Pamagat: Kaugnayan ng Sitwasyong Pantahanan sa Antas ng Pagkatuto at Pagsabay ng mga

Estudyante sa Makabagong Sistema ng Pag-aaral sa Panahon ng Pandemya

Rasyunal

Sa kasalukuyang kalagayan ng mundo, kung saan halos lahat ng bagay ay limitado bilang
bunga ng pandemya, magkaiba na ang larawan ng pag-aaral noon at ngayon. Subalit ang
malaking pagbabago sa mundo ay sumasanga sa kalagayang pang edukasyon ng nakararami
kung saan matiyagang isinusulong ang karunungan sa pamamagitan ng distance learning gaya na
lamang ng modular at online learning. Naturan na ng Kagawaran ng Edukasyon na ang
pagkatuto ay hindi marapat huminto sa pagkat ang kaalaman ay patuloy sanang dumaloy.

Sa kabila ng magandang layunin ng muling pag-arangkada ng edukasyon, nariyan naman

ang higit pang suliranin na nauugat sa kalagayang pantahanan ng mga mag-aaral. Kung kaya,
minsan ng naging matunog ang balita hinggil sa ikinakasang academic freeze ng nakararaming
bilang ng mga kabataan. Naging maugaong ang mga usapin hinggil dito ngunit nananatili ang
desisyon sa pagpapatuloy ng muling pagbubukas at pagpapatuloy ng klase. Gayun pa man,
naitala pa din ang malaking bilang ng mga estudyanteng nakalahok sa panibagong paraan ng
pag-aaral dahil sa kagustuhang makasabay sa edukasyon at hindi mapag-iwanan ng panahon sa
kabila ng sandamakmak na suliraning nagmumula mismo sa sariling tahanan.

Sadyang malaking pagbabago ang idinulot ng pandemya sa buong mundo. Binago nito
ang takbo ng sistema ng lipunan partikular na sa aspeto ng edukasyon. Dahil nga sa pangamba
ng tuluyang pagkalat ng COVID 19, nag iba ang daloy at sistema ng pagtuturo at pagkatuto sa
mga paaralan. Kung dati ay face to face learning o ang aktuwal na pagtuturo ng harapan sa mga
estudyante sa loob ng paaralan napalitan ito ng ilan sa mga napiling alternatibo paraaan kung
saan ang magiging daloy ng edukasyon ay sa pamamagitan ng online na pagkatuto na kapwa
isasagawa sa sari- sarili na lamang na tahanan. Dahil dito naging malaki ang parte ng tahanan
lalo na ang mga magulang sa pagbibigay ng gabay sa mga estudyante upang maging
alternatibong guro na magiging gabay ng mga estudyante sa mabisang pagkatuto ng mga aralin.
Dahil dito maraming mga magulang ang nangamba na hindi magabayan ng wasto ang mga anak
dahil kasabay pa ng kanilang tungkulin ang paghahanap-buhay para sa mga anak upang
pantustos sa pangunahing pangangailangan kasabay pa ang dagdag na gastos para sa pag aaral
katulad na lamang ng pang internet ng mga anak.

Dagdag pa dito, hindi katiyakan na magiging maayos ang sistema ng pagtuturo at

pagkatuto kung ilan sa mga magulang ay hindi tapos ng pag aaral upang matutukan sa
pangangailangan ng kaalaman ang mga anak. Hindi rin pare parehas ang sitwasyong pantahanan
ng bawat mag aaral na malaking salik din na makakaapekto sa kanilang pagkatuto. Dahil nga
magiging daluyan ng pag aaral ang tahanan na hindi na bago sapagkat ito naman ang naging una
nating paaralan ay magiging mahirap parin sapagkat may mga kaalaman na mas madaling
maintindihan kung ito ay natatalakay ng may mataas na antas ng kaalaman partikular na ang
ating mga guro. Tunay na ang Panuruang 2020-2021 ay hindi magiging madali sa parte ng guro,
estudyante at magulang, at hindi tiyak ang magiging resulta ng makabagong sistema nito.

