ABSTRAK

Ang pag-aaral na ito ay naglalayong malikom ang sampung (10)

pinakapinapanood na mga awitin ni Gloc-9 sa Youtube, mailahad ang paksa

gamit ang pagduloga pormalistiko, mabigyang kahulugan ang awitin gamit ang

pagsusuring hermenyutika at matukoy ang implikasyong sosyolohikal ng

bawat awitin.

Saklaw ng pag-aaral na ito ang mga sumusunod na mga awitin: 1)

Sirena, 2) Hari ng Tondo, 3) Magda, 4) Simpleng Tao, 5) Ipagpatawad Mo, 6)

Lando, 7) Alalay ng Hari, 8) Hindi Mo Nadinig, 9) Katulad ng Iba, 10) Upauan.

Ginamit ng mga mananaliksik ang disenyong kwalitatib na nasa paraang

palarawan o deskriptiv. Ito ang ginamit ng mga mananaliksik upang mailahad

ang mga katangiang makikita sa mga awitin. Ang paraang palarawan ay

ginamit din upang mailahad ang mga kahulugan ng mga awitin gamit ang apat

na antas ng hermenyutiks.

Tuwirang pamamaraan naman ang ginamit sa pangangalap ng datos

sapagkat direktang nilikom ang mga sinuring piling awitin sa internet,

partikular na sa Youtube. Sa pagsusuri ng mga awitin ay ginamit naman ang

pagdulog Pormalistiko upang suriin ang pagkakabuo ng mga awitin sa

pamamagitan ng kasiningan nito.

Batay sa pagsusuri ng mga mananaliksik, sa kabuuang sampung awitin

ni Gloc-9 ay lumabas na kadalasang paksa nito ay patungkol sa sariling

karanasan, pag-ibig, kahirapan, pamahalaan, at kabataan.

 Ayon sa natuklasan, ang manunulat na si Gloc-9 ay gumagawa ng awitin

na nakabase sa mga pamumuhay na namamasdan niya sa kaniyang paligid.

Ang kaniyang mga awitin ay kinapapalooban ng mga karanasang may

kaugnayan sa mga isyung panlipunan tulad ng hindi pantay na karapatan sa

mga kasapi ng LGBT community, pagmamaltrato, maling pamamahala ng

gobyerno, kawalan ng hustisya, kahirapan, pakiki-apid at ang pagtutulungan

ng bawat isa. Natuklasan rin na ang mga kahulugan sa likod ng mga awitin ni

Gloc-9 ayon sa apat na antas ng hermenyutiks ay nagbubukas ng ating isipan

upang maging mabuting tao at makatulong sa iba pa nating mga kababayan.

Batay sa kongklusyon ng pag-aaral, ang mga awitin ni Gloc-9 ay

nakapokus sa mga madalas na nangyayari sa lipunan. Pinapalitaw niya ang

mga katangiang nais niyang bigyang-puna at panatilihin. Karamihan sa

kaniyang mga awitin ay tipong nagkukuwento at nakikipag-usap sa mga

tagapakinig – may aasahan kang suliranin, kalutasan at magiging wakas sa

kaniyang mga awitin.

Iminumungkahi ng mga mananaliksik na magsagawa ng pag-aaral

patungkol sa iba pang mga awitin ng ibang tanyag na rapper gamit ang apat

na antas ng hermenyutiks.