay ng langit ngayon?” Pag-uulit niya nang maramdaman niya
siguro ang paglapit ko. Muli kong pinag-aralan ang estranghero at pinagtagpi-tagpi ang mga detalye. Itim
na salamin. Mahaba at puting tungkod. Nagtatanong ng kulay ng langit. Nang mapagtanto ang kanyang
kalagayan, para akong binuhusan ng malamig na tubig mula ulo hanggang paa at tuluyan na lamang akong
napaupo sa tabi niya. Tinitigan ko ang langit sa aming harapan. Papalubog na ang araw.

“Ang araw ay bumababa na. Kulay kahel na may halong mapusyaw na dilaw at pula ang mayroon ang
kalangitan ngayon,” nahihiya kong tugon sa kanyang pakiusap.

“Paano mo ba mailalarawan ang kulay kahel?” Napapikit ako dahil hindi ko kailanman inakala na darating
ang panahon sa buhay ko na kailangan kung ipaliwanag sa isang mahigit sa 40 taong gulang kung ano
ang kulay kahel.

“Matingkad at parang mainit sa mata ang kulay kahel,” nahihirapan kong pagsubok ng tugon.

“Kung ganoon, masakit ba sa matang tignan ang langit ngayon?” Patuloy niya pa ring tanong.

“Hindi naman. Tama lang. Maraming taong paboritong tanawin ang pagbaba ng araw dahil kahit
matitingkad ang mga kulay kahel, pula at dilaw, ang kanilang paghahalo ay nakakalikha ng malambot na
kulay sa kalangitan.”

“Ganoon naman pala. Ano pa ba ang iba mong nakikita? May mga ibon ba? Naririnig ko kasi silang
humuhuni.”

Hindi ko akalain na sa mga oras na ito, humihinga ako at ginagawa ito.

“Ang mga ibon na naririto ay maliliit. Lumilipad sila nang sabay-sabay. Ngayon ang mga ibon na narito ay
kulay abo at puti. Ang mga kulay na ito ay siya ring kulay ng buhok mo.”

Matagal muna bago siya nagsalita kaya nag-aalala ako kung ano nga ba ang iniisip niya o mas mahirap ba
ang susunod niyang itatanong.

“Ikaw? Ilarawan mo naman ang hitsura mo.”

Napatitig ako sa kanya at nag-uunahan na ang mga salita sa dulo ng aking dila. Ang hitsura ko. Tinatanong
niya ang hitsura ko na lagi na lang kinukutya, pinagtatawanan, at minamaliit. Huminga ako ng malalim at
tumingala, inaalala lahat ng pangungutya nila.

“Maitim, pangit, pango, baduy. Iyon ang hitsura ko. Maitim na parang tsokolate. Idagdag mo pa ang kulot
kong buhok na parang pugad ng mga sinabi kong ibon. Magulo ang hitsura ko na para bang piangtagpi-
tagpi lang ang mga bahagi ng mukha ko. Kung nakikita mo ako, marahil maaawa ka lang sa akin.”

Huminga nang malalim ang estranghero at sa mahinang bulong ibinanggit, “Hanggang hindi natin
tinatanggap ang ating sarili at kalagayan, lahat tayo ay kawawa.” At gusto kong magtanong kung tulad ko,
kawawa rin ba siya.
 KAWALAN
Masining na Paglalarawan
Paglalarawan sa Damdamin

Isang tawag ang bumasag sa tatlong pusong naging libo-libong piraso sa loob lamang ng
ilang minuto. Nang marinig namin ang balita ng paglisan mo, biglang tumigil ang mundo. Bakit?
Anong nangyari? Bumaha ng mga katanungan kasabay ng bagyo ng mga damdamin na
nasundan nang marahas na pagtanggi. Hindi ito totoo. Hindi ito maaari. Buhay ka. Sa ilalim ng
iyong paboritong abong damit, tumitibok ang puso mo. Natutulog ka lang at magigising ka.

Ngunit patuloy kang nahimbing. Ang iyong balat ay naging puting rosas. Ang mga
matitibay mong kamay na dati ay nagpupukpok ng pako ay nawalan na ng lakas. At mula sa iyong
maninipis na labi ay tumakas na ang bakas ng huli mong mga ngiti at tawa na kahit saan man
ako magpunta ay aking makikilala.

Kulay pula ang pighati para sa akin dahil sa galit na nararamdaman ko sa buong mundo.
Gusto kong may sisihin. Gusto kong maghimagsik laban sa oras dahil ito ay hindi sapat, laban sa
tadhana dahil ito ay madaya. Gusto kong ako na lang ang nawala. Ngunit, mula sa mga malalakas
na sigaw, unti-unti akong tahimik na magdarasal. Susubok na makahanap ng pang-unawa,
mangangapa sa dilim na umaalong sa aking paghikbi, at matutulog nang tuyo ang luha.
Kinabukasan, babalik din sa pagtanggi. Muling ilalaban ang kailanman ay wala nang pag-asang
maging katotohanan. Muling papaniwalain ang sarili na narito ka lang at magkukulong sa walang
hanggang pagsisi.

Ganito ang pakiramdam nang mawalan, maiwan at mag-isa. Hindi ko alam kung sa mga
pagkakataong iyon ay nabingi ba ako o sadyang nawaglit lahat ng musika sa mundo. Walang
huni ng mga ibon. Walang bulong ng hangin. Walang ingay ang yapak ng ibang tao. Walang
tugma ang mga salita. Wala. Ang tanging mayroon ay kawalan. Kawalan na kasinglaki ng
kalawakan at kasingdilim ng gabing walang buwan. Kawalang hindi mapupunan. Una ko itong
naramdaman bilang isang sugat na hindi dumurugo at bilang sakit na hindi ko mapangalanan.
Hanggang sa lumusong ang mga araw, linggo, buwan, at taon at naintindihan ko na ang kawalan
ay hindi isang damdamin ngunit isang karanasan ng tuluyang pagtakas ng kaluluwa mula sa
pisikal na katawan. Kaya, kahit naigagalaw ko man ang mga daliri ko, pumipikit at bumubuka man
ang mga talukap ko, kahit batid ko mang humihinga ako, hindi ko na maramdaman kung totoong
buhay pa ba ako. Ang kawalang ito ay patuloy lamang na lumalawak at lumalalim habang patuloy
na nabibiyak ang aking sarili. Sa bawat espasyo sa pagitan ng mga biyak, sumisibol ang panibago
na namang kawalan na hindi kayang pasukin ng sinag ng araw o ng patak man ng marahang
ulan. Doon ko rin nalaman na sa nag-iisang buhay natin, hindi lamang isang beses tayong
namamatay.

Araw-araw, parang sabay-sabay na sampal ng isang libong kamay sa aking pisngi ang
napagtanto ko sa pagkawala mo. Ang buhay ay hiram lamang at tayo, sa huli, ay magiging alaala
na lang. At ikaw ay habangbuhay na magiging isang magandang alaala ng isang bulaklak na sa
akin ay laging handang ngumiti.