Ayon sa isang pananaliksik mula sa New Era University, maraming pagbabago ang
nangyayari sa larangan ng edukasyon maging ang mga pamamaraan at estratehiya ng pagtuturo
na nagsisilbing malaking hamon na kinakaharap ng mga guro sa kasalukuyang panahon g
teknolohiya at agham. Hindi maikakaila na ang panahong ito ng pandemya ay mas lumaganap
ang paggamit ng teknolohiya sa pagkatuto at isa sa problemang kinakaharap ng mga mag-aaral
ay ang pagsabay dito. Kaakibat ng kinakaharap na suliranin sa itinakdang online learning at
modular ng mga paaralan, kolehiyo, at unibersidad ay hindi rin maiiwasan ang pagkakaroon ng
mga sitwasyong pampamilya, at dahil na rin sa nasa kanya-kanyang tahanan ang mga estudyante
ay nagkakaroon ito ng mga epektong nakakasama o nakakabuti sa kanilang kalagayang
pampaaralan, pisikal, mental, at emosyonal. Sa sitwasyong ito ay inaasahan na magiging hati at
mas madadagdagan ang papel ng mga magulang sa mabisang pagkatuto ng mga estudyante, at
maayos na pagsabay sa makabagong sistema ng edukasyon.

MGA KAUGNAY NA LITERATURA AT PAG-AARAL

 Ang kabanatang ito ay tumatalakay ukol sa mga pag-aaral at mga babasahin na may
kaugnayan sa paksa ng pananaliksik na ito.

Mga Sitwasyong Pantahanan

Ang mga sitwasyong pantahanan kadalasan na nakakaapekto sa mga estudyante ay ang

mga problemang kinakaharap ng isang pamilya sa kanilang bahay tulad na lamang sa pinansyal,
paghihiwalay, mga bisyo, kawalang-respeto, kawalang-komunikasyon, mga bisyo at iba pa.
Ayon kay Jardin (2013), Sa ngayon, maraming hamon na kinakaharap ng p amilyang Pilipino. Ang
mga hamong ito ay nagpapahina sa katatagan ng pamilya at nagiging dahilan ng unti-unting
pagkawasak nito. Nararapat na suriin kung paano sinisira ng mga problemang ito ang kaayusan
ng pamilyang Pilipino, lalo na ang pagbubuklod at pagmamahalan ng bawat miyembro nito. Sa
gayon, magkakaroon tayong mga kabataan ng kahandaan sa pagharap at paglutas sa mga
problema at isyung ito. Subalit paano ito masosolusyunan ng mga kabataan kung sila mismo ang
naapektuhan ng mga sitwasyong kinakaharap sa pamilya.

Suliraning Kinakaharap ng mga Estudyante

Tunay na malaki ang naging epekto ng pagkakaroon ng pandemya o ang lumalaganap na

Covid-19 sa kasalukuyan lao na sa larangan ng edukasyon. Maraming mga paaralan ang nagsara
at mas piniling isagawa ang pag-aaral sa pamamagitan ng online class o paggamit ng
makabagong teknolohiya bilang midyum ng pag-aaral ng mga mag-aaral.

Ayon kay Guinto (2010), ang kulturang popular ay nakabatay sa pagdisimina ng iba’t
ibang bagay gamit ang isang midyum. Hindi natin maikakaila na ang Internet ay isang penomena
na naging kaakibat ng isang makabagong kultura. Hindi siguro akalain ni Tim Burners Lee kung
gaano kalaki ang kanyang maging kontribusyon sa pandaigdigang lipunan noong naimbento niya
ang World Wide Web.

Kaugnay nito, malaki ang bahaging ginagampanan ng internet sa kasalukuyang panahon

sapagkat karamihan sa mga paaralan ay naglunsad ng paggamit ng Google Classroom, GMeet,
Zoom, at iba pang mga app na nakatutulong upang magkaroon ng komunikasyon ang mga guro
at mag-aaral patungkol sa mga asignaturang kanilang kinuha sa loob ng semester.
Maisasakatuparan lamang ang paggamit ng mga nasabing app sa pamamagitan ng paglalapat ng
internet o pagsagap sa signal na naibibigay nito.
 Ayon kay Espina at Borja, ang komunikasyon ay isang makabuluhang kasangkapan
upang maangkin ng bawat nilikha at ang kakayahang maipaliwanag nang buong linaw ang iniisip
at nadarama. Dito kusang umuusbong ang isang matatag na pagkakaunawaan at relasyon ng mga
tao sa isang lipunan. Nagiging bukas ang isipan sa mga pangyayari sa loob at labas ng isang
bansa at nagsisilbing libangan ng karamihan. Ngunit kailangan pa rin na maimulat ang mga
estudyante sa maaaring dulot o epekto nito sa kanilang pag-aaral at pati na rin sa kanilang pag-
uugali.

