Ako ay mapalad na sa aking murang edad ay aking naranasan ang pagtulong
sa iba. Isa sa mga ito ay ang pagpledge at pamimigay ng “Hygiene Kit” sa mga batang edad apat hanggang walong taon gulang. Ang “hygiene kit” ay naglalaman ng sabon, towel, toothbrush, toothpaste, alcohol, pulbos at cologne. Sumama din ako sa pamimibigay sa mga batang beneficiaries. Ito ay ginanap sa Brgy. Batia Bocaue Bulacan noon ika-lima ng Agosto taong 2017. Hindi lamang kami nagbigay ng hygiene kit bagkus kami din ay nagpakain sa mga bata nang mga masusustansyang pagkain gaya ng sopas, tinapay at inumin. Para makatulong din sa mga magulang ng mga bata kami ay bumili nang kanilang gawang mga basahan. Isang lingo bago ang aking kaarawan noong 2018, kami ay nagbigay ng maagang pamasko sa mga lolo’t lola sa isang Home for the Elderly and Abandoned sa Laguna. Maliban sa pagkain aming inihanda sa pananghalian kami din ay naghanda ng laro gaya ng BINGO. Hinandugan ko din sila ng isang tula. Kahit sa isang araw ay naipadama namin sa kanila ang pagmamahal ng isang anak o apo. Hindi lamang sa tao ako nagkaroon ng pagkakataon na makatulong maging sa kalikasan ay naranasan ko na rin na makatulong. Ito ay sa pamamagitan ng pagtatanim ng mga mangroves sa Calatagan, Batangas noong May 4, 2019. Madaling araw kami bumiyahe galing Cavite papuntang Batangas para maaga at low tide pa kaming makarating sa lokasyon kung saan kami magtatanim. Natutunan ko sa mangrove tree planting ang kahalagahan nito lalo na kung may bagyo. Kami din ay namigay ng mga school supplies para sa mga batang nag aaral sa Day Care Center sa barangay kung saan kami nagtanim ng mga mangroves. Bumili din kami ng aning mga gulay ng kanilang baranggay. Ang lahat ng nabanggit ko ay aking naranasan sa tulong ng kompanya kung saan nagtatrabaho ang akin ina. Subalit meron din akong pagkakataon na nakatulong sa iba na walang kinalaman ang kompanyang pinagtatrabahuhan ng aking ina. Minsan sa aming pagbili sa Mini Stop, may lumapit sa amin na matandang lalaki na namamalimos. Ito ay aming binilhan ng pagkain at ibinigay sa kanya. Minsan din sa loob ng jeep may umaakyat na mga bata para mamalimos sila ay akin din binibigyan. Maging ang aking mga lumang laruan at damit ay aking ibinabahagi sa mga nangangailangan. Madalas ang aking mga lumang laruan at pinagliitang damit ay aking binibigay sa mga anak ng mga basurerong nangongolekta ng basura sa amin subdibisyon. Sadyang napakasarap sa pakiramdam na kahit sa maliit na paraan ay makatulong at makabahagi ka ng kung anong meron ka sa iyong kapwa lalong lalo na sa nangangailangan. Ang mga pasasalamat at ngiti sa mga taong iyong natulungan ay kailanman ay di mapapantayan ng kahit anong materyal na bagay sa mundo. Gawin nating makatulong sa iba kung may pagkakataon lalong lalo na ngayon na halos naghihirap ang lahat dala nang pandemyang ating nararanasan. May kasabihan nga tayo na “it is better to give than to receive”. Hindi lang kasiyahan sa ibang tao ang naidulot ng pagtulong maging sa aking sarili ay naramdaman ko ito.