PAGTALUNTON SA KAUGALIANG MERANAW SA MGA KWENTONG BAYANG MERANAW
Almayrah A. Tiburon, mayanne82@yahoo.com
Mindanao State University, Marawi City
Abstrak
Napakahalaga ng pangangalap o pangongolekta ng literatura ng bawat tribo sapagkat sa
pamamagitan nito’y nagpapayaman ng literaturang Filipino at napapanatili ang kaugalian na maipapasa nila sa mga susunod pang henerasyon. Ang pangangalap na ito ay isang gawaing kailangang gampanan bago ito mabaon sa limot. Nararapat na malaman ang mga kaugalian noon lalo na sa kasalukuyang kalagayan na ang lahat ay nasa makabagong pamamaraan. Masasalamin ang mga kaugaliang ito sa mga kwentong-bayang Meranaw na mabisang pagpapalipas ng panahon at kinagigiliwan nilang magsalaysay ng mga ganitong uri ng kwento upang mapanatili ang kultura at tradisyon. Ang layunin ng pag-aaral na ito ay: Una, makakalap ng mga kwentong bayang Meranaw ng Lanao del Sur na hindi pa nalilimbag. Pangalawa, malaman ang mabubuti at di-mabubuting ugali ng mga tauhan sa mga kwentong bayan. Pangatlo, matukoy ang repleksyon ng mga ugaling Meranaw na nasa kwentong-bayang sinuri. At pang-apat, mabatid ang kahalagahan ng mga kwentong bayang Meranaw sa literaturang Pilipino. Ginamit ang pamaraang palarawan o deskriptib sa pag-aaral na ito na nilapatan ng pagsusuring moralistiko. Natuklasan ng mananalik ang mga mabuting ugali na masasalamin sa mga kwentong-bayan gaya ng pagdidisiplina sa anak, pagiging magiliw sa bisita, pag-akyat ng ligaw sa bahay, pagtitiwala, kasipagan, paghahanap sa magulang na matagal na nawalay, katapatan ng pag-ibig, pagkakaisa, at pag-aalala sa anak. Samantala, ang mga di-mabuting ugali naman na masasalamin sa mga kwentong-bayang sinuri ng mananaliksik ay katakawan, manloloko, kayabangan, katangahan, katamaran, rido, sobrang maprinsipyo, at magagalitin. Ang mga kwentong-bayang sinuri ng mananaliksik ay may malaking maitutulong sa lipunan ng mga Meranaw. Ito ang naging lunsaran ng kanilang mga ninuno sa paghubog ng mga ugaling dapat panatilihin kung mabuti na tunay ring makatutulong sa pamumuhay at huwag naman tularan kung ito ay hindi mabuti dahil paniguradong magdudulot ito ng kapahamakan sa buhay ng tao.
Mga susing salita: kwentong bayan, Meranaw, kaugalian, mabuti, di-mabuti