Sa kabila nito, maraming mga mag-aaral ang nakakaranas ng kakulangan sa pag-access

sa internet dahilan ng ibat-ibang kalagayang pantahanan na kanilang nararanasan kabilang na rito
ang kawalan ng kakayahan na suportahan ang kanilang pag-aaral dahil sa kakulangang
pinansyal.

Ayon sa Manila Today, hindi mapapasubaliang nahihirapan ang mga estudyante na

magpatuloy sa online class sa gitna ng mga alalahanin at kahirapang dulot ng lockdown.
Nahihirapan silang makagawa ng mga gawaing pang-akademiko dahil wala silang sapat na
kagamitan sa gadget at walang sapat na internet connection. May ibang estudyante na sumuko na
sa online class dahil hindi kinaya ang sistema na ito. May mga estudyante tinanggap na lang na
hindi sila makaka-graduate dahil sa walang sapat na kagamitan para sa online class.

Ayon naman kay Schindler (2020) mula sa isang artikulo na “Opinyon: Kailangan ng
Mga Mag-aaral ng Suporta Online, Masyado,” ang mga kabataan ay nagkakaiba-iba ng mga
karanasan sa pag-aaral online habang nasa tahanan. Ang ilang mga kabataan ay walang isang
pribadong silid kung saan maaari silang dumalo sa mga klase ng Zoom, ang ilan ay walang mga
laptop o wifi upang makumpleto ang mga takdang-aralin, at ang ilan ay nakikibaka sa
kakulangan ng pakikipag-ugnayan sa lipunan. Naitala rin dito ang kalusugang pangkaisipan ng
mga kabataang nag-aaral sa online na paaralan.
Sinasabing kailangan ng mga mag-aaral ng suporta sa pag-aaral tulad na lang ng mga
nabanggit na kakulangan sa kagamitan sa pag-aaral online. Halimbawa ay wi-fi na siyang
pangunahing kagamitan na hindi dapat mawala sa online na pag-aaral. Isa na rin dito ang
pagbibigay ng isang sariling espasyo na tahimik habang nag-aaral o di kaya ay dumadalo sa mga
klase sa Zoom. Isa din ang kawalan laptop o ano mang gadget sa mga pinoproblema ng mga
mag-aaral na nag-aaral online.
 Dagdag pa nito, ayon kay semblantecherryflor, Ang pagkakaroon ng kakulangang
pinansyal ng mga mag - aaral ay kadalasan nagiging dahilan upang mapatigil ang isang mag -
aaral sa pag -aaral. Maraming pamilya sa Pilipinas na umaasa din sa tulong ng pamahalaan sa
pamamagitang ng programang 4P'S na kung saan binigyan sila ng konting pinansiyal na tulong.
Ngunit, ito ay hindi sapat dahil marami ring mga magulang na walang trabaho. Ganunpaman,
dagdag ni semblante cherryflor, marami pa ring kwento ng buhay ang nagpapaalala sa atin na
ang kahirapan kailanman ay hindi hadlang sa pag - abot ng pangarap kailangan lang ang
determinasyon, sipag at tiyaga.

Kaugnay nito, nakakaapekto rin ang kapaligiran sa loob ng tahanan ng mga mag-aaral
halimbawa na lamang ay ang silid na kanilang ginagalawan na maaaring may di kaaya-ayang
tunog na nakakaapekto sa kanilang pag-aaral. Maaaring magkaroon rin ng kalituhan sa oras ng
pagsasagawa ng mga gawaing bahay at gawaing pampaaralan.

