'No Homework Policy': Isang Hakbang Tungo sa Balanseng Edukasyon at
Personal na Buhay"
Ang pagbawas ng dami ng mga takdang-aralin o assignments sa mga mag-aaral ay
isang isyu na patuloy na tinatalakay at isinusulong sa larangan ng edukasyon. Sa kabila ng mga benepisyo ng takdang-aralin sa pagbuo ng kasanayan at pag-unlad ng kaalaman, may mga nagmumungkahi na ang labis na dami nito ay maaaring magdulot ng labis na stress at pagod sa mga mag-aaral. Bilang isang mag-aaral ng Senior High School (SHS), ako ay sumasang-ayon na bawasan ang mga workload at takdang-aralin upang makapagpahinga at makapag-aral nang mas maayos ang mga estudyante kaysa magugol ang oras sa paggawa nito.
Matatandaang isinampa ni Quezon City Representative Alfred Vargas ang "No
Homework Policy" sa ilalim ng House Bill No. 388. Sa polisiyang ito ay ipinagbabawal ang pagbibigay ng takdang-aralin dahil aniya ay sa paaralan pa lang ay marami nang mga ginagawa ang mga mag-aaral. Labis na makatutulong ito sa mga mag-aaral lalo na sa SHS dahil mas magagampanan nila ang kanilang mga reponsibilidad sa labas sa paaralan tulad ng pag-aalaga sa sarili, pagpapahinga, pagrerebyu para sa mga scholarship at entrance exam, at paglibang kasama ng pamilya. Ang mga pag-aaral ukol dito ay nagpapakita ng mataas na antas ng stress na maaaring magdulot ng negatibong epekto sa pangkalahatang kalusugan ng mga mag-aaral. Ang pagkakaroon ng sapat na oras para sa iba't ibang aspeto ng buhay tulad ng pahinga, pamilya, at personal na interes ay mahalaga upang mapanatili ang kanilang kagalingan.
Sa kabilang banda, hindi maikakailang maganda at positibo ang dulot ng pagbibigay
ng takdang-aralin sa pagsukat ng kaalaman ng mga estudyante. Magagamit nila ang kanilang pag-iisip, nang walang guro na nagtuturo, upang masagot ang mga tanong. Nahuhubog ang kritikal na pag-iisip, pagiging independente sa pag-aaral, at pag-asesa sa kung ano ang natutunan sa paaralan. Ngunit sa katunayan, halos kalahating araw na ang iginugugol ng mga mag-aaral sa paaralan kaya makapagdudulot lamang ito ng kapaguran. Maari namang maasesa ang kanilang kaalaman sa pamamagitan ng quizzes o periodical tests. Hindi rin makakasiguro ang guro na mayroong nalaman ba talaga ang mag-aaral sa pagbibigay ng takdang-aralin dahil sa panahon ngayon marami na ang gumagamit sa mga artificial intelligence o AI at search engine tulad ng Google. Gayunpaman, nasa mga estudyante pa rin kung paano nila pamamahalaan ang kanilang oras. Nangangailangan ng balanse sa pag-aaral at personal na buhay. Ang wastong balanse sa pagitan ng pag-unlad ng kasanayan at pangangalaga sa kalusugan ng mga mag- aaral ay maaaring maging pangunahing layunin ng pagbabago sa sistema ng edukasyon. Ito ay upang masigurong ang bawat oras na inilalaan ng mga mag-aaral ay nagdudulot ng makabuluhang karanasan at hindi lamang ng kapaguran.