Sa mga taong lumipas, napakarami ng nasaksihan ng mga Pilipino mula sa
pagbabago ng ating wika. Mula sa pang-araw-araw na karanasan sa pakikipag komunikasyon, sa pakikipagtalastasan, argyuhan, at maging sa akademikong sulatin. Marami ring naging positibong epekto ang mga pagbabago sa ating sariling wika tulad ng pagkahasa natin sa pakikipag komunikasyon, pagsulat, pagbasa at pag-unawa ng Wikang Filipino. Sa modernisadong panahon, maging ang mga dayuhan na nagmula sa iba’t ibang bansa ay nagagalak at nawiwili na magsalita, magbasa at umunawa ng Wikang Filipino. Sa makabagong panahon, mas napabuti at yumaman ang kalagayan ng Wikang Filipino. Ang pagkakaunawaan, pagkakaisa sa ating mga kultura bilang Pilipino ay mas nagpatibay at naging simbolo ng ating pagka Pilipino. Ito ay siyang nagtukoy sa ating identidad at lahing Pilipino. Ang Wikang Filipino ay patuloy na umuunlad at nagbabago, tayo ay gumagamit na rin na iba’t ibang paraan upang mas mapaikli ang paggamit ng ating wika. Ilang halimbawa ay ang pagpapalawak ng bokabularyo sa pamamagitan ng paggamit ng akronim o ang paggamit ng mga letra na nagrerepresenta sa isang salita upang ito ay mas umikli at ang pinaka tanyag sa panahon ngayon ay ang paggamit ng mga balbal na salita na karaniwang ginagamit ng mga kabataan. Ayon kay Barker at Barker (1993), ikinukunekta ng wika ang nakaraan, ang kasalukuyan at ng hinaharap. Iniingatan din rito ang ating mga tradisyon at kultura, maaari daw mawala ang mga matatandang henerasyon, ngunit sa pamamagitan ng wika, naipapabatid parin nila ang kanilang mga ideya, tagumpay, kabiguan, at maging ang kanilang mga plano o adhikain sa hinaharap. Sa kasalukuyang panahon, sa tingin ko, ang kalagayan ng ating wika ay dapat pang mas pagyamanin, payabungin at irespeto. Sa pag-unlad ng panahon, kasabay din ang pag-unlad ng wika, nasaan mang dako tayo ng mundo, nararapat nating mahalin at ipagmalaki ang ating sariling wika dahil ito ang nagmomolde sa ating identidad bilang isang Pilipino.