EDITORYAL

MAS MABUTING MAAGAP KAYSA MAGSISI

https://www.philstar.com/pilipino-star-ngayon/opinyon/2024/01/22/2327545/editoryal-inutilto

Sa isang pahayag ng Department of Health
(DOH) ukol sa muling pagtaas ng mga kaso ng
COVID-19 sa bansa ay nakitang hindi
kailangan na muling ipatupad ang mandatory o
sapilitang pagsusuot ng facemask na tuntunin.
Sa ngayon daw, ang kasalukuyang polisiyang
boluntaryong pagsuot ng facemask ay
maaaring panatilihin hangga’t batid ng mga
tao kung kailan dapat silang magsuot ng
kanilang facemask. Gayundin ang isolation and
quarantine policy sa bansa para sa COVID-19
ay hindi babaguhin sa kabila ng tumataas na
bilang ng kaso.
Hindi daw dapat mabahala ang publiko sa
pagtaas ng mga kaso dahil hindi naman daw
kasing-taas ang mga kaso kumpara sa
nakaraang mga taon ng pandemya. Taliwas sa
pahayag ng DOH ay ipinag-utos kamakailan ni
Mayor Benjamin Magalong ng Lungsod ng
Baguio na ibalik muli ang sapilitang pagsusuot
ng facemask sa “indoors” o loob ng mga gusali
at matataong lugar. Sinabi ni Mayor Magalong
na ang pagbalik muli ng tuntunin sa facemask
ay isang hakbang na proaktibo o maagap na
pagtugon upang mabawasan ang dumadaming
bilang ng mga kaso ng COVID sa lungsod.
Sa kanilang pagtataya ay sinabi ni Magalong na
magkakaroon ng tumataas na direksiyon para
sa susunod na tatlo hanggang apat na linggo
bago marating ang pagtalampas kaya
kailangan daw maging mas mag-ingat tayo
ngayon. Ang kautusang ito ng alkalde ay umani
ng halo-halong reaksiyon mula sa mga
residente kung saan ang ilan ay sumang-ayon
sa hakbang ng mayor, samantalang ang iba ay
naniniwala na may ibang paraan ng pag-iingat.
May ilang nagsabi na nararapat ituloy ang
pagsusuot ng facemask kung ang mga tao ay
maliligtas mula sa sakit at masigurado ang
kaligtasan ng bawat-isa.
Sinabi naman ng iba na kailangan ugaliin ang
iba pang safety protocol para mabawasan ang
paghawa ng COVID-19 kasabay ng pagsusuot
ng facemask. Kalilangan pa ring gawin ang
social distancing at magpabakuna mungkahi
naman ng iba. Subalit maraming residente lalo
na ang mahihirap ang nagsabing kailangang
magbigay ang lokal na gobyerno ng suporta at
magbigay ng libreng facemask, lalo na sa mga
mahihirap na may iba pang bayarin.
Walang masama sa naging kautusan ni Mayor
Magalong na ibalik muli ang tuntunin ng
sapilitang pagsuot ng facemask sa loob ng mga
gusali at matataong lugar dahil pangunahing
katungkulan ng gobyerno na siguruhin ang
kaligtasan ng mga mamamayan. Matagal na at
marami na tayong karanasan sa COVID-19 na
ito, na pabalik-balik at palit-palit ang mga
variants, na kung saan sa kaunting pagkalingat
at pagpapabaya ay muling dumarami ang
nagiging biktima. Ang mahalaga ngayon ay
maagapan ito bago lalong kumalat ito at
nawa’y mas alam na ng gobyerno at mga
kinauukulang mga ahensiya ang tama at
mabilis na pagtugon dito.