Sa isa namang artikulo na nakasaad sa Manila Bulletin, “Common Problems that Occur
During Online Classes (2020), inilahad ang mga pangunahing salik na nakakaapekto sa mga
mag-aaral habang nasa kalagitnaan ng online class. Isa na lamang dito ang mabagal na sistema
ng internet na nagdaragdag ng pasanin sa mga estudyanteng umaakyat pa ng matataas na lugar
gaya ng bundok upang magkaroon lamang ng signal. Bukod dito ay ang hindi maayos na
learning environment kung saan ang ingay na nagmumula sa iba't ibang bagay o alagang hayop
ay nakakapukaw ng atensyon ng mga mag-aaral sa halip na nakatuon ang atensyon sa aralin. Sa
katunayan, ang ilang estudyante ay mas pinipiling hindi na lamang sumagot sa mga talakayan
dahil nahihiya siyang madinig ng guro at mga kamag-aaral ang ingay sa kanilang lugar. Dagdag
pa sa mga suliranin ang malaking pangangailangan sa mga gadgets na higit na kailangan ng mga
nasa Online Distance Learning. Noon ay karangyaan lamang na maayos na cellphone ay naging
pangunahing pangangailangan na sa ngayon. Subalit sa ibang pamilya na kapos sa buhay, mas
matinding kalbaryo ang kinakaharap nila kung saan ang iba ay nakikigamit lamang sa mga
kakilala o di kaya ay ibabayad para sa renta ng cellphone.

Sa ibang pagkakataon naman, nagkakaroon pa rin ng suliranin ang mga mag aaral kahit
may maayos ng kagamitan para sa pag aaral. Nariyan kasi ang mga pagkakataon ng biglaang
pagkasira ng application na kanilang ginagamit, incompatible na application, paghahang ng
cellphone, at biglaang pagkatanggal sa online class gaya ng Google meet at Zoom. Isa pang
problema na higit na nararanasan ng mga bata ay ang labanan ang antok at manatiling aktibo sa
pag aaral. Gayung nasa tahanan lamang at walang kamag-aaral na aaliw, hindi maikakailang ang
ginhawang mararanasan ay higit na nakakaakit na makapagpahinga.

Ayon sa Manila Today (2020) ay hindi mapapasubaliang nahihirapan ang mga estudyante
na makipagsabayan sa online class dahil sa mga alalahanin at kahirapang dulot ng lockdown at
sitwasyong pantahanan. Nahihirapan silang makagawa ng mga gawaing pang-akademiko dahil
wala silang sapat na kagamitan gaya ng gadget at walang sapat na internet connection. Tumataas
na din ang bilang ng mga estudyanteng mas pinili ang sumuko at tanggapin na lamang na hindi
na sila makakapagtapos dahil hindi kinaya ang sistema na ito.

Gipit ang mga estudyante sa ipinapatupad na online class at sa pagbagsak ng mga

estudyante sa Physical Education (PE) o Wellness Recreation Program (WRP). Karamihan sa
mga estudyante ay nahihirapan sa pagsunod sa rekisito ng kurso gaya ng paggawa at pagpasa ng
mga online exercise video nila. Kamakailan lang, maraming mag-aaral ang bumabagsak sa
kanilang PE/WRP at kalakhan din sa mga estudyante ay nawalan ng scholarship. Kalakhan sa
mga estudyanteng may scholarship ay hindi na alam kung saan pa kumukuha ng pangtustos sa
kanilang pag-aaral, may magulang na rin na nagrereklamo at nagtatanong kung bakit natanggal
ang anak nila ng walang dahilan sa pagiging scholar.

