“Marellian’s Integrated Approach in Mathematics, Science and Technology for an Empowered and Sustainable Future”
Ang Sci-Math Camp ay isa sa mga aktibidad na inaabang at hinihintay ng mga
mag-aaral sa aming paaralan, ang Our Lady of Mercy Academy. Sa ganap na 12:40 ng hapon ay nagtungo ang mga mag-aaral na makikilahok sa himnasyo ng paaralan. Nagbigay ng ilang salita si Ginoong Reymond Apurillo upang opisyal na simulan ang gawaing ito. Sunod ay nagdasal ng taimtim ang bawat isa sa pangunguna ni Judea Marithe Villanueva. Ito ay sinundan ng talumpating nagbigay inspiration mula kay Bb. Jasmin Balbastro. Nang matapos ang talumpati, nagsama- sama ang bawat miyembro ng labinlimang grupo. Binigyan ang lahat ng tatlumpung minuto upang mag-isip ng pangalan at yell ng grupo na magsisilbing pagkakakilanlan ng bawat grupo. Pagkatapos nito, sinimulan na ang mga palarona mayroong ibat-ibang istasyon. Nararapat itong tapusin ng bawat grupo. Mayroong mga tanong tungkol sa Matematika at Agham. Kinailangan ng pagkakaisa at kooperasyon ng mga miyembro at naipakita naman ito ng bawat isa. Nakita sa mukha at halakhak ng bawat mag-aaral na sila at nasiyahan at mayroong natutunan sa bawat istasyon na kanilang nilaruan. Dumapit ang ika-5:30 ng hapon. Nagsimula ng maghanda ang bawat grupo para sa kanilang mga lulutuin para sa hapunan. Nagtulungan ang bawat miyembro at ang ibang grupo sa pagluluto. Sa paghahanda ng mga sangkap hanggang sa pagkaluto ng ulam at kanin, nakita ko ang pagiging masipag at pagtutulungan ng bawat isa. Nang maluto ang pagkain, sama-samang nagsalo sa pagkain ng adobo at kanin ang mga miyembro ng grupo. Naglaan rin ng oras upang maglinis ng mga gamit sa pagluluto at maghanda sa magaganap na Mr. and Ms. Sci-Math. Sa ganap na ika – 7:40 ng gabi, nagtungong muli sa himnasyo ang mga mag-aaral at guro upang gumawa ng mga damit na isusuot gamit ang mga recyclable na materyales. Nagkaisa ang bawat isa sa paggawa ng mga ito. Naipamalas ng bawat grupo ang pagiging malikhain. Pagpatak ng ika- 9 ng gabi, nagsimula na ang Search for Mr. and Ms. Sci-Math. Nakita ko sa kapwa kong kalahok ang kaba at tindi ng paghahanda para sa kompetisyon na ito. Narinig ko ang bawat hiyaw at palakpak ng mga mag-aaral para sa bawat kalahok. Naipamalas rin naming ang galing at kuwela sa pagrampa pati na rin sa pagsagot sa Q and A portion. At ng gabing iyon, pinarangalan ang mga nanalo. Sa pagpatak ng ika-11 ng gabi, nagpahinga na ang lahat sa kani-kanilang tent. Pebrero 16, 5:40 am, bumangon na ang mga mag-aaral. Nagtipon muli sa bulwagan at ginanap ang morning praise o ang pagdadasal. Nagkaroon rin ng pag-eehersisyo at zumba upang magising ang diwa ng bawat isa. Habang ang mga estudyante ay nagliligpit ng kani-kanilang gamit, inihanda naman ng mga guro ang pagkaing ipapamahagi sa bawat isa para sa umagahan. Nang makakain ang bawat isa, sinundan naman ito ng Group Quiz Bee, dito naman naipakita ang mga natutunan ng bawat isa sa larangan ng Matematika at Agham. Nagkaroon rin ng Math Bingo kung saan sabik ang bawat isa sapagkat mayroon itong premyong salapi. At nang matapos ang lahat ng aktibidad at gawain, nagsimula na ang pagpaparangal sa mga nagkamit ng karangalan, at ang mga grupong nanguna sa puntos sa mga palaro. Nagbigay naman ng pangwakas na pananalita si Br. Jose Bart Cancio, ang direktor ng paaralan at si Gng. Mercy Driz, ang punongguro ng paaralan. Dito nagwawakas ang Sci- Math Camp 2023, dito ko naobserbahan kung bakit mahalaga ang pagkakaisa at pagtutulungan. Bilang isang bagong mag-aaral sa Our Lady of Mercy Academy, natuklasan ko kung gaano kasaya ang aktibidad na ito.