Professional Documents
Culture Documents
რიდერი 4 Homo-ს გვარის გაჩენა
რიდერი 4 Homo-ს გვარის გაჩენა
რა ანატომიური ნიშან-თვისებები
ახასიათებთ ადამიანის გვარის პირველ წარმომადგენლებს? რა ადგილი უჭირავთ მის
განსაზღვრაში კულტურულ, ქცევით და ფსიქომოტორულ მონაცემებს? ბიოლოგიურ
ანთროპოლოგიაში, ადამიანის გვარის დახასიათებისას ჩვენ ძირითადად ანატომიურ და
ბიოლოგიურ მახასიათებლებს დავეყრდნობით, რომელიც შედარებითი და ცვალებადია. ჩვენ
ასევე ვისაუბრებთ პირველ ადამიანებზე, რომელთაც აფრიკაში 2.8 – 1.6 მლნ წლებში
იცხოვრეს. Homo-ს გვარის დახასიათებაზე მსჯელობა, მის გაჩენასთან დაკავშირებული
საკითხებისგან დამოუკიდებლად ძალიან რთულია. ადამიანის ევოლუციის ისტორია
მნიშვნელოვნად შეიცვალა და გართულდა ბოლო ათეული წლების მანძილზე. მისი
განვითარების ადრინდელი სწორხაზოვანი ხედვა დღეს ბუჩქისმაგვარ მოდელებთან
ასოცირდება, სადაც ჰიბრიდაცია შესაძლო ვარიანტებად განიხილება.
Homo-ს გვარი პირველად 1758 წელს, შვედმა ნატურალისტმა კარლ ლინეუსმა განსაზღვრა,
ისევე როგორც თანამედროვე ადამიანის სახეობა: Homo sapiens. ლინეუსის მიხედვით
ადამიანი ეს არის „animale, rationale, loquens, bimanum, erectum”. გვარ Homo -ს
მიკუთვნებასთან არსებული პროცესები, მჭიდროდაა დაკავშირებული ახალ განამარხებული
ფორმების აღმოჩენებთან, რომელიც სახეობისათვის ახალი ანატომიური ნიშან-თვისებების
დადგენას ან/და მორფოლოგიური ატრიბუტების ახალი ინტერპრეტაციის საშუალებას
იძლეოდა. ცვლილებები 1864 წელს იწყება, როცა ბრიტანელმა გეოლოგმა უილიამ კინგმა
ნეანდერტალელის სახეობა Homo-ს გვარს მიაკუთვნა. ადამიანის გვარში ახალი მონაცემების
შეტანამ Homo-ს გვარის თავის ქალისა და სხვა ანატომიური ნაწილების მორფოლოგიური
მრავალფეროვნება გამოიწვია, რომელსაც მოგვიანებით Homo heidelbergensis (1908) და
Pithecanthropus erectus (1944) სახეობები მიემატა. 1955 წელს ბრიტანელი ანატომისტი
უილიამ კლარკი Homo-ს გვარის ახალ დახასიათებას გვთავაზობს: „ჰომინიდების ოჯახში
შემავალი გვარი, რომლის წარმომადგენლებს ახასიათებთ დიდი თავის ტვინის მოცულობა
1100 სმ3 საშუალოდ, დაახლოებით 900-დან 2000 სმ3 ინტერვალით“.
1964 წელს ახალი Homo habilis -ის სახეობის განსაზღვრასთან ერთად ადამიანის გვარისათვის
აუცილებელი კრიტერიუმები ისევ შეიცვალა. თანამედროვე ადამიანთან მსგავსების გამო
ანთროპოლოგებმა სახეობა Homo-ს გვარში მოათავსეს და მისი ხელების ანატომიის
გათვალისწინებით „მოხერხებული“ ადამიანი უწოდეს. Homo habilis -ის აღწერისას
ყურადღება მახვილდება თანამედროვე ადამიანისათვის დამახასიათებელ მორფოლოგიურ
ნიშან-თვისებებზე და Australopitheque-ების გვარისაგან განსხვავებით დიდი თავის ტვინზე.
Homo habilis -ის ადამიანის გვარში გაერთიანებამ მანამდე არსებული ადამიანის გვარის -
ინდივიდებისაგან შემდგარი ჯგუფის (ტაქსონი) მეცნიერული აღწერის გადახედვა
გამოიწვია. მისი შემდგენლები ადამიანების დახასიათებას ავსტრალოპითეკების გვართან
შედარების გზით გვთავაზობენ. ნიშან-თვისებების დიდი ნაწილი სიარულთან
დაკავშირებული ანატომიური ნაწილებია, სახის პროფილის და საღეჭი აპარატის
დაპატარავება და თავის ტვინის გაზრდაა. ამგვარად ადამიანის თავის ტვინის მოცულობა
აღწერილია როგორც ცვალებადი მოცემულობა, ავსტრალოპითეკზე შესამჩნევად დიდი
მოცულობის და 600 სმ3 დან (ყველაზე ძველ ფორმებში) 1 600 და უფრო მეტ სმ3-მდე.
ადამიანის გაჩენის ადგილად ჩარლზ დარვინი 1871 წელს აფრიკის კონტინენტს გვთავაზობს.
ბოლო საუკუნე ნახევრის მანძილზე ევრაზიასა და აფრიკაში მიმდინარე
პალეოანთროპოლოგიურმა კვლევებმა ეს ჰიპოთეზა დაადასტურა. დღეს Homo-ს გვარის
პირველი ფორმები ორასამდე განამარხებულ ძვალს მოიცავს. მათo უმრავლესობა დიდი
რიფტის ხეობაში მდებარე ძეგლებზე იქნა ნაპოვნი (Ledi-Geraru, Hadar, Omo-ს ხეობა, Fejej,
ეთიოპია), (Chemeron, ტურკანას ტბის დასავლეთ და აღმოსავლეთ სანაპიროები, კენია),
Olduvai (ტანზანია), Malawi (ურაჰა) და (Sterkfontein, Swartkans, Drimelon, სამხრეთ აფრიკა) და
2.8 და 1.6 მილიონი წლებით დათარიღებული. მათგან ყველაზე ძველი Ledi-Geraru-ს ძეგლზე
აღმოჩენილი ფორმაა, მაგრამ მათი ცალკე სახეობად გამოყოფა ამ ეტაპზე არ მომხდარა. 2.4 და
2.3 მილიონი წლებით დათარიღებული ფორმები ეთიოპიაში, Omo-ს და Afar-ის ხეობაში და
კენიაში Malawi -ს ძეგლებიდანაა. 2 მილიონი და უფრო ძველი ასაკის განამარხებული
ფორმების სიიშვიათე და ფრაგმენტულობა (თავის ქალის რამდენიმე ელემენტი და კბილები)
ართულებს მათი სახეობად გამოყოფის და მიკუთვნებულობის საკითხს. სამაგიეროდ 1.8
მილიონი წლის და უფრო გვიანი ფორმების ანატომიური დახასიათება გვარი Homo-ს
ფარგლებში შესაძლებელია: ამ პერიოდიდან მოყოლებული მატულობს განამარხებული
ფორმების რიცხვი რაც ამარტივებს მათ ტაქსინომიურ განსაზღვრებას.
როგორ გამოიყურებოდნენ?