Positibong Epekto ng Pagtulong ng Pamilya sa Pagkatuto at Pagsabay ng mga Estudyante

Mula sa pahayag ng Department of Education (DepEd) patungkol sa pagtulong ng mga

magulang sa kanilang anak, sinasabi rito na ang kagalingan ng anak sa paaralan ay
naiimpluwensyahan ng mga nangyayari at ng mga aksyong ginagawa ng mga tao. Sa isang ligtas
at mapagsuportang kapaligiran, ang mga magulang ay makakatulong na mapanatili ang
kagalingan ng bawat miyembro sa pamilya. Dagdag pa rito, ang pananatili sa isang lugar sa loob
ng mahabang panahon ay maaaring humantong sa dagdag na pagkabahala at salungatan sa
tahanan tulad na lamang ng sitwasyon ng mga estudyante ngayon na nag-aaral sa kani-kanilang
mga tahanan dulot ng pandemya. Pinapayuhan din ang mga magulang na magtala ng oras para sa
may istrakturang mga aktibidades pang-pamilya, gawaing pampaaralan at paglalaro upang
masiguro na hindi nakukulong sa iisang gawain ang bawat miyembro sa pamilya at upang
mapanatili ang normal na karaniwang gawain ng pamilya kung saan maaari. Gayundin ang
pakikipagkomunikasyon sa mga anak na nag-aaral tungkol sa mga gawaing pang-edukasyon at
pangkalusugan upang maipakita ang pagsuporta sa kanila. Ang kagalingan ng kanilang mga anak
ay naiimpluwensyahan ng mga nangyayari at ng mga aksyong ginagawa ng mga tao. Sa isang
ligtas at pagsuporta ng kapaligiran, ang mga magulang ay makakatulong na mapanatili ang
kagalingan ng inyong pamilya. Maraming mga bata ang may-kamalayan sa epekto ng novel
coronavirus (COVID19) at maaaring matutuhan nila ang mga pag-aalala at pagkabahala ng iba.
Ito ay maaaring sa pamamagitan ng pakikinig at panonood ng nangyayari sa paaralan, sa tahanan
o online. Mahalaga na makipag-usap sa mga bata tungkol sa kanilang mga alalahanin. (DepEd,
2020)
Sa artikulong ito inilahad ang pangangailangan ng pagsuporta ng mga magulang sa anak
lalo na sa panahon ngayon ng pandemya dahil hindi lamang kakulangan ng kagamitan ang
kanilang iisipin, pati na rin kung paanong makakasabay sa pagbabago at makakuha ng mataas na
grado gayong kulang nga sa internet connection, gadgets, at iba pa. Kailangang suportahan ng
mga magulang ang kanilang mga anak sa abot ng kanilang makakaya, hindi lamang sa paaralan
pati na rin kung paano nakikiangkop sa malaking pagbabago na ito sa sistema ng edukasyon.
Malaki ang magiging epekto nito sa kaisipang pang-kalusugan ng mga mag-aaral kung kaya’t
kailangang antabayan ng mga magulang ang kanilang mga anak at obserbahan ang kanilang mga
ikinikilos sa bahay at habang nag-aaral. (DepEd, 2020)
Ang P-TECH 9-14 modelo ng pagsasaliksik ay nagpapakita ng malinaw na kaugnayan ng
mga mag-aaral sa pagitan ng pagganap at paglahok ng mag-aaral at ng komunidad. Ayon kay
Kevin Rothman, Principal ng Excelsior Academy, “Para tunay na magtagumpay ang mga
estudyante, susi ang pakikipag-ugnayan sa mga pamilya.” Sinasabi din ni Rothman na para sa
mga mag-aaral na magtagumpay sa mahihirap na kapaligirang ito sa akademikong kapaligiran,
kailangang makabuo ng suporta sa paligid nila na kinabibilangan ng pamilya. Dagdag pa rito,
inilad niya sa mga magulang na ang tagumpay ng kanilang anak ay nakasalalay, sa malaking
bahagi, sa kanilang suporta at pakikibahagi.
Inilahad ni Rothman ang malaking kontribusyon ng pamilya sa kaunlaran ng isang
kabataan. Ang pakikipag-ugnayan ng pamilya sa mga kanilang mga anak ang suso upang
magtagumpay sa sila sa mga bagay na kanilang ginagawa partikular sa pag-aaral. Mas
nagkakaroon ng motibasyon ang isang estudyante na pagbutihing gawin ang isang bagay sa
