წინა კიდურის ძირითადი არტერიული მაგისტრალია იღლიის არტერია - a. axillaris,
რომელიც ლავიწქვეშა არტერიის - a. subclavia გაგრძელებაა.
იღლიის არტერია თანამოსახელე ვენასთან ერთად მდებარეობს მხარ -ბეჭის სახსრის
მედიალურ ზედაპირზე. აღნიშნულ ზედაპირზე იღლიის არტერიიდან გამოიყოფა
მკერდ-აკრომიონის, ანუ ბეჭის განივი არტერია - a. transversa, seu a. Thoracoacromialis,
რომელიც ტოტს აძლევს ქედწინა კუნთს;
ასევე იღლიის არტერიიდან გამოდის ბეჭქვეშა არტერია - a. subscapularis. ამ
უკანასკნელიდან კი ოთხი საკმაოდ მსხვილი არტერია გამოდის:
1. მხრის ლატერალური შემომხვევი არტერია - a. Circumflexa humeri lateralis.
მიემართება მხრის სახსრის დისტალურ ზედაპირზე და ტოტებს აძლევს სამთავა კუნთს, დელტისებრ, მცირე მრგვალს და ქედუკანა კუნთებს, ასევე მხრის სახსრის ჩანთას და კანს; 2. მკერდის დორსალური არტერია - a. thoracodorsalis ატოტიანებს ზურგის, უგანიერეს, მკერდის ღრმა, წინა მხრის გამჭიმავ კუნთებს და სამთავა კუნთს; 3. ბეჭის შემომხვევი არტერია - a. Circumflexa scapulae ბეჭის ყელის მიდამოში გამოდის და ტოტიანდება მხარის სამთავა, ბეჭქვეშა, ქედუკანა და დელტისებრ კუნთებსა და ბეჭის ძვალში - a. nutricia scapulae; 4. მხარის სამთავა კუნთის არტერია - a. tricipitis გამოდის ერთი ან რამდენიმე წვრილი ტოტების სახით და ტოტიანდება მხარის სამთავა კუნთში.
ასევე იღლიის არტერიიდან გამოდის მხარის არტერია - a. brachialis თანამოსახელე
ვენასთან და საშუალო ნერვთან ერთად. მას გამოეყოფა ძვალთაშუა საერთო არტერია - a. interossea communis და თვითონ გრძელდება როგორც საშუალო არტერია - a. mediana.
მხარის არტერიიდან გამოდის:
1. მხარის მედიალური შემომხვევი არტერია - a. Circumflexa humeri medialis მხარის
არტერიის დორსალური კედლიდან გამოდის და ტოტიანდება ნისკარტ-მხარის, მკერდის ღრმა და ორთავა კუნთებში; 2. მხარის ორთავა კუნთის არტერია - a. bicipitalis იწყება მხარის არტერიის დისტალური მესამედის მიდამოდან; 3. სხივის ზედაპირული არტერია - a. radialis superficialis აქვს მხოლოდ ძაღლს. მონაწილეობს მაჯის დორსალური ქსელის წარმოქმნაში; 4. სხივის კოლატერალური, ანუ გვერდითი არტერია - a. collateralis radialis ტოტიანდება იდაყვის მომხრელ, მაჯისა და თითების გამშლელ კუნთებში; 5. მხარის ღრმა არტერია - a. profunda brachii მხარის არტერიიდან გამოდის ერთი ან ორი ტოტით და ტოტიანდება იდაყვის სახსრის გამშლელ კუნთებში; 6. იდაყვის შებრუნებული არტერია - a. ulnaris recurrens ტოტიანდება მაჯისა და თითების მომხრელ კუნთებში; 7. ძვალთაშუა საერთო არტერია - a. interossea communis მხარის არტერიიდან გამოსვლის შემდეგ შედის წინა მხარის ძვალთაშუა სივრცეში , იყოფა ვოლარულ და დორსალურ ძვალთაშუა არტერიებად - a. interossea volaris et dorsalis და ტოტიანდება მაჯისა და თითების გამშლელ კუნთებში.
ძვალთაშუა საერთო არტერიის მხარის არტერიის უშუალო გაგრძელებას წარმოადგენს
საშუალო არტერია - a. mediana. იგი თანამოსახელე ვენასა და ნერვთან ერთად იძლევა კუნთოვან ტოტებს, სხივის მედიალური და მაჯის ვოლარული ქსელისა და ნების არტერიებს. საბორკილე სახსართან იგი იყოფა თითების მედიალურ და ლატერალურ არტერიებად - a. a. digitalis medialis et lateralis და კვებავს შესაბამისი მიდამოს კუნთებს, მყესებს, იოგებს, ძვლებსა და კანს.