tulong ng pamilya. Kung mayroong magandang suporta na nakapaligid sa kanila ay mas tataas
ang posibilidad na mas uunlad sila sa pag-aaral at sa kanilang ginagawa.
Negatibong Epekto ng Suliraning Pantahanan sa Pagkatuto at Pagsabay ng mga
Estudyante
Ayon sa pag-aaral na isinagawa ng mga mananaliksik sa Makati Medical Center College
ukol sa mga epekto ng mga suliranin sa pamilya kaugnay sa matagumpay na pag-aaral sa
asignaturang Filipino sa kolehiyo, malaki ang epekto ng mga suliranin sa pamilya sa mga mag-
aaral. Ilan sa mga suliraning nabanggit ay problemang pinansyal, paghihiwalay ng magulang,
kakulangan sa paggabay, oras, at komunikasyon, at bisyo ng magulang na nagreresulta ng
pagkawala ng mga estudyante ng pokus sa pag-aaral, rebelyon, di pagkakaunawaan sa pamilya,
at depresyon. (Makati Medical Center College, 2014)
Ang pangunahing dahilan kung bakit nawawalan ng inspirasyon o gana ang mga
kabataan sa pag-aaral ay nagsisimula sa tahanan, lalo pa ngayong pandemya kung saan dapat ang
pamilya ang unang magbibigay ng inspirasyon sa kanila upang magpatuloy. Ang mga kabataang
may masalimuot na pamilya o di kaya ay mga problema ang kadalasang may mga mababang
grado, lumiliban sa klase, o di kaya’y hindi na talagang pumapasok. Malaki ang epekto ng mga
suliranin sa tahanan sa kaisipang pang-kalusugan ng mga mag-aaral. Madadala nila ang mga
problemang ito na nagreresulta sa mababang atensyon na binibigay sa klase. Nagreresulta rin ang
mga problemang ito sa pagrerebelde ng isang anak sa kagustuhang takasan na lamang ang mga
suliraning kinakaharap na maaari ring magdulot ng depresyon sa mga kabataan.
Ayon sa isang blog na may pamagat na “Problemang Pampamilya: Epekto Nito sa mga
Kabataang Miyembro,” ang mga kabataang madalas na humaharap sa mga suliranin ng pamilya
ay kadalasang naapektuhan kung saan binubuksan ang kanilang pag iisip sa mga bagay na hindi
dapat gaya nalang ng pagkakaroon ng bisyo. Ayon sa isang panayam kay Eloisa Jean Garbo,
"Ang mga bisyo na ito ay may malaking epekto sa bawat isang kabataan na nalululong dito. Ang
pag aaral ay napapabayaan at hindi na naiisip pa ang magandang kinabukasan na makakamit
nila.” Dagdag pa rito, nagreresulta rin ang problemang pampamilya sa pagrerebelde at paglalayas
dahil sa madalas na pag-aaway o problema sa pamilya ay lumalayo ang loob nila. Ang mga
epektong ito ay nagdudulot ng negatibong resulta sa pag-aaral ng estudyante lalo na at
nararanasan nila ito sa kanilang mga tahanan.
Katulad sa mga naunang artikulo, ito ay naglalahad din na ang sitwasyong pampamilya
ay nagdudulot ng malaking epekto sa mga kabataan partikular na sa kanilang pag-aaral.
Natututunan nilang magkaroon ng bisyo at mapasama sa maling barkada na nagdudulot ng
kapariwaraan ng kanilang isipan. Nawawala na sa kanilang isip ang mag-aral at tumitigil na
lamang. Nagdudulot din ito ng paglalayas at pagrerebelde ng mga kabataan na minsan ay nauuwi
sa pagkakaroon ng kasintahan, pagbubuntis ng maaga, at pagkakaroon ng sariling pamilya sa
murang edad. Hindi maiiwasan ang pagkakaroon ng suliranin sa pamilya. Parte ito ng maraming
pagsubok na susubok sa isang pamilya kung kaya't dapat lahat ng miyembro nito ay
nagkakaunawaan na solusyunan ang problema, at sinusuportahan ang bawat isa.

Paradima ng Pag-aaral

Malayang Baryabol Di-Malayang Baryabol

Level ng Pagkatuto

SITWASYONG PANTAHANAN

 Mahinang internet
 Problemang Pinansyal
 Problemang Pampamilya
 Ingay sa Paligid
 elektrisidad